Lucas 23 - Chayahuita (Shahui)

Piratoquë quëpapisoꞌ

¹ Ina quëran pipirahuatonaꞌ, Piratoquë Quisoso quëpapi.

² Inaquë shaꞌhuirapipi. —Iso quëmapi piyapiꞌsaꞌ nonpintarin. “Noma copirno coriqui yamaꞌpahuachinquëmaꞌ, ama quëtocosohuëꞌ,” tosahuaton: “Casoꞌ Cristoco. Yosë aꞌpaimarinco huaꞌanëntaꞌhuaso marëꞌ,” toconin, itopi.

³ —¿Quëmasoꞌ cotioroꞌsaꞌ copirnonquën ti? itërin Piratori. —Ca mini inaco, itërin.

⁴ Nonapipisoꞌ natanahuaton, yaꞌipi cotio ansianoꞌsaꞌ, corto huaꞌanoꞌsaꞌ inapita itapon: —Iso quëmapisoꞌ noya, tënahuë. Co mantaꞌ onporinhuëꞌ. Co anaꞌintacasoꞌ yaꞌhuërinhuëꞌ, itopirinhuëꞌ,

⁵ aquë aquëtëꞌ noꞌhuitatonaꞌ, itaantapi: —Aꞌchintohuachina, piyapiꞌsaꞌ nisha nisha yonquipi. Naporahuaton, copirno yanoꞌhuipi. Yaꞌipi parti aꞌchinárin. Cariria parti quëran huëcaton, yaꞌipi Cotia parti paꞌtërin. Isëquëntaꞌ aꞌchinarin, itopi.

Irotisëquë aꞌparinsoꞌ

⁶ Ina natanahuaton, “¿Cariria parti quëran huëꞌnin ti?” itërin Piratori.

⁷ “Ina quëran mini,” itopi. Iꞌhuamiáchin Cariria huaꞌan Quirosarinquë huëꞌnin niꞌtapon, Irotisë itopisoꞌ. Inaquë yaꞌhuarin niꞌton, Quisoso yaaꞌparin Irotisë nontacaso marëꞌ. “Ina piyapinën niꞌton, inari anaꞌinchin,” taꞌton, aꞌparin.

⁸ Inaquë canconpachina, Irotisëri paꞌyatërin. Huaꞌquiꞌ Quisoso yaniꞌpirinhuëꞌ, co nohuichátërarinhuëꞌ. Nani maꞌsha naporinsoꞌ nani natantërin. “Yosë pochin ninin. Piyapi aꞌnaroáchin anoyatërin,” topi natantërin. “Anoyatohuachin, cantaꞌ niꞌi,” tënin.

⁹ Napoaton Quisoso canquihuachina, huaꞌquiꞌ nontopirinhuëꞌ, co aꞌpanitërinhuëꞌ. Naꞌcon natanpirinhuëꞌ, taꞌtárin.

¹⁰ Corto huaꞌanoꞌsaꞌ, cotio maistroꞌsaꞌ, inapita huëcatonaꞌ, Quisoso shaꞌhuirapiapirinahuëꞌ, co mantaꞌ tëninhuëꞌ.

¹¹ Napohuachina, Irotisëri tëhuarin. Sontaronënpitarintaꞌ tëcaripi. Noyápiachin huaꞌan aꞌmorinso pochin aꞌmotahuaton, Piratoquë aꞌpaantarin.

¹² Nani huaꞌquiꞌ Pirato Irotisërëꞌ ninoꞌhuipirinahuëꞌ, naporo quëran huarëꞌ co huachi niinimicotopihuëꞌ, noya ninontantapi.

Tëpacasoꞌ shaꞌhuirinsoꞌ

¹³ Ina quëran Piratori piyapiꞌsaꞌ amatërin. Corto huaꞌanoꞌsaꞌ, cotio huaꞌanoꞌsaꞌ, inapitantaꞌ ayontonahuaton, itërin:

¹⁴ —Canpitasoꞌ naꞌcon Quisoso shaꞌhuirapiramaꞌ. “Piyapiꞌsaꞌ shaꞌhuitarin niahuëcaiso marëꞌ,” itopiramacohuëꞌ. Nani huaꞌquiꞌ nontërahuë, canpitantaꞌ natanamaꞌ. Iso quëmapisoꞌ noya. Shaꞌhuirapipiramahuëꞌ, co mantaꞌ onporinhuëꞌ, tënahuë.

¹⁵ Irotisëntaꞌ inachachin tënin. Napoaton aꞌpatiantarinco. Co tëpacasoꞌ yaꞌhuërinhuëꞌ.

¹⁶ Topinan ahuihuitahuato ocoiꞌi, topirahuëꞌ, itërin. [

¹⁷ Nani Pascoa tahuëri aꞌnaraꞌ apinaꞌpi tashinan pëi quëran ocoirin pipicaso marëꞌ. Iso piꞌipintaꞌ aꞌnaraꞌ ocoicasoꞌ yaꞌhuërin.]

¹⁸ Piyapiꞌsariso nipirinhuëꞌ chiníquën nontopi. —¡Quisososoꞌ tëpaquëꞌ! ¡Parapasë ocoitocoi! itopi.

¹⁹ Parapasësoꞌ co noya quëmapihuëꞌ. Tëpatonaꞌpi inasoꞌ. Ninanoquë piyapiꞌsaꞌ shaꞌhuitërin niahuëcaisoꞌ niꞌton, tashinan pëiquë nani poꞌmopi.

²⁰ Pirato co nohuantërinhuëꞌ Quisoso tëpacasoꞌ. Napoaton: “Ocoiꞌi,” tantarin.

²¹ Naquëranchin chiníquën nontaantapi. —¡Corosëquë patanantëquëꞌ chimiꞌin! ¡Inaquë patanantëquëꞌ chimiꞌin! itaantapi.

²² —¿Maꞌmarëtaꞌ atëpachi? Nani natanpirahuëꞌ. Co mantaꞌ onporinhuëꞌ. Co tëpacasoꞌ yaꞌhuërinhuëꞌ, tënahuë. Topinan ahuihuitahuato, ocoiꞌi, tënin. Nani cararoꞌ inachachin itaantarin.

²³ “¡Corosëquë patanantëquëꞌ chimiꞌin!” itaantapi. Chiníquën nontápi niꞌton, “Inta nipachin,” itërin.

²⁴ Napotahuaton, sontaroꞌsaꞌ shaꞌhuitërin corosëquë patanantacaiso marëꞌ.

²⁵ Parapasësoꞌ tëpatonaꞌpi nipirinhuëꞌ, tashinan pëi quëran ocoirin. Piyapiꞌsari huayonpi niꞌton, ocoirin. Quisososo nipirinhuëꞌ co ocoirinhuëꞌ. Tëpacaiso marëꞌ shaꞌhuitërin. Cotioroꞌsaꞌ nohuantopiso chachin ninin.

Corosëquë patanantopisoꞌ

²⁶ Ninano quëran quëpasoiꞌ, aꞌna quëmapi Simon itopisoꞌ nacapipi. Imin quëran huëntararin. Inasoꞌ Siriniquë yaꞌhuërin. Sontaroꞌsari masahuatonaꞌ, corosë apitëntopi. Quisoso pinën quëran quëpatërin.

²⁷ Naꞌa quëmapiꞌsari imasapi. Sanapiꞌsarintaꞌ imasapi. Quisoso yatëpapiso marëꞌ chiníquën sëtatonaꞌ, naꞌnërapi.

²⁸ Tahuërëtahuaton, Quisosori itapon: —Ama imoyaroꞌsaꞌ ca marëꞌ naꞌnëcosohuëꞌ. Aꞌna tahuëri Quirosarinquë yaꞌhuëramasopita naꞌcon parisitaramaꞌ. Huaꞌhuamapitantaꞌ parisitapi. Ina yonquiatomaꞌ tëhuënchinsoꞌ, sëtocoꞌ.

²⁹ Naporoꞌ tahuëriꞌsaꞌ huaꞌhuahuaninsopita naꞌcon naꞌcon parisitapi. Huaꞌhuinpita yonquiatonaꞌ, sëtapi. Co huaꞌhuanpihuëꞌ naporini, noya noya niitonahuëꞌ.

³⁰ Piyapiꞌsaꞌ chiníquën parisitapi niꞌton, “Motopi quëran naꞌpiroꞌsaꞌ notarintahuatonaꞌ imotërinpoaꞌ naporini, noya niitonhuëꞌ,” tosapi.

³¹ Niꞌcoꞌ. “Nanpimëꞌ co huëyarinhuëꞌ, yanimëso nipirinhuëꞌ aꞌnaroáchin huëyarin,” topi. Casoꞌ nanpimë pochin nipirahuëꞌ, aparisitarinaco. Canpitasoꞌ yanimë pochin ninamaꞌ niꞌton, chini chiníquën aparisitarinënquëmaꞌ tënahuë, itërin Quisosori.

³² Catoꞌ apiroꞌsantaꞌ quëpapi inapitantaꞌ tëpacaiso marëꞌ.

³³ Paꞌsahuatonaꞌ, aꞌna panëaꞌhuayaquë canconpi, “Nansë Motoꞌ,” itopiquë. Inaquë canconahuatonaꞌ, corosëquë patanantopi. Catoꞌ apiroꞌsantaꞌ nisha patanantopi. Aꞌna ahuënan quëran, aꞌna inchinan quëran. Quisososoꞌ ahuancanapipi. [

³⁴ Patanantopirinahuëꞌ, Yosë nontërin. —Tëparinacoso marëꞌ Tata, ama anaꞌintëquësohuëꞌ. Co nohuitatonacohuëꞌ, napotarinaco, itërin.] Ina quëran sontaroꞌsa capini ninontopi. “Huëcoꞌ nicanatëhuaꞌ Quisoso aꞌmorinsoꞌ maahuaꞌ,” nitatonaꞌ, yaꞌnipirapi. Naporahuatonaꞌ, aꞌnaya aꞌnaya mapi.

³⁵ Naꞌa piyapiꞌsaꞌ inaquë niꞌsapi. Cotio huaꞌanoꞌsarisoꞌ tëhuapi. —Aꞌnapita nichaꞌëponahuëꞌ, inaora chaꞌëcasosoꞌ co nanitërinhuëꞌ. Inasoꞌ Cristo, Yosëri chachin huayoninsoꞌ nipachin, inaora chaꞌëꞌin, nitopi tëhuatonaꞌ.

³⁶ Sontaroꞌsarintaꞌ tëhuapi. Yaꞌcariconahuatonaꞌ, huino main nininsoꞌ ihuëtopi. —Oꞌoquëꞌ Maistro.

³⁷ Quëmasoꞌ cotioroꞌsaꞌ copirnonquën nipatan, corosë quëran nohuararahuaton, chaꞌëquëꞌ, itoonpi.

³⁸ Onporinso marësona tëparapisoꞌ ninshitopi. isosoꞌ cotioroꞌsaꞌ copirno taꞌcaso ninshitopi. Nani ninshitohuachina, corosëquë chachin motën pëtëcha achinpitopi.

³⁹ Catoꞌ apiroꞌsantaꞌ corosëquë parisitapi. Aꞌnari Quisoso noꞌhuirin. —Quëmasoꞌ Cristonquën nipatan, corosë quëran nohuararahuaton, chaꞌëquëꞌ. Ina quëran quiyantaꞌ nichaꞌëcoi, itërin.

⁴⁰ Aꞌnariso nipirinhuëꞌ pënënin: —Taꞌtëquëꞌ. ¿Co piꞌpisha tërantaꞌ Yosë tëꞌhuatëranhuëꞌ ti? Tëpararinën quëmantaꞌ.

⁴¹ Canposoꞌ co noyahuëꞌ ninëꞌ. Napoaton noꞌtëquën coisë anaꞌintarinpoꞌ. Iso quëmapiso nipirinhuëꞌ nóya. Co mantaꞌ onporinhuëꞌ, itërin.

⁴² Ina quëran Quisoso itapon: —Huaꞌanëntacasoꞌ caniaritohuatan, yonquico Sinioro cantaꞌ, itërin.

⁴³ —Tëhuënchachin iyasha ipora tahuëri chachin carëꞌquën Yosëꞌpaꞌ yaꞌhuëcontaran, itërin.

Quisoso chimininsoꞌ

⁴⁴ Camotëchin nisahuasoꞌ, yaꞌipi parti tashiarin. Iꞌhuaraya huarëꞌ yono tashi pochin ninin.

⁴⁵ Co huachi piꞌi aꞌpininhuëꞌ. Naporoꞌ Yosë chinotopiso pëiꞌ tanontën nëꞌmëtëquë patonpisoꞌ inaora noshatërin.

⁴⁶ Napohuachina, Quisoso chiníquën nonin. —Apira Tata chiminarahuë. Huaꞌyanëhuë quëpaquëꞌ, itahuaton, chiminin.

⁴⁷ Capitansoꞌ ina niꞌsahuaton, Yosë chinotërin: —Tëhuënchachin iso quëmapi co mantaꞌ onporinhuëꞌ, tënin.

⁴⁸ Naꞌa piyapiꞌsaꞌ Quisoso chimininsoꞌ niꞌsapi. Nani chiminpachina, paꞌyanpi. Chiníquën sëtatonaꞌ, yanquëëpi.

⁴⁹ Imarinsopitasoꞌ nipirinhuëꞌ, aquë quëran notëërapi. Sanapiꞌsantaꞌ Cariria parti quëran imaquitonaꞌ, inaquë niꞌsápi.

Quisoso paꞌpitopisoꞌ

^50-51 Aꞌna cotio huaꞌan yaꞌhuërin, Arimatiaquë yaꞌhuërinsoꞌ. Cosi itopi. Cotio huaꞌan niponahuëꞌ, noya quëmapi. Yosë noꞌtëquën chinotërin. “Aꞌna tahuëri Yosë acorinsoꞌ isoroꞌpaquë huaꞌanëntapon,” taꞌton, Yosë chinotërin. Aꞌnapitari Quisoso yatëpahuachinara, “Ama tëpacosohuëꞌ,” itopirinhuëꞌ, co yanatëpihuëꞌ.

⁵² Quisoso chiminpachina, Piratoquë paꞌnin. “Quisoso nonën quëtoco quëpaꞌi,” itohuachina, “Noyahuaꞌ, quëpaquëꞌ,” itërin.

⁵³ Ina natanahuaton, paꞌnin. Corosë quëran nonën anohuararahuatonaꞌ, morinquë soꞌquëëtopi. Soꞌquëëtahuatonaꞌ, naꞌpi naninquë poꞌmopi. Inaquë co insontaꞌ chimipi poꞌmoyatërarinhuëꞌ. Inaquë nonën poꞌmopi.

⁵⁴ Ina tashiraya chinoto tahuëri niꞌton, cotioroꞌsaꞌ tapatapi chinotacaiso marëꞌ. Napoaton piꞌi yayaꞌconahuasoꞌ, manorahuatona poꞌmopi.

⁵⁵ Sanapiꞌsantaꞌ Cariria quëran imaquipisoꞌ paꞌsahuatonaꞌ, naꞌpi nanin quënanconpi. Poꞌmopisoꞌ niꞌpi.

⁵⁶ Nani niꞌpachinara, yaꞌhuëpiꞌpaꞌ paantapi. Inaquë noꞌmorain pimóton nininsoꞌ tapapi. Pimo huaꞌsaintaꞌ tapapi Quisoso nonën pashitacaiso marëꞌ. Chinoto tahuëri nanihuachina, chinotopi. Moisësë shaꞌhuirinso chachin chinotopi.