Lucas 4 - Chayahuita (Shahui)

Sopairi tënirinsoꞌ

¹ Quisoso Cortani quëran pipirahuaton, huëantarin. Ispirito Santori noyá yaꞌcoancantërin. Inasáchin natërin. Naporoꞌ ina nohuanton, inotëro parti paꞌnin.

² Inaquë catapini shonca tahuëri yaꞌhuërarin. Naporoꞌ sopairi huëcapairahuaton, shaꞌhuitopirinhuëꞌ ama Yosë natëcaso marëhuëꞌ. Catapini shonca tahuëri yaꞌhuaponahuëꞌ, co mantaꞌ caꞌninhuëꞌ. Ina piquëran tanarin.

³ Tanahuachina, sopairi itërin: —Tëhuënchachin Yosë huiꞌninquën nipatan, iso naꞌpi cosharoꞌ atarantëquëꞌ, itopirinhuëꞌ.

⁴ —Inca co nohuantërahuëꞌ. Yosë quiricanënquë pënëninpoaꞌ: “Co cosharoriáchin piyapi ananpirinhuëꞌ. Yaꞌipi Yosë nanamën natëhuachin tëhuënchinsoꞌ nanpiarin,” tënin, itërin.

⁵ Ina quëran aꞌna motopiꞌpaꞌ sopairi quëparin. Yaꞌipi ninanoroꞌsaꞌ, maꞌshanënpita, inapita aꞌnotërin. Aꞌnaroáchin noyápiachin nininsopita, yaꞌipi quënanin.

⁶ —Yaꞌipi isopita huaꞌanëntato, carinquën quëchinquën inapita huaꞌanëntamaso marëꞌ. Chiníquën nanan quëchinquën. Insosona nohuantërahuësoꞌ nanitërahuë quëtaꞌhuasoꞌ.

⁷ Isonahuaton, chinotohuatanco, catahuaaranquën yaꞌipiya huaꞌanëntamasoꞌ, itërin.

⁸ —Inca co nohuantërahuëꞌ. Yosë quiricanënquë shaꞌhuitërinpoaꞌ. “Sinioroíchin chinotëquëꞌ. Inasáchin natëcasoꞌ yaꞌhuërin. Inasoꞌ huaꞌanëntërinpoaꞌ,” tënin, itërin Quisosori.

⁹ Ina quëran Quirosarinꞌpaꞌ quëpaantarin. Yosë chinotopiso pëi aꞌcanpiquë huarëꞌ quëparahuaton: —Tëhuënchachin Yosë huiꞌninquën nipatan, noꞌpaquë niiquëꞌ.

¹⁰ Quiricanënquë nani shaꞌhuitërinquën: “Yosë, anquëninënpita aꞌpatimarinquën, co maꞌsha onpoaranhuëꞌ.

¹¹ Imirina quëran masarinënquën ama naꞌpiquë tërantaꞌ yaꞌquiamaso marëhuëꞌ,” tënin niꞌton, noꞌpaquë niiquëꞌ aꞌpainënquën, itërin sopairi.

¹² —Inca co nohuantërahuëꞌ. Yosë quiricanënquë pënëninpoaꞌ. “Ama Yosë tëniquësohuëꞌ. Ama camaiquësohuëꞌ. Ina nohuantërinsoáchin yonquicasoꞌ yaꞌhuërin,” tënin, itërin Quisosori.

¹³ Nani huaꞌquiꞌ sopairi shaꞌhuitopirinhuëꞌ, co yanatërinhuëꞌ. Napoaton patërin. “Aꞌna tahuëri minsëapo nimara,” taꞌton, paꞌnin huachi.

Quisoso pënëntacaso caniaritërinsoꞌ

¹⁴ Ina quëran Cariria parti Quisoso paantarin. Ispirito Santori noyá yaꞌcoancantërin niꞌton, catahuarin nóya nicacasoꞌ. Yaꞌipi naporinsoꞌ nahuinin.

¹⁵ Nisha nisha niyontonpiso pëiquë aꞌchinaꞌpiarin. Aꞌchinpachina: “Ma noyacha yonquirin paya,” topi.

Nasaritoquë paantarinsoꞌ

¹⁶ Ina quëran Nasaritoquë paantarin. Inaquë soꞌsorin. Chinoto tahuëri nanihuachina, niyontonpiso pëiquë paꞌnin. Nani simana inaquë paꞌnin niꞌton, naporoꞌ paantarin. Inaquë yaꞌconahuaton, Yosë quiricanën nontacaso marëꞌ huanirin.

¹⁷ Isaiasë pënëntërinsoꞌ quirica quëtohuachina, manin. Oporinahuaton, nontërin natanacaiso marëꞌ.

¹⁸ “Sinioro ispiritonën yaꞌcoancantërinco niꞌton, noya catahuarinco. Naꞌa piyapiꞌsaꞌ co Yosë nohuitatonahuëꞌ, nosorotopi. Napoaton Yosë acorinco noya nanan aꞌchintaꞌhuaso marëꞌ. Sopairi minsëpirinhuëꞌ, ocoiarahuë noya yonquicaiso marëꞌ. Somaraya nininsopita anoyatarahuë. Parisitapisopita nichaꞌësarahuë.

¹⁹ Ipora tahuëriꞌsaꞌ Yosë nosoroatënquëmaꞌ, nichaꞌësarinquëma huachi, tënahuë. Ina shaꞌhuicaꞌhuaso marëꞌ acorinco,” tënin Isaiasë, itërin quirica nontaton.

²⁰ Quirica soꞌnanahuaton, niyontonpisoꞌ pëiquë catahuatonaꞌpi quëtaantarin. Ina quëran huënsëhuachina, yaꞌipi inaquë yaꞌhuëpisopitari niꞌsápi.

²¹ —Tëhuënchachin iyaroꞌsaꞌ iráca Isaiasë ninorincoso chachin, Yosë aꞌpaimarinco nichaꞌëcaꞌhuanquëmaso marëꞌ, itërin Quisosori.

²² Yaꞌipiya natantapi. “Maꞌpítacha nitotaton, naporin paya. Nóya aꞌchintërinpoaꞌ,” taꞌtonaꞌ: —¿Coꞌna isoꞌ Cosi huiꞌninhuëꞌ? topi.

²³ Ina quëran Quisosori itaantarin: —Iráca quëran huarëꞌ napopi: “Nitoanoyatohuatan, quëmaꞌton nianoyatëquëꞌ niꞌii,” topi. Ina pochin canpitantaꞌ yonquiramaꞌ tënahuë. “Capinaomoquë naꞌa caniaꞌpiroꞌsaꞌ aꞌnaroáchin anoyatëran niꞌquëhuarëꞌ, isëquëntaꞌ anoyatëquëꞌ niꞌii,” itaramaco, tënin.

²⁴ Ina quëran itaantarin: —Co yanatëtomacohuëꞌ, napotëramaco. Niꞌcoꞌ. Pënëntonaꞌpi pënëntohuachina, nisha nisha parti noya natanpi. Ninanonënquë yaꞌhuëpisopitariso nipirinhuëꞌ, co noya natanpihuëꞌ.

²⁵ Tëhuënchachin iráca Iniasë pënëntonaꞌpi nanpipon, cara piꞌipi miria co piꞌpian tërantaꞌ oꞌnaninhuëꞌ. Yaꞌipi parti tanarotopi. Naporoꞌ naꞌa quëyoronoꞌsaꞌ Israiroquë yaꞌhuëpirinahuëꞌ,

²⁶ co Yosëri catahuarinhuëꞌ. Aꞌna quëyoronso nipirinhuëꞌ Saripitaquë yaꞌhuërin, Siton parti yaꞌhuërinsoꞌ. Nisha sanapi niponahuëꞌ, Yosëri catahuarin. Inaquë Iniasë aꞌparin cosharonën anaꞌatacaso marëꞌ.

²⁷ Irisio pënëntonaꞌpintaꞌ nanpisoꞌ, naꞌa chana caniori maninsopita Israiro noꞌpaquë yaꞌhuëpirinahuëꞌ, co aꞌnaya tërantaꞌ anoyatërinhuëꞌ. Namanosoꞌ Siria piyapi niponahuëꞌ, Yosë nohuanton, anoyatërin. Aꞌnaroáchin canio inquirin, tënin Quisoso.

²⁸ Ina natanahuatonaꞌ, yaꞌipi piyapiꞌsaꞌ chiníquën noꞌhuitopi.

²⁹ Manorahuatonaꞌ, ninano quëran quëpapi. Ina yonsanquë tahuan yaꞌhuërin. Inatohuaꞌ quëpapi tëꞌyatacaiso marëꞌ.

³⁰ Yatëꞌyatopirinahuëꞌ, Quisososoꞌ huancánachin paaton, noya chaꞌërin.

Sopai aꞌparinsoꞌ

³¹ Ina quëran Cariria parti paantarin. Capinaomoquë paaton, chinoto tahuëri aꞌchiantarin.

³² Chiníquën nanantonaꞌpi pochin aꞌchinarin niꞌton, natanahuatonaꞌ, paꞌyanpi. “Ma noyacha aꞌchintërinpoa paya,” topi.

³³ Niyontonpiso pëiquë chachin aꞌna quëmapi yaꞌhuërin. Sopairi yaꞌcoancantërin niꞌton, paꞌpi co noyahuëꞌ yonquirin. Quisoso quënanahuaton, chiníquën nontërin. Sopairi chachin ichinonin.

³⁴ —¡Tananpitocoi! ¿Maꞌtaꞌ onpotaponcoi? ¿Ataꞌhuantaponcoi ti? Nohuitërainquën. Quëmasoꞌ Quisosonquën, Nasaritoquë yaꞌhuëran. Yosë quëran oꞌmaton, noya noya ninan, itërin.

³⁵ Itohuachina, Quisosori itërin: —¡Taꞌtëquëꞌ! Iso quëmapi quëran pipimiatëquëꞌ, itërin. Sopaisoꞌ quëmapi noꞌpaquë tëꞌyatahuaton, pipirin. Co mantaꞌ onpotërinhuëꞌ.

³⁶ Yaꞌipi piyapiꞌsaꞌ nicatonaꞌ, paꞌyanpi. —¡Maꞌpítacha Quisoso nitotërin paya! Chiníquën nanantaton, sopairoꞌsaꞌ ocoirin. Camaihuachina pipipi, nitopi.

³⁷ Quisoso naporinsoꞌ, yaꞌipi parti nahuinin.

Simon Pitro aꞌshatën aꞌnaroáchin anoyatërinsoꞌ

³⁸ Ina quëran niyontonpiso pëi quëran pipirahuaton, Simon pëinënquë paꞌnin. Simon aꞌshatën chiníquën saporin niꞌton, Quisoso shaꞌhuitopi. “Aꞌshacha chiníquën saporin taꞌa. Quëmari anoyatëquëꞌ topiraihuëꞌ,” itopi.

³⁹ Inaquë paaparahuaton, sapo aꞌnaroáchin inquitërin. Noyatërin huachi. Nani noyatahuaton, inari chachin aꞌcarin, oꞌshitërin, napotërin.

Naꞌa caniaꞌpiroꞌsaꞌ anoyatërinsoꞌ

⁴⁰ Iꞌhuanahuanquë piꞌi yayaꞌconahuasoꞌ, naꞌa caniaꞌpiroꞌsaꞌ nisha nisha caniori maninsopita Quisoso quëshipi. Napohuachinara, aꞌnaya aꞌnaya sëꞌhuarahuaton, yaꞌipiya anoyatërin.

⁴¹ Sopairi yaꞌcoancantërinsopitantaꞌ quëntapi. Quisosori nontohuachina, sopairoꞌsaꞌ pipipi. Yapipihuachinaꞌ, chiníquën nontapi. —Quëmasoꞌ Yosë huiꞌninquën, itopi. Yosëri aꞌpaimarinsoꞌ nitotatonaꞌ, napotopi. Napoaton Quisosori itapon: “Taꞌtëquëꞌ. Ama insontaꞌ shaꞌhuitëquësohuëꞌ,” itohuachina, taꞌtopi huachi.

Nisha nisha parti aꞌchininsoꞌ

⁴² Tahuëririnquë tashiramiachin Quisoso huënsërahuaton, paꞌnin. Ninano quëran pipirahuaton, co piyapi yaꞌhuërinquëhuëꞌ paꞌpirinhuëꞌ. Naꞌa piyapiꞌsaꞌ ina yoníponaꞌ paꞌpi. Quënanahuatonaꞌ, “Ama paquësohuëꞌ. Isëquë yaꞌhuaton, aꞌchintocoi,” itopirinahuëꞌ, co nohuantërinhuëꞌ.

⁴³ —Nisha nisha ninanoroꞌsaquë pacaꞌhuasoꞌ yaꞌhuërin. Inaquëntaꞌ Yosë nanamën aꞌchinchi huaꞌanëntërinquë yaꞌcoinaꞌ. Ina marëꞌ Yosë aꞌpaimarinco, itërin.

⁴⁴ Ina quëran yaꞌipi cotioroꞌsaꞌ yaꞌhuërin parti paꞌsahuaton, niyontonpiso pëiroꞌsaquë aꞌchinarin.