Números 20 - Chayahuita (Shahui)

Naꞌpi quëran iꞌsha pipirinsoꞌ

¹ Amaricoroꞌsaꞌ, cananoꞌsaꞌ, inapitari canapi piquëran, israiroꞌsaso huëꞌpiso parti paꞌmantapi. Pascoa yoquiquë, Sin inotëro parti camantapi. Catisë ninanoquë huaꞌqui quëparitopi. Inaquë Maria chiminin. Chiminpachina, inaquëranchin paꞌpitopi.

² Inaquënta capa iꞌsha niantahuachina, israiroꞌsaso niyontonahuatonaꞌ, Moisësë, Aaron inapita noꞌhuitona noncarotaantapi:

³ —¡Siniorori tëparinsopitarëꞌ quiyanta chiminai naporini, noya noya niitonhuëꞌ!

⁴ ¡Quiyasoꞌ Yosë piyapinënpitacoi niꞌtoi, co iso inotëro parti quëcancoiso nipirinhuëꞌ! Quiya nisahuaton, pëꞌtahuanëhuëipitanta chiminaꞌhuaiso marëꞌ ¿isoporinquë quëntamarancoi ti?

⁵ ¡Maꞌmarëta Iquipito quëran poꞌconinquë quënancoi! Co manta isëquëso shaꞌnëhuëꞌ. Co iquira nararoꞌsa yaꞌhuërinhuëꞌ. Co oparoroꞌsa yaꞌhuërinhuëꞌ. Co cranata nararoꞌsanta huanirinhuëꞌ. Co iꞌsha tëranta oꞌocaꞌhuaiso yaꞌhuërinhuëꞌ, itopi.

⁶ Ina natanatonaꞌ, Moisësë, Aaron, inapitaso piyapiꞌsa patopi. Patahuatona Yosë chinotacaso pëi yaꞌcoanaquë, pantapi. Inaquë isonpi quëran noꞌpaquë huarëꞌ monshorahuatonaꞌ, Sinioro chinotopi. Naporoꞌ Sinioro huënaratërinsoꞌ, yaꞌnorin.

^7-8 Siniorori, Moisësë itapon: —Iya masho Aaronëꞌquën, israiroꞌsa ayontoncoꞌ. Nani niyontonpachinaꞌ, huaranën maquëꞌ. Masahuaton inapita niꞌtërantapaquë, naꞌpi camaiquë iꞌsha quëchinquëmaꞌ. Ca nohuanto israiroꞌsa oꞌocaiso marëꞌ naꞌpi quëran iꞌsha pipiarin. Pëꞌtahuanënapitanta oꞌopona huachi, itërin.

⁹ Siniorori camairinso chachin Moisësësoꞌ, huaranën chinotopiso pëi quëran maconin.

¹⁰ Ina quëran Aaronë chachin naꞌpi notënanquë israiroꞌsa ayontonpi. Inaquë Moisësëri noꞌhuiton itapon: —Canpitaso co natantochinachin cancantopiramahuëꞌ, shaꞌhuichinquëmaꞌ: Canpita oꞌocamaso marëꞌ ¿iso naꞌpi quëranpita iꞌsha ocoicaꞌhuaiso yaꞌhuërin ti? itërin.

¹¹ Ina tosahuaton huaranën quëran catoro naꞌpi ahuërin. Inapotohuachina, notohuaroꞌ iꞌsha pipirin niꞌton, israiroꞌsa oꞌopi huachi. Pëꞌtahuanënanta oꞌopi.

¹² Moisësë, Aaron, inapitaso napoaponahuëꞌ, Yosëri itapon: —Canpitaso co natëtapomarahuëꞌ naporamaꞌ. Ina niꞌton, israiroꞌsa co chinotërinacohuëꞌ. Yaꞌipi cancanëma quëran natëtoma naporama naporini, israiroꞌsa chinochitonacohuëꞌ. Chinotatonaco: “¡Ma noyacha inaso paya!” ichitonacohuëꞌ. Napoaton canpitantaꞌ, noꞌpaꞌ quëtaranquëmaquë co yaꞌconaramahuëꞌ, itërin.

¹³ Ina iꞌsha pipirinquë apoyatopi: “Miripa iꞌsha” itopi. Inaquë israiroꞌsa co Sinioro natëtonaraihuëꞌ iꞌsha marëꞌ nonca topi niꞌton, Siniorori noyasáchin nininsoꞌ aꞌnotërin.

Israiroꞌsa naꞌhuëcaisoꞌ, itomoroꞌsari yaꞌcopipisoꞌ

¹⁴ Catisë quëran caraya quëmapiꞌsaꞌ, Moisësëri aꞌparin Itomo copirno nontacaiso marëꞌ. Cantonahuatona itaponaꞌ: “Quiyasoꞌ israiroꞌsacoi, canpita quëmopinëma ninai. Nani nitotëran Iquipitoquë yacapatatoi, parisitëraisoꞌ. Isëquë huarëꞌ canquiaꞌhuaiso marëntaꞌ, naꞌcon parisitërai.

¹⁵ Shimashonëhuëipita iráca Iquipito parti paꞌpi. Inaquë huaꞌqui yaꞌhuëpi. Oshaquëranchin iquipitoroꞌsari, shimashonëhuëipita aparisitërin. Quiyanta yaꞌhuëantahuatoira, inapochachin aparisitërinacoi.

¹⁶ Parisitápatoi catahuaincoiso marëꞌ Sinioro nontërai. Chiníquën nontohuatoira natanahuatoncoi catahuarincoi. Anquëninën aꞌpaimarin Iquipito quëran ocoincoiso marëꞌ. Iporasoꞌ Catisë ninanoquë yaꞌhuëarai, canpita noꞌpanëma naniconinquë nisarai.

¹⁷ Iporaso nipirinhuëꞌ, noꞌpanëmataëchin naꞌhuëcaꞌhuaiso marëꞌ natainquën taꞌtoi huëꞌnai. Co iminëmaquë yaꞌconapoihuëꞌ. Oparonëmanta co yaꞌcontapoihuëꞌ. Co posonëmaquë tëranta iꞌsha oꞌopoihuëꞌ. Tëquën irasáchin paꞌtarai. Co pëshonaraihuëꞌ. Noꞌpanëma naꞌhuëtaꞌhuai huarëꞌ inapoarai,” itopi.

¹⁸ Copirnoriso nipirinhuëꞌ, itapon: —¡Co naporinhuëꞌ! Co noꞌpanëhuëitaëchin naꞌhuëcamaso yaꞌhuërinhuëꞌ. Co natëtohuatamahuëꞌ, sontaronëhuëpitaroꞌco chachin anaꞌintaranquëmaꞌ, itërin.

¹⁹ Itohuachina, israiroꞌsari noya shaꞌhuitërin: —Tëquën irasáchin paꞌtarai. Papoi pochin oꞌocaꞌhuaiso marëꞌ pëshonpatoi, pahuërëarainquën. Pëꞌtahuanëhuëipita oꞌorinso marëntaꞌ, pahuërëarainquën. Topinan naꞌhuëcaꞌhuaiso marëꞌ napotarainquën, itopi.

^20-21 —¡Co naꞌhuëaramahuëꞌ! itahuaton, sontaronënpitarë chachin noyá niacorahuatonaꞌ, israiroꞌsa ama naꞌhuëcaiso marëhuëꞌ toꞌshitëpi. Ina niꞌsahuatonaꞌ, israiroꞌsasoꞌ aꞌna ira paꞌtacaisoꞌ yonquipi huachi.

Aaron chimininsoꞌ

²² Yaꞌipi israiroꞌsa Catisë quëran pipirahuatonaꞌ, Or motopi parti notëtopi.

²³ Inaquë itomoroꞌsa noꞌpanën nanirintaëchin, Siniorori Moisësë, Aaron inapita itapon:

²⁴ “Aaronsoꞌ chiminapon huachi. Israiroꞌsa noꞌpaꞌ quëtaꞌhuasoꞌ shaꞌhuitërahuëquë co yaꞌconaponhuëꞌ. Miripa iꞌshataquë camairanquëmaso co natëramahuë niꞌton, Aaronsoꞌ isëquë chiminapon.

²⁵ Quëmari Moisësë Or motopi huiꞌnimotënquë quëpaquëꞌ. Huiꞌnin Iriasaro itëramasontaꞌ, quëpaquëꞌ.

²⁶ Inaquë Aaron, corto huaꞌan niꞌton, aꞌmorinso ocoitahuaton, huiꞌnin aꞌmotëquëꞌ. Paꞌpinsoꞌ inaquë chachin chiminapon,” itërin.

²⁷ Sinioro camaitërinso chachin, Moisësëso ninin. Yaꞌipi israiroꞌsa niꞌtonënquë, cara chachin Or motopiquë pantapi.

²⁸ Pomosontahuachinara, Aaron corto huaꞌan niꞌton, aꞌmorinso ocoitërin. Nani ocoitahuaton, inaquë huiꞌnin aꞌmotërin. Inaquë chachin Aaron chiminin huachi. Ina quëran Moisësë, Iriasaro, inapitaíchin oꞌmapi huachi.

²⁹ “Aaron chiminin huachi,” taꞌtonaꞌ, israiroꞌsasoꞌ naꞌcon sëtopi. Cara shonca tahuëri ina marëꞌ naꞌnërápi.