Miqueas 4 - Chayahuita (Shahui)

Sinioro yaꞌipi huaꞌanëntohuachin, sano cancantapisoꞌ

¹ Ayaro tahuëri yaꞌcaritohuachin, Sinioro chinotërëhuaso pëi yaꞌhuërinquë motopiaꞌhua, aꞌnapita motopiroꞌsa quëran noya noya Siniorori acoapon. Naporahuaton aꞌnapita motopiroꞌsa quëran ina inápa acoapon. Yaꞌipi isoroꞌpaquë yaꞌhuëpisopita inaquë huëcaponaꞌ.

² Notohuaroꞌ nisha nisha piyapiꞌsa huëcapona pochin: “Huëco pantatëhua Sion motopiquë Sinioro chinotahuaꞌ. Inaquë pëinën yaꞌhuërin niꞌton, yaꞌipi israiroꞌsari chinotërin. Inasoꞌ nanamën aꞌchintarinpoaꞌ. Onpopinsona nanpicasoꞌ, anitotarinpoaꞌ,” tosapi. Ninapotatonaꞌ, Quirosarinquë paponaꞌ. Inaquë Sinioro nanamën aꞌchinapi niꞌton, paꞌsapi. Inaquë Siniorosoꞌ piyapinënpita nanamën anitotarin.

³ Naporoꞌ Siniorosoꞌ coisë pochin nicaton, nisha nisha piyapiꞌsa noꞌtëquën shaꞌhuitapon. Notohuaroꞌ piyapiꞌsa nanan yaꞌhuëtopisoꞌ, áquë yaꞌhuëpirinahuëꞌ, maꞌsona onpotacaisoꞌ shaꞌhuitapon. Shaꞌhuitohuachin, inahuaso sahuëninëna quëran noꞌpaꞌ ohuërënanoꞌsa ocoiaponaꞌ. Nansanëna quëraontaꞌ, yaquitonanoꞌsa ocoiaponaꞌ. Naporosoꞌ, co huachi niahuëcaiso niaꞌchintaponahuëꞌ. Naporahuaton co huachi niahuëaponahuëꞌ.

⁴ Ina tahuëri nanihuachin, co huachi tëꞌhuarëꞌna yaꞌhuëaponahuëꞌ. Opanënaꞌ, iquiranënaꞌ, inapita huanirinsoanaquë, aꞌnaya aꞌnaya noya chinotaponaꞌ. Sinioro chachin yaꞌipi nanitapaton, inapocaso shaꞌhuitarinpoaꞌ.

⁵ Nisha piyapiroꞌsasoꞌ, mamanshinëna natëpi. Canpoaso napoaponahuëꞌ: “Sinioroso Yosënënpoaꞌ,” taꞌtëhuaꞌ, inasáchin natëahuaꞌ.

^6-7 Sinioro chachin shaꞌhuitaantarinpoaꞌ: “Piyapinëhuëpita anaꞌintërahuë niꞌton, nisha nisha nacionoꞌsaquë quëpapi. Inaquë naꞌcon aparisitopi. Niꞌniri ohuicaroꞌsa yaꞌcontaton ayanquëtërinso pochin piyapinëhuëpita nitërahuë. Inapotopirahuëꞌ, huaꞌanëntaꞌhuaso caniaritohuato cari chachin anaꞌintërahuë quëran, caraya chaꞌëpisopita ayontoantarahuë. Inapitaroꞌco aꞌnara panca nacion ocoiarahuë. Ca chachin Sinioroco, piyapinëhuëpita huaꞌanëntarahuë. Sion motopiquë yaꞌhuërahuë quëran, huaꞌanëntarahuë. Co huachi onporo tëranta aꞌnapitari huaꞌanëntarinhuëꞌ.

⁸ Quirosarinquë yaꞌhuëpisopitasoꞌ, Sion motopiquë noyá niacorapipi. Inapoaton ohuica aꞌpainaꞌpiroꞌsa torinën pochin ninin. Inaquë chachin canta huënsëato huaꞌanëntarahuë niꞌton, iráca pochachin niantapon,” tënin.

Coꞌhuara Sinioro huaꞌanënchátërasohuëꞌ, maꞌpitasona onpocaso yaꞌhuëarinsoꞌ

⁹ Ina quëran Sinioro taantapon: “Iporaso israiroꞌsanquëmaꞌ, yaꞌhuërama noꞌpa quëran quëpainëmaso yaꞌhuërin niꞌton, ¡nohuantëramaso chachin noncarocoꞌ! Sanapi huaica marëꞌ iquitërinso pochachin nicoꞌ. Copirno yaꞌhuëtopirinquëmahuëꞌ, ¡inimicoroꞌsa quëpainënquëmaso yaꞌhuërin! Copirno ayonquinaꞌpiroꞌsanta co chiminpirinahuëꞌ, ¡inimicoroꞌsa quëpainënquëmaso yaꞌhuërin!

¹⁰ Co nohuantopiramahuëꞌ, inimiconëmapita áquë quëpaponënquëmaꞌ. Papironiaꞌpaꞌ huarëꞌ cansaramaꞌ. Papoma pochin caparoꞌtëquë huëꞌërantapomaꞌ. Napoarama niꞌton, ipora Quirosarinquë yaꞌhuëramasopitasoꞌ, sanapi yahuaiton nisiꞌhuitërinso pochin nicoꞌ. Napoaponahuëꞌ, huaꞌqui parisitëramaso piquëran inimiconëma quëran carima nichaꞌësaranquëmaꞌ. Piyapinëhuëpitanquëma niꞌton, napotaranquëmaꞌ.

¹¹ Iporasoꞌ naꞌa nacionoꞌsaquë yaꞌhuëpisopita ahuëinënquëmaso marëꞌ niyontonpi: ‘Huëco Quirosarin ataꞌhuantatëhuaꞌ, capa cancantahuaꞌ,’ niitopi.

¹² Inapitasoꞌ, co yonquirahuëso nitotopihuëꞌ. Cari aꞌna tahuëri inimiconëmapita ayontonarahuë. Trico cayarinso mapachinara, tonpopi. Inapotahuatona toꞌnorapiquë yontonpi. Inapochachin cantaꞌ, inimiconëmapita nitarahuë.

¹³ Ina quëran Quirosarinquë yaꞌhuëramasopita camaiaranquëmaꞌ: ‘Paatoma inimiconëmapita anaꞌintocoꞌ. Toro trico toꞌnorarinso pochin inapita nitocoꞌ. Carinquëma catahuaranquëma niꞌton, ina chinirinso pochin chiniaramaꞌ. Huaꞌna quëran pomohuanaton, shaꞌpi huaꞌna quëran toꞌtëratëtërinso pochin nisha nisha parti quëran huëꞌpisopita ataꞌhuantapomaꞌ. Inapitaso ihuatatonaꞌ, tiquitatonaꞌ, inapoatona maꞌhuanpiso matapomaꞌ. Matatomaꞌ, quëtapomaco. Ca Sinioroco yaꞌipi isoroꞌpaꞌ huaꞌanëntato, camaiaranquëmaꞌ,’ itaranquëmaꞌ,” tënin.