Malaquías 4 - Chayahuita (Shahui)

¹ Naquëranchin Sinioro shaꞌhuitaantarinpoaꞌ: “Caso Sinioroco yaꞌipi nanitapato shaꞌhuitaranquëmaꞌ: ‘Niꞌcoꞌ. Co huaꞌquiya quëranhuëꞌ, anaꞌintaꞌhuaso tahuëri naniarin. Ina tahuëri nanihuachin, ornoquë pën huënaratërinso pochin nisarin. Nocantopisopita, co noyahuëꞌ nipisopita, yaꞌipi inapita anaꞌintarahuë. Panca pënquë shinpitë aꞌnaroáchin huëyarinso pochin co noyahuëꞌ nipisopita anaꞌintarahuë.

² Noya nicatomaco natëramacosopitaso nipirinhuëꞌ, noya coisë pochin ninahuësoꞌ, niꞌsaramaꞌ. Piꞌi aꞌpinpachina aꞌninquëchin maꞌsha quënanëso pochin niꞌsaramaꞌ. Naporoꞌ canpitaso nichaꞌësaranquëma niꞌton, capa cancantaramaꞌ. Ohuacaꞌhuaroꞌsa oncorapipi quëran iꞌsohuatohuachinara, niirëꞌnachin taꞌapiso pochin cancantaramaꞌ.

³ Anaꞌintaꞌhuaso tahuëri nanihuachin, canpitaso piyapinëhuëpitanquëma nicatomaꞌ, co noyahuëꞌ nipisopita minsëaramaꞌ. Nonëna huiquitërinso yanonën, toꞌpi toꞌpitapomaꞌ,’ itëranquëmaꞌ,” tënin.

Tiquiapon pochin pënëninsoꞌ

⁴ Tiquiapon pochin Siniorosoꞌ pënëntaton: “Piyapinëhuë Moisësë itopisoꞌ, Sinai motopiquë pënëntërahuësoꞌ aninshitërahuë. Ama ina naniantatomarahuëꞌ, yonquiráco. Inaquë nanamëhuë, camaitërahuësopita, inapita israiroꞌsanquëma natëcamaso marëꞌ quëtëranquëmaꞌ.

⁵ Niꞌcoꞌ. Anaꞌintaꞌhuaso tahuëri nanihuachin, paꞌpi huëhuëpiro nisarin. Coꞌhuara ina tahuëri naniátërasohuëꞌ, Iniasë pënëntonaꞌpi aꞌpataranquëmaꞌ.

⁶ Ina pënëntohuachin huiꞌnahuanoꞌsasoꞌ, huiꞌninapitarëꞌ noya ninicatona yaꞌhuëantaponaꞌ. Sanapiꞌsanta huaꞌhuinapitarëꞌ inapoaponaꞌ. Huaꞌhuaroꞌsanta paꞌpinaꞌ, aꞌshinaꞌ, inapitarëꞌ napoaponaꞌ. Co ina pochin ninicatona yaꞌhuëantahuachinahuëꞌ, oꞌmarahuato yaꞌhuëramaso noꞌpaꞌ anaꞌintarahuë. Inapotato ataꞌhuantomiatarahuë,” tënin.