Lucas 22 - Chayahuita (Shahui)

Quisoso macacaiso marëꞌ chinotopisoꞌ

¹ Catoꞌ tahuëri pahuanarin Pascoa nanicasoꞌ. Naporoꞌ cotioroꞌsaꞌ niyontonpi Yosëri iráca nichaꞌërinsoꞌ yonquicaiso marëꞌ. Ina tahuëri nanihuachina, nisha pan caꞌpi, co ahuëpocatopisohuëꞌ.

² Corto huaꞌanoꞌsaꞌ, cotio maistroꞌsaꞌ, inapitari chinotopi Quisoso tëpacaisoꞌ. Piyapiꞌsaꞌ tëꞌhuatatonaꞌ, co nanitopihuëꞌ aꞌninquëchin macacaisoꞌ.

³ Shonca catoyaꞌpiri Quisoso caꞌtanpirinahuëꞌ, aꞌnaraꞌ sopairi yaꞌcoancantërin, Cotasë Iscarioti itopisoꞌ. Sopairi yaꞌcoancantohuachina,

⁴ corto huaꞌanoꞌsaquë paꞌnin. Cotio sontaroꞌsantaꞌ nontërin Quisoso shaꞌhuirapicaso marëꞌ.

⁵ Natanahuatonaꞌ, paꞌyatopi. Ina marëꞌ coriqui quëtacaiso shaꞌhuitopi.

⁶ —Noyapaꞌ, taꞌton, Cotasë yonquirarin poꞌoana quëran aꞌnocaso marëꞌ.

Pascoa tahuëri coshatopisoꞌ

⁷ Pascoa tahuëriꞌsaꞌ nipachina, nisha pan caꞌpi, co ahuëpocatopisohuëꞌ. Naporo tahuëri chachin carniroaꞌhua iráca tëpapiso pochin tëpaantapi yonquicaiso marëꞌ. Nani piꞌipiquë cotioroꞌsaꞌ naporápi.

⁸ Quisosontaꞌ yonquirin ina pochin capacasoꞌ niꞌton, Pitro, Coansha, inapita shaꞌhuitërin: —Paatomaꞌ, Pascoa cosharoꞌ tapacoꞌ capaquëhuaquë, itërin.

⁹ —¿Intohuataꞌ paatoi tapaii? itopi.

¹⁰ —Ninanoquë pacoꞌ. Inaquë aꞌna quëmapi nacapiaramaꞌ. Yonquë iꞌsha chiꞌyatarin. Ina imacoꞌ. Pëiquë yaꞌconconpachin, canpitantaꞌ yaꞌconcoꞌ.

¹¹ Pëiꞌ huaꞌanën quënanconpatamaꞌ, natanconcoꞌ. “ ‘¿Insëquëtaꞌ patoana yaꞌhuërin Pascoa cosharoꞌ capacaꞌhuaisoꞌ?’ tënin Maistro,” itoncoꞌ.

¹² Napotohuatamaꞌ, panca patoana aꞌnotarinquëmaꞌ, inápaquë nininsoꞌ. Misa, huënsënan, inapita nani yaꞌhuërarin. Inaquë cosharoꞌ tapacoꞌ canpoaꞌ capaquëhuaquë, itërin Quisosori.

¹³ Itohuachina, paatonaꞌ, ninanoquë canconpi. Quisosori shaꞌhuitërinso chachin quënanconpi. Inaquë Pascoa cosharoꞌ acopi capacaiso marëꞌ.

¹⁴ Ora nanihuachina, Quisoso caꞌtanoꞌsanënpitarëꞌ huëꞌpi. Huëcatonaꞌ, misaquë huënsëquipi.

¹⁵ —Apira Pascoa cosharoꞌ caꞌsarëhuaꞌ. Paꞌpi nohuantërahuë canpitaroꞌco ina capaꞌhuasoꞌ. Ipora tërantaꞌ caꞌahuaꞌ coꞌhuara chimianahuë.

¹⁶ Yosë natëto, chiminarahuë. Iporáchin Pascoa cosharoꞌ caꞌsarahuë. Ina quëran Yosë huaꞌanëntërinsoꞌ naniquë huarëꞌ caꞌsarahuë. Naporoꞌ noya noya yaꞌhuarihuaꞌ, itërin.

¹⁷ Minëaꞌhua masahuaton, Yosë nontërin. “Yosparinquën, Tata,” itahuaton, caꞌtanoꞌsanënpita quëtërin. —Canpitantaꞌ piꞌpian piꞌpian oꞌocoꞌ.

¹⁸ Ipora quëran huarëꞌ co huachi huino oꞌosarahuëꞌ. Yosë isoroꞌpaꞌ huaꞌanëntaquë huarëꞌ oꞌoantarahuë, itërin.

¹⁹ Ina quëran cosharoꞌ masahuaton, “Yosparinquën, Tata,” itahuaton, sëꞌpanin. Inapotahuaton, aꞌnaya aꞌnaya quëtërin. —Ca nonëhuë pochin isoꞌ. Canpita marëꞌ chiminarahuë. Ca chinotatomaco, caꞌcoꞌ, itërin.

²⁰ Nani coshatohuachinara, ninëaꞌhua maantarin. —Huënainëhuë pochin isoꞌ. Huënainëhuë paꞌsarin niꞌton, nasha quëran canpitarëꞌ Yosë anoyatërinsoꞌ shaꞌhuichinquëmaꞌ imacamaso marëꞌ. Huënainëhuë quëran nichaꞌësaranquëmaꞌ.

²¹ Napoaponahuëꞌ, aꞌnaquëmaꞌ carëꞌquëma chachin coshatapomarahuëꞌ, shaꞌhuirapiaramaco.

²² Yosë quëran quëmapico niporahuëꞌ, ina nohuanton, chiminarahuë. Napoaponahuëꞌ, shaꞌhuirapirincosoꞌ, chiníquën parisitapon. Yosëri anaꞌintarin, tënin Quisoso.

²³ “¿Inquënpoacha yashaꞌhuirapirëhuaꞌ nicaya?” nitopi.

Chini chiníquën nanantacasoꞌ nohuantopisoꞌ

²⁴ Ina quëran inahua capini ninontapi. “¿Inquënpoataꞌ chini chiníquën nanantërëꞌpëhuaya?” nitopi. Yaꞌipiya chiníquën nanan nohuantopi.

²⁵ Napoaton Quisosori itërin: “Nisha piyapiꞌsaꞌ co Yosë nohuitopihuëꞌ. Huaꞌanënapita chiníquën nanantatonaꞌ, piyapinënpita camaipi. ‘Casoꞌ noyaco niꞌton, “aꞌpaitonaꞌpi,” itoco,’ toconpi aꞌnaya aꞌnaya.

²⁶ Canpitaso nipirinhuëꞌ ama ina pochin yonquicosohuëꞌ. Insosona chiníquën nanantacaso nohuantohuachin, aꞌnapita naꞌcon naꞌcon catahuacasoꞌ yaꞌhuërin. Huaꞌan yanipatamaꞌ, piyapimia pochin cancantocoꞌ.

²⁷ Niꞌcoꞌ. Huaꞌansoꞌ huënsërahuaton, coshatarin. Piyapinënpitaso nipirinhuëꞌ sacatapi. Co huaꞌanën pochin chiníquën nanantopihuëꞌ. Caso nipirinhuëꞌ piyapimia pochin cancantërahuë. Apira apira aꞌnapita catahuarahuë.

²⁸ Canpitasoꞌ noya imaramaco. Aparisitopirinacohuëꞌ, co aꞌporamacohuëꞌ.

²⁹ Ina marëꞌ Yosëꞌpaꞌ canaaramaꞌ. Aꞌna tahuëri Yosë nohuanton, huaꞌanëntarahuë. Naporoꞌ canpitantaꞌ acoaranquëmaꞌ huaꞌan pochin nicamasoꞌ.

³⁰ Huaꞌanëntohuato, carëꞌquëmaꞌ noya coshatërëhuaso pochin nóya cancantaramaꞌ. Inaquë catahuaramaco yaꞌipi israiroꞌsaꞌ huaꞌanëntaꞌhuasoꞌ,” itërin.

Pitrori nonpinapicasoꞌ ninorinsoꞌ

³¹ Ina quëran Simon Pitro pënënin chiníquën cancantacaso marëꞌ. —Tëhuënchachin iya Simon sopai yaminsërinquëmaꞌ. Inari nani Yosë nontërin: “Arosë pintiapiso pochin tëniꞌi, topirahuëꞌ,” itërin. “Inta nipachin tëniriquëꞌ,” itërin Yosëri. Napoaton sopai chiníquën shaꞌhuitarinquëmaꞌ naniantamacoso marëꞌ.

³² Caso nipirinhuëꞌ iyasha, nani Yosë nontërahuë ama aꞌpoancoso marëhuëꞌ. Napoaton co naniantomiatarancohuëꞌ. Noya imaantahuatanco, iyanpita achinicancanquëꞌ, itërin.

³³ —Sinioro, co casoꞌ aꞌpoaranquënhuëꞌ. Tashinan pëiquë poꞌmohuachinënquën, cantaꞌ yaꞌcoꞌin. Yatëpapirinacohuëntaꞌ, co tëꞌhuatarahuëꞌ, tënin Pitro.

³⁴ —Noꞌtëquën iyasha itaranquën. Ipora tashi chachin, coꞌhuara atari përashatërasohuëꞌ, cararoꞌ nonpinapiaranco. “Co casoꞌ Quisoso nohuitërahuëꞌ,” toconapon, itërin Quisosori.

Tëniarinsoꞌ

³⁵ Ina quëran yaꞌipi caꞌtanoꞌsanënpita itapon: —Iráca aꞌchinacamaso marëꞌ aꞌparanquëmaꞌ. Paꞌpatamara, coriqui, pëꞌpëto, sapatëꞌ, co inapita tërantaꞌ quëparamahuëꞌ. Topinan paꞌpatamara, ¿co mantaꞌ pahuantërinquëmahuëꞌ ti? itërin. —Co mantaꞌ pahuantërincoihuëꞌ. Noya paꞌnai, itopi.

³⁶ —Iporaso nipirinhuëꞌ sacaiꞌ nipon. Napoaton ama topinan pacosohuëꞌ. Coriqui, pëꞌpëto, inapita yaꞌhuëtohuachinquëmaꞌ, quëpacoꞌ. Co sahuëni yaꞌhuëtohuachinquëmahuëꞌ, aꞌmoramasoꞌ paꞌanatomaꞌ, sahuëni paꞌancoꞌ.

³⁷ Iráca Yosë quiricanën quëran ninorinaco. “Apiroꞌsarëꞌ acorapi,” tënin. Napopiso chachin apiroꞌsa pochin cancantatonaco, masarinaco. Yaꞌipi ninorinacosoꞌ nanicaso yaꞌhuërin, tënin.

³⁸ —Niꞌquëꞌ Maistro. Catoꞌ sahuëni yaꞌhuëtërincoi, itohuachina: —Tatoco huachi paꞌahuaꞌ, itërin Quisosori.

Quisoso sëtaton, Yosë nontërinsoꞌ

³⁹ Ina quëran pipirahuaton, Oriposë panënquë paꞌnin. Nani tashiꞌ inaquë paꞌnin. Caꞌtanoꞌsanënpitarintaꞌ imapi.

⁴⁰ Inaquë canconpachinara: —Yosë nontocoꞌ iyaroꞌsaꞌ, ama sopai minsëinquëmaso marëhuëꞌ, itërin.

⁴¹ Ina quëran amashamiachin paꞌsahuaton, isonin quëran, inaora Yosë nontërin:

⁴² “Quëma nohuantohuatan Tata, nichaꞌëco, ama maꞌsha onpoꞌisohuëꞌ. Main oꞌorëso pochin parisitaꞌhuasoꞌ yaꞌhuërin. Co parisitaꞌhuasoꞌ nohuantaporahuëꞌ, quëma nohuantohuatan, maꞌsona yaonpotohuatancontaꞌ noya, tënahuë. Noꞌtëquën yanatëranquën,” itërin. [

⁴³ Nani nontohuachina, anquëni inápa quëran oꞌmarahuaton, achinirin.

⁴⁴ Ina quëran paꞌpi sëtaton, chiníquën Yosë nontaantarin. Oncainën huënai pochin noꞌpaquë huiꞌshirin.]

⁴⁵ Nani Yosë nontohuachina, caꞌtanoꞌsanënpita paahuantapirinhuëꞌ. Huëꞌësápi quënanconin. Sëtatonaꞌ, huëꞌësápirinahuëꞌ.

⁴⁶ —¿Onpoatomataꞌ iyaroꞌsaꞌ huëꞌësáramaꞌ? Huënsëatomaꞌ Yosë nontocoꞌ ama sopai minsëinquëmaso marëhuëꞌ, itërin.

Quisoso mapisoꞌ

⁴⁷ Nontaso chachin, naꞌa piyapiꞌsaꞌ canquipi. Cotasë quëchitëriarin. Inantaꞌ caꞌtanaponahuëꞌ, aꞌnotiarin. Quisoso yaꞌyoranquirahuaton, apinorin.

⁴⁸ —Iya Cotasë, Yosë quëran quëmapico nipirahuëꞌ, ¿shaꞌhuirapitonco, apinoranco ti? itërin.

⁴⁹ Caꞌtanoꞌsanënpitari quënanahuatonaꞌ, “Quisoso yamasapi,” taꞌtonaꞌ, yaahuëtopi. —¿Sahuëniquë Sinioro ahuëchi? itopirinahuëꞌ.

⁵⁰ Coꞌhuara aꞌpanichatërasohuëꞌ, aꞌnasoꞌ corto huaꞌan piyapinën ahuëaton, inchinan huëratën nishitëtërin.

⁵¹ —Tananpitëquëꞌ iyasha. Ama ahuëquësohuëꞌ, itërin Quisosori. Ina quëran sëꞌhuahuëratërahuaton, aꞌnaroáchin anoyatërin.

⁵² Naporahuaton, corto huaꞌanoꞌsaꞌ, capitanoꞌsaꞌ, ansianoꞌsaꞌ, inapita itapon: —Sahuëni, shonqui, inapita sëꞌquëërahuatomaꞌ, huëcapairamaco. Tëpatonaꞌpi pochin cancantatomaco, ¿yamanamaco ti?

⁵³ Coꞌtana nani tahuëri Yosë chinotopiso pëiquë paꞌnahuë. Nicapomaracohuëꞌ, co manamacohuëꞌ. Napoaponahuëꞌ, Yosë nohuanton, iporasoꞌ masaramaco. Tashi pochin cancantëramaꞌ niꞌton, sopai camairinquëmaꞌ co noyahuëꞌ nicacaso marëꞌ, itërin.

Pitrori nonpinapirinsoꞌ

⁵⁴ Quisoso masahuatonaꞌ, corto huaꞌan chini chiníquën nanantërinsoꞌ pëinënquë quëpapi. Pitrori aquë quëran imaquiarin.

⁵⁵ Iꞌiratëquë huarëꞌ imaquirahuaton, pairaanaquë yaꞌconin. Inaquë ponisiaroꞌsaꞌ nani aꞌpëtopi napëntacaiso marëꞌ. Pana yonsanquë huënsërahuaton, inantaꞌ napëntarin.

⁵⁶ Napëntaquëyaꞌ, aꞌna cosonari quënanin. Noya niꞌsahuaton: —Iso quëmapintaꞌ Quisoso imarin, tënin.

⁵⁷ —¡Co imoya casoꞌ ina nohuitërahuëꞌ! itërin Pitrori.

⁵⁸ Co huaꞌquiya quëranhuëꞌ aꞌna quëmapiri niantarin. —Quëmantaꞌ Quisoso imaran topirahuëꞌ, itërin. —Coꞌchi iyasha imarahuëꞌ paya, itaantarin.

⁵⁹ Aꞌna ora pochin nisahuasoꞌ, aꞌnantaꞌ taantapon: —Cariria piyapi pochin nonin niꞌton, iso quëmapintaꞌ Quisoso caꞌtanin tënahuë, tënin.

⁶⁰ —¡Coꞌchi iyasha paya! Co carisoꞌ nohuitërahuëꞌ, itaantarin. Nonasoꞌ, atari përarin.

⁶¹ Naporo chachin Quisosori tahuërëtahuaton, Pitro notëërin. Niꞌsarin niꞌton, ninorinsoꞌ Pitrori yonquirin. “Ipora tashi chachin, coꞌhuara atari përashatërasohuëꞌ, cararoꞌ nonpinapiaranco,” ¿itërinco pora? taꞌton,

⁶² aipiran pipirahuaton, naꞌnërin. Chiníquën sëtaton, naꞌnërin.

Quisoso tëhuapisoꞌ

⁶³ Ina quëran ponisiaroꞌsari Quisoso tëhuapi. Tëhuarahuatonaꞌ, ahuëpi.

⁶⁴ Tonporayatahuatonaꞌ, panpirayapi. —¿Intaꞌ ahuërinquën? Ninoquëꞌ, itopi.

⁶⁵ “¿Quëmasoꞌ huaꞌanquën ti?” itatonaꞌ, tëhuapi. Nisha nisha itatonaꞌ, noꞌhuipi.

Cotio huaꞌanoꞌsaquë quëpapisoꞌ

⁶⁶ Tahuërihuachina, cotio ansianoꞌsaꞌ, corto huaꞌanoꞌsaꞌ, cotio maistroꞌsaꞌ, inapita niyontonpi. Nani niyontonpachinaꞌ, inaquë Quisoso quëpapi natanacaiso marëꞌ.

⁶⁷ —Quëmasoꞌ Cristo Yosë aꞌpaimarinquënsoꞌ nipatan, noꞌtëquën shaꞌhuitocoi nitochii, itopi. —Shaꞌhuitohuatënquëmaꞌ, co natëaramacohuëꞌ.

⁶⁸ Maꞌsona tërantaꞌ natanpatënquëmaꞌ, co aꞌpaniantaramacohuëꞌ.

⁶⁹ Nipirinhuëꞌ, ipora quëran huarëꞌ casoꞌ Yosë quëran quëmapico niꞌto, Yosë inchinanën quëran huënsëapo. Inaquë chiníquën nanantarahuë, itërin.

⁷⁰ —Napoahuarëꞌ ¿quëmasoꞌ Yosë huiꞌninquën ti? itopi. —Ca mini inaco, itërin.

⁷¹ —Co huachi aquëtëꞌ shaꞌhuirapicaisoꞌ nohuantarihuahuëꞌ. “Ca Yosë huiꞌninco,” toconin, nani natanëhuaꞌ, nitopi.