Lucas 21 - Chayahuita (Shahui)

Quëyoron Yosë marëꞌ coriqui acorinsoꞌ

¹ Yosë chinotopiso pëiquë aꞌna cacon yaꞌhuërin. Inaquë coriqui Yosë marëꞌ poꞌmopi. Quisosori notëërahuaton, naꞌa maꞌhuanoꞌsaꞌ niꞌnin. Naꞌcon coriqui inaquë poꞌmorapirinahuëꞌ.

² Ina quëran aꞌnara quëyoron huëꞌnin, saꞌahua nininsoꞌ. Catotëraꞌhuayaíchin coriqui poꞌmoquirin.

³ Ina niꞌsahuaton, Quisosori itërin: —Noꞌtëquën itëranquëmaꞌ, naꞌa piyapiꞌsaꞌ naꞌcon coriqui poꞌmorapirinahuëꞌ, iso quëyoronso nipirinhuëꞌ naꞌcon naꞌcon poꞌmoquirin.

⁴ Maꞌhuanoꞌsasoꞌ naꞌa coriquihuanatonaꞌ, yaꞌsotopisoíchin poꞌmopi. Iso sanapiso nipirinhuëꞌ, piꞌpian yaꞌhuëcharinsoꞌ, yaꞌipi poꞌmoton, tiquirin. Napoaton naꞌcon naꞌcon Yosë quëtërin, tënahuë, tënin Quisoso.

Yosë pëinën ohuatapisoꞌ

⁵ Yosë chinotopiso pëiꞌ nicatonaꞌ, aꞌnaquën nitaponaꞌ: —Ma noyápiachin naꞌpi quëran nipi. Aꞌnaquën ninshiyaráchin Yosë marëꞌ acopisoꞌ, nitopi.

⁶ Napohuachinara, Quisosori itërin: —Iporasoꞌ yaꞌipiya noyápiachin niꞌpiramahuëꞌ, aꞌna tahuëri yaꞌipi ohuatapi. Co aꞌna naꞌpiya tërantaꞌ niyaꞌhuiritarinhuëꞌ, itërin.

Ayaroꞌ tahuëri yaꞌcaritërinsoꞌ

⁷ Napohuachina, natanpi: —¿Onporotaꞌ Maistro ohuatapi? Ina tahuëriꞌsaꞌ naniriahuachin, ¿maꞌtaꞌ onporahuachinaꞌ, nitotapoi? Shaꞌhuitocoi quiyantaꞌ nitochii, itopi.

⁸ Napotohuachinara: “Niꞌcona iyaroꞌsaꞌ nonpintochinënquëmaꞌ. Aꞌnaquën huëcatonaꞌ: ‘Casoꞌ Cristoco. Yosë chachin aꞌpairinco,’ tosapi. Aꞌnapitantaꞌ nonpin nanan shaꞌhuirapi. ‘Nani tahuëri naniriarin, nitotërai,’ tosapi. Ama inapita imacosohuëꞌ.

⁹ Nisha nisha parti piyapiꞌsaꞌ ninoꞌhuiapi. Niahuërahuatonaꞌ, quira nisapi. Ina natanpatamaꞌ, ama paꞌyancosohuëꞌ. Piyapiꞌsaꞌ co noyahuëꞌ nicatonaꞌ, naꞌa quira nisapi. Napoaponahuëꞌ, co isoroꞌpaꞌ taꞌhuanchátëraponhuëꞌ.

¹⁰ Nisha nisha piyapiꞌsa capini quira nisapi. Copirnoroꞌsa capini ninoꞌhuitonaꞌ, piyapinënpita camairapi quira nicacaiso marëꞌ.

¹¹ Aꞌna parti aꞌna parti panca ocohua paꞌsarin. Cosharori pahuantohuachinaꞌ, piyapiꞌsaꞌ tanari tiquirarin. Nisha nisha parti chiníquën canio matarin. Naꞌa taquirapi. Yosë nohuanton, nisha nisha maꞌsha inápaquë yaꞌnoarin. Quënanahuatonaꞌ, piyapiꞌsaꞌ paꞌyanapi. Yaꞌipiya tëꞌhuatapi. Ayaroꞌ tahuëri yaꞌcaritohuachin, ayonquicaiso marëꞌ napoarin.

¹² Coꞌhuara maꞌsha onpoyatërasohuëꞌ, co noya piyapiꞌsahuëꞌ masarinënquëmaꞌ. Imaramacoso marëꞌ aparisitarinënquëmaꞌ. Cotio niyontonpiso pëiquë shaꞌhuirapiarinënquëmaꞌ. Tashinan pëiquë poꞌmorarinënquëmaꞌ. Imaramacoso marëꞌ copirno yaꞌhuërinquëntaꞌ quëpararinënquëmaꞌ.

¹³ Naporoꞌ inapitantaꞌ Yosë nanamën shaꞌhuitohuatamaꞌ, natanapi.

¹⁴ Mapachinënquëmaꞌ, ‘¿Maꞌcha tonoꞌpocoya?’ ama tocosohuëꞌ.

¹⁵ Catahuaranquëmaꞌ noya nonacamasoꞌ. Ca nohuanto, noya yonquiaramaꞌ. Inimiconënpita co nanitapihuëꞌ aꞌpaniinquëmasoꞌ.

¹⁶ Tataparimaꞌ co imatonahuëꞌ, shaꞌhuirapiarinënquëmaꞌ. Iyaparimaꞌ, quëmopinëmapita, amiconëmapita, inapita shaꞌhuirapiarinënquëmaꞌ. Aꞌnaquëmaꞌ tëpararinënquëmaꞌ.

¹⁷ Imaramacoso marëꞌ naꞌa piyapiꞌsaꞌ noꞌhuiarinënquëmaꞌ.

¹⁸ Napoaponahuëꞌ, Yosë niꞌsarinquëmaꞌ Co inquëma tërantaꞌ chimimiataramahuëꞌ.

¹⁹ Noya imamiatohuatamaco, chaꞌësaramaꞌ.

²⁰ Notohuaroꞌ sontaroꞌsaꞌ nisha parti quëran huëcatonaꞌ, Quirosarin tancapitapi. Ina niꞌpatamaꞌ, nani tahuëri nanirinsoꞌ nitotaramaꞌ. ‘Quirosarin ataꞌhuantapi,’ tosaramaꞌ.

²¹ Naporoꞌ taꞌacasoꞌ yaꞌhuërin. Cotia parti yaꞌhuëhuatamaꞌ, motopiꞌpaꞌ taꞌacoꞌ. Ninanoquë yaꞌhuëhuatamaꞌ, aꞌnaroáchin pipicoꞌ. Iminëmaquë yaꞌhuëhuatamaꞌ, ama ninanoquë ayancontacosohuëꞌ.

²² Ina tahuëriꞌsaꞌ nanihuachin, naꞌcon parisitapi. Iráca Yosë quiricanënquë ninorinso chachin naporo huarëꞌ Yosëri chiníquën anaꞌintarin.

²³ Cayoronoꞌsaꞌ, huaꞌhuahuanoꞌsaꞌ, inapitasoꞌ sacai quëran taꞌarapi. ¡Maꞌhuantacha nisapi paya! Yosëri noꞌhuiton, cotioroꞌsaꞌ anaꞌintarin.

²⁴ Inimicoroꞌsaꞌ huëcatonaꞌ, naꞌa piyapiꞌsaꞌ sahuëniquë tëparapi. Nisha nisha sontaroꞌsari yaꞌhuëpiquë quëparapi asacatacaiso marëꞌ. Nisha piyapiꞌsaꞌ Quirosarinquë yaꞌconahuatonaꞌ, camaitapi. Huaꞌquiꞌ inaquë yaꞌhuaponaꞌ. Tahuërinën nanihuachina, Yosë nohuanton, pipiapi.

Quisoso oꞌmantacasoꞌ tahuëri

²⁵ Ina quëran Yosë nohuanton, piꞌi tashiarin. Co huachi yoqui aꞌpianinhuëꞌ. Tayoraroꞌsaꞌ inápa quëran anotarin. Marëntaꞌ panca coꞌsacaitapon niꞌton, tënëntapon. Yaꞌipi piyapiꞌsaꞌ paꞌyanaponaꞌ.

²⁶ Inápaquë yaꞌhuërinsopitantaꞌ nacon nacontapon. Piyapiꞌsaꞌ nisha nisha yonquiatonaꞌ, tëꞌhuataponaꞌ. ‘¿Maꞌcha onporoꞌpoya?’ taꞌtonaꞌ, paꞌyani yatëpapon.

²⁷ Ina quëran niꞌsarinaco. Yosë quëran quëmapico niꞌto, chitoroꞌ huancana oꞌmantararahuë. Chiníquën nanantato, oꞌmantararahuë. Huënaráchin huënaráchin yaꞌnoarahuë.

²⁸ Napoaton nisha nisha quira nisahuachinaꞌ, nisha nisha maꞌsha onporahuachinaꞌ, ama paꞌyancosohuëꞌ. Oꞌmantaꞌhuasoꞌ tahuëri naniriarin niꞌton, nóya cancantatomaꞌ, ninaco. Oꞌmantahuato, noya nichaꞌësaranquëmaꞌ. Yosëꞌpaꞌ quëpantaranquëmaꞌ,” itërin Quisosori.

²⁹ Ina quëran iso pënënto nanan shaꞌhuitërin: “Iquira nara papotërin quëran nitotocoꞌ. Aꞌnapita nararoꞌsantaꞌ yonquicoꞌ.

³⁰ Nara taꞌamënquë monoantahuachina: ‘Nani oꞌnapi naniriarin,’ topi.

³¹ Inapochachin nani maꞌsha onporahuachinaꞌ, nitotaramaꞌ. ‘Oꞌmantacasoꞌ tahuëri naniriarin. Yosë huaꞌanëntarinpoaꞌ,’ tosaramaꞌ.

³² Noꞌtëquën itëranquëmaꞌ. Coꞌhuara cotioroꞌsaꞌ huënton taꞌhuanchatërasohuëꞌ, nani maꞌsha onporapi.

³³ Isoroꞌpaꞌ taꞌhuantarin. Piꞌiroꞌtëntaꞌ taꞌhuantarin. Ca nanamëhuëso nipirinhuëꞌ co onporontaꞌ taꞌhuantarinhuëꞌ. Noꞌtëquën nonahuë niꞌton, yaꞌipiya shaꞌhuitëranquëmaso chachin naniarin.

³⁴ Niꞌcona naniantotamaco. Ama pita paꞌyatacasoachin cancantocosohuëꞌ. Ama noꞌpicosohuëꞌ. Ama maꞌsharáchin yonquicosohuëꞌ. Ina pochin cancantohuatamaꞌ, co aquëtëꞌ yonquiaramacohuëꞌ. Co noya ninahuatamacohuëꞌ,

³⁵ huënson aꞌnaroáchin maꞌsha maninso pochin, aꞌnanaya oꞌmantararahuë. Yaꞌipi piyapiꞌsaꞌ aꞌninquëchin niꞌsarinaco.

³⁶ Napoaton noya cancantatomaꞌ, Yosë nontocoꞌ achinicancainquëmaꞌ chaꞌëcamaso marëꞌ. Yosë quëran caso quëmapico niꞌto, co imapisopitahuëꞌ anaꞌintarahuë. Apira apira Yosë nontohuatamaꞌ, naporoꞌ tahuëri co tapanatomahuëꞌ, noya huaniparamaco,” tënin Quisoso.

³⁷ Nani tahuëri Yosë chinotopiso pëiquë aꞌchinin. Tashiꞌ nipachina, Oriposë panënquë huëꞌëcaso marëꞌ paꞌnin.

³⁸ Tashiramiachin naꞌa piyapiꞌsaꞌ chinotopiso pëiquë paꞌpi Quisoso natanacaiso marëꞌ.