Nehemías 9 - Chayahuita (Shahui)

Israiroꞌsa oshanëna marëꞌ Istrasë Yosë nontërinsoꞌ

¹ Naporoꞌ yoquiquë cato shonca catapini tahuëritahuasoꞌ, israiroꞌsaso naquëranchin niyontoantapi. Saꞌcatën aꞌmosahuatonaꞌ, moꞌshiquë nisëꞌmomotopi. Inapoatona co coshatatonaraihuëꞌ Yosë nontopi.

² Nisharoꞌsarë niyaꞌtontopirinahuëꞌ, inapita aꞌporahuatonaꞌ, Sinioro marëꞌ huanipi. Shimashonënapitarë chachin co noyahuëꞌ nicatona oshahuanpisoꞌ, yonquipi.

³ Naporo chachin Yosë pënëntërinsoꞌ quirica, cara ora pochin nontopi. Ina quëran nápo ora chachin oshanëna yonquiatonaꞌ, Sinioro shaꞌhuitopi. Naporahuatona Sinioro chinotopi.

^4-5 Ina quëran isopita nihuiroꞌsasoꞌ, pëꞌsatëquë nanpëpi: Cosoi, Pinoi, Catomiri, Sipaniasë, Otiasë, Pitaiasë, Poni, Siripiasë, Pani, Quinani, Asapaniasë, inapita. Inapitasoꞌ chiníquën Yosë nontopi. Nani nontohuachinara, niyontonpisopita achinicancanpi: “Sinioroso Yosënënpoa niꞌton, huanirahuatëhua ina chinotahuaꞌ: Inasoꞌ, yaꞌhuëmiatarin. Co onporonta taꞌhuantarinhuëꞌ. ¡Noya noya niꞌton! ‘Yosparinquën Sinioro,’ itahuaꞌ,” itopi.

⁶ Istrasëntaꞌ, Yosë nontaton tapon: “Quëmasáchin Sinioronquën. Quëmari yaꞌipi piꞌiroꞌtë acoran. Yaꞌipi yaꞌhuërinsopitarë chachin ninan. Isoroꞌpaꞌ, marë, inapitanta ninan. Yaꞌipi inaquëpita yaꞌhuërinsopitarë chachin acoran. Quëma nohuanton yaꞌipi yaꞌhuëapi. Quëma nohuanton chachin yaꞌipi nanpiapi. Piꞌiroꞌtëquë yaꞌhuërinsopita chinotarinën.

⁷ Quëmasoꞌ Sinioro, Yosënquën. Apran huayonahuaton, Orë ninano quëran ocoiran. Inaquëso cartioroꞌsa yaꞌhuëpi. Ina chachin nininën canpiataton, Apraan itëran.

⁸ ‘Tëhuënchachin natëarinco,’ taꞌton, inarëꞌquën anoyatëran. Cananoꞌsaꞌ, itiroꞌsaꞌ, amororoꞌsaꞌ, huirisëroꞌsaꞌ, quiposoroꞌsaꞌ, quiriquiroꞌsaꞌ, inapita noꞌpanën matahuaton, shinpitari huaꞌanëntacaiso marëꞌ shaꞌhuitëran. Quëmasoꞌ noꞌtëquënáchin nonan niꞌton, shaꞌhuitëranso chachin nanirin.

⁹ Shimashonëhuëipita Iquipitoquë paꞌpi aparisitapirinahuëꞌ, Quëhuaiꞌ marë yonsanquë naꞌnëtërinënsoꞌ natanaton, catahuaran.

¹⁰ Iquipito copirnonta anaꞌintaton, nani maꞌsha paꞌpi huëhuëpiroꞌ nininsopita aꞌnotëran. Piyapinënpitarë chachin anaꞌintaton, napotëran. Israiroꞌsa co quëꞌyatonaraihuëꞌ aparisitapi niꞌton, anaꞌintaton, napotëran. Inapoaton iporasoꞌ, sacóshin nahuinan.

¹¹ Marë patomaihuatana, yanirotaquëchin piyapinënpita pëntonpi. Imaquipisopitaso nipirinhuëꞌ, anpoquë naꞌpi tëꞌyaitërëso pochin nitëran.

¹² Piyapinënpitasoꞌ quëpahuatana, naporopi chitoro aquëchitëran. Tashinta paꞌpachinara ina chachin, pën pochin huënaratërarin. Noya pacacaiso marëꞌ aꞌpintërarin.

^13-14 Ina quëran Sinai motopiquë nohuaraimaran. Naporoꞌ inápa quëran noya nicacaiso marëꞌ pënënan, camairan, naporan. Noꞌtën nanan aꞌchintahuaton, yonquínahuan yaꞌhuëcaiso marëꞌ anitotëran. Pënënancoisopita, camairancoisopita, anitotërancoisopita, inapitaso noyasáchin ninin. Chinoto tahuërinta acotëran. Ina tahuëri noya nicatonaꞌ, chinotiinënso marëꞌ acotëran. Piyapinën Moisësë itopiso quëran, yaꞌipi inapita anitotëran.

¹⁵ Tanahuachinarantaꞌ, inápaquë cosharo yaꞌhuërinso quëtëran. Yamorohuachinarantaꞌ, natëtë quëran iꞌsha ocoitëran. Noꞌpaꞌ quëtamaso quihuitëranquë yaꞌcaritohuachinara: ‘Yaꞌconatoma huaꞌanëntoco huachi,’ itëran.

¹⁶ Napotopiranhuëꞌ, shimashonëhuëipitasoꞌ co natëtopihuëꞌ. Co natantochináchinhuëꞌ, cancantatonaꞌ, co natërinënhuëꞌ.

¹⁷ Quëmarisoꞌ naꞌcon catahuapiranhuëꞌ, co ina yayonquipihuëꞌ. Co natëtënënhuëꞌ Iquipitoquë chachin panantacaisoꞌ yonquiantapi. Ina marëꞌ huaꞌan yonípi. Iquipitoroꞌsari camaiantacaiso marëꞌ yatahuërëantapi. Napopirinahuë tërantaꞌ, co ataꞌhuantëranhuëꞌ. Noyápiachin cancantaton, aꞌnaroáchin yanosorotëran. Co aꞌnaroáchin noꞌhuitëranhuëꞌ. Piyapinënpita nosoromiatëran niꞌton, co aꞌporanhuëꞌ.

^18-19 Oro asoquirahuatona toroaꞌhua nonanpi. Tënihuachinara: ‘Quëma Iquipito quëran ocoirancoi,’ itopi moshatonaꞌ. Inapoatona naꞌaro tëhuëtërinën. Napopitërapirinahuëꞌ, quëmarisoꞌ nosororan. Nosoroaton co inotëroquë aꞌporanhuëꞌ. Tahuëri nipachina, chitorori quëparárin. Tashintaꞌ, ina chitoro quëran pën pochin aꞌpintaton co patërinhuëꞌ. Inapoaton noꞌtëquën paacaiso marëꞌ aꞌnotëraran.

²⁰ Quëma Ispiritonëni nosoroaton aꞌchintërarin. Mananta co osërëtëranhuëꞌ. Yamorohuachinaranta iꞌsha quëtëran.

²¹ Inotëro parti catapini shonca piꞌipi nocomaran. Co manta ichipahuantëranhuëꞌ. Aꞌmopisontaꞌ, co mocarinhuëꞌ. Iratápirinahuëꞌ, co pomarantëtopihuëꞌ.

²² Naꞌa nacionoꞌsa huaꞌanëntopiso osërëtaton, shimashonëhuëi ahuaꞌanëntëran. Aꞌna huënton aꞌna huënton noꞌpaꞌ quëtëraꞌpiaran. Sicon copirno Isponquë yaꞌhuëpirinhuëꞌ, noꞌpanën osërëtaton ahuaꞌanëntëran. Oco copirnonta Pasan parti yaꞌhuëpirinhuëꞌ, inanta noꞌpanën osërëtaton ahuaꞌanëntëran.

²³ Quëma nohuanton notohuaroꞌ huiꞌnahuanpi. Tayoraroꞌsa nápo naꞌapi. Shimashonënpita noꞌpaꞌ quëtacaso shaꞌhuitëranso chachin ahuaꞌanëntëran.

²⁴ Napotëranso chachin shinpitari Canaan noꞌpaꞌ huaꞌanëntopi huachi. Cananoꞌsari inaso noꞌpaꞌ huaꞌanëntopirinahuëꞌ, quëma nohuanton canapi. Inapotatona atapanpi. Naꞌa copirnoroꞌsa yaꞌhuëpirinahuëꞌ canapi. Nisha nisha piyapiroꞌsa nipirinahuëꞌ, canapi. Canarahuatonaꞌ, nohuantopiso nitopi.

²⁵ Naꞌa pairahuan ninanoroꞌsa yaꞌhuëpirinhuëꞌ. Noꞌpanënanta noya noya nipirinhuëꞌ. Pëiroꞌsaquënta notohuaroꞌ maꞌsha amëntatopi. Iꞌsha tapainanoꞌsaꞌ, oparoroꞌsaꞌ, oripororoꞌsaꞌ, nisha nisha cashinoꞌsaꞌ, inapita yaꞌhuëpirinhuëꞌ, yaꞌipi mapi. Inapoatona noya coshatopi, oꞌopi, napopi. Inapoatona amonpitërapi. Nosororan niꞌton, capa cancantopi.

²⁶ Quëmarisoꞌ nosoropiranhuëꞌ, co natëtënënhuëꞌ anoꞌhuitërinën. Pënëntëransopita nocanatona aꞌpopi. Quëma marëꞌ pënëntopisopitanta tëpapi. Inapitari co noyahuëꞌ nipiso aꞌninquëchin shaꞌhuitopi: ‘Ina aꞌporahuatomaꞌ, Sinioroíchin tahuërëtocoꞌ,’ itopi. Napotopirinahuëꞌ, tëpapi. Inapoatona panca tëhuëtërinën.

²⁷ Napoaton inimiconënapitari canaipi. Inapitari huaꞌanëntatona aparisitopi. Parisitatona nontohuachinën, quëmarisoꞌ nosoroantaran. Inápa quëran natanahuaton, catahuaran. Quëma nohuanton huaꞌanoꞌsa huanipi. Aparisitopisopita aꞌpacaiso marëꞌ huanipi.

²⁸ Napoaponahuëꞌ, noya yaꞌhuëantahuachinaꞌ, aꞌnaroáchin naniantaantarinën. Quëmari niꞌsápiranhuëꞌ, co noyahuëꞌ niantapi. Napoaton naquëranchin inimicoroꞌsari minsërahuatona aparisitaantapi. Parisitatona nontaantahuachinën, nosoroaton inápa quëran catahuantaran. Inimiconënpita quëran naꞌaro nichaꞌëran.

²⁹ Quëma pënëntëransopitaráchin natëantatonaꞌ, yaꞌhuëcaiso pënënan. Pënënpiranhuëꞌ: ‘Noya quiyaora yaꞌhuëapoi,’ tënëso pochin cancantatona co natëtopihuëꞌ. Camaitëransopita, shaꞌhuitëransopita, inapita natëhuachina ananpitomiatacaso nipirinhuëꞌ, co natëtochináchinhuëꞌ cancantopi.

³⁰ Napopirinahuëꞌ, naꞌcon piꞌipi ahuantaton niꞌsáran. Quëma ispiritonën quëran pënëntonaꞌpiroꞌsa ayonquiran. Inapitari pënënpirinhuëꞌ, co natëpihuëꞌ. Napoaton nisha nisha nacionoꞌsaquë quëpapi. Inapitari huaꞌanëntatona camaipi.

³¹ Napoaponahuëꞌ nosoromiataton, co aꞌpomiatëranhuëꞌ. Co ataꞌhuantëranhuëꞌ. Noyápiachin cancantaton, nosorochináchin cancantëran niꞌton, naporan.

³² Quëmaso Yosënëhuëinquën. Chini chiníquën nanantaton paꞌpi huëhuëpiro nininsopita ninan. Nosororancoisoꞌ co nishatërinhuëꞌ. Quiyarëꞌquën anoyatëransontaꞌ, inachachin nisárin. Napoaton parisitëraisoꞌ noꞌtëquën tantiaquëꞌ. Copirnonëhuëipita, huaꞌanoꞌsaꞌ, corto huaꞌanoꞌsaꞌ, pënëntonaꞌpiroꞌsaꞌ, shimashonëhuëipita, yaꞌipicoi nani nohuantaso parisitërai. Asiria copirnoroꞌsa quëran huarëꞌ aparisitërinacoisoꞌ, ipora huanta inapoarai.

³³ Co quëma tëhuëran quëran parisitëraihuëꞌ. Quiyaora tëhuënëhuëiquë parisitarai. Shaꞌhuitërancoiso chachin co noyahuëꞌ ninaiso marëꞌ noꞌtëquën anaꞌintërancoi.

³⁴ Copirnonëhuëipita, huaꞌanoꞌsaꞌ, corto huaꞌanoꞌsaꞌ, shimashonëhuëipita, yaꞌipi inapita quëma pënëntëransoꞌ co natëpihuëꞌ. Camaitëransopita, shaꞌhuitëransopita, inapitanta co natëpihuëꞌ.

³⁵ Noꞌpaꞌ ahuaꞌanëntëransosoꞌ, pancana nisahuaton noyaroꞌpaꞌ. Inaquë nani maꞌsha quëtëran. Inapotopiranhuëꞌ, co paꞌyatatënën chinotërinënhuëꞌ. Co noyahuëꞌ nipisonta co yaaꞌpopihuëꞌ.

³⁶ Napoaton iporasoꞌ, topinan quëran asacatárinacoi. Shimashonëhuëipita noꞌpaꞌ quëtëran. Shaꞌtatona capacaiso marëꞌ quëtopiranhuëꞌ, inaquë chachin topinan quëran asacatárinacoi.

³⁷ Naꞌcon nitërinso mapiraihuëꞌ, nisha copirnoroꞌsa matërachinincoi. Oshanëhuëi marëꞌ anaꞌintatoncoi, ina copirnoroꞌsaquë yoꞌnancoi. Pëꞌtahuanëhuëipita quëran huarëꞌ, nohuantopisoꞌ nitopi. Inapoatoi paꞌpi parisitarai,” itërin.

³⁸ Ina yonquiatoi: “Ipora quëran huarëꞌ Yosëíchin natëarai huachi,” taꞌtoi, quiricaquë ina pochin ninshitërai. Inapotohuatoira, huaꞌanoꞌsaꞌ, corto huaꞌanoꞌsaꞌ, nihuiroꞌsaꞌ, inapitari huiꞌshapi. Inapotahuatona sichotopi huachi.