Marcos 7 - Chayahuita (Shahui)

Cotio mashocoroꞌsaꞌ napopisoꞌ

¹ Ina quëran aꞌnaquën parisioroꞌsaꞌ, cotio maistroꞌsaꞌ, inapita Quirosarin quëran oꞌmapi Quisoso natanacaiso marëꞌ.

^2-3 Quisoso caꞌtanoꞌsanënpita coshatasoiꞌ, quënanquipi. Aꞌnaquën co niopoimirataponaraihuëꞌ coshatapi. Parisioroꞌsasoꞌ coꞌhuara coshachatëraponahuëꞌ, piꞌpian iꞌshaquë niopoimiratopi. Yaꞌipi cotioroꞌsaꞌ ina pochin yonquipi. “Co inapohuatëhuahuëꞌ, oshahuanarihuaꞌ,” tëcatonaꞌ napopi. Shimashonënaꞌ inachintopisoꞌ niꞌton, inapopi.

⁴ Mircatoquë paꞌpi quëran yacoshatohuachinara, iꞌquë niopoimiratopi. Naꞌa nisha nisha inachintopisopita yaꞌhuëtopi. Minëroꞌsaꞌ, iꞌsha taꞌpainanoꞌsaꞌ, huaꞌna yonsharoꞌsaꞌ, pëꞌsararoꞌsaꞌ, inapita paꞌmopi.

⁵ Napoaton parisioroꞌsaꞌ, cotio maistroꞌsaꞌ inapitari Quisoso natanpi. —¿Onpoatontaꞌ Maistro quëma aꞌchintëransopitasoꞌ, co niopoimirataponaraihuëꞌ coshatapi? Shimashonënpoaꞌ inachintopirinahuëꞌ, inahuasoꞌ co napopihuëꞌ, itopi.

⁶ —Co noꞌtëquën iyaroꞌsaꞌ yonquiramahuëꞌ. “Yosë imarai,” topiramahuëꞌ, co imaramahuëꞌ. Canpitasoꞌ nonpintënquëmaꞌ. Iráca Yosë quiricanënquë Isaiasë noꞌtëquën ninorinquëmaꞌ: “Isopita piyapiꞌsasoꞌ nanamëna quëran noya nontopirinacohuëꞌ, co cancanëna quëran imarinacohuëꞌ.

⁷ ‘Yosë pënëntërinsoꞌ aꞌchinarai,’ topirinahuëꞌ, inahuara yonquipisoꞌ niaꞌchintapi. Napoaton topinan quëran chinotërinaco,” tënin Yosë. Iráca Isaiasë ninshitaton, naporin.

⁸ Inapochachin canpitantaꞌ Yosë pënëninpoasoꞌ naniantahuatomaꞌ, piyapiꞌsaꞌ aꞌchinpisoꞌ natërama huachi, itërin.

⁹ Naquëranchin itantarin: —Tehuënchachin Yosë pënëntërinsoꞌ aꞌporamaꞌ shimashonëmaꞌ napopisoꞌ natëcamaso marëꞌ.

¹⁰ Niꞌcoꞌ. Moisësë iráca pënëntaton, naporin: “Tatamaꞌ, mamamaꞌ, inapita noya natëtomaꞌ, catahuacoꞌ. Inso tëranta paꞌpinaꞌ, aꞌshinaꞌ inapita co noyahuë yonquirapitonaꞌ noꞌhuihuachinaꞌ, tëpacoꞌ,” tënin.

¹¹ Canpitaso nipirinhuëꞌ nisha aꞌchinamaꞌ. Aꞌchinatomaꞌ, naporamaꞌ: “Aꞌnaquën nanitërin paꞌpinaꞌ, aꞌshinaꞌ apiratacasoꞌ. ‘Maꞌsha yaꞌhuëtërincosoꞌ nani acorahuë Yosë quëtaꞌhuaso marëꞌ,’ topatëra, co tatamaꞌ, mamamaꞌ inapita quëtacasoꞌ yaꞌhuërinhuëꞌ,” toconamaꞌ. Napoaton tatamaꞌ, mamamaꞌ inapita maꞌsha pahuantohuachinara, apiratatomaꞌ, co quëtëramahuëꞌ.

¹² “Co quëtacasoꞌ yaꞌhuërinhuëꞌ,” toconatomaꞌ, co catahuaramahuëꞌ.

¹³ Ina pochin niaꞌchintatomaꞌ, co Yosë quiricanën natëramahuëꞌ. Huiꞌnamapitantaꞌ aꞌchintëramaꞌ inapochachin nicacaiso marëꞌ. Inapochachin pochin naꞌcon nisha nisha niaꞌchintëramaꞌ, itërin Quisosori.

Onporahuatëhuasona oshahuanëhuasoꞌ

¹⁴ Naquëranchin piyapiꞌsaꞌ përasahuaton, aꞌchintantarin. —Yaꞌipinquëmaꞌ natanco noꞌtëquën yonquicamaso marëꞌ.

¹⁵ Co mantaꞌ maꞌsha yaꞌhuërinhuëꞌ nonënpoaquë yaꞌconahuaton, aoshahuaninpoasoꞌ. Cancanënpoa quëran pipirinsoꞌ tëhuënchinsoꞌ aoshahuaninpoaꞌ. [

¹⁶ Huëratëhuanpatamaꞌ, noya natanatomaco, yonquicoꞌ, itërin.]

¹⁷ Nani aꞌchintohuachina, piyapiꞌsaꞌ patahuaton, pëiquë yaꞌconconin. Caꞌtanoꞌsanënpitantaꞌ yaꞌconpi. Nani yaꞌconpachinara: “Achin naporansoꞌ co nitotëraihuëꞌ. ¿Maꞌtaꞌ tapon naporan?” itopi.

^18-19 —¿Co canpita tërantaꞌ nitochátëraramahuëꞌ ti? Inta nipachin, aꞌchintantaꞌinquëmaꞌ. Nani maꞌsha caꞌnëhuaso marëꞌ co ina marëꞌ oshahuanëhuahuëꞌ. Co cosharoꞌ cancanënpoaquë yaꞌconinhuëꞌ. Chiꞌchirinamënpoaquë yaꞌconin. Ina quëran inquiantarëꞌ. Napoaton yaꞌipi cosharoꞌ noya capacasoꞌ. Coshatërëhuaso marëꞌ co oshahuanëhuahuëꞌ, itërin.

²⁰ Ina quëran itaantarin: —Cancanëma quëran co noyahuëꞌ yonquihuatamara, co noyahuëꞌ ninamaꞌ. Ina marëꞌ oshahuanamaꞌ.

²¹ Acopoꞌ cancanëma quëran co noyahuëꞌ yonquiramasopita pipirin. Co noyahuëꞌ yonquihuatamaꞌ, monshihuanamaꞌ, ihuatëramaꞌ, tëpatëramaꞌ.

²² Nitëhuananpitëramaꞌ. Paꞌyatacasoráchin cancantëramaꞌ. Aꞌnapita maꞌshanën noyaparamaꞌ. Co noyahuëꞌ ninamaꞌ. Nonpinamaꞌ. Nisha nisha co noyahuëꞌ ninamasoꞌ co yaaꞌporamahuëꞌ. Apiraramaꞌ. Pinotëramaꞌ. “Casoꞌ co aꞌnapita pochincohuëꞌ. Noya noyaco,” toconamaꞌ. Co yonquinahuanhuëꞌ ninamaꞌ.

²³ Co noyahuëꞌ yonquihuatamara, ina pochin ninamaꞌ. Ina marëꞌ oshahuanamaꞌ, itërin Quisosori.

Nisha sanapi natëtërinsoꞌ

²⁴ Ina quëran pipirahuaton, nisha piyapiꞌsaꞌ yaꞌhuëpiquë paꞌnin. Tiro, Siton, inapita yaꞌcariya paaton, aꞌna pëiquë yaꞌconconin. “Ama isëquë huëꞌnahuësoꞌ aꞌnapita shaꞌhuitocosohuëꞌ,” itopirinhuëꞌ, aꞌnaroáchin yaꞌipi nahuinin.

^25-26 Inaquë aꞌna sanapi yaꞌhuërin. Co cotio sanapihuëꞌ. Nisha piyapi. Siropinisia parti huaꞌhuatërin. Huaꞌhuinsoꞌ parisitárin. Sopairi yaꞌcoancantërin niꞌton, co inaora yonquirinsoꞌ yonquirinhuëꞌ. Quisoso huëꞌninsoꞌ natantahuaton, paaparin. Paaparahuaton, Quisoso nantën pirayan isonconin. —Huaꞌhuahuë Sinioro parisitárin. Sopairi yaꞌcoancantaton, chiníquën aparisitarin. Inquitoco, topirahuëꞌ, itiirin.

²⁷ —Niꞌquëꞌ imoya. Huaꞌhuaroꞌsaꞌ aꞌcahuatëra, co cosharonën osërëtahuatëꞌ, niꞌnira aꞌcarëhuëꞌ. Huaꞌhuaroꞌsaꞌton coshachin noya natëaquë huarëꞌ, itërin Quisosori.

²⁸ —Naporin mini Sinioro. Napoaponahuëꞌ, huaꞌhuaroꞌsaꞌ piꞌpian tërantaꞌ atatohuachinara, niꞌniraroꞌsarintaꞌ capitërin niꞌton, quiyantaꞌ catahuacoi topirahuëꞌ, itërin.

²⁹ —¡Naporinchi paya! Ma noya natëranco niꞌton, yaꞌhuëranꞌpaꞌ paantaquëꞌ. Nani sopai huaꞌhuan quëran pipirin, itërin.

³⁰ Sanapiso pëinënquë canconahuaton, huaꞌhuin noya quëhuëánin quënanconin. Nani sopai pipirin huachi.

Nëꞌhuëroꞌsaꞌ anatantërinsoꞌ

³¹ Quisoso Tiro quëran pipirahuaton, Sitontaquëchin naꞌhuërin. Ina quëran Ticaporisëquë canquirin. Inaso noꞌpaꞌ Cariria sono yonsanquë yaꞌhuërin.

³² Inaquë aꞌnara apia quëpi Quisosori anoyatacaso marëꞌ. Noyá nëꞌhuërin. Naporahuaton, paꞌpi icotëꞌ ninin. “Iso quëmapi sëꞌhuaquëꞌ noyachin topiraihuëꞌ,” itopi.

³³ Napotohuachinara, apiaráchin amashamiachin quëparin. Quëparahuaton, imirin quëran icarahuëratërin. Ina quëran niipiimiratahuaton, nënërain sëꞌhuatërin.

³⁴ Inápaquë nëꞌpëtahuaton, sëtërin quëran panca nii oꞌhuarin. Ina quëran Yosë nontahuaton: “¡Ipata!” itërin. “¡Nëꞌhuëransoꞌ inquiquëꞌ!” tapon napotërin.

³⁵ Naporoꞌ nëꞌhuërinsoꞌ inquirin huachi. Nënëriontaꞌ noyatahuaton, noya nonin huachi.

³⁶ Quisosori piyapiꞌsaꞌ pënënin: “Ama aꞌnapita shaꞌhuitocosohuëꞌ,” itërin. Itopirinhuëꞌ, piyapiꞌsasoꞌ paꞌsahuatonaꞌ, shaꞌhuiraꞌpiapi. Naꞌcon naꞌcon pënënpirinhuëꞌ, aquë aquëtë huarëꞌ shaꞌhuiraꞌpiapi.

³⁷ “¡Maꞌpitacha Quisoso nitotërin paya! Nëꞌhuëroꞌsaꞌ anoyatohuachina, noya natantopi huachi. Co nonpirinahuëntaꞌ, aꞌnaroáchin anoyatërin niꞌton, noya nonsapi. ¡Yaꞌipichi noya ninin paya!” topi.