Marcos 5 - Chayahuita (Shahui)

Sopairoꞌsari yaꞌcoancantërinsoꞌ

¹ Ina quëran, sonoꞌ aquëtëran Quirasa parti itopiquë canconpi.

² Quisoso nani nonshihuachina, aꞌna quëmapiri naꞌpi nanin quëran pipirahuaton, nacapirin. Sopairi yaꞌcoancantërin niꞌton, co huachi noya yonquirinhuëꞌ. Huaꞌyantërin.

³ Naꞌpi naninquë chimipiroꞌsaꞌ poꞌmopiquë yaꞌhuërin. Paꞌpi chiníquën niꞌton, co catinaquë tërantaꞌ nanitopihuëꞌ tonpocaisoꞌ.

⁴ Naꞌaroꞌ catinaquë tanpaquën tonpotahuatonaꞌ, paꞌon tonpotopirinahuëꞌ, oshitërachinin. Co incariso tërantaꞌ nanitërinhuëꞌ minsëcasoꞌ.

⁵ Nani tashiꞌ, nani tahuëri iratárin. Naꞌpi naninquë, motopiquë inaquëpita paꞌsápaton, chiníquën yaitárin. Naꞌpiquë nipëꞌsharárin.

⁶ Quisoso aquë quëran quënanahuaton, taꞌaquirin. Quisoso nocotapataquë isonquirahuaton, mosharin.

^7-8 Napohuachina, Quisosori nosoroaton, aꞌnaroáchin sopai nontërin. —¡Iso quëmapi quëran pipico huachi! itërin. Ina natanahuaton, sopairi chiníquën aꞌpanirin. —¿Maꞌtaꞌ yaonpotarancoi? Quëmasoꞌ Quisosonquën, Yosë huiꞌninquën niꞌton, chini chiníquën nanantëran. Yosë marëꞌ ama apira aparisitocoisohuëꞌ, itërin.

⁹ —¿Maꞌninquëntaꞌ quëmasoꞌ? itërin Quisosori. —Naꞌacoi niꞌtoi, “naꞌa huaranca,” itërinacoi.

¹⁰ Ama aꞌna parti aꞌpacoisohuëꞌ, tosapi.

¹¹ Ina yaꞌcariya notohuaroꞌ coshiroꞌsaꞌ panënquë coshatapi.

¹² —Aꞌpacoi coshiroꞌsaquë tërantaꞌ yaꞌcoantaꞌii, tosapi.

¹³ —Inta nipachin, inaquë paatomaꞌ yaꞌconconcoꞌ, itërin. Itohuachina, sopairoꞌsaꞌ pipirahuatonaꞌ, coshiroꞌsaquë yaꞌconconpi. Ina quëran yaꞌipi coshiroꞌsaꞌ, cato huaranca pochin nipirinahuëꞌ, huaꞌyantatonaꞌ taꞌapi. Tahuan paꞌtatonaꞌ, sonoquë niitopi. Inapoatonaꞌ, taquiitopi.

¹⁴ Coshi aꞌpainaꞌpiroꞌsasoꞌ niꞌsahuatonaꞌ, taꞌarëꞌnachin ninanoquë yaꞌhuëpisopita shaꞌhuitonpi. Ninano pirayan yaꞌhuëpisopitantaꞌ aꞌnaya aꞌnaya shaꞌhuitëraꞌpiapi. Natantahuatonaꞌ, “¿Maꞌtaꞌ onpocaisoꞌ?” taꞌtonaꞌ, paꞌpi nicaponaꞌ.

¹⁵ Quisosoquë canquirahuatonaꞌ, quëmapi huaꞌquiꞌ huaꞌyantërinsoꞌ quënanquipi. Nani aꞌmoanaton, noya huënsërarin. Naꞌa sopairoꞌsari yaꞌcoancantopirinahuëꞌ, noya yonquiantarin. Co huachi huaꞌyantërinhuëꞌ. Napoaton paꞌyanpi.

¹⁶ “Quisosori anoyatërin. Sopairoꞌsaꞌ aꞌpahuachina, coshiroꞌsaquë yaꞌconconpi. Inapohuachinara, tahuan paꞌtahuatonaꞌ, sonoquë taquiitopi huachi,” itopi niꞌpisopitari.

¹⁷ Natanahuatonaꞌ, piyapiꞌsaꞌ tëꞌhuatopi: “Aꞌna parti paquëꞌ,” itopi Quisoso nontatonaꞌ.

¹⁸ Quisoso potiquë yaꞌconasoꞌ, huaꞌyantërinsoari huëcapairahuaton, itapon: “Cantaꞌ imainquën,” itërin.

¹⁹ Quisososo nipirinhuëꞌ co nohuantërinhuëꞌ. —Yaꞌhuëranquë iyasha paantaquëꞌ. Quëmopinënpita shaꞌhuitonquëꞌ. “Sinioro noyá anoyatërinco. Naꞌcon nosororinco,” itëquëꞌ, itërin Quisosori.

²⁰ Napotohuachina, paꞌnin. Ticaporisë parti shaꞌhuiraꞌpiarin. “Quisoso nóya anoyatërinco,” itëraꞌpiarin. Natanahuatonaꞌ, “¡Maꞌpitacha shaꞌhuirin paya! ¡Ma noya catahuarin!” topi yaꞌipiya.

Sanapi anoyatahuaton, Cairo huiꞌnin ananpitaantarinsoꞌ

²¹ Quisososoꞌ pëntonquiantarahuaton, naꞌa piyapiꞌsaꞌ quënanquirin. Sonoꞌ yonsanquë huëcapairahuatonaꞌ, tancapitopi.

²² Naporoꞌ aꞌna cotio huaꞌan Cairo itopiso huëꞌnin. Inasoꞌ, niyontonpiso pëiꞌ huaꞌan yaꞌconin. Quisoso quënanquirahuaton, nantën pirayan isonquirin:

²³ —¡Huiꞌnahuë Sinioro, chiminarin! Huëquëꞌ. Sëꞌhuaquiton, anoyatoco, chiminpachin, itárin.

²⁴ —Inta nipachin, tosahuaton, imarin. Naꞌa piyapiꞌsantaꞌ imasapi niꞌton, Quisoso yaꞌquëëtërapi.

²⁵ Paaquëyaꞌ, aꞌna sanapiri imaquiarin, huaꞌquiꞌ panca huënaiꞌ aꞌparinsoꞌ. Nani shonca catoꞌ piꞌipi co sanorinhuëꞌ.

²⁶ Naꞌa notoroꞌsari nonënpirinahuëꞌ, naꞌcon parisitárin. Nani yaꞌipi coriquinën iꞌquiaponahuëꞌ, co mantaꞌ noyatërinhuëꞌ. Aquëtë chachin nisarin.

^27-28 Quisoso nahuininsoꞌ natantahuaton, pinën quëran imaquiarin. “Aꞌmorinso tërantaꞌ sëꞌhuahuato, anoyatarinco,” taꞌton, piyapiꞌsaꞌ yaꞌsëratërarahuaton, aꞌmorinsoꞌ sëꞌhuatiirin.

²⁹ Naporoꞌ aꞌnaroáchin huënaiꞌ noꞌnarin. Canio quëran nani noyatërin ninatanin.

³⁰ Quisososoꞌ co quënanaponahuëꞌ, inaora nitotërin. “Aꞌnasoꞌ natëtonco, sëꞌhuaquirinco. Ca nohuanto noyatërin,” taꞌton, aꞌnaroáchin tahuërëtahuaton, natantërin: —¿Intaꞌ aꞌmorahuësoꞌ sëꞌhuatërinco? tënin.

³¹ —Niꞌquëchi Maistro, notohuaroꞌ piyapiꞌsaꞌ yaꞌquëëtapirinënquënhuëꞌ, “¿Intaꞌ sëꞌhuarinco?” ¿tënan ti? itërin caꞌtanoꞌsanënpitari.

³² Itopirinahuëꞌ, Quisososoꞌ aꞌnaya aꞌnaya niꞌsarin. “¿Intaꞌ sëꞌhuarinco?” taꞌton, niꞌsárin.

³³ Napohuachina, sanapisoꞌ “Nani anoyatërinco,” taꞌton, ropa ropátërarin quëran Quisoso huëcapairin. Isonquirahuaton, noꞌtëquën shaꞌhuitërin. “Huaꞌquiꞌ caniorahuë niꞌton, sëꞌhuaranquën Sinioro. Sëꞌhuatënquën, aꞌnaroáchin noyatërahuë huachi,” tënin.

³⁴ —Natëranco niꞌton, nani imoya, anoyatëranquën. Nani noyatëran niꞌton, noya paquë huachi, itërin.

³⁵ Ina nontaso chachin, Cairo pëinën quëran huëꞌsahuatonaꞌ, shaꞌhuitiipi. —Huiꞌnan nani chiminin huachi. ¿Maꞌmarëtaꞌ topinan quëran Maistro quësaran? itiipi.

³⁶ Quisososo nipirinhuëꞌ piyapiꞌsaꞌ noninsoꞌ natanaponahuëꞌ, co ina yonquirinhuëꞌ. —Ama iyasha paꞌyanquësohuëꞌ. Natëco, itërin.

³⁷ “Ama aꞌnapitasoꞌ huëꞌinasohuëꞌ,” topachina, Pitro, Santiaco, Coansha, inapitaráchin paꞌpi. Coanshasoꞌ Santiaco iin.

³⁸ Cairo pëinënquë canconahuatonaꞌ, naꞌa piyapi natanconpi. Chiníquën naꞌnëtonaꞌ, ayanápi.

³⁹ Yaꞌcontarahuaton, inapita itapon: —¿Onpoatomataꞌ naꞌnëtomaꞌ, noncaroaramasoꞌ? Co sanapiaꞌhua chimininhuëꞌ. Huëꞌësárin, itërin Quisosori.

⁴⁰ Naporinsoꞌ natanahuatonaꞌ, piyapiꞌsari tëhuapirinahuëꞌ. Quisosorisoꞌ inapita ocoirahuaton, paꞌpin, aꞌshin, cara caꞌtanoꞌsanën, inapitaráchin quëparin. Sanapiaꞌhua yaꞌhuërinquë yaꞌconcontarin.

⁴¹ Maimirarahuaton, inaora nananquë: —Tarita comi, itërin. “Huënsëquëꞌ apiaꞌhua,” tapon napotërin.

⁴² Aꞌnaroáchin sanapiaꞌhua huënsërahuaton, huanirin. Nani shonca catoꞌ piꞌipitërin niꞌton, noya iratërin. Ina niꞌsahuatonaꞌ, yaꞌipi piyapiꞌsaꞌ paꞌpi paꞌyanpi. “¡Maꞌpítacha nitotaton, ananpitaantarin paya!” topi.

⁴³ Quisososo nipirinhuëꞌ, “Ama aꞌnapita shaꞌhuitocosohuëꞌ,” itahuaton, “Nanon aꞌcacoꞌ,” itërin.