Marcos 15 - Chayahuita (Shahui)

Piratoquë quëpapisoꞌ

¹ Tahuërianpitohuachinara, yaꞌipi cotio ansianoꞌsaꞌ, cotio maistroꞌsaꞌ, corto huaꞌanoꞌsaꞌ, inapita niyontonahuatonaꞌ, ninontopi. Ina quëran Quisoso tonporahuatonaꞌ, Pirato yaꞌhuërinquë quëpapi.

² —¿Quëmasoꞌ cotioroꞌsaꞌ copirnonquën ti? itërin Piratori. —Inaco mini, tënin Quisoso.

³ Ina quëran corto huaꞌanoꞌsari naꞌcon nonpinapipirinahuëꞌ, co mantaꞌ tëninhuëꞌ.

⁴ —Nani maꞌsha shaꞌhuirapipirinënquënhuëꞌ, ¿co mantaꞌ tënanhuëꞌ ti? itaantarin Piratori.

⁵ Quisososo nipirinhuëꞌ, co mantaꞌ tëninhuëꞌ. Napohuachina: “Ma quëmapitaꞌ isosoꞌ niꞌton, co mantaꞌ tëninhuëꞌ,” tënin Pirato yonquiaton.

Tëpacaiso marëꞌ shaꞌhuirinsoꞌ

⁶ Nani Pascoa tahuëri aꞌnara apinaꞌpi tashinan pëi quëran ocoirin noya pipicaso marëꞌ. Pita tahuëri niꞌton, Noma huaꞌan napotërin. Insosona piyapiꞌsari nohuantopisoꞌ ocoirin.

⁷ Tashinan pëiquë copirno noꞌhuipisopita yaꞌhuëpi. Copirno piyapinënpita tëpapi niꞌton, tashinan pëiquë poꞌmopi. Aꞌnaraꞌ Parapasë itopisoꞌ.

⁸ Piyapiꞌsaꞌ huëꞌsahuatonaꞌ, Pirato nontiipi. —Ipora Pascoaquëntaꞌ apinaꞌpi ocoitaantacoi, itopi.

⁹ —¿Intaꞌ ocoichinquëmaꞌ? Copirnonëmaꞌ ocoichinquëmaꞌ topirahuëꞌ, itërin Piratori.

¹⁰ Corto huaꞌanoꞌsari apiratonaꞌ, Quisoso nani mapi. Ina nitotaton, Piratori naponontërin.

¹¹ Napoaponahuëꞌ, corto huaꞌanoꞌsari aꞌnaya aꞌnaya piyapiꞌsaꞌ shaꞌhuitëraꞌpiapi. —“Co Quisososoꞌ nohuantëraihuëꞌ. Parapasë ocoitocoi,” itocoꞌ, itëraꞌpiapi. Napoaton: —Parapasë ocoitocoi, tosapi.

¹² —¿Maꞌtaꞌ nipachin Quisoso onpochi: “Inasoꞌ copirnonëhuëi,” tënamasoꞌ? itërin Piratori. Napotohuachina:

¹³ —¡Corosëquë patanantëquëꞌ chimiin! itapi chiníquën nontatonaꞌ.

¹⁴ —¿Maꞌmarëtaꞌ tëpaꞌi? ¿Maꞌtaꞌ onporinsoꞌ? itopirinhuëꞌ, aquëtë chachin chiníquën itaantapi: —¡Corosëquë patanantëquëꞌ chimiin! itaantapi.

¹⁵ Ina natanahuaton, ama piyapiꞌsari noꞌhuicaiso marëhuëꞌ Parapasë ocoitërin. Quisososo nipirinhuëꞌ, chiníquën ahuihuitërin. Chiníquën huihuitonaꞌ, pëꞌsha pëꞌshatopi. Ina quëran shaꞌhuitërin corosëquë patanantacaiso marëꞌ.

¹⁶ Ina quëran sontaroꞌsari Pirato pëinënquë quëpapi. Pairaanaquë ichiyaꞌconahuatonaꞌ, yaꞌipi sontaroꞌsaꞌ amatopi.

¹⁷ Nani niyontonpachinara, quëhuanën miachin huaꞌan aꞌmorinso pochin aꞌmotopi tëhuacaiso marëꞌ. Yancotëntaꞌ nahuan quëran nicatonaꞌ, ayancotopi:

¹⁸ —¡Huaꞌqui tahuëri nicaton cotioroꞌsaꞌ huaꞌanëntëquëꞌ! itoonpi.

¹⁹ Piquirananquë ahuëmotopi. Ahuërahuatonaꞌ, ipitopi. Isonahuatonaꞌ, nito mosharapi.

²⁰ Inapotatonaꞌ, tëhuapi. Ina quëran quëhuanën aꞌmotopiso ocoitahuatonaꞌ, inaora aꞌmorinso chachin aꞌmotaantapi. Inapotahuatonaꞌ, corosëquë patanantacaiso marëꞌ quëpapi.

Corosëquë Quisoso patanantopisoꞌ

²¹ Paꞌsapirinahuëꞌ, aꞌna quëmapi Sirini parti huaꞌhuatërinsoꞌ nacapipi. Iminën quëran huëntararin. Simon itopi. Inasoꞌ, catoꞌ huiꞌninpita yaꞌhuëtërin, Aricantro, Nopo, inapita itopisoꞌ. Simon nacapirahuatonaꞌ, sontaroꞌsari Quisoso corosënën apitëntopi inari quëpatacaso marëꞌ.

²² Pantarahuatonaꞌ, panëaꞌhuayaquë canconpi huachi, Corocota itopiquë. Corocotasoꞌ: “Nansë Motoꞌ,” tapon naporin.

²³ Huino tanparo nimirio ayontahuatonaꞌ, yaoꞌshitopirinahuëꞌ, co oꞌorinhuëꞌ.

²⁴ Ina quëran sontaroꞌsari corosëquë patanantopi. Nani patanantohuachinaraꞌ, “Huëcoꞌ, nicanatëhuaꞌ, Quisoso aꞌmorinsoꞌ maahuaꞌ,” nitatonaꞌ yaꞌnipirapi. Nicanatonaꞌ, aꞌnaya aꞌnaya mapi.

²⁵ Yono piꞌirirahuasoꞌ, corosëquë patanantapi.

²⁶ Onporinso marësona tëparapisoꞌ nani ninshitopi. isosoꞌ cotioroꞌsaꞌ copirno taꞌcaso ninshitopi. Motën pëtëcha achinpitopi.

²⁷ Quisoso pirayan catoꞌ apiroꞌsantaꞌ patanantopi. Aꞌnaraꞌ inchinan quëran, aꞌnantaꞌ ahuënan quëran acopi. [

²⁸ Iráca Yosë quiricanënquë ninorin. “Apiroꞌsapitarëꞌ acorapi,” tënin. Naporinso chachin inapitarëꞌ acopi.]

²⁹ Piyapiꞌsaꞌ naꞌhuëpona pochin Quisoso tëcariatonaꞌ, tëhuapi. —“Yosë pëinën ataꞌhuantohuato, cara tahuëri quëran anoyatantarahuë,” tënan pora.

³⁰ Inta nipachin, corosë quëran nohuararahuaton, chaꞌëquëꞌ, itoonpi.

³¹ Inapochachin corto huaꞌanoꞌsaꞌ, cotio maistroꞌsaꞌ, inapitantaꞌ Quisoso tëhuatonaꞌ, itaponaꞌ: —Aꞌnapitasoꞌ nichaꞌëponahuëꞌ, inaora chaꞌëcasosoꞌ co nanitërinhuëꞌ.

³² “Casoꞌ Cristoco, israiroꞌsaꞌ copirnoco,” toconin. Inta nipachin, corosë quëran nohuarain nicatëhuaꞌ natëahuaꞌ, nitopi. Ina pirayan patanantopisopitantaꞌ Quisoso noꞌhuipi.

Quisoso chimininsoꞌ

³³ Camotëchin nisahuasoꞌ, yaꞌipi parti tashirin. Iꞌhuaraya huarëꞌ yono tashi pochin ninin.

³⁴ Naporoꞌ Quisoso chiníquën nonin. “Iroi iroi ¿nama sapacatani?” tënin. Inaora nananquë nonaton, naporin. “¿Onpoatontaꞌ Tata patëranco?” tapon naporin.

³⁵ Aꞌnaquën huanipapisopitari natanahuatonaꞌ: —Natancoꞌ. Iniasë përasamara, topi.

³⁶ Aꞌna quëmapisoꞌ manorahuaton, piꞌshiro pochin nininsoꞌ maconin. Main huino asëꞌcotëtërin. Naraꞌhuayaquë achinpitahuaton, inápaquë ihuëtërin oꞌocaso marëꞌ. —Tananpitëquëꞌ. Corosë quëran anohuaracaso marëꞌ, Iniasë huëꞌsamara, tënin.

³⁷ Ina quëran Quisososoꞌ chiníquën nonsahuaton, chiminin huachi.

³⁸ Naporoꞌ Yosë chinotopiso pëiquë tanontën nëꞌmëtëꞌ patonpisoꞌ noshatërin. Inaora noshataton, catotë huarëꞌ ninin. Inapa quëran noꞌpaquë huarëꞌ noshatomarin.

³⁹ Onporahuatonsona Quisoso chimininsoꞌ capitani niꞌsahuaton: —Tëhuënchachin iso quëmapi Yosë huiꞌnin, tënin.

⁴⁰ Sanapiꞌsantaꞌ aquë quëran notëërapi. Aꞌnaraꞌ Maria Mactarina, aꞌnasoꞌ Saroma, aꞌnantaꞌ Maria. Inasoꞌ Cosi, Santiaco, inapita aꞌshinaꞌ. Santiacosoꞌ huaꞌhua nimarinsoꞌ.

⁴¹ Quisoso Caririaquë niꞌsoꞌ, imatonaꞌ, nocomapisoꞌ. Aꞌnapita sanapiꞌsantaꞌ Quisoso notëërapi. Iꞌhuamiáchin Quisoso Quirosarinquë huëꞌpachina, inapitarintaꞌ imaquipi.

Naꞌpi naninquë poꞌmopisoꞌ

⁴² Ina tashiraya chinoto tahuëri niꞌton, cotioroꞌsaꞌ tapatapi chinotacaiso marëꞌ.

⁴³ Iꞌhuararahuasoꞌ, Cosi huëꞌnin. Inasoꞌ Arimatiaquë yaꞌhuërinsoꞌ. Cotio huaꞌan niponahuëꞌ, noya Yosë chinotarin. “Aꞌna tahuëri Yosë oꞌmararin huaꞌanëntiinpoaso marëꞌ,” tënin yonquiaton. Napoaton co tëꞌhuatatonhuëꞌ, Piratoquë paꞌnin Quisoso nonën maꞌpatacaso marëꞌ.

⁴⁴ “Co chimiyántëramarahuëꞌ,” taꞌton, capitan amatahuaton, natantërin. “¿Nani Quisoso chiminin?” itërin.

⁴⁵ “Nani mini chiminin,” itërin capitani. Napotohuachina, Cosi itapon: “Nonën quëpaquëꞌ nipachin,” itërin.

⁴⁶ Morin nani paꞌanin niꞌton, corosë quëran nonën anohuarahuatonaꞌ, quëpapi. Soꞌpinahuatonaꞌ, naꞌpi naninquë poꞌmopi. Ina quëran pancaraꞌpi masho piꞌnapirahuatonaꞌ, paꞌcopitopi.

⁴⁷ Maria Mactarina, aꞌna Maria (Cosi aꞌshin nininsoꞌ), inapitari niꞌsapi. Insëquësona Quisoso acopisoꞌ niꞌpi.