Nehemías 4 - Chayahuita (Shahui)

Inimicoroꞌsa napopisoꞌ

¹ Ninano pairanën acoantaraisoꞌ Sanparato natantahuaton, paꞌpi noꞌhuitërin. Noꞌhuitaton yaatapanincoi.

² Amiconënpita, Samaria sontaroꞌsaꞌ, inapita nontaton tëhuarincoi: “Cotioroꞌsasoꞌ, tanari yatëparárin. ¿Ina nipirinhuëꞌ yasacatopi ti? ‘¡Naquëranchin maꞌsha tëparahuatëhua Yosë chinotaantarihuaꞌ! ¡Aꞌna tahuëri marëáchin sacato tëniarihuaꞌ! ¡Naꞌpiroꞌsanta huiquitopirinahuëꞌ, yamopi quëran nasha pipiponaꞌ!’ tëcatona inaporapi ipora,” tënin.

³ Topiasënta ina pirayan huaniton, tapon: “Niꞌcoꞌ, nani pairatatona naꞌpi ayaꞌhuiriraantarapi. Napoaponahuëꞌ, anashiri tëranta nanpëtohuachin, nohuatapon,” tënin tëhuaton.

⁴ Napotápachinacoira caso Yosë nontato itapo: “Quëmaso Yosënëhuëinquën. Nocanatonacoi tëhuarinacoisoꞌ, natanquëꞌ. Noꞌhuitonacoi napotarinacoi niꞌton, quëmari anaꞌintëquëꞌ. Quëma nohuanton inimiconënapitari minsërahuatonaꞌ, aꞌna noꞌpaꞌpaꞌ tëꞌyachinaꞌ.

⁵ Co noyahuëꞌ cancantopiso marëꞌ ama nichaꞌëquësohuëꞌ. Oshahuanpiso yonquiráquëꞌ. Paira nicasocoi noꞌhuiatërinacoi niꞌton, inapotëquëꞌ,” itërahuë.

⁶ Napotápirinacoihuëꞌ, co tananpitëraihuëꞌ. Sacatápatoi huancopitontarai. Yaꞌipiya quëran noya cancantërai niꞌton, napotërai.

⁷ Inapotëraisoꞌ, Sanparato, Topiasë, arapiaroꞌsaꞌ, amonoꞌsaꞌ, asototoroꞌsaꞌ, inapitanta natantopi. Co huachi intoparan yaꞌconacaisohuëꞌ nipachina, naꞌcon naꞌcon noꞌhuitopi.

⁸ Napopináchin yonquiatona ahuëinacoiso marëꞌ yahuëcapairinacoi. Inapoatona sacatëraisoꞌ, yatapiantapi.

⁹ Ina natantatoi, catahuaincoiso marëꞌ Yosë nontërai. Naporahuaton tahuëri tashirë chachin aꞌpaitaꞌhuaiso marëꞌ niacorai.

¹⁰ Napoin quëran Cota huënton sacatoroꞌsa chachinta napopi: “Naꞌpi pëꞌpëroꞌsa sanpatopi huachi. Paꞌpi notohuaroꞌ naꞌpi yamorinso yaꞌhuëarin. Quiyanta co huachi aꞌcanchináchinhuë cancantërai,” topi.

¹¹ Inimicoroꞌsanta napopi: “Yaahuërëhuasoꞌ, ama nitochinasohuëꞌ. Aꞌnanaya yaꞌcontatëhua tiquiaꞌahuaꞌ. Inapotatëhua atananpitahuaꞌ,” topi.

¹² Napopirinahuëꞌ, cotioroꞌsa inaquë yaꞌhuëpisopitasoꞌ, apira apira shaꞌhuitiirinacoi: “Itohuaran itohuaran yayaꞌcontatënënquëma yaahuërinënquëmaꞌ,” itiirinacoi.

¹³ Napotohuachinacoira, sacatoroꞌsa quëmopinënpitarë chachin yapo yaporia paira nininquë acoraꞌpiarahuë. Sahuëninënaꞌ, nansanënaꞌ, pëꞌchinanënaꞌ, inapitarë chachin acoraꞌpiarahuë. Yaꞌcoanaroꞌsaquëntaꞌ, inapotëraꞌpiarahuë.

¹⁴ Inapotopirahuëꞌ, tëꞌhuatopisoꞌ nicato yaꞌipi huaꞌanoꞌsaꞌ, maꞌhuanoꞌsaꞌ, sacatoroꞌsaꞌ, inapita shaꞌhuitërahuë: —Ama inapita tëꞌhuatocosohuëꞌ. Siniorosoꞌ chini chiníquën nanantaton, paꞌpi huëhuëpiro ninin. Ina catahuarinpoa niꞌton, ahuëtocoꞌ. Iyanpoapita, huiꞌnanpoapita, saꞌanpoaꞌ, pëinënpoaꞌ, inapita yonquiatëhuaꞌ, ahuëtahuaꞌ, itërahuë.

¹⁵ Yosë nohuanton, chinotërinacoiso nitotërai. Inahuanta noyá niacorapiraisoꞌ natantopi. Napoaton co huachi ahuërinacoihuëꞌ. Napohuachina yaꞌipicoi sacataantarai.

^16-18 Naporo quëran huarëꞌ, patomachin piyapinëhuëpita pairaquë sacatopi. Patoma chachin: Sahuëni, nansa, iscoto, pëꞌchinan, inapita sëꞌquëatona aꞌpaitapi. Huaꞌna cotonsáchin aꞌmomantapi. Huaꞌanoꞌsarinta sacatoroꞌsa noya catahuapi. Naꞌpi pëꞌpëroꞌsanta chiꞌyatapona pochin niyatainpita sacatapi. Yaꞌipi sacatoroꞌsa sahuëninënaꞌ, pëꞌtënpiquëranchin sacatapi. Tronpita camayonta ca pirayan huanirin.

¹⁹ Yaꞌipi huaꞌanoꞌsaꞌ, maꞌhuanoꞌsaꞌ, sacatoroꞌsaꞌ, inapita cari shaꞌhuitërahuë: “Canpoasoꞌ, panca sacato nisarëhuaꞌ. Co inaquëráchin sacatatëhuahuëꞌ, aquë aquë niacorëhuaꞌ.

²⁰ Napoaton insëquësona tronpita pihuipisoꞌ natanpatamaꞌ, aꞌnaroáchin taꞌaintacoꞌ. Naporoꞌ Yosënënpoa catahuainpoaso marëꞌ ahuëtarin,” itërahuë.

²¹ Inapochin niacoatoi, iꞌhuaquë huarëꞌ iꞌhuaquë huarëꞌ sacatërai. Aꞌnaquën sacatasoiꞌ, napopinchin nansanëna sëꞌquërahuatona aꞌpaitapi.

²² Naporahuaton yaꞌipi sacatoroꞌsa inaranchin huëꞌëcaiso camairahuë. Catahuatoroꞌsa quëran huarëꞌ, ina pochin camairahuë. Tashinta aꞌpaitacaiso marëꞌ, tahuërinta sacatacaiso marëꞌ napotërahuë.

²³ Naporahuaton co iꞌnanpiratoi huëꞌëraihuëꞌ. Nansanta niacoantëraiquëranchin huëꞌërai. Amacaꞌhuaiso marëáchin iꞌnanpirarai.