Números 13 - Chayahuita (Shahui)

Canan noꞌpaꞌ nëhuëcaiso marëꞌ aꞌparinsoꞌ

^1-2 Ina quëran Siniorori, Moisësë nontaton itapon: “Caraya quëmapiꞌsa huayonahuaton, noꞌpaꞌ nicacaiso marëꞌ Canan parti aꞌpaquëꞌ. Inaso noꞌpaꞌ quëtaranquëmaꞌ. Aꞌna huënton aꞌna huënton ninin quëran aꞌnara quëmapi huaꞌan nininso huayonquëꞌ,” itërin.

³ Siniorori napotohuachina, Paran inotëro parti quëran Moisësëri Israiro huaꞌanoꞌsa aꞌparin. Noꞌpaꞌ nahuicaiso marëꞌ aꞌparin.

^4-24 (-)

^25-26 Catapini shonca tahuëri Canaan noꞌpaꞌ noya niꞌpi. Nani niꞌsahuatonaꞌ, shonca cato huaꞌanoꞌsasoꞌ, Catisëquë huënantapi. Inaso ninanoꞌ, Paran inotëro parti yaꞌhuërin. Inaquë Moisësë, Aaron, nisahuaton aꞌnapita israiroꞌsanta yaꞌhuërapi. Nani canquimahuachinara, niꞌpiso shaꞌhuiimapi. Sharoꞌsa nitërinsonta quëpisoꞌ, aꞌnoimapi.

²⁷ Ina quëran Moisësë itaponaꞌ: —Iꞌhua aꞌparancoisoꞌ, nani noꞌpaꞌ niꞌcontarai. Tëhuënchachin inaquësoꞌ, co manta pahuaninhuëꞌ. Maꞌtana nitërinsopita quëmaraisoꞌ niꞌcoꞌ.

²⁸ Napoaponahuëꞌ, yaꞌhuëhuanoꞌsaso chini chiníquënoꞌsa pochin yaꞌnopi. Ninanonënapitantaꞌ, pancana. Pairapipisonta inápa nisahuaton tanónën. Naporahuaton panca piyapi Anaco itopisoꞌ shinpitanta quënanai.

²⁹ Amaricoroꞌsaso nipirinhuëꞌ, Niquipi parti yaꞌhuëpi. Yaꞌhuërëꞌ itiroꞌsaꞌ, amororoꞌsaꞌ, quiposoroꞌsaꞌ, inapitaso motopiroꞌsa parti yaꞌhuëpi. Cananoꞌsaso nipirinhuëꞌ, Cortaniiꞌ yonsan parti yaꞌhuërahuatonaꞌ, marë yonsanquë huarëꞌ yaꞌhuëpi, itopi.

³⁰ Naporoꞌ Caripisoꞌ, israiroꞌsa Moisësë notënanquë nisapiso acopitahuaton, itapon: —¡Huëco iyaroꞌsa paꞌahuaꞌ! Yaꞌhuëhuanoꞌsa canarahuatëhuaꞌ, noꞌpanëna matahuaꞌ. ¡Canpoari noya minsëarihuaꞌ! itërin.

³¹ Ina natanaponaraihuëꞌ, aꞌnapita noꞌpaꞌ nicapona paꞌpisopitasoꞌ, co nohuantopihuëꞌ: —¡Coꞌchi napoarihuahuë paya! Inapitasoꞌ canpoa quëran chini chiníquënoꞌsa niꞌton, minsëarinënpoaꞌ, topi.

³² Naporahuatona aꞌnapita israiroꞌsaꞌ, apaꞌyanacaiso marëꞌ itaponaꞌ: —Noꞌpaꞌ nahuipoi paꞌpiraihuëꞌ, paꞌpi co noyahuëꞌ niꞌconai. Inatohuasoꞌ, chimirin yaꞌhuërin. Yaꞌipi yaꞌhuëhuanoꞌsa niꞌconaisoꞌ, mashoinaꞌ huanipi.

³³ Panca piyapi Anaco itopisoꞌ shinpitanta quënanai. Inapita pirayan huanihuatoira, sëquërëya pochin ninatanai. Inapitanta nicatoncoi, ina pochin cancantërinacoi, itopi.