Mateo 26 - Chayahuita (Shahui)

Quisoso macacaiso marëꞌ chinotopisoꞌ

¹ Nani aꞌchintohuachina, caꞌtanoꞌsanënpita itapon:

² —Catoꞌ tahuëri pahuanarin Pascoa nanicasoꞌ, nani nitotëramaꞌ. Naporoꞌ Yosë quëran quëmapico niporahuëꞌ, masarinaco. Masahuatonaco, corosëquë patanantarinaco, itërin.

³ Ina quëran corto huaꞌanoꞌsaꞌ, cotio ansianoꞌsaꞌ, inapita Caihuasë pëinënquë niyontonpi. Inasoꞌ corto huaꞌan, chini chiníquën nanantërin.

^4-5 Inaquë niyontonahuatonaꞌ, ninontapi Quisoso tëpacaiso marëꞌ. —Ama pita tahuëri chachin maahuasohuëꞌ, piyapiꞌsaꞌ noꞌhuihuachinënpoaꞌ. Quisoso paꞌyatapi niꞌton, ahuëarinënpoaꞌ. Napoaton poꞌoana quëran maahuaꞌ, nitopi.

Huaꞌsaiquë opomototërinsoꞌ

⁶ Quisososo nipirinhuëꞌ Pitaniaquë paꞌnin. Simon pëinënquë coshatapatarin. Ina Simon chana caniori mapirinhuëꞌ, anoyatërinsoꞌ.

⁷ Misaquë coshatasoiꞌ, aꞌnaraꞌ sanapi huëꞌnin. Potiriaꞌhuaya huirinaꞌpi quëran nipisoꞌ quënin. Inaquë pimo huaꞌsaiꞌ naꞌcon paꞌtërinsoꞌ yaꞌhuërin. Quisoso nosoroaton, opomototërin.

⁸ Ina nicatona caꞌtanoꞌsanënpitasoꞌ, noꞌhuitopi. Noꞌhuitatona ninontopi. —¿Onpoatontaꞌ iso huaꞌsaiꞌ paꞌton nipirinhuëꞌ chiniarin?

⁹ Paꞌanin naporini, naꞌcon coriqui canaton saꞌahuaroꞌsaꞌ quëtacasoꞌ yaꞌhuëchitonhuëꞌ, nitopi.

¹⁰ Quisosori natanahuaton, itërin: —¿Maꞌmarëtaꞌ iso sanapi noꞌhuiramaꞌ? Tananpitocoꞌ. Naꞌcon nosoroatonco, inapotërinco.

¹¹ Nani tahuëri saꞌahuaroꞌsasoꞌ yaꞌhuërapi. Caso nipirinhuëꞌ, co huaꞌquiyahuëꞌ canpitaroꞌco yaꞌhuarahuë.

¹² Coꞌhuara chimiyantërasocohuëꞌ, nosoroatonco, nonëhuë huaꞌsaiquë opotërinco paꞌpitinacoso marëꞌ.

¹³ Noꞌtëquën itaranquëmaꞌ. Yaꞌipi parti noya nanan shaꞌhuihuachinaꞌ, iso sanapi napotërincosoꞌ shaꞌhuirapi antaꞌ. Co naniantapihuëꞌ, itërin.

Cotasëri shaꞌhuirapirinsoꞌ

¹⁴ Ina quëran, Cotasë Iscarioti paꞌpi co noyahuëꞌ yonquirin. Quisoso caꞌtanaponahuëꞌ, yashaꞌhuirapirin. Corto huaꞌanoꞌsaꞌ yaꞌhuërinquë paꞌsahuaton, itoonin:

¹⁵ —Poꞌoana quëran Quisoso aꞌnotohuatënquëmaꞌ, ¿onpo coriquitaꞌ quëtaramaco? itërin. —Cara shonca coriqui prata quëran nininsoꞌ quëchinquën, itopi. Itohuachinara: —Noyahuaꞌ. Quëtoco nipachin aꞌnochinquëmaꞌ, topachina, quëtopi.

¹⁶ Naporo quëran huarëꞌ Cotasë yonquirarin poꞌoana quëran aꞌnocaso marëꞌ.

Pascoa tahuëri coshatopisoꞌ

¹⁷ Pascoa tahuëri nipachina, nisha pan caꞌpi, co ahuëpocatopisohuëꞌ. Ina tahuëri nanihuachina, caꞌtanoꞌsanënpitari huëcapaipi. —¿Intohuataꞌ Maistro paatoi, Pascoa cosharoꞌ nii capacaso marëꞌ? itopi.

¹⁸ —Ninanoquë pacoꞌ. Inaquë aꞌna quëmapi quënanconaramaꞌ. Ina quënanconpatamaꞌ, shaꞌhuitocoꞌ. “Maistro aꞌparincoi niꞌton, huëꞌnai. Naporin: ‘Yosë ninorinsoꞌ nani naniriarin niꞌton, quëma pëinënquë Pascoa cosharoꞌ caꞌtanoꞌsanëhuëpitarëꞌco chachin coshatarai, tënin,’ itoncoꞌ,” itërin Quisosori.

¹⁹ Paꞌpachinara, Quisosori shaꞌhuitërinso chachin quënanconpi. Quëmapi quënanconahuatonaꞌ, nontopi. Nani natanconpachinara, inaquë Pascoa cosharoꞌ nipi capacaiso marëꞌ.

²⁰ Nani tashihuachina, Quisoso caꞌtanoꞌsanënpitarë chachin huëꞌpi. Huëꞌsahuatonaꞌ, misaquë huënsëquipi.

²¹ Coshatapona pochin itërin: —Noꞌtëquën ipora itaranquëmaꞌ. Shonca catonquëmaꞌ caꞌtanpiramacohuëꞌ, aꞌnaquëmaꞌ shaꞌhuirapiaramaco, itërin.

²² Natanahuatonaꞌ, sëtopi. Sëtatonaꞌ, aꞌnaya aꞌnayari Quisoso natanpi. —¿Incoitaꞌ Sinioro, yashaꞌhuirapirainquën? ¿Co cahuëꞌ nimara ti? itopi aꞌnaya aꞌnayari.

²³ —Tëhuënchachin aꞌnaquëmaꞌ yashaꞌhuirapiramaco. Ina sënanquëráchin iꞌshiaton carëꞌ caponahuëꞌ, yashaꞌhuirapirinco.

²⁴ Yosë quiricanën quëran ninorincoso chachin chiminarahuë. Yashaꞌhuirapirincoso nipirinhuëꞌ, maꞌhuantacha nicapon paya. Co nasitërinhuëꞌ naporini, noya noya niitonhuëꞌ, itërin.

²⁵ Itohuachina, Cotasërintaꞌ itërin: —¿Incoitaꞌ Maistro, yashaꞌhuirapirainquën? ¿Co cahuëꞌ nimara ti? itohuachina, —Quëma chachin mini, itërin.

²⁶ Coshatasoiꞌ, pan masahuaton Yosë nontërin. “Yosparinquën, Sinioro” itahuaton, sëꞌpanin. Ina quëran caꞌtanoꞌsanënpita quëtërin. —Caꞌcoꞌ iyaroꞌsaꞌ. Ca nonëhuë pochin isoꞌ, itërin.

²⁷ Minëntaꞌ masahuaton, “Yosparinquën Sinioro,” itahuaton, inantaꞌ quëtërin. —Yaꞌipinquëmaꞌ oꞌocoꞌ.

²⁸ Ca huënainëhuë pochin isoꞌ. Huënainëhuë paꞌsarin niꞌton, nasha quëran canpitarëꞌ Yosë anoyatërinsoꞌ shaꞌhuichinquëmaꞌ imacamaso marëꞌ. Chiminarahuë naꞌa piyapiꞌsaꞌ oshanënaꞌ inquitaꞌhuaso marëꞌ.

²⁹ Co huachi opaiꞌ oꞌoantarahuëꞌ. Chiminarahuë huachi. Aꞌna tahuëri Tata Yosë huaꞌanëntërinsoꞌ nanihuachin, canpitaroꞌco nasha pochin oꞌoantarahuë. Naporoꞌ noya noya cancantarihua huachi, itërin.

Pitrori nonpinapicasoꞌ ninorinsoꞌ

³⁰ Ina quëran Yosë cantanën cantarahuatonaꞌ, pipipi. Pipirahuatonaꞌ, Oriposë panënquë paꞌpi huachi.

³¹ Inaquë Quisosori itërin: —Iráca quiricanënquë ninoton, Yosë naporin: “Ca nohuanto, aꞌpaitonaꞌpi tëpaapi. Tëpahuachinaꞌ, ohuicanënpita yanquëërapi,” tënin. Inapochachin yatëpahuachinaco, yaꞌipinquëmaꞌ co chiníquën cancantatomahuëꞌ, taꞌananpiaramaco. Ipora tashi chachin napoaramaꞌ.

³² Chiminaporahuëꞌ, Yosë ananpitaantarinco. Ananpitaantahuachinco, caꞌton Caririaꞌpaꞌ paꞌsarahuë. Inatohuaꞌ niquënantarihuaꞌ, itërin.

³³ —Aꞌnapita taꞌananpipirinënquëontaꞌ, co casoꞌ taꞌarahuëꞌ, tënin Pitro.

³⁴ —Noꞌtëquën iyasha, itëranquën. Ipora tashi chachin coꞌhuara atari përashatërasohuëꞌ, cararoꞌ nonpinapiaranco. “Co casoꞌ Quisoso nohuitërahuëꞌ,” toconapon, itërin Quisosori.

³⁵ —Co Sinioro napoarahuëꞌ. Quëma imasaranquën niꞌton, yatëpapirinacohuëntaꞌ co onporontaꞌ nonpinapiaranquënhuëꞌ, itaantarin Pitrori. Inachachin topi yaꞌipiya.

Quisoso sëtaton, Yosë nontërinsoꞌ

³⁶ Ina quëran, Quisimani nararo itopiquë canconpi. Inaquë caꞌtanoꞌsanënpita shaꞌhuitërin. —Isëquë huënsëtacoꞌ. Pasëyáquë paꞌsarahuë Yosë nontapo, itërin.

³⁷ Caraíchin caꞌtanoꞌsanën amashamiachin quëparin. Pitro, Sipitio huiꞌninpita inapitaíchin quëparin. Naporoꞌ sëtaton, co napion cancantërin.

³⁸ —Paꞌpi sëtërahuë. Chiminchináchin sëtërahuë. Isëquë huënsëtacoꞌ. Ama huëꞌëtomarahuëꞌ, niꞌtácoꞌ, itërin.

³⁹ Amashamiachin paꞌsahuaton, isonconin. Noꞌpaquë huarëꞌ monshomarahuaton, Yosë nontërin: “Quëma nohuantohuatan Tata, nichaꞌëco ama maꞌsha onpoꞌisohuëꞌ. Main oꞌorëso pochin parisitaꞌhuasoꞌ yaꞌhuërin. Co parisitaꞌhuasoꞌ nohuantopirahuëꞌ, quëma nohuantohuatan, noya, tënahuë. Noꞌtëquën yanatëranquën,” itërin.

⁴⁰ Ina quëran huënantapirinhuëꞌ, cara chachin huëꞌësápi quënanquintarin. —Iya Pitro, ¿co aꞌna ora tërantaꞌ nanitëramahuëꞌ niꞌtamasoꞌ ti?

⁴¹ Ama huëꞌëtomahuëꞌ, niꞌtácoꞌ. Yosë nontocoꞌ ama sopai minsëinquëmaso marëhuëꞌ. Cancanëma quëranso mini Yosë yanatëpiramahuëꞌ, co canpitaora chiníquën cancantaramahuëꞌ, itërin.

⁴² Ina quëran paantarahuaton, Yosë nontaantarin. —Nohuantohuatan Tata, nichaꞌëco ama maꞌsha onpoꞌisohuëꞌ. Nipirinhuëꞌ co nohuantohuatanhuëꞌ, maꞌsona yaonpotohuatancontaꞌ noya, tënahuë. Noꞌtëquën yanatëranquën, itaantarin.

⁴³ Ina quëran huënantapirinhuëꞌ, naquëranchin huëꞌëantapi, quënanquinantarin. Huëꞌëiꞌ iquitatonaꞌ, huëꞌësápi.

⁴⁴ Tananpitahuaton, paantarin. Paantarahuaton, inachachin Yosë itantarin. Nani cararoꞌ inachachin Yosë nontërin.

⁴⁵ Ina quëran huënantahuaton, itërin: —¿Ipora huantaꞌ huëꞌësaramaꞌ ti? Nani ora nanirin huachi. Yosë quëran quëmapico nipirahuëꞌ, shaꞌhuirapiarinco oshahuanoꞌsaꞌ macainacoso marëꞌ.

⁴⁶ Huënsëco huachi paꞌahuaꞌ. Niꞌcoꞌ, shaꞌhuirapirincosoꞌ nani canquiarin, itërin.

Quisoso mapisoꞌ

⁴⁷ Nontaso chachin, Cotasë canquirin. Inantaꞌ Quisoso caꞌtanaponahuëꞌ, yashaꞌhuirapirin. Inarëꞌ naꞌa piyapiꞌsaꞌ huëꞌsapi, corto huaꞌanoꞌsaꞌ, cotio ansianoꞌsaꞌ, inapitari aꞌpapisopita. Sahuëni, shonqui, inapita sëꞌquërahuatonaꞌ huëꞌsapi.

⁴⁸ Coꞌhuara canshatërasoihuëꞌ, Cotasëri nani shaꞌhuitërin Quisoso nohuitacaiso marëꞌ. “Insosona apinohuato, ina Quisososoꞌ. Máco huachi,” itërin.

⁴⁹ Ina quëran yaꞌyoranquirahuaton: —Tashita Maistro, itiirahuaton, apinorin.

⁵⁰ —Maꞌsona yaninansoꞌ iyasha, manóton niquëꞌ, itërin Quisosori. Ina quëran piyapiꞌsari chiníquën masapi huachi.

⁵¹ Caꞌtanoꞌsanënpita inaquë huaniapi. Aꞌnaraꞌ sahuëninën ocoirahuaton, corto huaꞌan inpriatonën ahuërin. Ahuëaton, nishitëhuëratëtërin.

⁵² Quisososo nipirinhuëꞌ co nohuantërinhuëꞌ. —Sahuëninën iyasha, poꞌmoantaquëꞌ. Huaꞌnaquë tëpatohuatamaꞌ, huaꞌna quëran chachin tëpainëmasoꞌ yaꞌhuërin.

⁵³ Tatahuë nontërahuë naporini, shonca cato huaranca anquëniroꞌsaꞌ aꞌpatimaitoncohuëꞌ. Aꞌnaroáchin catahuaitonacohuëꞌ. ¿Co ina nitotëranhuëꞌ ti?

⁵⁴ Napoaponahuëꞌ, co nohuantërahuëꞌ chaꞌëcaꞌhuasoꞌ. Nichaꞌërinaco naporini, co huachi ninorinacosoꞌ naniitonhuëꞌ. Yosë nohuanton, chiminarahuë, itërin caꞌtanoꞌsanënpita.

⁵⁵ Ina quëran piyapiꞌsaꞌ itapon: —Sahuëni, shonqui, inapita sëꞌquërahuatomaꞌ, huëcapairamaco. Tëpatonaꞌpi pochin cancantatomaco, ¿yamanamaco ti? Coꞌtana nani tahuëri Yosë chinotopiso pëiquë huënsëato, aꞌchinárahuë. Nicapomaracohuëꞌ, co manamacohuëꞌ.

⁵⁶ Napoaponahuëꞌ, Yosë nohuanton, iporasoꞌ masaramaco. Quiricanën quëran ninorinacoso chachin masaramaco, itërin. Ina quëran yaꞌipi caꞌtanoꞌsanënpitari taꞌananpipi huachi.

Corto huaꞌanoꞌsaquë quëpapisoꞌ

⁵⁷ Nani masahuatonaꞌ, corto huaꞌan chini chiníquën nanantërinsoꞌ yaꞌhuërinquë quëpapi, Caihuasë itopisoꞌ. Inaquë cotio maistroꞌsaꞌ, ansianoꞌsaꞌ, inapita nani niyontonpi.

⁵⁸ Pitroso nipirinhuëꞌ, aquë quëran imaquiarin. Iꞌiratëquë huarëꞌ imaquirin. Pairaanaquë yaꞌconahuaton, ponisiaroꞌsapitarëꞌ huënsëquirin. “¿Maꞌtaꞌ onpotaponaꞌ? Tëpaponaꞌ nimara,” taꞌton, niꞌsárin.

⁵⁹ Corto huaꞌanoꞌsaꞌ, cotio huaꞌanoꞌsaꞌ inapitari yatëpapi niꞌton, aꞌnaya aꞌnaya yonípi Quisoso shaꞌhuirapicaiso marëꞌ.

⁶⁰ Naꞌa piyapiꞌsari nonpinapiponaraihuëꞌ, nisha nisha nonconpi. Napoyan quëran catoyaꞌpiri huëꞌsahuatonaꞌ, shaꞌhuirapipi.

⁶¹ —Iꞌhua chachin Quisoso noninsoꞌ natanai. “Yosë chinotopiso pëiꞌ ataꞌhuantahuato, caora nanitërahuë anoyatantaꞌhuasoꞌ. Cara tahuëri quëran anoyatantarahuë,” toconin, itopi.

⁶² Corto huaꞌan chini chiníquën nanantërinsoari huanirahuaton, Quisoso itapon: —¿Co mantaꞌ tënanhuëꞌ ti? ¿Maꞌtaꞌ taponaꞌ isopita nonapiarinënquën? itërin.

⁶³ Quisososo nipirinhuëꞌ co mantaꞌ tëninhuëꞌ, taꞌtárin. Ina quëran corto huaꞌani itantarin: —“Yosë niꞌsárinco co nonpinahuëꞌ,” taꞌton, noꞌtëquën shaꞌhuitocoi. ¿Quëmasoꞌ Cristo, Yosë huiꞌninquën chachin ti? itërin.

⁶⁴ —Ca mini inaco. Yosë quëran quëmapico niꞌto, aꞌna tahuëri niantaramaco. Inápaquë paꞌpato, Yosë inchinanën quëran ahuënsëarinco. Ina quëran chitoroꞌ huancana oꞌmantararahuë niantaramaco, itërin.

⁶⁵ Corto huaꞌanso natanahuaton, chiníquën noꞌhuitërin. Inapoaton aꞌmorinso osharin. —“¡Casoꞌ Yosë huiꞌninco,” toconin! Nani natanamaꞌ. Inaora chachin shaꞌhuitërinpoaꞌ niꞌton, co aꞌnapita shaꞌhuitinpoasoꞌ nohuantarihuahuëꞌ.

⁶⁶ ¿Maꞌtaꞌ onpotahuaꞌ Quisoso? tënin. —Paꞌpi co noya quëmapihuëꞌ niꞌton, tëpacasoꞌ yaꞌhuërin, topi yaꞌipiya.

⁶⁷ Ina quëran ipirayatahuatonaꞌ, ahuëpi. Aꞌnaquënintaꞌ tonporayatahuatonaꞌ, chiníquën panpirayapi.

⁶⁸ —¿Intaꞌ ahuërinquën? Quëmasoꞌ Cristonquën nipatan, ninoton noꞌtëquën shaꞌhuitocoi, itopi.

Pitrori nonpinapirinsoꞌ

⁶⁹ Napotasoi, Pitrosoꞌ iꞌiratëquë huënsëarin. Aꞌna cosonari huëꞌsahuaton, itiirin. —Quëmantaꞌ Quisoso Cariria quëran huëꞌninsoꞌ caꞌtanan, itopirinhuëꞌ.

⁷⁰ —¿Ma quëmapitaꞌ napotaransoꞌ? Co casoꞌ ina nohuitërahuëꞌ, itërin. Yaꞌipiya natanpi.

⁷¹ Ina quëran paꞌsahuaton, yaꞌcoanaquë huanisoꞌ, aꞌna cosonarintaꞌ quënanquiantarin. Quënanahuaton, huanipapisopita itapon: —Iso quëmapi Quisoso Nasaritoquë yaꞌhuërinsoꞌ caꞌtanin antaꞌ, itaantapirinhuëꞌ.

⁷² —¡Coꞌchi nohuitërahuëꞌ paya! Yosë niꞌsárinco, co nohuitërahuëꞌ, taantarin Pitro.

⁷³ Ina quëran huaꞌquimiachin nisahuasoꞌ, aꞌnapitarintaꞌ itaantapi: —Tëhuënchachin quëmantaꞌ Quisoso caꞌtanan. Cariria piyapi pochin nonan quëran nohuitërainquën, itopi.

⁷⁴ —¡Coꞌchi iyaroꞌsaꞌ paya! Yosë niꞌsárinco, co carisoꞌ nohuitërahuëꞌ. Nonpintohuatënquëmasoꞌ, Yosë anaꞌinchinco, tënahuë, itërin. Naporo chachin atari përarin.

⁷⁵ Ina natanahuaton, Quisosori napotërinsoꞌ yonquirin: “Coꞌhuara atari përashatërasohuëꞌ, cararoꞌ nonpinapiaranco,” itërinco, taꞌton, aipiran pipirin. Inaquë chiníquën sëtaton, naꞌnërin.