Mateo 5 - Chayahuita (Shahui)

Panënquë aꞌchininsoꞌ

^1-2 Ina quëran notohuaroꞌ piyapiꞌsaꞌ niyontonpi. Inapita quënanahuaton, Quisoso panënquë paꞌsahuaton, huënsëconin. Imarinsopitari tancapitohuachinara, naꞌcon aꞌchintárin.

Noya cancantopisopita

³ “Natanco iyaroꞌsaꞌ aꞌchinchinquëmaꞌ. Yosë huëntonënquë yayaꞌconpatamaꞌ, iso pochin cancantacasoꞌ yaꞌhuërin. ‘Caora co nanitërahuëꞌ noya nicaꞌhuasoꞌ. Catahuaco Sinioro,’ topatamaꞌ, Yosë noya niꞌsarinquëmaꞌ niꞌton, noya cancantaramaꞌ. Huaꞌanëntërinquë chachin ayaꞌconarinquëmaꞌ.

⁴ Sëtohuatamaꞌ, Yosë achinicancanarinquëmaꞌ. Oshanëmaꞌ yonquiatomaꞌ, cancanëma quëran huarëꞌ sëtohuatamaꞌ, Yosë noya niꞌsarinquëmaꞌ. Catahuarinquëmaꞌ noya cancantacamaso marëꞌ.

⁵ Sano piyapi nipatamaꞌ, Yosë noya niꞌsarinquëmaꞌ. Naporahuaton, aꞌna tahuëri nasharoꞌpaquë yaꞌhuëmiataramaꞌ.

⁶ Tanarëso pochin, yamororëso pochin cancantatomaꞌ, Yosë naꞌcon nohuantocoꞌ. Ina pochin cancantacasoáchin nohuantohuatamaꞌ, noya niꞌsarinquëmaꞌ. Catahuarinquëmaꞌ ina pochin cancantacamaso marëꞌ. Sano cancantaramaꞌ.

⁷ Aꞌnapita nosorohuatamaꞌ, Yosë nosoroarinquëmaꞌ canpitantaꞌ. Noya cancantaramaꞌ.

⁸ Yaꞌipi cancanëma quëran imapatamaꞌ, Yosë nohuitaramaꞌ. Naporahuaton, aꞌna tahuëri ina quënancontahuatamaꞌ, noyá nohuitaramaꞌ.

⁹ Isoroꞌpaquë naꞌa piyapiꞌsaꞌ ninoꞌhuipirinahuëꞌ, canpitari catahuacoꞌ noya ninonchinaꞌ. Ina marëꞌ Yosë noya niꞌsarinquëmaꞌ. Huiꞌnin pochin cancantiarinquëmaꞌ.

¹⁰ Yosë natëramaso marëꞌ aparisitohuachinënquëmaꞌ, Yosë noya niꞌsarinquëmaꞌ. Huaꞌanëntërinquë chachin nani ayaꞌconinquëmaꞌ. Aꞌna tahuëri inápaquë yaꞌhuëcontaramaꞌ.

¹¹ Imaramacoso marëꞌ aꞌnaquën noꞌhuiarinënquëmaꞌ, ahuëarinënquëmaꞌ, pinosarinënquëmaꞌ, nisha nisha nonpinapiarinënquëmaꞌ. Napotopirinënquëmahuëꞌ, ama sëtocosohuëꞌ. Ina marëꞌ Yosë noya niꞌsarinquëmaꞌ niꞌton, nóya cancantocoꞌ.

¹² Iracantaꞌ Yosë piyapinënpita pënëntohuachinara, aꞌnaquëni inapochachin noꞌhuipi. Napoaton aꞌnapita noꞌhuihuachinënquëmaꞌ, noya cancantocoꞌ. Parisitëramaso marëꞌ Yosëꞌpaꞌ naꞌcon acanaarinquëmaꞌ. Ina yonquiatomaꞌ, capa cancantocoꞌ,” itërin Quisosori.

Yamora pochin nininsoꞌ

¹³ Ina quëran itantarin: “Canpitasoꞌ iyaroꞌsaꞌ, yamora pochin nicatomaꞌ aꞌnapita catahuamasoꞌ yaꞌhuërin. Napoaponahuëꞌ, yamora chimipitë pochin nicatoma co aꞌnapita catahuahuatamahuëꞌ, co huachi insonta natëarinquëmahuëꞌ.

¹⁴ Isoroꞌpaquë yaꞌhuëpisopita tashinanquë paꞌnëso pochin nisapirinahuëꞌ, canpitari aꞌpintatë pochin nitaramaꞌ. Niꞌcoꞌ iyaroꞌsaꞌ. Ninanoꞌ panënquë yaꞌhuëhuachina, yaꞌipi piyapiꞌsari quënanpi.

¹⁵ Nanpariontaꞌ iꞌchinpihuatëra, co caconquë ocohuëtërëhuëꞌ. Aꞌninquëchin acorëꞌ pëiꞌ acoana aꞌpinacaso marëꞌ. Piyapiꞌsaꞌ inaquë yaꞌhuëhuachinara, noya quënantopi.

¹⁶ Inapochachin canpitantaꞌ aꞌpininso pochin nicatomaꞌ, noyasáchin nicoꞌ. Aꞌnapita nicatënënquëmaꞌ: ‘Ma noya Tata Yosëri catahuarin niꞌton, noya nisapi,’ tosapi,” tënin.

Iráca pënëntopisoꞌ

¹⁷ Ina quëran itaantarin: “Iráca Moisësë, pënëntonaꞌpiroꞌsaꞌ, inapita naꞌcon pënëntopi. Pënëntatonaꞌ, ninshitopi. Co ina naniantacasoꞌ yaꞌhuërinhuëꞌ, tënahuë. Yaꞌipi inapita ninopisoꞌ nanicaso marëꞌ oꞌmarahuë. Maꞌsona tapon naporinsopita noꞌtëquën shaꞌhuichinquëmaꞌ.

¹⁸ Tëhuënchachin itëranquëmaꞌ. Isoroꞌpaꞌ taꞌhuantaquë huarëꞌ Yosë quiricanën iráca ninshitopisoꞌ yaꞌhuápon. Co aꞌna huiꞌsharinso tërantaꞌ topinan quëran ninshitopihuëꞌ. Yaꞌipi ninorinsoꞌ naniarin huachi.

¹⁹ Napoaton piꞌpian tërantaꞌ co natëhuatamahuëꞌ, co Yosë noya niꞌsarinquëmahuëꞌ. Huaꞌanëntërinquë co acanarinquëmahuëꞌ. Piyapiꞌsaꞌ aꞌchintatomaꞌ: ‘Ama natëquësohuëꞌ,’ itohuatamaꞌ, co noya aꞌchinaramahuëꞌ. ‘Natëcasoꞌ yaꞌhuërin,’ itohuatamaꞌ, noya aꞌchinaramaꞌ. Natëhuatamaꞌ, Yosë noya niꞌsarinquëmaꞌ. Huaꞌanëntërinquë acanamiatarinquëmaꞌ.

²⁰ Cotio maistroꞌsaꞌ, parisioroꞌsaꞌ, inapita Yosë quiricanën noya nitotaponaraihuëꞌ, co cancanëna quëran imapihuëꞌ. Canpitantaꞌ co yaꞌipi cancanëma quëran huarëꞌ imapatamahuëꞌ, co onporontaꞌ Yosë huaꞌanëntërinquë yaꞌconaramahuëꞌ,” tënin.

Co noꞌhuitacasoꞌ yaꞌhuërinhuëꞌ

²¹ Ina quëran itaantarin: “Iráca pënëntopisoꞌ nani nitotëramaꞌ. Mashocoroꞌsaꞌ iráca pënënpi. ‘Ama piyapi tëpacosohuëꞌ. Tëpahuatamaꞌ, huaꞌanoꞌsaꞌ anaꞌintinquëmasoꞌ yaꞌhuërin,’ topirinahuëꞌ.

²² Co tëpatërëso marëáchin anaꞌintinpoasoꞌ yaꞌhuërinhuëꞌ, tënahuë. Aꞌna piyapi noꞌhuihuatamaꞌ, anaꞌintarinquëmaꞌ. Pinotohuatamantaꞌ, cotio ansianoꞌsaꞌ anaꞌinchinquëmaꞌ. Cancanëma quëran huarëꞌ noꞌhuitomaꞌ, ‘Quëmasoꞌ sopainquën,’ itohuatamaꞌ, pënquë chachin parisitacasoꞌ yaꞌhuërin, tënahuë.

²³ Napoaton, iyaroꞌsaꞌ, aꞌnaroáchin nanan anoyatacasoꞌ yaꞌhuërin. Yosë yachinotohuatamaꞌ, yonquicoꞌ. Piꞌpian tërantaꞌ nanan yaꞌhuëhuachin,

²⁴ aꞌnaroáchin paatomaꞌ, anoyatocoꞌ. Nani nanan anoyatohuatamaꞌ, naporo huarëꞌ Yosë pëinënquë paantacoꞌ. Yosë chinotatomaꞌ maꞌsha yaquëtëramasoꞌ, quëtoco huachi.

²⁵ Niꞌcoꞌ. Nihuitëramaso marëꞌ yaquëpahuachinënquëmaꞌ, aꞌnaroáchin nanan anoyatocoꞌ. Co anoyatohuatamahuëꞌ, coisëquë quëparinënquëmaꞌ. Coisëquë quëpahuachinënquëmaꞌ, sontaroꞌsaquë yoꞌcoaninënquëmaꞌ, tashinan pëiquë poꞌmoarinënquëmaꞌ.

²⁶ Inaquë poꞌmohuachinënquëmasoꞌ, yaꞌipiya pahuërëtaquë huarëꞌ pipiaramaꞌ,” tënin Quisoso.

Monshihuaninsoꞌ

²⁷ Ina quëran itantarin: “Isontaꞌ iráca pënëntopisoꞌ. ‘Saꞌamaꞌ yaꞌhuëtohuachinquëmaꞌ, ama monshihuancosohuëꞌ,’ tënin iráca, natantëramaꞌ.

²⁸ Nipirinhuëꞌ, co monshihuanpiso marëáchin anaꞌintacasoꞌ yaꞌhuërinhuëꞌ, tënahuë. Aꞌna sanapi cancanëna quëran noyahuachinaꞌ, ina marëntaꞌ oshahuanapi. Nani monshitërinso pochin Yosëri niꞌsarin.

²⁹ Napoaton, yaꞌpirama quëran quënanamaso marëꞌ co noyahuëꞌ yonquihuatamaꞌ, paꞌpi co noyahuëꞌ nisaramaꞌ. Yaꞌpiramaꞌ ocoiramaꞌ naporini, noya noya niitomahuëꞌ. Somaraya nipomarahuëꞌ, co parisitopiquë paꞌitomahuëꞌ. Catoꞌ quëran chachin noya niꞌtapomarahuëꞌ parisitopiquë tëꞌyatohuachinënquëmaꞌ, paꞌpi co noyahuëꞌ nisaramaꞌ.

³⁰ Imirama quëran piꞌpian tërantaꞌ co noyahuëꞌ nipatamaꞌ, oshahuanamaꞌ. Ninishitëimiratëramaꞌ naporini, noya noya niitomahuëꞌ. Apia nipomarahuëꞌ, co parisitopiquë paꞌitomahuëꞌ. Imiramaꞌ nishitëramaso pochin cancantatomaꞌ, yaꞌipi aoshahuaninquëmasoꞌ aꞌpocoꞌ,” tënin.

Saꞌahuanoꞌsaꞌ pënëninsoꞌ

³¹ Ina quëran itaantarin: “Isontaꞌ iráca pënëntopisoꞌ. ‘Aꞌna quëmapi saꞌin yatëꞌyatohuachin, co topinan tëꞌyatacasoꞌ yaꞌhuërinhuëꞌ. Coisëquë paaton, quirica aninshichin: “Iso sanapi nani tëꞌyatërahuë huachi,” taꞌcaso aninshichin. Ina quëran sanapi quëtacasoꞌ yaꞌhuërin,’ topi.

³² Caso nipirinhuëꞌ nisha pënënanquëmaꞌ. Co saꞌama monshihuanpachinahuëꞌ, co onporontaꞌ tëꞌyatamasoꞌ yaꞌhuërinhuëꞌ, tënahuë. Topinan tëꞌyatohuatamaꞌ, oshahuanaramaꞌ. Ina sanapintaꞌ soꞌyantahuachin, monshihuaninso pochin nisarin. Nasha soꞌiontaꞌ, monshin pochin nisarin. Co onporontaꞌ tëꞌyatacasoꞌ yaꞌhuërinhuëꞌ, tënahuë,” tënin.

Noꞌtëquënáchin nonacasoꞌ yaꞌhuërinsoꞌ

³³ Ina quëran itaantarin: “Isontaꞌ shimashonëmapita iráca pënënpisoꞌ. ‘Yoscoarëꞌ noꞌtëquën nontaranquën, itohuatëra, noꞌtëquën nontacasoꞌ yaꞌhuërin, Yosë anaꞌintohuachinpoaꞌ. Ina pochin nonpatëra, shaꞌhuitëranso chachin nicacasoꞌ yaꞌhuërin,’ topi.

³⁴ Nipirinhuëꞌ, carinquëmaꞌ shaꞌhuichinquëmaꞌ. Noꞌtëquënáchin nonpatëra, co Yoscoarëꞌ taꞌcasoꞌ yaꞌhuërinhuëꞌ. Co onporontaꞌ nonpinacasoꞌ yaꞌhuërinhuëꞌ, tënahuë. Aꞌnaquënsoꞌ yanonpinatonaꞌ, taponaꞌ: ‘Piꞌiroꞌtëꞌ yaꞌhuërin niꞌton, noꞌtëquën nontëranquën,’ toconpi. ‘Ina pochin nontato, nonpintohuatëra, co Yosë anaꞌintarincohuëꞌ,’ topirinahuëꞌ. Piꞌiroꞌtëntaꞌ Yosëri ninin. Inaquë yaꞌhuaton, yaꞌipiya huaꞌanëntarin. Napoaton co ina pochin nonacasoꞌ yaꞌhuërinhuëꞌ.

³⁵ Aꞌnaquëontaꞌ taponaꞌ: ‘Isoroꞌpaꞌ yaꞌhuërin niꞌton, noꞌtëquën nontëranquën,’ topi. Yanonpinatonaꞌ, napopirinahuëꞌ. Isoroꞌpantaꞌ Yosëri ninin. Chini chiníquën nanantaton, isëquëntaꞌ huaꞌanëntërinpoaꞌ. ‘Quirosarin yaꞌhuërin niꞌton, noꞌtëquën nontëranquën,’ toconpi aꞌnaquëontaꞌ. Aꞌna tahuëri inaquë Yosëri aꞌpaimarinsoꞌ huaꞌanëntapon huachi. Napoaton co ina pochin nonacasoꞌ yaꞌhuërinhuëꞌ.

³⁶ ‘Motoꞌ yaꞌhuëtërinco niꞌton, noꞌtëquën nontëranquën,’ topi aꞌnaquëontaꞌ yanonpinatonaꞌ. Ama ina pochin noncosohuëꞌ. Acatohuatamara, co nanitëramahuëꞌ aꞌna ainëma tërantaꞌ ayararintantacasoꞌ. Yosëíchin nanitërin.

³⁷ Maꞌsona tërantaꞌ iyaroꞌsaꞌ nonpatamaꞌ, noꞌtëquënáchin noncoꞌ. ‘Paꞌsarahuë,’ topatamaꞌ, pacoꞌ. ‘Co paꞌsarahuëꞌ,’ topatamaꞌ, ama pacosohuëꞌ. Noꞌtëquënáchin nonpatamaꞌ, co Yoscoarëꞌ taꞌcasoꞌ yaꞌhuërinhuëꞌ. Piꞌpisha tërantaꞌ piyapi nonpintohuatamaꞌ, sopai nohuanton napoaramaꞌ, tënahuë,” tënin Quisoso.

Yaiꞌhuërëtopisoꞌ

³⁸ Ina quëran aꞌchintaantarin: “Isontaꞌ iráca pënëntopisoꞌ. ‘Aꞌna piyapi aꞌnari ahuëaton, tapirayahuachin, coisëquë quëpaquëꞌ. Inaquë noꞌtëquën iꞌhuërëchin. Inantaꞌ tapirayacasoꞌ yaꞌhuërin. Natëontaꞌ nipantohuachin, coisëquë quëpaquëꞌ iꞌhuërëchin,’ topi.

³⁹ Napopirinahuëꞌ, carimaꞌ shaꞌhuichinquëmaꞌ. Co canpita capinisoꞌ niiꞌhuërëtacasoꞌ yaꞌhuërinhuëꞌ, tënahuë. Maꞌsha onpotohuachinënquëmaꞌ, ama noꞌhuicosohuëꞌ. Panpirayahuachinënquëmaꞌ, ama mantaꞌ iꞌhuërëtocosohuëꞌ. Naquëranchin panpiantahuachinquëmaꞌ, co naporo tërantaꞌ noꞌhuicasoꞌ yaꞌhuërinhuëꞌ.

⁴⁰ Aꞌnaquën noꞌhuitënquëmaꞌ, coisëquë quëparinënquëmaꞌ. ‘Aꞌmoranso quëtoco,’ itohuachinënquëmaꞌ, quëtocoꞌ. Aipi aꞌmoransontaꞌ quëpatopirinënquëmahuëꞌ, co noꞌhuicasoꞌ yaꞌhuërinhuëꞌ.

⁴¹ Inso tërantaꞌ camaiatënquëmaꞌ: ‘Pëꞌpëtonëhuë macaton, aꞌna quiromitro pochin quëpatoco,’ itohuachinquëmaꞌ, ama noꞌhuicosohuëꞌ. ‘Noyahuaꞌ. Nohuantohuatan, catoꞌ quiromitro quëpachinquën,’ itocoꞌ.

⁴² Aꞌnaquën: ‘Maꞌsha quëtoco,’ itohuachinënquëmaꞌ, ama apiratomahuëꞌ, quëtocoꞌ. ‘Cantaꞌ maꞌsha aꞌnanco, topirahuëꞌ,’ itohuachinënquëmantaꞌ, aꞌnancoꞌ. Onpopiontaꞌ nosoroatëꞌ catahuacasoꞌ yaꞌhuërin,” tënin.

Inimicoroꞌsantaꞌ nosorocasoꞌ yaꞌhuërinsoꞌ

⁴³ Ina quëran aꞌchintaantarin: “Isontaꞌ iráca pënëntopisoꞌ. ‘Canpita capini ninosorocoꞌ. Inimiconëmapitaso nipirinhuëꞌ, co nosorocasoꞌ yaꞌhuërinhuëꞌ,’ topi.

⁴⁴ Nipirinhuëꞌ carimaꞌ shaꞌhuichinquëmaꞌ. Inimiconëmapitantaꞌ iyaroꞌsaꞌ, nosorocoꞌ. Aparisitopirinënquëmaontaꞌ, nosorocasoꞌ yaꞌhuërin. Inapita marëntaꞌ noya Yosë nontocoꞌ inahuantaꞌ catahuain.

⁴⁵ Inapotohuatamaꞌ, Yosë pochin cancantaramaꞌ. Inasoꞌ yaꞌipi piyapiꞌsaꞌ nosororin. Ina nohuanton, piꞌi, oꞌnan, inapita yaꞌhuërin noya nanpicaso marëꞌ. Co imarinsopita marëáchin piꞌi aꞌpininhuëꞌ. Noya nipisopita, oshahuanoꞌsantaꞌ, yaꞌipiya aꞌpintërin. Naporahuaton, oꞌnaontaꞌ napopianachin acotërinpoaꞌ maꞌsha apapotacaso marëꞌ.

⁴⁶ Nipayaramasopitaráchin nosorohuatamaꞌ, co ina marëꞌ Yosë acanaarinquëmahuëꞌ. Copirno marëꞌ coriqui maꞌpatonaꞌpiroꞌsantaꞌ nipayapisopita nosoropi.

⁴⁷ Iyamaráchin noya nontohuatamaꞌ, co noya noya ninamahuëꞌ. Co Yosë nohuitopisopitahuëntaꞌ inahua capini noya ninontopi. Napoaton canpitasoꞌ nisha piyapiroꞌsantaꞌ noya nontocoꞌ.

⁴⁸ Tata Yosë pochin cancantacasoꞌ yaꞌhuërin. Inaso noyasáchin ninin niꞌton, canpitantaꞌ ina pochin cancantatomaꞌ, noyasáchin nicoꞌ,” tënin.