Números 14 - Chayahuita (Shahui)

Canan piyapiꞌsa tëꞌhuatatona co Sinioro natëpisohuëꞌ

¹ Ina natanatona israiroꞌsasoꞌ, co napion cancantatonaꞌ, “yai,” topi. Chiníquën naꞌnëchináchin tahuërianpitopi.

² Naporahuatona, Moisësë, Aaron inapita pinopi. Inahua capinintaꞌ: “Iquipitoquëhuë nipon, iso inotëroquëhuë nipon chiminëhua naporini, noya noya niitërihuahuëꞌ.

³ ¡Co Sinioro iso noꞌpaquë quëcainpoaso nipirinhuëꞌ! Canpoaso ahuëtërëhuaquë tëpahuachinënpoaꞌ, saꞌanpoaꞌ, huiꞌnanpoaꞌ, inapita masapi huachi. ¡Iquipitoquë chachin paꞌmantarëhua naporini, noya noya niitonhuë!” nitopi.

⁴ Ina quëran inahua capini: “¡Huëco paꞌahua aꞌna huaꞌan acoatëhuaꞌ, Iquipitoquë chachin paꞌmantaꞌahua nipachin!” taantapi.

⁵ Moisësë, Aaron, inapitaso ina niꞌsahuatonaꞌ, piyapiꞌsa notënanquë isonpi. Isonpi quëran, noꞌpaquë huarëꞌ monshopi.

⁶ Cosoi, Caripi, inapitaso nipirinhuëꞌ, panca sëtatona aꞌmopiso oshapi. Inapitanta Canaan noꞌpaꞌ nohuitapona paꞌpisoꞌ.

⁷ Inapitari israiroꞌsa itaponaꞌ: —¡Noꞌpaꞌ nahuipoi paꞌnaisoꞌ, paꞌpi nóya niꞌcontarai!

⁸ Sinioro noya niꞌpachinpoasoꞌ, catahuarinpoa inaquë yaꞌconacasoꞌ. Ina chachin ina noꞌpaꞌ quëtarinpoaꞌ. Ina noꞌpaquësoꞌ, maꞌsha noya noyatërin. Co manta pahuaninhuëꞌ.

⁹ Napoaton Sinioro natëcoꞌ. Ama yaꞌhuëhuanoꞌsa tëꞌhuatocosohuëꞌ. Co oshatarihuahuëꞌ minsëcasoꞌ. Inahuaso co Yosë natëpihuëꞌ niꞌton, co incari tëranta catahuarinhuëꞌ. Canpoaso nipirinhuëꞌ, Sinioro chachin catahuararinpoaꞌ. ¡Ama manta tëꞌhuatocosohuëꞌ! itopi.

¹⁰ Napotopirinahuëꞌ, israiroꞌsasoꞌ co natëtopihuëꞌ. Tëpacaiso marëꞌ naꞌpiquë yatëꞌyarapi. Naporo chachin Sinioro huënaratërinsoꞌ, chinotacaso pëi aipi yaꞌnorin. Yaꞌipi israiroꞌsa niꞌtonënaquë yaꞌnorin.

¹¹ Naporoꞌ Siniorori, Moisësë itapon: —¡Maꞌchachinta niꞌtonaꞌ, isopita yánocaninaco! Inapita catahuaꞌhuaso marëꞌ nani maꞌsha sacai nininsopita nipirahuëꞌ, ¡co yanatërinacohuëꞌ!

¹² Chiníquën canio aꞌpatato, tiquiꞌi nipachin. Ama noꞌpaꞌ quihuitërahuëquë yaꞌconacaiso marëhuëꞌ, inapochi. Inapita tiquirahuato, quëma shiparinpita quëran noya noya nacion ocoiarahuë, itërin.

¹³ Moisësëso napoaponahuëꞌ, Sinioro itapon: —Iquipitoroꞌsaso nani nitotopi, yaꞌhuëpi quëran chiníquën nanantaton ocoirancoisoꞌ. Iporasoꞌ israiroꞌsa tiquihuatan, inanta nitotaponaꞌ.

¹⁴ Ina nitotatonaꞌ, Canaan parti yaꞌhuëꞌpisopita shaꞌhuitaponaꞌ. Inahua chachionta nani natantopi yaꞌhuërai huáncana yaꞌhuëransoꞌ. Piyapi capini ninontopiso pochin ninontërësontaꞌ, nitotopi. Paꞌpatoira naporopi chitoroquë quëchitëransonta nani nitotopi. Tashinta nipachina, ina chitoro chachin pën pochin huënaratërinsoꞌ, inanta nitotopi.

¹⁵ Yaꞌipi inapita nitotopirinahuëꞌ, aꞌnaromarëáchin israiroꞌsa tiquihuatan, inapitaso taponaꞌ:

¹⁶ “Caso Yosëco niꞌto, Canaan noꞌpaꞌ quëtaranquëmaꞌ,” taꞌton, israiroꞌsa quësapirinhuëꞌ, co huachi nanitatonhuëꞌ, inotëro parti tiquirin, itaponën.

¹⁷ Napoaton ipora chachin, chini chiníquën nanantëranso aꞌnotocoi. Shaꞌhuiranso chachin niquëꞌ. Nani iꞌhua shaꞌhuitëranco:

¹⁸ “Caso co aꞌnaroáchin noꞌhuitërahuëꞌ. Piyapinëhuëpita nosoromiatërahuë. Co noyahuëꞌ nipirinahuëꞌ, oshanëna inquitato nanan anoyatërahuë. Co natëtonacohuëꞌ oshahuanpachinantaꞌ, inapotërahuë. Tëhuëhuachinaso napoaponahuëꞌ, onpopionta anaꞌintarahuë. Huiꞌninpita, shinpita, inapitanta anaꞌintarahuë. Shiparina shinpita nicoantarinquë huarënta anaꞌintápo,” tënan.

¹⁹ Ina pochin quëmasoꞌ piyapinënpita nosororan nichinapon chachin, nosoroquëꞌ. Iquipito quëran huarëꞌ naꞌcon tëhuëtërinën. Tëhuëtopirinënhuëꞌ, isëquë huarëꞌ nani quëꞌcanquiran niꞌton, co noyahuëꞌ nipiso inquitaton, noya niꞌquëꞌ, itërin.

Siniorori israiroꞌsa anaꞌintërinsoꞌ

²⁰ Moisësëri napotohuachina Siniorori itapon: —Noyapaꞌ. Quëma napotëranco niꞌton, co ataꞌhuantarahuëꞌ.

²¹ Napoaponahuëꞌ, caso nanpiárahuë. Naporahuaton, yaꞌipi isoroꞌpaquë noyasáchin ninahuë. Naporahuësoꞌ noꞌtëquën nininso pochachin apira shaꞌhuitaranquënsontaꞌ, noꞌtëquën nisarin.

^22-23 Chini chiníquën nanantato, Iquipitoquë nani maꞌsha sacai nininsopita ninahuë. Inotëro partinta inaporahuë. Inaporahuësopita anitotërinquëma noyasáchin ninahuësoꞌ. Ina nicaponaraihuë israiroꞌsasoꞌ, naꞌaro tënirinaco. Naporahuaton camaitërahuësopita co natëpihuëꞌ. Ina niꞌton, napopisopita co inso tëranta yaꞌconaponahuëꞌ. Shimashonënapita noꞌpaꞌ quëtaꞌhuasoꞌ shaꞌhuitërahuëquë co yaꞌconaponahuëꞌ. Nocaninacosopita co inso tëranta yaꞌcoanpihuëꞌ.

²⁴ Piyapinëhuë Caripi itëramasoráchin nanitaparahuësoꞌ natëton, nishatërin. Napoaton ina tëhuëchinsoꞌ noꞌpaꞌ nohuitacaso marëꞌ paꞌninquë yaꞌconapon. Shinpitanta inaquë yaꞌhuëaponaꞌ.

²⁵ Amaricoroꞌsaꞌ, cananoꞌsaꞌ, inapitaso canonamatëroꞌsaquë yaꞌhuëpi. Canpitaso nipirinhuëꞌ, tahuërëantarahuatomaꞌ, tashiraya chachin inotëro parti paꞌtomantacoꞌ. Quëhuai marë parti paꞌmantacoꞌ, itërin.

²⁶ Naquëranchin Siniorori, Moisësë, Aaron, inapita nontaton itapon:

²⁷ —Israiroꞌsa co noyahuëꞌ cancantatonaꞌ, naꞌcon pinorinaco niꞌton, ¡co huachi ahuantërahuëꞌ! Yaꞌipi pinorinacosopita nani natanahuë.

^28-29 Napoaton quëma Moisësë paꞌsahuaton, yaꞌhuërënamëhuë israiroꞌsa shaꞌhuitonquë: “Caso Sinioroco nanpiárahuë niꞌto, noꞌtëquën nontaranquëmaꞌ. Nonatoma naporamaso chachin, co nanitaramahuëꞌ Canaanquë yaꞌconacamasoꞌ. Iꞌhua chachin nipichiramaquë, cato shonca piꞌipitëramasoꞌ quëran huarëꞌ pichirinënquëmaꞌ. Ina naponquëma chachin pochin, pinoramaco niꞌton, iso inotëro parti chachin chiminaramaꞌ. Chiminpatamaꞌ, nansëquëma notëntërantapon.

³⁰ Caripi, Cosoi, inapitaráchin yaꞌconaponaꞌ. Inaquë poꞌmoanquëmaso marëꞌ noꞌtëquën shaꞌhuitopiranquëmahuëꞌ, co natëtëramahuëꞌ niꞌton, canpitaso co yaꞌconaramahuëꞌ.

³¹ Huiꞌnamanta yonquiatomaꞌ: ‘Inimicoroꞌsa mataponënpoaꞌ,’ topiramahuëꞌ, co napoarinhuëꞌ. Inapitasoꞌ canpita noꞌpaꞌ nocanamaquë poꞌmohuato, nóya yaꞌhuëaponaꞌ.

³² Canpitaso iso inotëro parti chiminpatamaꞌ, nansëquëma notëntërantapon.

³³ Isëquë chachin huiꞌnamapitantaꞌ, ohuicanëna aꞌpaitona yaꞌhuaponaꞌ. Catapini shonca piꞌipi napoaponaꞌ. Canpita co natëramacohuëꞌ niꞌton, huiꞌnamapitanta ina pochin parisitapi. Yaꞌipi mashonquëma ninamasopita isëquë chachin taquiama huarëꞌ inapoaponaꞌ.

³⁴ Huaꞌanoꞌsa Canaan noꞌpaꞌ nohuitacaiso marëꞌ aꞌparamasopita, catapini shonca tahuëri huaꞌquipi. Inapochachin carimantaꞌ, catapini shonca piꞌipi anaꞌintaranquëmaꞌ. Aꞌna tahuëri marëꞌ, aꞌna piꞌira parisitaramaꞌ. Inapotohuatënquëmaꞌ, yaꞌipiya quëran nitotapomaꞌ: ‘Sinioro anoꞌhuitacasosoꞌ, paꞌpi co noyahuëꞌ,’ tëcapomaꞌ.

³⁵ Ca Sinioroco noꞌtëquën shaꞌhuitaranquëmaꞌ. Ina pochin mini co noyahuëꞌ cancantopisopita, anaꞌintarahuë. Iso inotëro parti napopináchin yonquiatomaꞌ, co yanatëramacohuë niꞌton, isëquë chachin taquiapomaꞌ,” itërin.

Shonca huaꞌanoꞌsa chimininsoꞌ

^36-37 Shonca cato huaꞌanoꞌsa Canaan noꞌpaꞌ nohuitacaiso marëꞌ Moisësëri aꞌparin. Napopirinhuë shonca yaꞌpisoꞌ, paꞌpi co noyahuëꞌ nanan shaꞌhuiimapi. Ina natanatonaꞌ, piyapiꞌsa Yosë noꞌhuipi. Napoaton ina nohuanton chiníquën caniori maꞌton tiquirin huachi.

³⁸ Cosoi, Caripi, inapitaso nipirinhuëꞌ, co chiminpihuëꞌ.

Orma ninanoquë israiroꞌsa canapisoꞌ

³⁹ Yaꞌipi Sinioro naporinso Moisësëri israiroꞌsa shaꞌhuitohuachina, paꞌpi sëtopi huachi.

⁴⁰ Tahuëririnquë, tashíramiachin capayatahuatonaꞌ, motopiroꞌsa parti pantapi. Inaquë aꞌna motopi huiꞌnimotënꞌpaꞌ pantarahuatonaꞌ, napoontapi: —Tëhuënchachin co noyahuëꞌ nicatëhua oshahuanëhuaꞌ. Napoaponahuëꞌ, nani isëquë huëntarëhuaꞌ. ¡Huëco paꞌahuaꞌ, Sinioro shaꞌhuitërinpoaquë yaꞌcoanhuaꞌ! topi.

⁴¹ —Canpitaso co Sinioro natëtomahuëꞌ, napoaramaꞌ. Canpitaora nohuanton yayaꞌconpiramahuëꞌ, co onporo napoaramahuëꞌ.

⁴² Co huachi Sinioro catahuarinquëmahuë niꞌton, ama aquëtë pacosohuëꞌ. Inimicoroꞌsa minsëchinquëmaꞌ.

⁴³ Amasha paꞌpatamaꞌ, amaricoroꞌsaꞌ, cananoꞌsa inapita quënancontaramaꞌ. Yosë nani aꞌporama niꞌton, inapitarëꞌquëma niahuëhuatamaꞌ, tiquiarinënquëmaꞌ, itërin Moisësëri.

⁴⁴ Napotopirinhuëꞌ, inapitaso onpopionta paꞌpi. Canaan motopiroꞌsa parti ahuëtacaiso marëꞌ paꞌpi. Siniororëꞌ anoyatopiso caposonënsoꞌ, co quëpapihuëꞌ. Co Moisësë tëranta paꞌninhuëꞌ. Yaꞌhuëpiquëranchin yaꞌhuërapi.

⁴⁵ Naporoꞌ amaricoroꞌsaꞌ, cananoꞌsaꞌ, inapita ninanonëna quëran pipirahuatonaꞌ, israiroꞌsa ahuëimapi. Nitaꞌatohuachinara Orma ninanoquë huarëꞌ imaquimapi. Naporoꞌ israiroꞌsa ahuëatona canamiatopi.