Mateo 1 - Chayahuita (Shahui)

Quisocristo shimashonënpita

¹ Quisocristo nanamën shaꞌhuitaranquëmaꞌ. Inasoꞌ Yosë huiꞌnin. Iráca quëran huarëꞌ Yosë yonquirin ina aꞌpaimacaso marëꞌ. Tapico chachin Quisocristo shimashonën. Apraancontaꞌ shimashonën chachin. Yaꞌipi shimashonënpita iráca yaꞌhuëpisoꞌ shaꞌhuichinquëmaꞌ, nitotocoꞌ.

² Iráca Apraan huiꞌnahuanpachina, Isaco itopi. Ina quëran Isacontaꞌ huiꞌnahuanpachina, Cacopo itopi. Cacoposoꞌ naꞌa huiꞌninpita yaꞌhuëtërin. Aꞌnasoꞌ Cota itopi.

³ Cotantaꞌ huiꞌnahuanpachina, Parisë, Saro, inapita itopi. Tamara huaꞌhuinpita inahuasoꞌ. Ina quëran Parisë huiꞌnahuanpachina, Isromo itopi. Inantaꞌ huiꞌnin yaꞌhuëtohuachina, Aramo itopi.

⁴ Aramontaꞌ huiꞌnahuanpachina, Aminatapo itopi. Ina huiꞌnin Nasono itopi. Nasonontaꞌ huiꞌnahuanpachina, Sarëmon itopi.

⁵ Sarëmon yasaꞌapachina, Nacapa manin. Huiꞌnin yaꞌhuëtohuachina, Pooso itopi. Poososoꞌ Rota macaton, huiꞌnahuanin. Opito itopi. Opitontaꞌ huiꞌnahuanpachina, Quisi itopi.

⁶ Quisintaꞌ huiꞌnahuanpachina, Tapi itopi. Inasoꞌ copirno yaꞌconin. Ina quëran Oriasëcoꞌ saꞌin masahuaton, huiꞌnahuanin. Saromon itopi.

⁷ Saromon huiꞌnin Nopoamo itopi. Ina huiꞌnin Apiasë itopi. Apiasëntaꞌ huiꞌnahuanpachina, Asa itopi.

⁸ Asa huiꞌnin Cosahuato itopi. Cosahuatontaꞌ huiꞌnahuanpachina, Coramo itopi. Ina huiꞌnin Osiasë itopi.

⁹ Osiasëntaꞌ huiꞌnahuanpachina, Cotamo itopi. Ina huiꞌnin Acaso itopi. Acasontaꞌ huiꞌnahuanpachina, Isiquiasë itopi.

¹⁰ Ina huiꞌnin Manasisë itopi. Inantaꞌ huiꞌnahuanpachina, Amon itopi. Amon huiꞌnin Cosiasë itopi.

¹¹ Ina huiꞌnin Quiconiasë itopi. Iinpitantaꞌ yaꞌhuërin. Naporoꞌ cotioroꞌsasoꞌ, inimicoroꞌsari Papironia quëran huëcatonaꞌ, canaipi. Minsërahuatonaꞌ, napopinchin yaꞌhuëpiꞌpaꞌ quëpapi asacatacaiso marëꞌ.

¹² Ina piquëran Quiconiasë huiꞌnahuanpachina, Saratiri itopi. Ina huiꞌnin Soropapiri itopi.

¹³ Inantaꞌ huiꞌnahuanpachina, Apioto itopi. Apioto huiꞌnin Iriaquimo itopi. Ina huiꞌnin Asoro itopi.

¹⁴ Asorontaꞌ huiꞌnahuanpachina, Satoco itopi. Satoco huiꞌnin Aquimo itopi. Ina huiꞌnin Irioto itopi.

¹⁵ Iriotontaꞌ huiꞌnahuanpachina, Iriasaro itopi. Iriasaro huiꞌnin Matan itopi. Ina huiꞌnin Cacopo itopi.

¹⁶ Cacopontaꞌ huiꞌnahuanpachina, Cosi itopi. Cosi yasaꞌapachina, Maria manin. Ina huaꞌhuinsoꞌ Quisoso, Cristo itopisoꞌ.

¹⁷ Nani Quisocristo shimashonënpita shaꞌhuitëranquëmaꞌ. Apraan quëran Tapi copirno yaꞌconaquë huarëꞌ shonca catapini shimashonënpita yaꞌhuëtërin. Ina quëran Papironiaquë quëpai huarëꞌ shonca catapini shimashonënpita ninshitantaranquëmaꞌ. Ina quëran Quisocristo nasitaquë huarëꞌ, shonca catapini chachin shimashonënpita ninshitantaranquëma huachi.

Quisocristo nasitërinsoꞌ

¹⁸ Apira Quisocristo nasitërinsoꞌ shaꞌhuichinquëmaꞌ, nitotocoꞌ. Naporo tahuëriꞌsaꞌ Cosisoꞌ, nani Maria nontërin macacaso marëꞌ. Napoaponahuëꞌ coꞌhuara mashatërasohuëꞌ, Ispirito Santo nohuanton inaora cayorin.

¹⁹ Cosi nitotahuaton, paꞌyanin. Noya quëmapi niꞌton, yonquiarin. “¿Maꞌcha onpoꞌiya? Maria nani huaꞌhua maꞌpatërin. Co macaꞌhuasoꞌ yaꞌhuërinhuëꞌ. Co piyapiꞌsaꞌ shaꞌhuitarahuëꞌ, Maria tapanpachin. Coisëichin shaꞌhuitahuato, co masarahuëꞌ,” taꞌton, yonquirárin.

²⁰ Huëꞌësoꞌ, Yosë anquëninëni yaꞌnotimarin nontacaso marëꞌ. —Tashita Cosi. Carinquën nohuitëranquën. Quëmasoꞌ Tapicoꞌ shinquën. Piꞌpian shaꞌhuitaponquën oꞌmarahuë. Maria noya maquëꞌ. Co quëmapiri sëꞌhuarinhuëꞌ. Ispirito Santo nohuanton, inaora cayorin. Napoaton noya maquëꞌ.

²¹ Huaicasoꞌ nanihuachin, quëmapiaꞌhuaya nasitapon. Nasitohuachin, Quisoso itëquëꞌ. Piyapinënpita oshanënaꞌ inquitaton, nichaꞌësarin niꞌton, ina nininën acotëquëꞌ, itërin anquëniri. Itahuaton, panantarin huachi.

²² Iráca Yosë nohuanton, pënëntonaꞌpi ninorin. Ninoton, Yosë quiricanënquë chachin ninshitërin:

²³ “Aꞌna tahuëri nanon inaora cayoapon. Co quëmapiri sëꞌhuapirinhuëꞌ, napoapon. Quëmapiaꞌhuaya huaihuachin, Imanino itapi,” tënin. Yosë chachin oꞌmaton, yacaparinpoaꞌ, tapon naporin. Ina pochin nasitimahuachina, iráca ninopisoꞌ nanirin huachi.

²⁴ Cosisoꞌ capayatahuaton, Sinioro anquëninën natëton, Maria manin huachi.

²⁵ Macaponahuëꞌ, co ichihuëꞌërinhuëꞌ. Huaꞌhuin nasitërin piquëran huarëꞌ ichihuëꞌërin. Quëmapiaꞌhuaya nasitohuachina, Quisoso itopi.