Mateo 28 - Chayahuita (Shahui)

Quisoso nanpiantarinsoꞌ

¹ Chinoto tahuëri piquëran Maria Mactarina, aꞌna Mariarëꞌ naquëranchin paantapi poꞌmopiquë nicacaiso marëꞌ. Tomio tahuëri tashíramiachin naꞌpi naninꞌpaꞌ paꞌsapirinahuëꞌ.

² Aꞌnanaya panca ocohua paꞌnin. Sinioro anquëninëni inápa quëran oꞌmarahuaton, pancaraꞌpi paꞌcopitopisoꞌ chiꞌhuincarin. Chiꞌhuincarahuaton, ina aipi huënsërin.

³ Huënaráchin huënaráchin oꞌcori pochin yaꞌnorin. Huiríchin aꞌmorin. Piꞌshiro quëran huiri huiríchin.

⁴ Ina niꞌsahuatonaꞌ, sontaroꞌsaꞌ paꞌyanpi. Paꞌpi tëꞌhuatopi. Ropa ropátahuatonaꞌ, chimipi pochin noꞌpaquë anotopi.

⁵ Ina quëran sanapiꞌsantaꞌ canquihuachinara, anquëniri itërin: —Ama paꞌyancosohuëꞌ. Quisoso corosëquë patanantopisoꞌ yonisaramasoꞌ, nitotërahuë.

⁶ Co huachi isëquë yaꞌhuërinhuëꞌ. Shaꞌhuitërinquëmaso chachin nani nanpiantarin. Huëcoꞌ niꞌquiricoꞌ poꞌmopiquë. Capa huachi.

⁷ Manóton paatomaꞌ, caꞌtanoꞌsanënpita shaꞌhuitoncoꞌ: “Nani nanpiantarin. Inaꞌton Caririaquë paꞌsarin. Inatohuaꞌ quënancoantaramaꞌ,” itoncoꞌ. Nani shaꞌhuitëranquëmaꞌ, itërin anquëniri.

⁸ Natanahuatonaꞌ, aꞌnaroáchin naꞌpi nanin quëran pipipi. Paꞌpi paꞌyanpirinahuëꞌ. Nóya cancantatonaꞌ taꞌapi caꞌtanoꞌsanënpita shaꞌhuitacaiso marëꞌ.

⁹ Paꞌsapirinahuëꞌ, aꞌnanaya iraquë chachin Quisosori yaꞌnotërin. —Huëꞌcama imoyaroꞌsaꞌ, itërin. Ina nohuitatonaꞌ, yaꞌcarionpi. Monshorahuatonaꞌ, nantën iporantërahuatonaꞌ, chinotopi.

¹⁰ —Ama huachi paꞌyancosohuëꞌ. Paatomaꞌ, iyahuëpita shaꞌhuitoncoꞌ Caririaꞌpaꞌ paꞌinaꞌ. Inatohuaꞌ quënancoantarinaco, itahuaton, paꞌnin huachi.

Sontaroꞌsaꞌ napopisoꞌ

¹¹ Sanapiꞌsaꞌ paasoiꞌ, sontaroꞌsantaꞌ ninanoquë paꞌpi corto huaꞌanoꞌsaꞌ shaꞌhuitacaiso marëꞌ. “Quisoso paꞌpitopiquë noya niꞌsapiraihuëꞌ, aꞌnanaya panca ocohua paꞌnin. Naporoꞌ anquëni yaꞌnorahuaton, pancaraꞌpi paꞌcopitopisoꞌ chiꞌhuincarin. Niꞌpiraihuëꞌ, Quisoso nonën capa huachi,” itonpi.

¹² Ina quëran corto huaꞌanoꞌsaꞌ, cotio ansianoꞌsaꞌ inapita niyontonahuatonaꞌ, ninontápi. Nani ninontohuachinara, sontaroꞌsaꞌ amatantarahuatonaꞌ, naꞌcon coriqui quëtopi.

¹³ —Piyapiꞌsaꞌ shaꞌhuitocoꞌ: “Yono tashiꞌ Quisoso caꞌtanoꞌsanënpita huëꞌpi. Huëꞌësocoi, nonën quëpapi,” itocoꞌ.

¹⁴ Huaꞌanëmaꞌ natantaton ina marëꞌ noꞌhuihuachinquëmaꞌ, quiyari anoyatarai ama anaꞌintinquëmaso marëhuëꞌ, itopi.

¹⁵ —Noyahuaꞌ. Napoꞌi nipachin, tosahuatonaꞌ, coriqui maꞌpatopi. Paꞌsahuatonaꞌ, piyapiꞌsaꞌ nonpintopi. Cotio huaꞌanoꞌsari shaꞌhuitopiso chachin nonpinpi. Ipora huantaꞌ naꞌa cotioroꞌsaꞌ ina nonpin nanan natëpi.

Caꞌtanoꞌsanënpita aꞌchinacaiso marëꞌ shaꞌhuitërinsoꞌ

¹⁶ Ina quëran shonca aꞌna caꞌtanoꞌsanënpitasoꞌ paꞌpi Caririaꞌpaꞌ. Aꞌna panënquë paꞌpi, Quisosori shaꞌhuitërinquë chachin.

¹⁷ Inaquë Quisoso quënanconahuatonaꞌ, chinotopi. Aꞌnaquënso nipirinhuëꞌ piꞌpian co natërinhuëꞌ. “Co inahuëꞌ nimara,” topirinahuëꞌ.

¹⁸ Quisosori yaꞌcarirahuaton, itapon: —Tata Yosë nohuanton, chini chiníquën nanantërahuë. Inápaquë yaꞌhuërinsopita, isoroꞌpaquë yaꞌhuërinsopita, yaꞌipiya huaꞌanëntarahuë.

¹⁹ Napoaton canpita paatomaꞌ, yaꞌipi piyapiꞌsaꞌ aꞌchintocoꞌ. Nisha nisha nananquë nonpisopita aꞌchintocoꞌ imainaco. Insosona natëhuachinaco, iꞌquë aporintocoꞌ. “Tata Yosë, Huiꞌnin, Ispirito Santo inapita nanan quëtërincoi niꞌton, aporintaranquën,” itahuatomaꞌ, aporintocoꞌ.

²⁰ Ina quëran yaꞌipi shaꞌhuitëranquëmasoꞌ aꞌchintocoꞌ natëinaco. Insëquësona paꞌpatamaꞌ, carinquëmaꞌ caꞌtanaranquëmaꞌ. Nani tahuëri catahuaranquëmaꞌ. Ayaroꞌ tahuëri naniquë huarëꞌ caꞌtanaranquëmaꞌ. Co onporontaꞌ pataranquëmahuëꞌ, itërin Quisosori. Nani huachi.