Números 24 - Chayahuita (Shahui)

¹ “Sinioroso nipirinhuëꞌ, israiroꞌsa noya yaꞌhuëcaiso marëꞌ shaꞌhuitaꞌhuasoráchin nohuantërin,” tënin Paramo yonquiaton. Napoaton co huachi iꞌhua pochin nininhuëꞌ. Iꞌhuasoꞌ, Siniorori maꞌsona anitotacaso marëꞌ amasha paꞌnin. Iporasoꞌ co paꞌninhuëꞌ. Ina quëranchin inotëro parti notëtërin.

² Yaꞌipi israiroꞌsa yaꞌhuëpiquë, aꞌna huënton aꞌna huënton nëꞌmëtë pëinëna ótënaꞌpiapi quënanin. Naporo chachin Yosë ispiritonëni, yaꞌcoancantërin huachi.

³ Yaꞌcoancantohuachina, Yosë yonquirinso shaꞌhuiton naporin: “Caso Paramoco. Tatahuësoꞌ, Pioro itopi. Yosë nohuantërinsoꞌ nitotato, noꞌtëquën shaꞌhuitaranquën.

⁴ Yosë ispiritonën yaꞌcoancantohuachincora, noya noya nitotërahuë. Yosë chachin nanan anitotërinco. Co huëꞌëporahuëꞌ, huaꞌnarëso pochin quënanahuë. Ina Yosëso yaꞌipi nanitaparin.

⁵ Cacopo shinpitanquëma ninamasoꞌ: ¡Ma noyápiachincha nëꞌmëtë pëinëmaso paya! Israiroꞌsanquëma ninamasoꞌ: ¡Ma noyápiachincha yaꞌhuëramaso paya!

⁶ Palmeraroꞌsa panshinquë shaꞌpiso pochin yaꞌhuëramaꞌ. Yanco iminoꞌsa iꞌ yonsanquë shaꞌpiso pochin yaꞌnoramaꞌ. Sinioro shinparotërinso pochin ninamaꞌ. Nonara iꞌ yonsanquë huaniáporinso pochin yaꞌhuëramaso yaꞌnorin.

⁷ Israiroꞌsasoꞌ, notohuaroꞌ iꞌsha yaꞌhuëtapi. Oꞌocaisoꞌ, shaꞌtopiso opotacaisoꞌ, inapita marëꞌ yaꞌhuëtapi. Copirnonënantaꞌ, chini chiníquën nanantapon. Napoaton Acaco copirno canamiatapon.

⁸ Tanan ohuacasoꞌ noꞌhuitohuachina, pomonën quihuirin. Inapochachin israiroꞌsantaꞌ, Yosëri chiníquën nanantaton Iquipito quëran ocoirin niꞌton, inasáchin quihuípi. Israiroꞌsasoꞌ, nisha nisha nacionoꞌsa canaponaꞌ. Maꞌsha capatë pëꞌyarëso pochin inimicoroꞌsa nitaponaꞌ. Nansëna paꞌqui paꞌquitatonaꞌ, pëꞌchinan shinërënëna quëran papito papitotaponaꞌ. Ina pochin inimicoroꞌsa nitaponaꞌ.

⁹ Israiroꞌsa chinotai marëꞌ quëhuënpachinara, paꞌpiniroꞌsa pochachin niconpi. Co macari tëranta ochinanaponhuëꞌ. Inpitarisona inapita noya yaꞌhuëcaiso marëꞌ shaꞌhuitohuachinaꞌ, inapitanta noya yaꞌhuëcaiso marëꞌ shaꞌhuitaponaꞌ. Inpitarisona ama huachi noya yaꞌhuëcaiso marëhuëꞌ shaꞌhuitohuachina, inapitanta inapotacaiso yaꞌhuërin,” tënin.

Paramo ninoton shaꞌhuiantarinsoꞌ

¹⁰ Paramo naporinso natanahuaton, Paracoso paꞌpi noꞌhuitërin. Noꞌhuitaton pinca tëcapon pochin tapon: —Inimiconëhuëpita ama huachi noya yaꞌhuëcaiso marëhuëꞌ shaꞌhuitëquëꞌ, taꞌto amatopiranquënhuëꞌ, nani cara cararo noya yaꞌhuëcaiso marëꞌ shaꞌhuitëran.

¹¹ Noya nicatënquën naꞌcon yaacanapiranquënhuëꞌ, Sinioro yaꞌcopirinquën niꞌton, co inapotaranquënhuëꞌ. ¡Iporasoꞌ yaꞌhuëranquë paantaquë huachi! itërin.

^12-13 —Coꞌta nani huaꞌanoꞌsa aꞌparansopita shaꞌhuitërahuë: “Paraco pëinënquë, oro, prata, inapita amëntatahuaton quëtopirincohuë tërantaꞌ, Sinioro camaitërinsoráchin nisarahuë. Caso caora yonquinëhuë quëran ama huachi noya yaꞌhuëcaiso marëhuëꞌ shaꞌhuitaꞌhuasoꞌ co nanitërahuëꞌ. Noya yaꞌhuëcaiso marëꞌ shaꞌhuicaꞌhuasonta co nanitërahuëꞌ,” itërahuë.

¹⁴ Iporasoꞌ mini quëma naporanso chachin, yaꞌhuërahuëquë paantarahuë. Napoaponahuëꞌ, coꞌhuara paꞌshátërasocohuëꞌ, maꞌsona pasopita aꞌna tahuëri onpotiinquëmaso shaꞌhuichinquën.

¹⁵ Naporoꞌ Paramo, Yosë yonquirinso shaꞌhuirin. “Caso Paramoco. Tatahuësoꞌ, Pioro itopi. Yosë nohuantërinsoꞌ nitotato, noꞌtëquën shaꞌhuitaranquën.

¹⁶ Yosë ispiritonën yaꞌcoancantohuachincora, noya noya nitotërahuë. Yosë chachin nanan anitotërinco. Co huëꞌëporahuëꞌ, huaꞌnarëso pochin quënanahuë. Ina Yosëso chini chiníquën nanantaton yaꞌipi nanitaparin.

¹⁷ Aꞌna tahuëri napocaso shaꞌhuiarahuë. Huaꞌqui quëran niponahuë nanipon. Aꞌna tahuëri aꞌnara israiroꞌsa copirnonëna yaꞌhuëapon. Tayora aꞌpininso pochin nicaton, Cacopo shinpita catahuapon. Moapo piyapiꞌsa ataꞌhuantapon. Yaꞌipi Sito shinpita napotapon.

¹⁸ Itomoroꞌsanta misëapon. Inimiconën Sëir itopisoꞌ noꞌpanën, mataton huaꞌanëntapon huachi. Israiroꞌsasoꞌ ahuëtohuachinaꞌ, canatëraꞌpiaponaꞌ. Napopisoꞌ, nisha nisha parti nahuinapon.

¹⁹ Ina copirnosoꞌ, Cacopo shiin nisarin. Inasoꞌ, inimicoroꞌsa minsëapon. Ninanoroꞌsaquë yaꞌhuëpisoꞌ, yaꞌipi noyá tiquiapon,” tënin.

²⁰ Amaricoroꞌsa yaꞌhuëpiquë notërahuaton, Yosë yonquirinso shaꞌhuiantarin: “Amaricoroꞌsasoꞌ, chini chiníquënoꞌsaꞌ. Napopirinahuëꞌ, israiroꞌsari noyá ataꞌhuantapon,” tënin.

^21-22 Quini quëran pipipisopita yaꞌhuëpiquënta notërahuaton, Yosë yonquirinso shaꞌhuirin: “Quini quëran pipiramasopitasoꞌ, noyá niacorapitoma yaꞌhuëramaꞌ. Natëtëroꞌsaquë inaira huaꞌhuatërinso pochin yaꞌhuëpiramahuëꞌ, inaira pëꞌpëtëꞌ huiquitërinso pochin, asiriaroꞌsa minsëarinquëmaꞌ. Inapoatonaꞌ, yaꞌhuëpiꞌpaꞌ quiquiarinënquëmaꞌ,” tënin.

²³ Ina quëran Yosë yonquirinsoꞌ, shaꞌhuiantarin: “¡Maꞌhuantacha nisapi paya! Yosë napohuachin: ¿Inpitacha chaꞌërëꞌpoya?

²⁴ Sontaroꞌsa Chipri quëran nancharoꞌsaquë huëꞌsapi. Asiriaroꞌsa minsërahuatona ataꞌhuantaponaꞌ. Ipiri itopisoꞌ naciontaꞌ, napotaponaꞌ,” tënin.

²⁵ Yosë yonquirinso shaꞌhuirahuaton, Paramoso yaꞌhuërinꞌpaꞌ paantarin. Paraconta yaꞌhuërinꞌpaꞌ paꞌnin antaꞌ.