Números 11 - Chayahuita (Shahui)

Nosha marëꞌ naꞌnëpisoꞌ

¹ Aꞌna tahuëri israiroꞌsa nisha nisha parisitatona amipi huachi. Amiatonaꞌ, Sinioro pinopi. Inaso natanahuaton, chiníquën noꞌhuitërin. Noꞌhuitaton, yaꞌnatiirinso nëꞌmëtë pëiroꞌsa ahuiquitacaso marëꞌ pën aꞌpatimarin.

² Ina niꞌsahuatonaꞌ, chiníquën Moisësë nontopi. Moisësënta inahua marëꞌ Sinioro nontohuachina, ina nohuanton aꞌnaroáchin pën tacopirin.

³ Napoaton ina parti inahua nananquë “Tapira,” itopi. Inaquë Sinioro nohuanton, huiquianapi niꞌton, ina pochin nohuitopi.

⁴ Iquipito quëran pipiponaꞌ, co israiroꞌsaráchin pipipihuëꞌ. Nisha nisha piyapiꞌsanta imatiipi. Inahuaso capacaisoráchin yonquiatonaꞌ, nosha marëꞌ naꞌnëpitërapi. Inapita nicatona israiroꞌsantaꞌ, naꞌnëtona ninapotapi: “¡Maꞌcha nosha quëtërinënpoa caꞌnëhuahuë paya!

⁵ Iquipitoquësoꞌ, co paꞌan quëran sami caꞌnëhuahuëꞌ. Pipino, sanchia, inapita caꞌnëhuaꞌ. Sahuanpa, ajosë, pëiro inapita huaꞌsanënoꞌsanta caꞌnëhuaꞌ.

⁶ Iporaso nipirinhuëꞌ, manasáchin capatëhuaꞌ, yanisarëhua huachi,” topi.

⁷ Manasoꞌ, conantroraya pochachin ninin. Huiríton niponahuëꞌ, shaꞌpi shaꞌpiroton. Comoro yaqui pochin.

⁸ Anpipinansoꞌ, tricoroꞌmo tomarëꞌ tapapisoꞌ, iyapinan pochin ninin. Nani tahuëri tashiramiachin, israiroꞌsa paꞌpi ina macaponaꞌ. Aꞌnaquënso pëꞌsanatonaꞌ, pan pochin nicatona caꞌpi. Aꞌnaquëontaꞌ, amasha amasha pëꞌsanatona aꞌitopi.

⁹ Tashi poroncayotohuachina, mananta yaꞌhuëpiquë anotimarin.

¹⁰ Israiroꞌsasoꞌ saꞌina huiꞌninpitarë chachin nëꞌmëtë pëinëna yaꞌcoanaquë naꞌnërápi. Napopisoꞌ Moisësë natanin. Ina natanaton, co noyahuëꞌ niꞌnin. Sinioronta napopisoꞌ nicaton, paꞌpi noꞌhuitërin.

¹¹ Napoaton Yosë nontaton itapon: —Caso quëma piyapinënco niꞌto, ama aquëtë aparisitocosohuëꞌ. ¡Ama huachi aquëtë israiroꞌsa huaꞌanën pochin nicaꞌhuaso marëꞌ quëtocosohuëꞌ! Ina pochin acoatonco, aparisitaranco.

¹² Iráca shimashonënpita shaꞌhuitëran noꞌpaꞌ quëtacasoꞌ. Inaquë quëpaꞌhuaso marëꞌ acopirancohuëꞌ, co huachi nanitërahuëꞌ. Inapita quëpacasosoꞌ, huaꞌhuaroꞌsa ipotë quëparëso pochin niconin. Co caso paꞌpinacohuëꞌ. Co caso aꞌshinacohuëꞌ. ¡Napoaton co quëpaꞌhuaso yaꞌhuërinhuëꞌ!

¹³ Naꞌnëtatonaco: “Nosha quëtocoi caꞌi, itárinaco” niꞌton, ¿intoparancha nosha macato iso nápo piyapiꞌsa aꞌcai paya?

¹⁴ Caso caora co nanitërahuëꞌ ina nápo piyapinënpita quëpaꞌhuasoꞌ. Paꞌpi sacai natanahuë taꞌa.

¹⁵ Inachachin nisápahuasoꞌ nohuantohuatan, acopitochanco nipachin. Ina noya noya. Noya niꞌpatancosoꞌ inapotoco. Chimipatosoꞌ, co huachi poꞌpin parisitapohuëꞌ, tënahuë, itërin.

¹⁶ Napotopirinhuëꞌ, Siniororisoꞌ itaantarin: —Canchisë shonca ansianoꞌsa chiníquën nanantopisopita huayonahuaton, ayontonquëꞌ. Nani ayontonpatan, chinotëramacoso nëꞌmëtë pëiquë quëntaquëꞌ. Inaquë ninaco.

¹⁷ Inaquë oꞌmarahuato nontaranquën. Naporoꞌ inapita ayaꞌcoancatacaso marëꞌ, napoinchin ispirito quëtëranquënsoꞌ mataranquën. Inapitanta quëma pochin cancantatonaꞌ, israiroꞌsa quëpacaisoꞌ catahuapënën.

¹⁸ Ina quëran israiroꞌsa shaꞌhuitëquë tashiraya marëꞌ nitapacancainaꞌ. Naporoꞌ nosha caꞌsapi. Naꞌnëtonaꞌ: “¡Maꞌcha nosha quëtërinënpoa caꞌnëhuahuë paya! ¡Iquipitoquë tëhuënchinso noya noya yaꞌhuëapirëhuahuëꞌ!” topisoꞌ, nani natanahuë. Noyapaꞌ, napopi niꞌquëhuarëꞌ, nosha nipachin quëchi caꞌinaꞌ.

¹⁹ Co aꞌna tahuëriáchin caꞌsapihuëꞌ. Co cato tahuëri, co aꞌnatërápo tahuëri, co shonca tahuëri, co cato shonca tahuëriáchin caꞌsapihuëꞌ.

²⁰ Aꞌna yoquiraꞌ nanirinso chachin nosha caꞌsapi. Amirotaquë huarëꞌ caꞌsapi. Ca chachin inahua huáncana huëꞌsápirahuëꞌ, naꞌnëpi. Naꞌnëtonaꞌ: “¡Maꞌmarëcha Iquipito quëran pipirëhua paya!” topi. Napoatona nocaninaco niꞌton, napotarahuë, itërin Yosëri.

²¹ Moisësëso napoaponahuëꞌ, taantarin: —Saota pasa huaranca quëmapiꞌsa chiníquënoꞌsa nipisopita, imaquiarinaco. ¿Aꞌna yoquiraꞌ nosha capaꞌhuaiso quëtáponcoi ti? ¡Coꞌchi inaquë huarëso nanitërahuë natëaꞌhuanquënso paya!

²² ¡Yaꞌipi ohuicaroꞌsaꞌ, ohuacaroꞌsaꞌ, quësaraisoꞌ tëparai naporini, co iso nápo naniitonahuëꞌ! Marëquë yaꞌipi sami yaꞌhuërinso quëtopirëhuahuë tërantaꞌ, co naniitonahuëꞌ, itërin.

²³ Siniororiso napoaponahuëꞌ itapon: —“Co inaso nanitaparanhuëꞌ,” ¿itëranco ti? Inta nipachin. ¿In taꞌma noꞌtëquën noinpaꞌ? itërin.

Canchisë shonca ansianoꞌsa napopisoꞌ

²⁴ Moisësësoꞌ, paꞌsahuaton Siniorori napotërinsoꞌ israiroꞌsa shaꞌhuitonin. Ina quëran canchisë shonca ansianoꞌsa ayontonin. Aꞌnapita ansianoꞌsa quëran huayonahuaton, Yosë chinotacaso pëi tahuirinquë ahuaniraꞌpiarin.

²⁵ Naporoꞌ Siniorosoꞌ chitoroquë oꞌmarahuaton, Moisësë nontiimarin. Ina quëran napopinchin ispirito quëtërinsoꞌ matahuaton, canchisë shonca ansianoroꞌsa quëtërin. Inari yaꞌcoancantohuachina, pënëntonaꞌpiroꞌsa pochin caniaritopi Yosë yonquirinsoꞌ shaꞌhuicaisoꞌ. Napoaponahuë napopisoꞌ, naporoíchin naporin.

²⁶ Cato yaꞌpinta Moisësëri huayonpirinhuëꞌ, co chinotopiso pëiquë paꞌpihuëꞌ. Inapitasoꞌ, Iritato, Mitato, inapita itopi. Inapitanta ispiritori yaꞌcoancantërin niꞌton, yaꞌhuëpiquëranchin caniaritopi Yosë yonquirinsoꞌ shaꞌhuicaisoꞌ.

²⁷ Napohuachina, aꞌnara huiꞌnapi taꞌarëꞌnachin paꞌsahuaton Moisësë shaꞌhuitonin: —¡Iritato, Mitato, inapita yaꞌhuëpiquëranchin Yosë yonquirinsoꞌ, shaꞌhuirapi! itërin.

²⁸ Naporoꞌ Moisësë piyapinëni itapon: —¡Ama sinioro napoꞌinasohuëꞌ! ¡Shaꞌhuitëquë taꞌchinaꞌ! itërin. Moisësë piyapinënsoꞌ, Cosoi itopi. Inasoꞌ, Non huiꞌnin. Cosoisoꞌ, huiꞌnapitapon quëran huarëꞌ, Moisësë marëꞌ sacatërin.

²⁹ Inari napotohuachina, Moisësëso naporin: —¡Ama aꞌpitocosohuëꞌ! Inapitanta pënënchinaꞌ. Yaꞌipi israiroꞌsa Siniorori, ispiritonën ayaꞌcoancantërin niꞌton, ina yonquirinso shaꞌhuirapi naporini, noya noya niitonhuëꞌ.

³⁰ Ina quëran Moisësëso ansianoꞌsarë chachin, yaꞌhuëpiquë paantapi.

Nisha ocoron, aꞌpairinsoꞌ

³¹ Ina quëran Sinioro nohuanton marë parti quëran, panca ihuan huëꞌnin. Ina huëꞌsahuaton, nisha ocoron israiroꞌsa yaꞌhuëapiquë paꞌpi notohuaroꞌ quënin. Yaporisha yanpoáporin. Aꞌna mitroíchin pochin inaparinso yanpoáporin. Yaꞌhuëpi quëran inaporinsoꞌ, aꞌna tahuëri iratërëso aquërinꞌpaꞌ huarëꞌ, inachachin paꞌnin.

³² Naporoꞌ yaꞌipi tahuëri, machináchin niiꞌhuapi. Tashintaꞌ, inapochinachin tahuërianpitopi. Tahuëririnquëntaꞌ, inapopiso niiꞌhuantapi. Napoatona naní quëran shonca imo shonca imo pochin mapi. Nani mapachinara, yaꞌhuëpiso aquëcha ayanitopi.

³³ Napoaponahuëꞌ, nisha ocoron anpipiso ipora huarëꞌ capasoiꞌ, Siniorori noꞌhuirin. Chiníquën canio quëran anaꞌintaton, notohuaroꞌ piyapiꞌsa tiquirin.

³⁴ Napoaton ina parti apoyatopi: “Quiporo-ataapa” itopi. Inaora nanamënaquë, “capacasoáchin cancantopisopita poꞌoroꞌ,” tapon naporin.

³⁵ Quiporo-ataapa quëran paantarahuatonaꞌ, Asirotoquë canconpi. Inaquë huaꞌquimiachin yaꞌhuëpi.