Mateo 25 - Chayahuita (Shahui)

Sanapi nipayarinsopita

¹ Naquëranchin Quisosori pënëantarin: “Yosë huaꞌanëntërinsoꞌ aꞌchintantaꞌinquëmaꞌ, noya natanco. Huaꞌan saꞌarinso pochin ninin. Inaso aquë quëran huëꞌsarin. Onporosona canquicasoꞌ co nitotopihuëꞌ. Tahuëri nanihuachina, sanapi nipayarinsopita ninarapi huaꞌan huëcacasoꞌ. ‘Huaꞌqui quëran canquipon nimara,’ taꞌtonaꞌ, shonca nanoꞌsaꞌ nanparinënarë chachin ninarapi.

^2-4 Aꞌnatërápo sanapiíchin noya yonquipi. Quirosin pochin orotërinsoꞌ taꞌpantatonaꞌ, mëntaiquë huarëꞌ quëpapi. Naporahuatonaꞌ, aꞌnaya aꞌnaya potiriaquë quëpapi. Aꞌnatërápo sanapiꞌsaso nipirinhuëꞌ co yonquiatonahuëꞌ, co aquëtëꞌ quëpapihuëꞌ.

⁵ Huaꞌan huaꞌquirin niꞌton, tashitopi. Yahuëꞌëtonaꞌ, yaꞌipimiáchin huëꞌëpi.

⁶ Huëꞌësoiꞌ, yono tashiꞌ aꞌnanaya chiníquën noninsoꞌ natanpi. ‘¡Maꞌtana, huëꞌsarin huachi! ¡Huënsëcoꞌ paꞌahuaꞌ nacapiaꞌahuaꞌ!’ nitopi.

⁷ Aꞌnaroáchin shonca nanoꞌsa chachin capayatahuatonaꞌ, nanparinënapita taparapi noya orotacaso marëꞌ.

⁸ Noya yonquirinsopitasoꞌ taꞌpantohuachinara, noya orotërin. Aꞌnapitaso nipirinhuëꞌ iꞌchinpitopirinahuëꞌ, yatacopiconpi. Napohuachinara: ‘Taꞌpantocoi quiyantaꞌ iꞌchinpiꞌi. Nani quiyasoꞌ tacopiarin,’ topirinahuëꞌ.

⁹ ‘Coꞌchi nanitëraihuëꞌ taꞌpantaꞌhuainquëmaso paya. Inapohuatoi, co huachi quiyantaꞌ orotarinhuëꞌ. Yaꞌipinpoaꞌ tacopianarihuaꞌ. Manóton paatomaꞌ, paꞌanconcoꞌ,’ itopi.

¹⁰ Napotohuachinara, aꞌnatërápo chachin manotona paꞌpi quirosin pochin nininsoꞌ paꞌanaponaꞌ. Paꞌpirinahuëꞌ, coꞌhuara huëntayátërasoihuëꞌ, huaꞌan canquirin. Aꞌnatërápo nanoꞌsaꞌ noya yonquirinsopitasoꞌ imatonaꞌ, pëiquë yaꞌconpi. Inaquë saꞌacaso marëꞌ pita nisapi. Nani yaꞌconpachinara, oncotopi.

¹¹ Ina quëran co yonquirinsopitasohuëꞌ huënantatonaꞌ: ‘¡Iꞌsoatocoi sinioro quiyantaꞌ yaꞌcoin!’ itopirinahuëꞌ.

¹² Huaꞌani co nohuantërinhuëꞌ. ‘Co canpitasoꞌ piyapinëhuëpitanquëmahuëꞌ. Co nohuitëranquëmahuëꞌ,’ taꞌton co ayaꞌconinhuëꞌ.

¹³ Napoaton canpitantaꞌ noya yonquiatomaꞌ, oꞌmantaꞌhuasoꞌ tahuëri ninacoꞌ. Onporosoꞌ nanipon nimara, co nitotëramahuëꞌ. Niꞌcona patontatënquëmaꞌ,” itërin.

Canacaso marëꞌ coriqui quëtërinsoꞌ

¹⁴ Ina quëran itaantarin: “Isontaꞌ iyaroꞌsaꞌ aꞌchinchinquëmaꞌ Yosë huaꞌanëntërinsoꞌ nitotamaso marëꞌ. Aꞌna quëmapi aquë yapaꞌsarinso pochin ninin. Yapaꞌpachina, inpriatonënpita amatërin camaicaso marëꞌ. Huëꞌpachinara, itapon: ‘Aquë paꞌpato, oshaquëran huënantarahuë. Inatohuaꞌ yaꞌhuasoco, noya sacatocoꞌ. Apira coriqui quëchinquëmaꞌ ina quëran naꞌcon naꞌcon canacaꞌhuaso marëꞌ. Maꞌsha paꞌanatomaꞌ, oshaquëran anaꞌatocoꞌ,’ itërin.

¹⁵ Itahuaton, aꞌnaya aꞌnaya quëtëraꞌpiarin. Co napopianachin quëtërinhuëꞌ. Nanitinpichin tantiaton, nisha nisha quëtërin. Aꞌnasoꞌ aꞌnatërápo huaranca coriqui oro quëran nininsoꞌ quëtërin. Aꞌnasoꞌ cato huaranca quëtërin. Aꞌnantaꞌ huaranca quëtërin. Nani inpriatonënpita quëtahuaton, paꞌnin huachi.

¹⁶ Aꞌnatërápo huaranca maꞌpatonaꞌpisoꞌ aꞌnaroáchin natërin. Paaton, naꞌa maꞌsha paꞌanin. Ina quëran inapita paꞌanaton, naꞌcon naꞌcon coriqui canarin. Nani tahuëri inapoaton, oshaquëran aꞌnatërápo huaranca aquëtëꞌ canaantarin.

¹⁷ Cato huaranca quëtërinsontaꞌ noya sacatërin. Inantaꞌ maꞌsha paꞌanahuaton, cato huaranca aquëtëꞌ canantarin.

¹⁸ Huaranca maꞌparinsosoꞌ nipirinhuëꞌ, co yanatërinhuëꞌ. Noꞌpaquë ihuatahuaton, coriquinën paꞌpitërin inaquë tapacaso marëꞌ.

¹⁹ Huaꞌqui quëran huaꞌanëna huënantarahuaton, inpriatonënpita amataantarin nontacaso marëꞌ.

²⁰ Aꞌnatërápo huaranca maꞌpatonaꞌpiso huëꞌsahuaton, coriqui aꞌnotiirin. ‘Niꞌquëꞌ sinioro, aꞌnatërápo huaranca quëtopirancohuëꞌ, ina quëran aꞌnatërápo huaranca aquëtëꞌ nani canarahuë,’ itiirin.

²¹ ‘¡Ma noyacha sacatëran paya! Natëranco niꞌquëhuarëꞌ, chiníquën nanan quëchinquën naꞌcon huaꞌanëntamaso marëꞌ. Pëinëhuëquë huëquëꞌ, noya cancantahuaꞌ,’ itërin huaꞌanëni.

²² Ina quëran aꞌnantaꞌ huëꞌnin: ‘Niꞌquëꞌ sinioro, cato huaranca quëtopirancohuëꞌ, nani cato huaranca aquëtëꞌ canarahuë,’ itiirin.

²³ ‘¡Ma noyacha quëmantaꞌ sacatëran paya! Natëranco niꞌquëhuarëꞌ, nanan quëchinquën naꞌcon huaꞌanëntacaso marëꞌ. Pëinëhuëquë huëquëꞌ, noya cancantahuaꞌ,’ itërin inantaꞌ huaꞌanëni.

²⁴ Piquëran quëtërinsoso nipirinhuëꞌ, huëꞌsahuaton itiirin: ‘Quëmasoꞌ sinioro co nosororancoihuëꞌ. Co quëmaora shacaponahuëꞌ, nitërinsoꞌ manan. Co sacataponahuëꞌ, canaran.

²⁵ Napoaton tëꞌhuatatënquën, co sacatërahuëꞌ. Coriqui quëtërancosoꞌ acoporoquë poꞌorahuë. Maꞌtana yaꞌhuarin,’ itahuaton, coriqui aꞌnotërin.

²⁶ Napotohuachina, co noya niꞌninhuëꞌ. ‘Quëmasoꞌ co noyanquënhuëꞌ. Chiroton, co natërancohuëꞌ. Co noꞌtëquën yonquiranhuëꞌ. “Co sacataponahuëꞌ canaran,” ¿itëranco ti?

²⁷ ¿Onpoatontaꞌ nipachin, co bancoquë acoranhuëꞌ? Inaquë acoran naporini, piꞌpian tërantaꞌ canaitohuëꞌ,’ itërin.

²⁸ Ina quëran aꞌna piyapinën shaꞌhuitërin. ‘Iso quëmapi topinan quëran coriqui quëtërahuë. Osërëtahuaton, pasoꞌ quëmapi naꞌcon naꞌcon canarinsoꞌ, quëtëquëꞌ.

²⁹ Noya natërinco niꞌton, naꞌcon naꞌcon quëtantarahuë. Co mantaꞌ pahuantarinhuëꞌ. Aꞌnaso nipirinhuëꞌ co natërincohuëꞌ niꞌton, piꞌpian yaꞌhuëtërinso tërantaꞌ osërëtarahuë.

³⁰ Naporahuaton co noyahuëꞌ niꞌton, aipiran tashinantërinquë tëꞌyatocoꞌ. Inatohua co napion ancantaton naꞌnërápon,’ tënin,” itërin Quisosori.

Nisha nisha nananquë nonpisopita anaꞌintërinsoꞌ

³¹ Ina quëran itaantarin: “Yosë quëran quëmapico niꞌto, aꞌna tahuëri oꞌmantararahuë huaꞌanëntaꞌhuaso marëꞌ. Yaꞌipi anquëniroꞌsapitarëꞌco chachin oꞌmantararahuë. Huënaráchin huënaráchin yaꞌnorahuato, huaꞌanëntaꞌhuasoꞌ shiraquë huënsëarahuë coisë pochin nicaꞌhuaso marëꞌ.

³² Yosë nohuanton, nisha nisha nananquë nonpisopita niyontonapi. Niyontonpachinaꞌ, pëꞌtahuatonaꞌpi pochin nisarahuë. Niꞌcoꞌ. Tahuëri nipachina, ohuicaroꞌsaꞌ, chiporoꞌsaꞌ napopianachin paꞌsapi coshatacaiso marëꞌ. Inaquëráchin yaꞌhuëpirinahuëꞌ, tashihuachina, nisha nisha acorin huachi.

³³ Ohuicaroꞌsaꞌ inchinanën quëran acorahuaton, chiporoꞌsasoꞌ ahuënanën quëran acorin. Inapochachin cantaꞌ yaꞌipi piyapiꞌsaꞌ nisha nisha acoarahuë. Noya cancantopisopita inchinanëhuë quëran acoarahuë. Co noyahuëꞌ cancantopisopitaso nipirinhuëꞌ, ahuënanëhuë quëran acoarahuë.

³⁴ Ina quëran inchinanëhuë quëran acorahuësopita itarahuë: ‘Yaꞌipinquëmaꞌ huëcatomaꞌ, Yosë huaꞌanëntërinquë yaꞌconquicoꞌ. ¡Ma noyacha Tata Yosë nosororinquëma paya! Isoroꞌpaꞌ ninin quëran huarëꞌ yonquirinquëmaꞌ huaꞌanëntërinquë ayaꞌcoinquëmaso marëꞌ.

³⁵ Canpitasoꞌ noya nosororamaco. Tanahuatëra, aꞌcaramaco. Yamorohuatëra, oꞌshitëramaco. Yaꞌhuëramataquëchi naꞌhuëpatëra, noya nontëramaco. Pëinëmaquë chachin ayaꞌconamaco.

³⁶ Capa aꞌmocaꞌhuasoꞌ nipachina, quëtëramaco. Caniohuatërantaꞌ, huëcatomaꞌ, nosoroquiramaco. Tashinan pëiquë yaꞌhuasocontaꞌ, niꞌquiramaco. Napoaton huëco huachi, noya yaꞌhuaꞌahuaꞌ,’ itarahuë.

³⁷ Naporoꞌ inapitasoꞌ natanarinaco: ‘¿Onporotaꞌ Sinioro tanaran nicatëinquën, aꞌcarainquën? ¿Onporotaꞌ yamororan niꞌton, oꞌshitërainquën?

³⁸ ¿Onporotaꞌ pëinëhuëiquë ayaꞌconainquën? ¿Onporotaꞌ aꞌmocamasoꞌ pahuantërinquën niꞌton, quëtërainquën?

³⁹ ¿Onporotaꞌ canioran niꞌton, nosoroquirainquën? ¿Onporotaꞌ tashinan pëiquë parisitëran, niꞌconainquën? ¿Onpórochana napotërainquën nicaya? Co yonquiraihuëꞌ,’ itarinaco.

⁴⁰ ‘Coꞌta, imarinacosopita parisitohuachinara, catahuaramaꞌ. Topinan piyapiꞌsaꞌ, saꞌahuaroꞌsaꞌ, inapita maꞌsha pahuantohuachinara, quëtëramaꞌ. Imatomaco, aꞌnapita catahuaramaꞌ niꞌton, cantaꞌ catahuaramacoso pochin niꞌnahuë,’ itarahuë.

⁴¹ Ahuënanëhuë quëran acorahuësopitaso nipirinhuëꞌ, shaꞌhuitarahuë: ‘Yaꞌipinquëmaꞌ paco huachi. Tata Yosë co noyahuëꞌ niꞌninquëmaꞌ niꞌton, anaꞌintarinquëma huachi. Panca pën nani acorin sopairoꞌsaꞌ anaꞌintacaso marëꞌ. Inaquë pën co onporontaꞌ tacopiarinhuëꞌ. Inaquë pacoꞌ canpitantaꞌ.

⁴² Tanapirahuëꞌ, co aꞌcaramacohuëꞌ. Yamoropirahuëꞌ, co oꞌshitëramacohuëꞌ.

⁴³ Yaꞌhuëramataquëchin naꞌhuëpatëra, co pëinëmaquë ayaꞌconamacohuëꞌ. Capa aꞌmocaꞌhuasontaꞌ nipirinhuëꞌ, co quëtëramacohuëꞌ. Caniopirahuëꞌ, co huëcatomaꞌ nosororamacohuëꞌ. Tashinan pëiquë yaꞌhuëpirahuëꞌ, co niꞌquiramacohuëꞌ,’ itarahuë.

⁴⁴ Ina quëran natanarinaco: ‘¿Onporotaꞌ Sinioro tanapiranhuëꞌ co aꞌcarainquënhuëꞌ? ¿Onporotaꞌ yamoropiranhuëꞌ co oꞌshitërainquënhuëꞌ? ¿Onporotaꞌ co pëinëhuëiquë ayaꞌconainquënhuëꞌ? ¿Onporotaꞌ aꞌmocasoꞌ pahuantopirinquënhuëꞌ, co quëtërainquënhuëꞌ? ¿Onporotaꞌ caniopiranhuëꞌ co nosororainquënhuëꞌ? ¿Onporotaꞌ tashinan pëiquë parisitopiranhuëꞌ co catahuarainquënhuëꞌ? Co onporontaꞌ ina pochin niꞌnainquënhuëꞌ,’ itarinaco.

⁴⁵ ‘Coꞌta imarinacosopita parisitopirinahuëꞌ, co catahuaramahuëꞌ. Saꞌahuaroꞌsaꞌ maꞌsha pahuantopirinahuëꞌ, co quëtëramahuëꞌ. Co inapita nosororamahuëꞌ niꞌton, co cantaꞌ nosororamacohuëꞌ,’ itarahuë. Itahuato, aꞌpararahuë huachi.

⁴⁶ Parisitopiquë paꞌsahuatonaꞌ, inaquë yaꞌhuëmiatapi huachi. Noya nipisopitaso nipirinhuëꞌ, Yosë pochin nanpimiatapi huachi,” itërin Quisosori.