Marcos 4 - Chayahuita (Shahui)

Paꞌsarayarin quëran aꞌchininsoꞌ

¹ Naquëranchin sonoꞌ yonsanquë Quisoso aꞌchiantararin. Inaquë notohuaroꞌ piyapiꞌsaꞌ niyontonpi natanacaiso marëꞌ. Huaꞌhuayatërahuëꞌ tancapitohuachinara, potiquë yaꞌconahuaton, huënsëmarin. Inaquë yanponapirarin. Yaꞌhuërëꞌ piyapiꞌsasoꞌ iiꞌ yonsanquë yamorapi.

² Nisha nisha pënënto nanan aꞌchintarin. Ma pochinsona Yosë nanamën nininsoꞌ ayonquicaso marëꞌ aꞌchintarin.

³ Aꞌchintaton, itapon: “Natanco aꞌchinchinquëmaꞌ. Aꞌna quëmapi shaꞌtapon paꞌsarin.

⁴ Naꞌa trico paꞌsarayarin papotacaso marëꞌ. Paꞌsarayahuachina, aꞌnaquën yaꞌpirin iraquë huarëꞌ anotërin niꞌton, inairaroꞌsari huëcapairahuatonaꞌ, pëꞌyaquipi.

⁵ Aꞌnaquën yaꞌpirin naꞌpiroquë paꞌsarayarin, piꞌpian piꞌpian noꞌpaꞌ yaꞌhuërinquë. Inaquë, shiarahuaton, papotopirinhuëꞌ.

⁶ Piꞌiri chiníquën picahuachina, yaahuirin. Piꞌpisharaꞌhuaya itëhuanin niꞌton, ahuirin huachi.

⁷ Aꞌnaquën yaꞌpiriontaꞌ nahuanoquë paꞌsarayarin. Inaquë papotopirinhuëꞌ, nahuanoꞌsantaꞌ papotërin. Shia aꞌshinahuatonaꞌ, imotërin. Napoaton co nitërinhuëꞌ.

⁸ Aꞌnaquënso nipirinhuëꞌ noyaroꞌpaquë paꞌsarayarin. Inaquë noya papotërin. Aꞌshinpachina, shaꞌnin quëran naꞌcon naꞌcon nitërin. Aꞌnaquën yaꞌpirin cara shonca, cara shonca nitërin. Aꞌnaquëontaꞌ saota shonca, saota shonca nitërin. Aꞌnaquënsoꞌ pasa, pasa nitochanin,” itërin.

⁹ Itahuaton: “Huëratëhuanpatamaꞌ, noya natanatomaco, yonquicoꞌ,” itaantarin.

Pënënto nananquë aꞌchininsoꞌ

¹⁰ Niyontonpisopita paꞌpachinara, aꞌnaquën imapisopita co paꞌpihuëꞌ. Shonca catoꞌ caꞌtanoꞌsanënpitarë chachin co paꞌpihuëꞌ. “Apira aꞌchintërancoisoꞌ co noya nitotëraihuëꞌ. ¿Maꞌtaꞌ tapon naporan?” itopi.

¹¹ Itohuachinara, Quisosori itapon: “Onpopinsona Yosë huaꞌanëntërinsoꞌ co aꞌnapita nitotopihuëꞌ. Co imarinacohuëꞌ niꞌton, co nitotopirinahuëꞌ, canpitasoꞌ carinquëmaꞌ aꞌchinchinquëmaꞌ. Yosë nanamën noꞌtëquën nitotacamaso marëꞌ aꞌchinchinquëmaꞌ. Aꞌnapitaso nipirinhuëꞌ pënënto nanan quëransáchin aꞌchintarahuë.

¹² Inapitasoꞌ co yanatërinacohuëꞌ niꞌton, natanaponaraihuëꞌ, co natëtapihuëꞌ. Maꞌsona ninahuësontaꞌ nicaponaraihuëꞌ, co yonquiapihuëꞌ. Imarinaco naporini, oshanënaꞌ inquitahuato anoyacancanchitohuëꞌ,” itërin.

Tricoraya tapon naporinsoꞌ

¹³ Naquëranchin Quisosori caꞌtanoꞌsanënpita itantapon: “Achin shaꞌhuitëranquëmasoꞌ ¿co nitotëramahuëꞌ ti? Co inaya tërantaꞌ nitotohuatamahuëꞌ, ¿onporahuatomacha yaꞌipiya nitotërëꞌpënquëmaya? Carinquëmaꞌ nipachin anitochinquëmaꞌ.

¹⁴ Tricoraya paꞌsarayarëso pochin Yosë nanamën yaꞌipi parti aꞌchinëꞌ.

¹⁵ Aꞌnaquën piyapiꞌsaꞌ iraquë huarëꞌ paꞌsarayarinso pochin nipi. Yosë nanamën natanpirinahuëꞌ, aꞌnaroáchin Satanasë huëꞌnin. Yosë nanamën natanpisoꞌ osërëtiirin. Ama natëcaiso marëhuëꞌ ananiantërin.

¹⁶ Aꞌnaquën piyapiꞌsantaꞌ naꞌpiroquë paꞌsarayarinso pochin nipi. Yosë nanamën natanahuatonaꞌ, aꞌnaroáchin paꞌyatatonaꞌ, natëpirinahuëꞌ,

¹⁷ co cancanëna quëran huarëꞌ natëpihuëꞌ. Co chiníquën cancantatonahuëꞌ, co natëmiatopihuëꞌ. Yosë nanamën yaimapi niꞌton, aꞌnapitari tëhuapi, noꞌhuipi, napotopi. Napohuachinara, Yosë nanamën yaaꞌpopi. Maꞌsha onpohuachinara, aꞌnaroáchin nanamën aꞌpopi.

¹⁸ Aꞌnaquën piyapiꞌsantaꞌ nahuanoquë paꞌsarayarinso pochin nipi. Yosë nanamën natanpirinahuëꞌ,

¹⁹ maꞌsharáchin yonquipi. ‘Naꞌa coriqui, maꞌsha, inapita yaꞌhuëtohuachincoi, noya cancantarai,’ topi. Napoaton nahuanoꞌsari imotërinso pochin, nani maꞌsha nohuantatonaꞌ, Yosë nanamën naniantopi. Co imamiatopihuëꞌ.

²⁰ Aꞌnaquënso nipirinhuëꞌ noyaroꞌpaquë paꞌsarayarinso pochin nipi. Yosë nanamën noya natanpi. Natanahuatonaꞌ, cancanëna quëran natëpi. Sharoꞌsaꞌ nisha nisha nitërinso pochin natëtopi. Aꞌnaquën yaꞌpirin cara shonca, cara shonca nitërinso pochin noyamiachin imapi. Aꞌnaquëontaꞌ saota shonca, saota shonca nitërinso pochin noya imapi. Aꞌnaquënsoꞌ pasa, pasa nitërinso pochin yaꞌipi cancanëna quëran imatonaꞌ, noya noya imapi huachi,” itërin.

Nanparin pochin nininsoꞌ

²¹ Naquëranchin Quisosori itaantarin: “Niꞌcoꞌ iyaroꞌsaꞌ. Nanparin iꞌchinpihuatëra, ¿co iꞌmëanaquë poꞌmorëhuëꞌ paꞌ? Co pëꞌsaraanaquë tërantaꞌ acorëhuëꞌ. Nanparin aconanquë acorëꞌ noya aꞌpinacaso marëꞌ.

²² Iporasoꞌ maꞌsha noyá poꞌopinan pochin niꞌton, co insontaꞌ nitotërinhuëꞌ. Aꞌna tahuëriso nipirinhuëꞌ yaꞌipiya nitotapi.

²³ Huëratëhuanpatamaꞌ, noya natanatomaco, yonquicoꞌ,” itërin.

²⁴ Ina quëran napotaantarin: “Natanpatamaꞌ, noya yonquicoꞌ. Onpopinsona aꞌnapita nitohuatamaꞌ, inapochachin Yosëntaꞌ nitarinquëmaꞌ. Aquë aquëtë chachinhuë nipon quëtarinquëmaꞌ.

²⁵ Noya natëhuatamaꞌ, naꞌcon naꞌcon nitotaramaꞌ. Aꞌnaquënso nipirinhuëꞌ, ‘Nani nitotërahuë,’ topirinahuëꞌ, co yanatëpihuëꞌ. Napoaton Yosëri tananpitarin. Inapotohuachina, piꞌpian tërantaꞌ nitotopisoꞌ, yaꞌipiya naniantapi,” itërin.

Yaꞌpirin papotërin quëran aꞌchininsoꞌ

²⁶ Ina quëran napotaantarin: “Yosë huaꞌanëntërinsoꞌ aꞌchinchinquëmaꞌ. Iminquë shaꞌtërëso pochin ninin.

²⁷ Shaꞌtërinso piquëran tashihuachina, huaꞌanën huëꞌërin. Tahuërihuachina, huënsëantarin. Nani tahuëri naporárin. Oshaquëran shaꞌninsoꞌ pichopitahuaton, papotërin. Onporohuatonsoꞌ papotërinsoꞌ co nitotërinhuëꞌ.

²⁸ Shaꞌpachina, inaora nohuanton, noꞌpa quëran papotërin. Nani aꞌshinpachina, huënsharatërin. Nani huënsharatahuaton, nitërin.

²⁹ Yaꞌpirin cayahuachina, nani noya macacasoꞌ niꞌton, manin huachi,” tënin. (Inapochachin Yosë nanamën shaꞌhuitohuatëhuaꞌ, ina nohuanton, oshaquëran aꞌnaquën natëtapi.)

Mostasaraya pochin nininsoꞌ

³⁰ Ina quëran shaꞌhuitantarin: “¿Maꞌpochintaꞌ Yosë huaꞌanëntërinpoasoꞌ ninin? ¿Ma quërantaꞌ nanitërëꞌ ina yonquicasoꞌ?

³¹ Mostasaraya noꞌpaquë shaꞌnëso pochin ninin. Mostasarayasoꞌ huaꞌhuishin. Aꞌnapita yaꞌpirin quëran piꞌpi piꞌpisharaꞌhuaya.

³² Piꞌpiraꞌhuaya niponahuëꞌ, shaꞌpatëra, panca panca papotërin. Aꞌnapita sharoꞌsa quëran panca panca taꞌan ninin. Panca sëꞌpatohuachina, inairaroꞌsaꞌ naꞌiyatonaꞌ, inaquë pëipi,” itërin.

Maꞌpochinsona nininsoꞌ

³³ Ina pochin Quisosori piyapiꞌsaꞌ aꞌchintarin. Naꞌa pënënto nananoꞌsa quëran ayonquiarin. Natantiinpichin aꞌchintarin.

³⁴ Napoaponahuëꞌ, pënënto nanan quëransáchin aꞌchintërin. Ina quëran caꞌtanoꞌsanënpitaráchin yaꞌhuëhuachinara, oshaquëran aꞌchintantarin noꞌtëquën yonquicaiso marëꞌ.

Ihuan aꞌparinsoꞌ

³⁵ Naporoꞌ tahuëri chachin nani tashirarapasoꞌ, caꞌtanoꞌsanënpita itapon: —Sono aquëtëran paꞌahuaꞌ, itërin.

³⁶ Nani piyapiꞌsa nontahuaton, Quisoso potiquë yaꞌcomarin. Napohuachina, caꞌtanoꞌsanënpitarë chachin paꞌpi. Naporoꞌ aꞌnapitantaꞌ nisha potiroꞌsaquë paꞌpi.

³⁷ Paaquëyaꞌ, panca ihuani manin. Coꞌsacairi poti opoto opototahuaton, nani yamëntairapirinhuëꞌ.

³⁸ Yaꞌhuërë Quisososoꞌ, huanconënquë motonan motoantahuaton, huëꞌë́rarin. Caꞌtanoꞌsanënpitari ochinanpi: —¡Catahuacoi Maistro chimiitarihuaꞌ! ¿Co ina yonquiranhuëꞌ ti? itopi.

³⁹ Huanintarahuaton, ihuan aꞌparin. Sonontaꞌ camaiton: —¡Sanoquëꞌ! ¡Copi tëquë huachi! itërin. Itohuachina, ihuan copitënin. Aꞌnaroáchin sanoirin.

⁴⁰ —¿Onpoatomataꞌ tëꞌhuataramasoꞌ? ¿Co Yosë natëyatëraramahuëꞌ ti? itërin.

⁴¹ Paꞌpi paꞌyanahuatonaꞌ, ninontopi: —¿Ma quëmapicha isosoꞌ niꞌton, ihuan aꞌparin nicaya? Sonontaꞌ aꞌnaroáchin asanoirin, nitopi.