Mateo 20 - Chayahuita (Shahui)

Sacatoroꞌsaꞌ canapisoꞌ

¹ “Natanco iyaroꞌsaꞌ, Yosë huaꞌanëntërinsoꞌ aꞌchintaantaꞌinquëmaꞌ. Aꞌna quëmapi yaꞌhuërin, pancana noꞌpaꞌ huaꞌanëntërinsoꞌ. Inaquë opasáchin shaꞌnin. Panca imin yaꞌhuëtërin niꞌton, piyapiꞌsaꞌ nohuantërin iminënquë asacatacaso marëꞌ. Tashiramiachin paꞌnin sacatoroꞌsaꞌ yonípon.

² Aꞌnaquën quënanconahuaton: ‘Sacatocoꞌ,’ itohuachina, natanpi. ‘¿Onpo marëtaꞌ asacatarancoi?’ itohuachinara: ‘Aꞌnapita canapiso nápoꞌ pahuërëaranquëmaꞌ,’ itërin. ‘Noyahuaꞌ. Ina nápo marëꞌ niꞌquëhuarëꞌ, sacatarai,’ topachinara, iminënquë aꞌparin sacatacaiso marëꞌ.

³ Ina quëran yono piꞌiriahuasoꞌ, cachiquë paantarin aꞌna sacatoroꞌsaꞌ yoniantacaso marëꞌ. Aꞌnaquën quënancoantarin.

⁴ ‘Canpitantaꞌ iminëhuëquë sacatocoꞌ noꞌtëquën pahuërëꞌinquëmaꞌ,’ itohuachina: ‘Noyahuaꞌ. Sacachii nipachin,’ taꞌtonaꞌ, inahuantaꞌ paantapi sacataponaꞌ.

⁵ Ina quëran camotëchin naquëranchin cachiquë paantarahuaton, aꞌnapitantaꞌ iminënquë aꞌparin sacatacaiso marëꞌ. Tëhuërënahuasoꞌ, inapotaantarin.

⁶ Iꞌhuaraya huarëꞌ naquëranchin cachiquë paantarahuaton, quëmapiꞌsaꞌ quënancoantarin. ‘¿Onpoatomataꞌ topinan huaniaramaꞌ? ¿Yaꞌipi tahuëri ipora co sacatëramahuëꞌ paꞌ?’ itoonin.

⁷ ‘Co sacachátëraraihuëꞌ. Co inso tërantaꞌ camairincoihuëꞌ niꞌtoi, ninaarai,’ itopi. ‘Inta nipachin, canpitantaꞌ iminëhuëquë sacatocoꞌ,’ itërin. Aꞌna oraíchin piꞌi yaꞌconacasoꞌ nisapirinhuëꞌ, paꞌpi sacataponaꞌ.

⁸ Nani tashihuachina, huaꞌanëni inpriatonën shaꞌhuitërin: ‘Yaꞌipi sacatoroꞌsaꞌ amatahuaton, pahuërëquëꞌ. Iꞌhuaraya huarëꞌ sacatërinsopitaꞌton pahuërëquëꞌ,’ itërin.

⁹ Aꞌna oraíchin sacatopirinahuëꞌ, huëꞌpachinara, yaꞌipi tahuëri nanirinsoꞌ pahuërërin.

¹⁰ Tashiramiachin sacatopisopita ina niꞌsahuatonaꞌ, yonquiapi: ‘Naꞌcon naꞌcon canpoasoꞌ pahuërëarinpoaꞌ,’ taꞌtonaꞌ, huëꞌpirinahuëꞌ. Ina nápo chachin pahuërërin antaꞌ.

¹¹ Coriqui maꞌpataponaraihuëꞌ, huaꞌanën noꞌhuiconpi.

¹² ‘Pasopitasoꞌ, aꞌna oraíchin sacatopi. Quiyaso nipirinhuëꞌ, yaꞌipi tahuëri sacatërai. Tashiramiachin quëran huarëꞌ piꞌi piꞌcarincoi. Huaꞌquiꞌ sacatopiraihuëꞌ, napopianachin pahuërërancoi. Co noꞌtëquën pahuërërancoihuëꞌ,’ itërin aꞌnari.

¹³ ‘Coꞌchi iyasha nonpintëranquëmahuë paya. Ina nápo coriqui marëꞌ yaꞌipi tahuëri sacatarai, itëramaco niꞌton, noꞌtëquën pahuërëranquëmaꞌ.

¹⁴ Canaransoꞌ masahuaton, paquë huachi. Aꞌnapitasoꞌ co huaꞌquiꞌ sacatopirinahuëꞌ, caora nohuanto, yaꞌipi tahuëri nanirinsoꞌ pahuërërahuë.

¹⁵ Caoranquën coriqui niꞌton, onposona nohuantohuato, inanapo pahuërëtaꞌhuasoꞌ yaꞌhuërin. Inapita nosoroato, pahuërërahuëso marëꞌ ¿noꞌhuiramaco ti?’ itahuaton, aꞌparin huachi.

¹⁶ Tëhuënchachin aꞌnaquënsoꞌ ipora co piyapiꞌsari noya niꞌpirinahuëꞌ, aꞌna tahuëri Yosëri nóya niꞌsarin. Aꞌnaquënso nipirinhuëꞌ ipora piyapiꞌsari noya niꞌpirinahuëꞌ, aꞌna tahuëri co Yosëri noya niꞌsarinhuëꞌ,” itërin Quisosori.

Chiminacasoꞌ shaꞌhuitantarinsoꞌ

¹⁷ Ina quëran Quirosarinquë paantapi. Papona pochin caꞌtanoꞌsanënpita amashamiachin quëparahuaton, inapitaráchin shaꞌhuitantarin.

¹⁸ —Natanco iyaroꞌsaꞌ. Quirosarinquë paantarëhuaꞌ. Inatohuaꞌ Yosë quëran quëmapico nipirahuëꞌ, shaꞌhuirapiarinaco. Cotio huaꞌanoꞌsaꞌ, maistroꞌsaꞌ, inapita masahuatonaco: “Tëpacasoꞌ yaꞌhuërin,” tosapi.

¹⁹ Ina tosahuatonaꞌ, nisha piyapiroꞌsaꞌ shaꞌhuitapi aparisitinacoso marëꞌ. Tëhuarahuatonaco, chiníquën huihuiarinaco. Huihuitonaco, pëꞌshaarinaco. Ina quëran corosëquë apatanantarinaco chiminaꞌhuaso marëꞌ. Chiminaporahuëꞌ, cara tahuëri quëran nanpiantarahuë huachi, itaantarin.

Santiaco, Coansha inapita nohuantopisoꞌ

²⁰ Ina quëran catoꞌ caꞌtanoꞌsanënpita huëꞌpi Quisoso nontacaiso marëꞌ. Sipitio huiꞌninpita inahuasoꞌ. Aꞌshinë chachin huëꞌpi. Aꞌshinsoꞌ isonahuaton: Piꞌpian Sinioro nonchinquën, topiraihuëꞌ, itërin.

²¹ —¿Maꞌtaꞌ imoya nohuantëran? itërin Quisosori. —Huaꞌan yaꞌconpatan, huaꞌhuahuëpita chiníquën nanan quëtëquëꞌ, topirahuëꞌ. Quëma pirayan ahuënsëquëꞌ, aꞌnaraꞌ inchinan quëran, aꞌnantaꞌ ahuënan quëran ahuënsëquëꞌ, itërin.

²² —Canpitasoꞌ co yaꞌipi nitochátëraramahuëꞌ niꞌton, co noꞌtëquën yonquiramahuëꞌ. Máin oꞌorëso pochin chiníquën parisitarahuë. Canpitantaꞌ aparisitohuachinënquëmaꞌ, ¿ahuantapomaꞌ ti? itërin. —Ahuantarai, topi cato chachin.

²³ —Imaramaco niꞌton, canpitantaꞌ parisitapoma mini. Napoaponahuëꞌ, co casoꞌ nanitërahuëꞌ chiníquën nanan quëtaꞌhuanquëmasoꞌ. Tata Yosëíchin nanitërinsoꞌ. Inari nohuantërinsopita acoarin. Nani inapita marëꞌ taparin huachi, itërin.

²⁴ Ina quëran oshaquëran aꞌnapita caꞌtanoꞌsanënpitari natanpi. “Chini chiníquën nanantacaisoꞌ ¿nohuantopi ti?” taꞌtonaꞌ, noꞌhuipi.

²⁵ Quisososo nipirinhuëꞌ, yaꞌipi caꞌtanoꞌsanënpita përasahuaton, pënënin: —Nisha piyapiroꞌsaꞌ chiníquën nanantacaisoꞌ paꞌyatopi. Huaꞌanoꞌsasoꞌ chiníquën nanantatonaꞌ, piyapinënpita noꞌhuiana quëran camaipi.

²⁶ Canpitaso nipirinhuëꞌ ama inapita pochin cancantocosohuëꞌ. Yosë huëntonënquë yaꞌconpatëra, co chiníquën nanantacasoꞌ nohuantërëhuëꞌ. Noya noya iyaroꞌsaꞌ yanipatamaꞌ, yaꞌipi piyapiꞌsaꞌ catahuacoꞌ.

²⁷ Piyapinën pochin cancantocoꞌ. Catahuacasoáchin yonquihuatamaꞌ, Yosë noya noya niꞌsarinquëmaꞌ.

²⁸ Cantaꞌ Yosë quëran quëmapico niporahuëꞌ, co aꞌnapita camaicaꞌhuaso marëꞌ oꞌmarahuëꞌ. Piyapiꞌsaꞌ catahuacaꞌhuaso marëꞌ oꞌmarahuë. Chiminarahuë naꞌa piyapiꞌsaꞌ nichaꞌëcaꞌhuaso marëꞌ, itërin Quisosori.

Somaraya nininsoꞌ

²⁹ Paantarahuatonaꞌ, aꞌna ninanoquë canconpi, Quirico itopisoꞌ. Ina quëran pipihuachina, notohuaroꞌ piyapiꞌsari imasapi.

³⁰ Catoꞌ quëmapiꞌsaso nipirinhuëꞌ, ira yonsanquë huënsëapi. Somaraya niꞌtonaꞌ, inaquë huënsërapi coriqui maꞌpatacaiso marëꞌ. “Quisoso naꞌhuërarin,” topachinara, chiníquën përapi. —¡Nosorocoi Sinioro! Quëmasoꞌ Tapicoꞌ shinquën. Yosë aꞌpaimarinquën niꞌton, nosorocoi quiyantaꞌ topiraihuëꞌ, itopi.

³¹ Aꞌnaquëni natanahuatonaꞌ, noꞌhuipi: “Taꞌtocoꞌ,” itopirinahuëꞌ, aquëtë chachin chiníquën nontopi. —¡Onpopiontaꞌ Sinioro nosorocoi quiyantaꞌ topiraihuëꞌ! itantapi.

³² Napotohuachinara, Quisososo chiniconahuaton: —Shaꞌhuitocoꞌ huëꞌinaꞌ, itërin. Huëꞌpachinara: —¿Maꞌtaꞌ iyaroꞌsaꞌ onpochinquëmaꞌ? itërin.

³³ —Anoyarayatocoi Sinioro quiyantaꞌ niꞌchii, itopi.

³⁴ Itohuachinara, nosoroaton, sëꞌhuarayarin. Aꞌnaroáchin noya niꞌtopi. Inapotohuachina, Quisoso imapi huachi.