Números 12 - Chayahuita (Shahui)

Aaron, oshinë chachin Moisësë pinopisoꞌ

¹ Aꞌna tahuëri Aaron, Maria inapita Moisësë pinopi. Coso sanapi maninso marëꞌ chinotopi.

² Naporahuaton: “Sinioroso co Moisësëáchin nontërinhuëꞌ, quiyanta nontërincoi chachin,” topi nonatonaꞌ. Napopiso napoaponahuëꞌ, Siniororinta natanin.

³ Moisësësoꞌ, yaꞌipi piyapiꞌsa quëran sano sano quëmapi ninin.

⁴ Napoaton Siniorori inapita cara chachin: “Caranquëma chachin chinotëramacoso pëiquë pantacoꞌ,” itërin. Napotohuachina, cara chachin paꞌpi.

^5-6 Naporoꞌ Siniorosoꞌ yaráton chitoro nininquë oꞌmarahuaton, chinotacaso pëi yaꞌcoanataquëchin chiniimarin. Ina quëran Aaron, Maria inapita përarin. Yaꞌcaritohuachinara, itapon: “Natanco shaꞌhuichinquëmaꞌ. Inso tëranta yonquirahuëso yashaꞌhuitohuato, co aꞌninquë yaꞌnotato shaꞌhuitarahuëꞌ. Huaꞌnarëso pochin niꞌpachinco, maꞌsona yonquirahuësoꞌ shaꞌhuitarahuë. Huëꞌënquëhuë nipon nontato, shaꞌhuicaiso marëꞌ anitotarahuë.

⁷ Piyapinëhuë Moisësëso nipirinhuëꞌ, co ina pochin anitotërahuë. Inasoꞌ, yaꞌipi piyapinëhuëpita quëran noꞌtë noꞌtëquën natërinco.

⁸ Napoaton inarëꞌcosoꞌ, aꞌninquëchin nonai. Ina pochin inarëꞌco nonahuë niꞌton, co onporonta canpitaso ina pinocamaso yaꞌhuërinhuëꞌ,” itërin.

^9-16 (-)