Miqueas 6 - Chayahuita (Shahui)

Yosëri israiroꞌsa shaꞌhuirapirinsoꞌ

¹ Naquëranchin Siniorosoꞌ, nontaantarinpoaꞌ: “Israiroꞌsaꞌ. Ca Sinioroco shaꞌhuirapiaranquëmasoꞌ natancoꞌ: Aꞌna piyapi coisëquë quëpahuachinara, huanirahuaton, maꞌsona onporinsoꞌ coisëroꞌsa shaꞌhuitërin. Inapochachin canpitantaꞌ, maꞌsona onporamasoꞌ motopiroꞌsa shaꞌhuitatë pochin nitocoꞌ. Inapitanta natanatënënquëmaꞌ, catahuainënquëmaꞌ,” itërinpoaꞌ.

^2-3 Motopiroꞌsaꞌ yaꞌhuërë nontaton, itapon: “Motopiroꞌsaꞌ, canpitaso simintori pëi achinirinso pochin isoroꞌpaꞌ achiniramaꞌ. Piyapi pochin nicatomaꞌ, piyapinëhuëpita shaꞌhuirapiarahuësoꞌ, natancoꞌ. Israiroꞌsaso piyapinëhuëpita nipirinahuëꞌ, shaꞌhuirapiarahuë,” itërin. Ina quëran itaantarinpoaꞌ: “Israiroꞌsanquëmaꞌ. ¿Maꞌta carima onpotatënquëma apiranquëmaꞌ? Shaꞌhuitoco nitochi.

⁴ Shimashonëmapita iráca Iquipitoquë chiníquën asacatatona aparisitápirinahuëꞌ, cari ocoiato nichaꞌërahuë. Naporahuaton catahuainëmaso marëꞌ Moisësë, Aaron, Maria, inapita acorahuë.

⁵ Canpitaso piyapinëhuëpitanquëmaꞌ. Moapo copirno Paraco itopisoꞌ naporinso yonquicoꞌ. Paramo ama huachi noya yaꞌhuëcamaso marëhuëꞌ, shaꞌhuitiinquëmaso marëꞌ yapahuërërinsoꞌ, yonquicoꞌ. Inapotopirinhuëꞌ, ca nohuanton Paramori shaꞌhuitërinsontaꞌ, yonquicoꞌ. Shimashonëmapita Sitin quëran pipirahuatonaꞌ, Quiricaroquë canconacaiso marëꞌ napopisontaꞌ, yonquiricoꞌ. Cortaniiꞌ ayanirahuëtaquëchin pëntonatonaꞌ, paꞌpi canatopisopita pochin nipisoꞌ yonquicoꞌ,” itërinpoaꞌ.

Sinioro nohuantërinsoꞌ

⁶ Canpitaso naporamaꞌ: “Siniorosoꞌ, Yosë. Inápaquë yaꞌhuërinsopitanta huaꞌanëntërin. Ina noya nicainpoaso marëꞌ ¿maꞌta aꞌnotatëhua chinotërëꞌpëhuaya? Toroaꞌhuaroꞌsa aꞌna piꞌipihuaninso oshanënpoa marëꞌ yaꞌipi ahuiquitohuatëhuaꞌ, ¿noya niꞌnëpënpoaꞌ?

⁷ Huaranca carniro, paꞌpi napaiꞌ asitona tomaꞌ, inapita aꞌnotohuatëhuaꞌ, ¿noya cancantërëꞌpoꞌ? Sinioro co natëtëhuahuëꞌ oshahuanëhua niꞌton, pahuërëatë pochin nicacaso marëꞌ, huiꞌnanpoa paninantërëhuasoꞌ quëtohuatëhua ¿noya niꞌnëpënpoaꞌ?” tënamaꞌ.

⁸ Napopiramahuëꞌ, co inapita Siniorosoꞌ nataninquëmahuëꞌ. Nani inaso maꞌsona nicacasoꞌ shaꞌhuitërinpoaꞌ. Piyapiꞌsa nosoroatëhua paꞌpoyacaso yaꞌhuërin. Maꞌsona nicacasoꞌ shaꞌhuihuatëra, ananicaso yaꞌhuërin. Naporahuaton: “Caora co nanitërahuë noya nicaꞌhuasoꞌ,” taꞌtëhuaꞌ, Sinioroíchin natëcaso yaꞌhuërin.

^9-16 (-)