Números 23 - Chayahuita (Shahui)

¹ Ina quëran Paramori Paraco itapon: —Isëquë chachin canchisë artaro nitoco. Inaquë ahuiquitacaso marëntaꞌ, canchisë toroaꞌhua, canchisë carniro, inapita quëquëꞌ, itërin.

² Ina natanahuaton, Paracosoꞌ ina inachachin ninin. Cato yaꞌpi chachin maꞌsha tëparahuatona Yosë marëꞌ acopi. Aꞌnaya aꞌnaya artaroquë aꞌnara toroaꞌhua, nisahuaton aꞌnara carniro acopi.

³ Ina quëran Paramori, Paraco itapon: —Isëquë maꞌsharoꞌsa tëpatë acorëso pirayan ninataco. Caso amasha paꞌsarahuë tapona Sinioro oꞌmarin nicaincoso marëꞌ. Ina quëran maꞌsona anitotërincosoꞌ, shaꞌhuitaranquën, itërin. Ina tosahuaton Paramosoꞌ, aꞌna panënaꞌhuaya tomaroꞌtë nininquë pantarin.

Paramori israiroꞌsa noya yaꞌhuëcaiso marëꞌ shaꞌhuitërinsoꞌ

⁴ Inaquë Yosëri yaꞌnotohuachina, Paramori itapon: —Canchisë artaro ninahuë. Aꞌnaya aꞌnayaquë aꞌnara toroaꞌhua nisahuaton aꞌnara carniro tëparahuato, quëma marëꞌ acorahuë, itërin.

⁵ Napotohuachina Siniorori Paramo anitotërin maꞌsona taꞌcasoꞌ. Nani anitotahuaton itapon: —Paracotaquë paantarahuaton, carinquën anitotëranquënso chachin shaꞌhuitëquëꞌ, itërin.

⁶ Paramosoꞌ huëantarahuaton, Paraco huaniárin quënanquiantarin. Artaroquë maꞌsha acopisoꞌ pirayan huaniárin. Moapo huaꞌanoꞌsantaꞌ, inaquë yamorapi.

⁷ Naporoꞌ Paramosoꞌ, Yosëri anitotërinso shaꞌhuirin: “Moapo copirno Paraco itopisoꞌ, piꞌi pipirinso parti quëran amatërinco niꞌton, huëꞌnahuë. Aran motopiroꞌsa parti yaꞌhuëpirahuëꞌ: ‘Huëcaton israiroꞌsa ama huachi noya yaꞌhuëcaiso marëhuëꞌ shaꞌhuitiiquëꞌ. Cacopo shinpita co noyahuëꞌ yonquirapiton napotëquëꞌ,’ tënin, itërinaco.

⁸ Napopirinhuëꞌ, inahuaso Yosëri noya niꞌnin. Noyasáchin yonquirapirin. Napoaton co nanitërahuëꞌ inapotaꞌhuasoꞌ. Co piꞌpian tëranta nanitërahuëꞌ, co noyahuëꞌ yonquirapiaꞌhuasoꞌ.

⁹ Inápa natëtëroꞌsa quëran notërahuë. Motopiaꞌhuaroꞌsa quëraonta nocorahuë. Co aꞌnapita piyapiroꞌsa pochinhuëꞌ inahuaso nicatonaꞌ, Yosë marëꞌ nanpicaisoꞌ nohuantopi.

¹⁰ Amocan tomontërinso pochin, co onpo pichichináchinhuëꞌ naꞌapi. Onposo yaꞌhuëpisoꞌ, co insonta nitotërinhuëꞌ. Inahuaso noyasáchin nipi niꞌton, noyasha chiminaponaꞌ. Inahua pochin cantaꞌ, chiminahuë naporini, noya noya cancanchitohuëꞌ, tënahuë,” itërin.

¹¹ Naporinso natanahuaton, Paracori Paramo itapon: —¡Ama napotëquësohuëꞌ! Inimiconëhuëpita ama huachi noya yaꞌhuëcaiso marëhuëꞌ shaꞌhuitamaso marëꞌ amatëranquën huëꞌnan. Quëmariso napoaponahuëꞌ, noya yaꞌhuëcaiso marëꞌ shaꞌhuitëran, itërin.

¹² —Coꞌtana nani shaꞌhuitëranquën. Sinioro anitotërincosoráchin nonsarahuë. Co caora nohuanto maꞌsha taꞌcahuasoꞌ nanitërahuëꞌ, itërin Paramori.

¹³ —Huëquë nipachin niquëꞌpaꞌ quëpantaꞌinquën. Ina quëransoꞌ, israiroꞌsa yaꞌhuëpiso co yaꞌipi niꞌsaranhuëꞌ. Caraíchin nëꞌmëtë pëiroꞌsa intonquë yaꞌhuërinsopitaráchin niꞌsaran. Ina quëran nocorahuaton, ama huachi noya yaꞌhuëcaiso marëhuëꞌ shaꞌhuitëquëꞌ, itërin.

¹⁴ Ina tosahuaton, Pisca motopi huiꞌnimotënquë Paramo quëparin. Sohuimo noya roꞌtë itopiquë quëparin. Inaquë canchisë artaro ninin. Aꞌnaya aꞌnaya artaroquë aꞌnara toroaꞌhua, aꞌnara carniro, inapita tëparinsoꞌ acorin.

¹⁵ Inaquë Paramori, Paraco itapon: —Isëquë maꞌsharoꞌsa tëpatë acorëso pirayan ninaantaco. Caso Sinioro nacapiapo amasha paꞌsarahuë, itërin.

¹⁶ Paꞌpachina Siniorori Paramo nacapiaton, maꞌsona taantacaso anitotaantarin. Ina quëran itapon: —Paracotaquë paantarahuaton, carinquën anitotëranquënso chachin shaꞌhuitonquëꞌ, itërin.

¹⁷ Paramosoꞌ paantarahuaton, Paraco huaniárin quënancoantarin. Artaroquë maꞌsha acopisoꞌ pirayan huaniárin. Moapo huaꞌanoꞌsantaꞌ, inaquë yamorapi. Naporoꞌ Paracori itaantapon: —¿Maꞌta Sinioro itërinquën? itërin.

¹⁸ Itohuachina, Paramosoꞌ Yosëri anitotërinsoꞌ, shaꞌhuiaantarin: “Paraco, quëmasoꞌ Sipor huiꞌninquën. Noya natanquë shaꞌhuichinquën:

¹⁹ Yosëso co canpoa pochinhuëꞌ. Co nisha nisha nonaton nonpininhuëꞌ. Maꞌsona topachina, inachachin nisarin. Catahuatacaso shaꞌhuihuachina, catahuatërin.

²⁰ Nani Yosë camairinco israiroꞌsa noya yaꞌhuëcaiso marëꞌ shaꞌhuitaꞌhuasoꞌ. Yosëri chachionta nani inapita noya yaꞌhuëcaiso marëꞌ shaꞌhuitërin. Napoaton co nanitërahuëꞌ naponin yaꞌhuëcaiso marëꞌ shaꞌhuitaꞌhuasoꞌ.

²¹ Siniorori israiroꞌsasoꞌ, noyasáchin niꞌnin. Cacopo shinpita niꞌtonaꞌ, co manta yaonpotërinhuëꞌ. Napoaton inahuarintaꞌ, huaꞌanën pochin nicatona paꞌyatopi.

²² Tanan ohuacasoꞌ noꞌhuitohuachina, pomonën quihuirin. Inapochachin israiroꞌsantaꞌ, Yosëri chiníquën nanantaton Iquipito quëran ocoirin niꞌton, inasáchin quihuípi.

²³ Cacopo shinpitasoꞌ, maꞌsha onpotacaiso marëꞌ nonënpachinarantaꞌ, co manta onpoapihuëꞌ. Shontapirinahuë tërantaꞌ, israiroꞌsaso co manta onpoapihuëꞌ. Ipora chachin israiroꞌsa shaꞌhuitahuaꞌ: ‘¡Canpitacha tëhuënchinsoꞌ, Yosëso catahuarinquëma paya! Catahuatënquëma inasoꞌ, huëhuëpiro nininsopita ninin,’ itahuaꞌ.

²⁴ Yosë piyapinënpita nani huanipi huachi. Paꞌpiniꞌ yamapintërinso pochin inahuaso niponaꞌ. Mapintaquë huarëꞌ paꞌpiniꞌ chinotërin. Ina pochin inahuasoꞌ nisapi. Mapinën huënaiꞌ oꞌóta huarëꞌ sanorinso pochin nisapi,” tënin Paramo.

²⁵ Naporoꞌ Paracori, Paramo itapon: —Israiroꞌsa ama huachi noya yaꞌhuëcaiso marëhuëꞌ shaꞌhuitamasoꞌ co nanitëranhuë niꞌquëhuarëꞌ, ¡ama nipachin noya yaꞌhuëcaiso marëntaꞌ shaꞌhuitëquësohuëꞌ! itërin.

²⁶ —Nani shaꞌhuitëranquën pora: “Caso Sinioro camaitërinsoráchin nisarahuë,” itëranquën, itërin Paramori.

²⁷ —Huëquë nipachin aꞌna parti yaꞌhuërëꞌ quëpantaꞌinquën. Tapona inaquësoꞌ, Yosë quëtërinquën israiroꞌsa ama huachi noya yaꞌhuëcaiso marëhuëꞌ shaꞌhuitamasoꞌ, itaantarin Paracori.

²⁸ Napotahuaton, Pioro motopi huiꞌnimotënꞌpaꞌ Paramo quëpantarin. Ina quëran notëtohuatëra, yaꞌipi inotëro parti quënantërëꞌ.

²⁹ Inaquë Paramori, Paraco itapon: —Isëquë chachin canchisë artaro nitoco. Inaquë ahuiquitacaso marëntaꞌ, canchisë toroaꞌhua, canchisë carniro, inapita quëquëꞌ, itërin.

³⁰ Ina natanahuaton, Paracosoꞌ ina inachachin ninin. Maꞌsha tëparahuaton, aꞌnaya aꞌnaya artaroquë aꞌnara toroaꞌhua, aꞌnara carniro acorin.