Nehemías 8 - Chayahuita (Shahui)

Istrasë Yosë quiricanën nontërinsoꞌ

^1-3 Pascoa yoqui quëran saota yoqui aꞌna tahuëri naꞌhuërapasoꞌ, yaꞌipi cotioroꞌsa aꞌna prasaquë niyontonpi. Inasoꞌ prasa, Iꞌsha maꞌcaisoꞌ yaꞌcoana itopisoꞌ notënanquë yaꞌhuërin. Inaquë niyontonahuatonaꞌ, Istrasë maistro Moisësë pënëntërinsoꞌ quirica nontacaso marëꞌ shaꞌhuitopi. Inasoꞌ quirica, Yosëri chachin israiroꞌsa iráca anitotërin. Napotohuachinara, inaso quësahuaton yaꞌipi quëmapiꞌsaꞌ, sanapiꞌsaꞌ, huaꞌhuaroꞌsa quëran huarëꞌ natantonënquë nontërin. Tashiramiachin quëran huarëꞌ caniaritërinsoꞌ, nontochináchin camotëanatërin. Yaꞌipiya quëran noya natanápi.

⁴ Naporoꞌ quirica nontacaso marëꞌ, nontë quëran pëꞌsatë nitopi. Inaquë huanirin quëran nontërin. Inchinan quëran Matataiasë, Sima, Aniasë, Oriasë, Iriquiasë, inapita huanipi. Ahuënan quërantaꞌ, Pitaiasë, Misairo, Marquiasë, Asomo, Asapatana, Sacariasë, Misoramo, inapita huanipi.

⁵ Yanontohuachina, inatohua huanirahuaton, soꞌnanpiso quirica oporinin. Napohuachina yaꞌipiya quëran notërápi. Oporinaso chachin natanacaiso marëꞌ yaꞌipiya quëran huanipi.

⁶ Ina nontacaso marëꞌ Istrasësoꞌ, anquirahuaton Yosë chinotërin: “¡Ma noyanquëncha quëmasoꞌ Sinioro ninan paya! ¡Yaꞌipi nanitapaton chini chiníquën nanantëran!” tënin. Napohuachina, yaꞌipi niyontonpisopitanta anquirahuatonaꞌ: “¡Naporin mini!” topi. Napoatona isonpi quëran noꞌpaquë huarëꞌ monshomapi.

^7-8 Cosoi, Pani, Siripiasë, Camin, Acopa, Sapitai, Otiasë, Maasiasë, Quirita, Asariasë, Cosapito, Anan, Piraia, inapitaso nihuiroꞌsaꞌ. Ina niꞌtona Yosë pënëntërinsoꞌ nontohuachina, maꞌsona tapon naporinsopita piyapiꞌsa aꞌninquëchin shaꞌhuitapi. Yosë pënëntërinsoꞌ quirica chiníquën nontahuatonaꞌ, maꞌsona tapon naporinsopita shaꞌhuiantapi.

⁹ Ina natanatonaꞌ, niyontonpisopitaso naꞌnëpi. Napoaton Niimiasë, Istrasë, maꞌsona tapon naporinsopita shaꞌhuinaꞌpiroꞌsaꞌ, inapitari piyapiꞌsa achinicancanpi. Ama aquëtë sëtatona naꞌnëcaiso marëhuëꞌ, achinicancanpi. Naporahuaton ina tahuërisoꞌ, Sinioro marëꞌ acopiso tahuëri niꞌton, co naꞌnërápaiso marëhuëꞌ napotopi.

¹⁰ Ina quëran Istrasëri itapon: “Paatoma noya coshatocoꞌ. Huino shaꞌmoronta oꞌocoꞌ. Naporahuaton aꞌnaquën co manta yaꞌhuëtohuachinahuëꞌ, përaco caꞌpainëmaꞌ, oꞌopainëmaꞌ. Sinioro marëꞌ tahuëri acorëhua niꞌton, inapocoꞌ. Ama sëtatomarahuëꞌ Sinioro yonquiatoma noya cancantocoꞌ. Inasoꞌ, noya aꞌpaiarinpoaꞌ,” itërin.

¹¹ Aꞌnapita nihuiroꞌsarintaꞌ, naꞌnëpisopita achinicancanpi: “Ipora tahuërisoꞌ, Sinioro marëꞌ acorëhuaso tahuëri. Napoaton co naꞌcon naꞌcon naꞌnëcamaso yaꞌhuërinhuëꞌ,” itopi.

¹² Napotohuachinara, inahuaso yaꞌhuëpiquë paꞌsahuatonaꞌ, coshatopi, oꞌopi, napopi. Aꞌnaquëonta co yaꞌhuëtohuachinarahuëꞌ, ichicaꞌpi, ichioꞌopi, inapotopi. Naporahuatonaꞌ, aꞌchintopiso noya nitotopi niꞌton, capa cancantopi.

¹³ Tahuëririnquë Israiro huaꞌanoꞌsasoꞌ, niyontoantapi. Corto huaꞌanoꞌsaꞌ, nihuiroꞌsaꞌ, inapitanta niyontonpi. Istrasërë chachin Yosë quiricanën nontaantapi.

¹⁴ Nontohuachinara, Sinioro Moisësë quëran camaitërinso quënanpi: “Israiroꞌsa ina yoquiquë chachin shonca aꞌnatërápo tahuëritapasoꞌ, imënamëaꞌhuaroꞌsa pita naꞌhuëinaꞌ,” tënin.

¹⁵ Napohuachina, Quirosarinquë nisahuaton yaꞌipi ninanoroꞌsaquë, iso pochin nanan aꞌpapi: “Tananoꞌsaquë paꞌsahuatomaꞌ, oripo, tanan oripo, arayan, inapita nararoꞌsa sëꞌpaquën macoꞌ. Nisha nisha panpënta macoꞌ. Panca taꞌan nararoꞌsa sëꞌpaquën, inapita macoꞌ. Inapita quëran imënamëaꞌhuaroꞌsa nicarihuaꞌ. Quiricanënquë ninshitopiso chachin nicarihuaꞌ,” topi.

¹⁶ Napotohuachinara, camaitopiso chachin macatona imënamëaꞌhuaroꞌsa nipi. Aꞌnaquën pëinëna aꞌcanpiso aipi. Aꞌnaquëontaꞌ, iꞌiratënënaquë nipi. Aꞌnaquënsoꞌ, Yosë chinotacaso pëi iꞌiratëquëntaꞌ, acopi. Iꞌsha macacaiso yaꞌcoana notënanquëntaꞌ, prasa yaꞌhuërin niꞌton, inaquënta acopi. Iprain yaꞌcoana itopiquëntaꞌ, prasa yaꞌhuërin niꞌton, inaquënta nipi.

^17-18 Nani acohuachinara, yaꞌipi huënantapisopita, pita naꞌhuëquë huarëꞌ, inaquë yaꞌhuëpi. Iráca Non, huiꞌnin Cosoi itopiso nanpisoꞌ, naꞌhuëpi quëran huarëꞌ, israiroꞌsa co ina pita naꞌhuëchinpihuëꞌ. Inapoatona capa cancantopisoꞌ, canchisë tahuëri nanipi. Caniaritërin quëran huarëꞌ Istrasëri Yosë pënëntërinso quirica nontërin. Nani tahuëri naporin. Taꞌhuantërinso tahuëririnquëntaꞌ, Sinioro marëꞌ niyontoantapi. Quiricanënquë camaitërinso chachin nipi.