Mateo 23 - Chayahuita (Shahui)

Parisioroꞌsaꞌ, cotio maistroꞌsaꞌ, inapita chiníquën pënëninsoꞌ

¹ Ina quëran piyapiꞌsaꞌ aꞌchintantarin. Caꞌtanoꞌsanënpitantaꞌ natanapi.

² “Tëhuënchachin iyaroꞌsaꞌ, cotio maistroꞌsaꞌ, parisioroꞌsaꞌ, inapita naꞌcon aꞌchintatënënquëmaꞌ: ‘Moisësë pënëninpoasoꞌ noꞌtëquën aꞌchinchinquëmaꞌ,’ topi.

³ Yosë nanamën aꞌchintohuachinënquëmaꞌ, noya natëcoꞌ. Nipirinhuëꞌ, ama inapita nonancosohuëꞌ. Inahuasoꞌ pënënpirinënquëmahuëꞌ, co cancanëna quëran imapihuëꞌ.

⁴ Niꞌcoꞌ. Panca pëꞌpëto quëpahuatëra, sacaiꞌ iratacasoꞌ. Inapitasoꞌ inapochachin aꞌchintërinënquëmaꞌ. Co Yosë quiricanënáchin aꞌchinpihuëꞌ. Inahuara yonquinëna quëraontaꞌ nisha nisha pënëntopi. Panca pëꞌpëto apëꞌpëtërëso pochin nitërinënquëmaꞌ. Aꞌchintopirinënquëmahuëꞌ, inahuara chachiontaꞌ co natëpihuëꞌ.

⁵ Piꞌpian Yosë quiricanën ninshitahuatonaꞌ, tëꞌyainaquë achinpipi piyapiꞌsari nicacaiso marëꞌ. Naporahuatonaꞌ, naporopi aꞌmopi nohuitacaiso marëꞌ. ‘Inapohuatëhuaꞌ, piyapiꞌsaꞌ noya niꞌsarinënpoaꞌ,’ taꞌtonaꞌ, napopi. Napoaponaraihuëꞌ, co aquëtëꞌ Yosë yonquipihuëꞌ.

⁶ Pita nipachina, huancánachin yahuënsëconpi. Niyontonpiso pëiquë yaꞌconpachinara, huaꞌanoꞌsapitarëꞌ yahuënsëconpi.

⁷ Cachiquë paꞌpachinara, naꞌa piyapiꞌsari noya nontopi. ‘Huëꞌcama maistro,’ itohuachinara, paꞌyatopi.

⁸ Canpitaso nipirinhuëꞌ, ama maistro itiinëmaso nohuantocosohuëꞌ. Yaꞌipinquëmaꞌ iyama pochin nisaramaꞌ. Casáchin noꞌtëquën aꞌchintëranquëmaꞌ.

⁹ Ama aꞌna piyapi naꞌcon naꞌcon paꞌyatocosohuëꞌ. ‘Quëmasoꞌ tata pochin niꞌnanquën. Natëaranquën huachi,’ ama itocosohuëꞌ. Yosëíchin natëcasoꞌ yaꞌhuërin. Inasoꞌ tatanënpoaꞌ inápaquë yaꞌhuërinsoꞌ.

¹⁰ Ama huaꞌan pochin chiníquën nanan nohuantocosohuëꞌ. ‘Ca natëco,’ ama tocosohuëꞌ. Aꞌnaíchin huaꞌan yaꞌhuëtërinquëmaꞌ, Cristo itopisoꞌ.

¹¹ Yosë huëntonënquë yaꞌconpatëra, co chiníquën nanantacasoꞌ yaꞌhuërinhuëꞌ. Noya noya yanipatamaꞌ, yaꞌipi piyapiꞌsaꞌ catahuacoꞌ.

¹² ‘Casoꞌ noya noyaco,’ topatamaꞌ, Yosë atapanarinquëmaꞌ. Nipirinhuëꞌ, ‘Caora co nanitërahuëꞌ noya nicaꞌhuasoꞌ. Catahuaco Sinioro,’ topatamaꞌ, Yosë catahuaarinquëmaꞌ. Noya noya acoarinquëmaꞌ,” itërin.

¹³ Ina quëran Quisosori cotio maistroꞌsaꞌ, parisioroꞌsa inapita pënënaton itapon: “Cotio maistroꞌsanquëmaꞌ, parisioroꞌsanquëmaꞌ, canpitaso nonpintënquëma niꞌton, ¡maꞌhuantacha nisarama paya! Co noꞌtëquën aꞌchinamahuëꞌ niꞌton, Yosë iranën yaꞌcopiatë pochin nitëramaꞌ. Co noꞌtëquën Yosë imatomahuëꞌ, co canpita tërantaꞌ Yosë huaꞌanëntërinquë yaꞌconaramahuëꞌ. Aꞌnapitantaꞌ yayaꞌconpirinahuëꞌ, co catahuaramahuëꞌ yaꞌconacaisoꞌ. Canpita nonaninënquëmaꞌ niꞌton, inapitantaꞌ co yaꞌconpihuëꞌ. [

¹⁴ Canpitaso nonpintënquëma niꞌton, ¡maꞌhuantacha nisarama paya! Quëyoronoꞌsaꞌ nonpintëramaꞌ. Noya nontapomarahuëꞌ, aꞌnaya aꞌnaya nonpintatomaꞌ, maꞌshanënapita matëramaꞌ. Ina quëran niyontonpiso pëiquë yaꞌconpatamara, huaꞌquiꞌ Yosë nontapomarahuëꞌ, co cancanëma quëran imaramahuëꞌ. Ina marëꞌ aquë aquëtëꞌ anaꞌintarinquëmaꞌ.]

¹⁵ Canpitasoꞌ nonpintënquëma niꞌton, ¡maꞌhuantacha nisarama paya! Nisha piyapiꞌsaꞌ aꞌchintacamaso marëꞌ ira iratë́rantaramaꞌ. Aquë paatomaꞌ, aꞌnaya aꞌnaya aꞌchintëramaꞌ canpita pochin yonquicaiso marëꞌ. Natëhuachinënquëmaꞌ, aquë aquëtëꞌ co noyahuëꞌ cancantapi. Yaꞌipinquëmaꞌ parisitopiquë paꞌsarama huachi.

¹⁶ ¡Maꞌhuantacha nisarama paya! Aꞌnapita yaaꞌchintopiramahuëꞌ, co noꞌtëquën yonquiatomahuëꞌ, somaraya pochin cancantëramaꞌ. Somaraya nininsoꞌ co piꞌpian tërantaꞌ nanitërinhuëꞌ aꞌnapita quëpacasoꞌ. Inapochachin canpitasoꞌ co Yosë nohuitatomahuëꞌ, co nanitëramahuëꞌ aꞌnapita aꞌchintacamasoꞌ. ‘Yoscoarëꞌ topatëra, noꞌtëquën nontacasoꞌ yaꞌhuërin,’ topi yaꞌipi piyapiꞌsaꞌ. Canpitaso nipirinhuëꞌ nisha nisha tënamaꞌ. ‘Yosë chinotopiso pëiꞌ yaꞌhuërin niꞌton, noꞌtëquën nontaranquën,’ itopiramahuëꞌ, nonpinpatamantaꞌ, ‘Co ina marëꞌ Yosë anaꞌintarinpoahuëꞌ,’ toconamaꞌ. ‘Yosë chinotopiso pëiquë oro yaꞌhuërin niꞌton, noꞌtëquën nontaranquën, topatëra, naporo huarëꞌ noꞌtëquën nontacasoꞌ yaꞌhuërin,’ topiramahuëꞌ.

¹⁷ Co noꞌtëquën yonquiramahuëꞌ. Yosë chinotopiso pëiꞌ mini oro quëran noya noya ninin. Oro inaquë yaꞌhuërinsoꞌ co aquëtëꞌ yonquicasoꞌ yaꞌhuërinhuëꞌ. Co chinotopisoꞌ pëiquë yaꞌhuërinhuëꞌ naporini, co Yosëri noya niꞌitonhuëꞌ.

¹⁸ Yosë chinotopiso pëiquë artaro yaꞌhuërin. Inaquë maꞌsha acopi Yosë chinotacaiso marëꞌ. ‘Artaro yaꞌhuërin niꞌton, noꞌtëquën nontaranquën,’ tapomarahuëꞌ, nonpinpatamantaꞌ, ‘Co ina marëꞌ Yosë anaꞌintarinpoahuëꞌ,’ toconamaꞌ. ‘Maꞌsha inaquë acopisoꞌ yaꞌhuërin niꞌton, noꞌtëquën nontaranquën, topatëra, naporo huarëꞌ noꞌtëquën nontacasoꞌ yaꞌhuërin,’ topiramahuëꞌ. Yanonpinatomaꞌ, naporamaꞌ.

¹⁹ Somaraya pochin cancantatomaꞌ, co noꞌtëquën yonquiramahuëꞌ. Co maꞌsha acopisoꞌ aquëtëꞌ yonquicasoꞌ yaꞌhuërinhuëꞌ. Artaro mini maꞌsha acopi quëran noya noya ninin. Artaroquë acopi niꞌton, Yosëri noya niꞌnin.

²⁰ ‘Artaro yaꞌhuërin niꞌton, noꞌtëquën nontaranquën,’ topatamaꞌ, yaꞌipi inaquë acopisopitantaꞌ yonquicasoꞌ yaꞌhuërin.

²¹ ‘Yosë chinotopiso pëiꞌ yaꞌhuërin niꞌton, noꞌtëquën nontaranquën,’ topatamaꞌ, Yosë inaquë yaꞌhuërinsontaꞌ yonquicamasoꞌ yaꞌhuërin.

²² Inapochachin ‘Piꞌiroꞌtëꞌ yaꞌhuërin niꞌton, noꞌtëquën nontaranquën,’ topatamantaꞌ, co piꞌiroꞌtëáchin yonquicasoꞌ yaꞌhuërinhuëꞌ. Yosë inaquë yaꞌhuaton, huaꞌanëntarinpoaꞌ. Inantaꞌ yonquicamasoꞌ yaꞌhuërin.

²³ Canpitaso nonpintënquëma niꞌton, ¡maꞌhuantacha nisarama paya! ‘Nani maꞌsha quëran, diesmo Yosë quëtacasoꞌ yaꞌhuërin,’ itërinpoaꞌ Moisësë. Ina natëpiramahuëꞌ, nonpintënquëmaꞌ canpitasoꞌ. Napoaton maꞌsha shaꞌpatamara, piꞌpian quëtëramaꞌ. Yaꞌipi cosharo apimotacaso marëꞌ shaꞌnamaꞌ quëran huarëꞌ diesmo quëtëramaꞌ. Inasoꞌ noya nipirinhuëꞌ, Yosë naꞌcon naꞌcon nohuantërinsosoꞌ naniantëramaꞌ. Co noꞌtëquën nonamahuëꞌ. Co saꞌahuaroꞌsaꞌ nosororamahuëꞌ. Naporahuaton, co cancanëma quëran huarëꞌ Yosë natëramahuëꞌ. Ina marëꞌ anaꞌintarinquëmaꞌ.

²⁴ Somaraya pochin cancantatomaꞌ, co noꞌtëquën aꞌchinamahuëꞌ. Niꞌcoꞌ. Canpitasoꞌ yaoꞌopatamara, ama oꞌoso tërantaꞌ oꞌocamaso marëhuëꞌ noyá panshairamaꞌ. Napoapomarahuëꞌ, camiyo aꞌnaroáchin miꞌtëramaso pochin ninamaꞌ. Yosë naꞌcon naꞌcon nohuantërinsoꞌ, co natëramahuëꞌ.

²⁵ Canpitasoꞌ nonpintënquëma niꞌton, ¡maꞌhuantacha nisarama paya! Tëhuënchachin yanonpinamaꞌ. Niꞌcoꞌ. Aꞌnaquën minëꞌ, sënan, inapita paꞌmohuachinara, aipiáchin paꞌmopi. Acoposo nipirinhuëꞌ, nëꞌhuënantëtërin. Inapochachin canpitasoꞌ piyapiꞌsaꞌ noya nicainënquëmasoachin yonquipiramahuëꞌ, acopoꞌ cancanëma quëransoꞌ, co noya yonquiramahuëꞌ. Nonpinatomaꞌ, yaihuatëramaꞌ. Maꞌsharáchin nohuantatomaꞌ, co Yosë nohuantërinsoꞌ ninamahuëꞌ. Ina marëꞌ Yosë anaꞌintarinquëmaꞌ.

²⁶ Canpitaso parisioroꞌsanquëmaꞌ, somaraya pochin cancantëramaꞌ. ¿Onporahuatomacha co noꞌtëquën yonquiramahuë paya? Cancanëmaꞌton anoyatocoꞌ. Ina quëran noya cancantatomaꞌ, noya nisarama huachi.

²⁷ Canpitasoꞌ nonpintënquëma niꞌton, ¡maꞌhuantacha nisarama paya! Yosë quiricanën aꞌchinpiramahuëꞌ, yanonpinamaꞌ. Niꞌcoꞌ. Chimipi naꞌpi naninquë poꞌmohuatëra, aipiran quëran huiríchinquë pashitërëꞌ. Noyápiachin yaꞌnopirinhuëꞌ, acoposoꞌ nansë, nosha chanatërinsoꞌ, inapita co nishinahuënꞌ nisarin.

²⁸ Inapochachin canpitasoꞌ ninamaꞌ. Piyapiꞌsaꞌ noya nicatënënquëmaꞌ: ‘Ma noya maistroꞌsaꞌ Yosë natëpi,’ topirinahuëꞌ. Acopoꞌ cancanëma quëranso nonpinatomaꞌ, paꞌpi co noyahuëꞌ cancantëramaꞌ.

²⁹ Canpitasoꞌ nonpintënquëma niꞌton, ¡maꞌhuantacha nisarama paya! Iráca Yosë piyapinënpita pënëntohuachinara, shimashonëmapitari noꞌhuitonaꞌ, tëpapi. Ipora canpitasoꞌ, paꞌpitopiquë pëirapiramaꞌ. Noya quëmapiꞌsanta paꞌpitopisoꞌ, yancoroꞌsaꞌ sharapiramaꞌ. Ama naniantacaso marëhuëꞌ napotëramaꞌ.

³⁰ Inapotatomaꞌ naporamaꞌ: ‘Iráca chachin yaꞌhuërai naporini, co quiyarisoꞌ tëpaꞌitoihuëꞌ,’ topiramahuëꞌ,

³¹ shimashonëmaꞌ quëpatomaꞌ, canpitantaꞌ tëpatonaꞌpiroꞌsa pochin cancantaramaꞌ.

³² Inapita pochin cancantatomaꞌ, co noyahuëꞌ nisaramaꞌ. Naꞌcon naꞌcon oshahuanaramaꞌ.

³³ ¡Yaꞌhuan pochin cancantatomaꞌ, paꞌpi co noyahuëꞌ nisaramaꞌ! ¿Onporahuatomacha pën quëran chaꞌërëꞌponquëmaya? Co chaꞌësaramahuëꞌ.

³⁴ Napoaton pënëntonaꞌpiroꞌsaꞌ aꞌpataranquëmaꞌ. Noꞌtëquën yonquinaꞌpiroꞌsaꞌ, aꞌchinaꞌpiroꞌsaꞌ inapita aꞌpataranquëmaꞌ aꞌchintinënquëmaso marëꞌ. Noꞌtëquën pënënaponënquëmaꞌ nipirinhuëꞌ, noꞌhuiaramaꞌ. Aꞌchintopirinënquëmahuëꞌ, aꞌnaquën tëpaaramaꞌ. Aꞌnaquën niyontonpiso pëiquë chiníquën huihuiaramaꞌ. Nisha nisha ninanoquë imatomaꞌ, aparisitaramaꞌ. Aꞌnaquëontaꞌ corosëquë patanantatomaꞌ, tëpaaramaꞌ.

³⁵ Iráca quëran huarëꞌ noya quëmapiꞌsaꞌ pënëntopirinahuëꞌ, naꞌa tëpapi. Apiriꞌton noya quëmapi nipirinhuëꞌ, iini tëparin. Ina piquëran aꞌnaya aꞌnaya noya pënëntopirinahuëꞌ, tëparaꞌpiapi. Naꞌa piꞌipi napopi. Napoin quëran Sacariasë tëpapi antaꞌ. Piriquiasë huiꞌnin inasoꞌ. Yosë chinotopiso pëi iꞌiratëquë artaro yaꞌhuërinso aquëcha tëpapi. Canpitasoꞌ ina nitotapomarahuëꞌ, co natantochináchinhuëꞌ cancantëramaꞌ. Napoaton Yosë chiníquën anaꞌintarinquëmaꞌ.

³⁶ Iráca quëran huarëꞌ shimashonëmapita co noyahuëꞌ cancantopi. Ipora canpitantaꞌ inapita pochachin cancantaramaꞌ niꞌton, Yosë naꞌcon anaꞌintarinquëma huachi, tënahuë,” itërin.

Quirosarinquë yaꞌhuëpisopita yonquiaton, Quisoso sëtërinsoꞌ

³⁷ Ina quëran taantarin: “¡Yaꞌipi Quirosarinquë yaꞌhuëramasopita yonquiatënquëmaꞌ, chiníquën sëtërahuë! Naꞌa pënëntonaꞌpiroꞌsaꞌ Yosë aꞌpatërinquëmaꞌ pënëinënquëmaso marëꞌ. Aꞌpapirinhuëꞌ, tëparamaꞌ. Aꞌnaquën naꞌpiquë tëꞌyaratomaꞌ, tëparamaꞌ. Yaꞌipinquëmaꞌ nosoroatënquëmaꞌ, naꞌaroꞌ yacatahuapiranquëmahuëꞌ, co ca tërantaꞌ nohuantëramacohuëꞌ. Atari huaꞌhuin toꞌcohuëtërinso pochin yapaꞌpoyapiranquëmahuëꞌ, co nohuantëramacohuëꞌ.

³⁸ Napoaton Tata Yosë patarinquëmaꞌ. Chinotëramaso pëintaꞌ patarin. Co huachi catahuaarinquëmahuëꞌ niꞌton, noquitarama huachi.

³⁹ Cantaꞌ, co huachi quënanaramacohuëꞌ. Oꞌmantaꞌhuasoꞌ tahuëri huarëꞌ quënaantaramaco. Naporoꞌ: ‘¡Ma noyanquëncha quëmaso paya! Sinioro chachin aꞌpaimarinquën,’ itaramaco huachi,” itërin Quisosori.