Lucas 20 - Chayahuita (Shahui)

Chiníquën nanantërinsoꞌ

¹ Ina quëran Yosë chinotopiso pëiquë paantarahuaton, piyapiꞌsaꞌ aꞌchintantarin. Noya nanan pënëntaquëyaꞌ, cotio ansianoꞌsaꞌ, cotio maistroꞌsaꞌ, corto huaꞌanoꞌsaꞌ, inapita huëꞌpi.

² —¿Onporahuatontaꞌ chiníquën nanantaton, nipaꞌantopisopita aꞌparan? ¿Intaꞌ nanan quëtërinquën ina pochin nicacasoꞌ? Shaꞌhuitocoi, itopi.

³ —Noyapaꞌ, carinquëmantaꞌ natainquëmaꞌ. Ina shaꞌhuitohuatamaco, cantaꞌ insosona nanan quëtërincosoꞌ shaꞌhuitaranquëmaꞌ.

⁴ ¿Incaritaꞌ Coansha nanan quëtërin piyapiꞌsaꞌ aporintacaso marëꞌ? ¿Yosëri nanan quëtërin, piyapiri nica? ¿Maꞌtaꞌ tënamaꞌ canpita yonquiatomaꞌ? Shaꞌhuitoco carinquëmantaꞌ nanan quëtërincosoꞌ shaꞌhuichinquëmaꞌ, itërin Quisosori.

⁵ Natanahuatonaꞌ, inahua capini ninontopi. “¿Maꞌtaꞌ itahuaꞌ? ‘Yosëri nanan quëtërin aporintacasoꞌ,’ itohuatëhuaꞌ: ‘¿Onpoatomataꞌ nipachin co natëramahuëꞌ?’ itarinpoaꞌ.

⁶ Nipirinhuëꞌ: ‘Co Yosëri nanan quëtërinhuëꞌ. Piyapiri quëtërin,’ itohuatëhuaꞌ, naꞌa piyapiꞌsaꞌ chiníquën noꞌhuiarinënpoaꞌ. Naꞌpiquë tëꞌyaratënënpoaꞌ, tëpamarinënpoaꞌ. ‘Yosëri aꞌparin pënëinpoaso marëꞌ,’ topi yaꞌipiya,” nitopi.

⁷ Nani ninontohuachinara, Quisoso itaponaꞌ: “Ahuën. Co quiyasoꞌ nitotëraihuëꞌ. ¿Incarisoꞌ Coansha nanan quëtomara? Co nitotëraihuëꞌ,” toconpi.

⁸ —Napoahuarëꞌ, co carinquëmantaꞌ insosona nanan quëtërincosoꞌ shaꞌhuitaranquëmahuëꞌ, itërin Quisosori.

Inpriatoroꞌsaꞌ co noyahuëꞌ yonquipisoꞌ

⁹ Ina quëran piyapiꞌsaꞌ aꞌchintacaso marëꞌ, iso pënënto nanan shaꞌhuitaantarin: “Aꞌna quëmapi pancana iminin. Inaquë opasáchin shaꞌnin. Nani tiquihuachina, inpriatoroꞌsaꞌ acorin aꞌpaicaiso marëꞌ. ‘Sacatëramaso marëꞌ, nitërinsoꞌ patomachin macoꞌ. Patomachin cantaꞌ acotoco,’ itërin. Itahuaton, aꞌna parti paꞌnin. Huaꞌquiꞌ inaquë yaꞌhuërin.

¹⁰ Nitërinsoꞌ nani cayahuachina, piyapinën yaꞌhuërinꞌpaꞌ aꞌparin. Patoma nitërinsoꞌ maꞌcaso marëꞌ paꞌpirinhuëꞌ, inpriatonënpitari masahuatonaꞌ, ahuëpi. Ahuërahuatonaꞌ, topinan aꞌpapi.

¹¹ Naquëranchin huaꞌanëni aꞌna piyapinën aꞌpantapirinhuëꞌ. Inantaꞌ chiníquën noꞌhuitonaꞌ, ahuëantapi. Ahuëatonaꞌ, topinan aꞌpaantapi.

¹² Aꞌnantaꞌ aꞌpantapirinhuëꞌ. Pëꞌsharahuatonaꞌ, aꞌpapi inantaꞌ.

¹³ Napoin quëran huaꞌanëni yonquirin. ‘¿Maꞌcha onpochiya? Naꞌayaꞌpi aꞌpapirahuëꞌ. Ahuërahuatonaꞌ, topinan aꞌpairachinpi. Huiꞌnahuë nosoropirahuëꞌ, ina huachi aꞌpaarahuë. Ina natëaponaꞌ nimara,’ taꞌton, huiꞌnin chachin aꞌpapirinhuëꞌ.

¹⁴ Inpriatonënpitasoꞌ huiꞌnin quënanahuatonaꞌ, ninontopi. ‘Pasoꞌ huiꞌnapi aꞌna tahuëri paꞌpin chiminpachin, iso noꞌpa chachin huaꞌanëntapon. Huëcoꞌ tëpaꞌahuaꞌ. Yaꞌipi maꞌshanënpita canpoari matahua huachi,’ nitopi.

¹⁵ Naporahuatonaꞌ, huiꞌnin masahuatonaꞌ, aipiran tëꞌyatahuatonaꞌ, tëpapi. Paꞌpin natantohuachin, ¿maꞌtaꞌ onpotintapon, huiꞌnin chachin tëpatopi niꞌquëhuarëꞌ?

¹⁶ Aꞌnaroáchin huëntarahuaton, inpriatonënpita tëpapon. Ina quëran nasha inpriatoroꞌsaꞌ acoantapon, tënahuë,” itërin Quisosori. Ina natanahuatonaꞌ: —¡Ama onporontaꞌ napoinsohuëꞌ! topi.

¹⁷ Napohuachinara, nirayarahuaton, itantarin: —Napopiramahuëꞌ, ¿maꞌtaꞌ tapon nipachin pënëntonaꞌpi iráca ninorinsoꞌ? Ninshitaton, tapon: “Naꞌpi quëran yapëihuachina, aꞌna naꞌpi yaꞌhuëpirinhuëꞌ, pëinaꞌpiroꞌsaꞌ co nohuantopihuëꞌ. ‘Napoonin,’ taꞌtonaꞌ, tëꞌyatopirinahuëꞌ, huaꞌanëni maantarahuaton, ‘Iso naꞌpi mini naꞌcon naꞌcon nohuantërahuë pëicaꞌhuaso marëꞌ,’ taꞌton, noya acoantarin.

¹⁸ Ina naꞌpi iꞌpatohuatëra, anotatëꞌ yaꞌpanëꞌ. Aꞌna tahuëriso nipirinhuëꞌ ina naꞌpi chachin insosona anoantohuachin, niꞌshariarin,” itërin Quisosori.

¹⁹ Ina natanatonaꞌ, corto huaꞌanoꞌsaꞌ, cotio maistroꞌsaꞌ, inapitasoꞌ noꞌhuitopi: “Chinotatonpoaꞌ, pënënarinpoaꞌ,” taꞌtonaꞌ, yamapirinahuëꞌ tashinan pëiquë poꞌmocaiso marëꞌ. Piyapiꞌsaꞌ tëꞌhuatatonaꞌ, co mapihuëꞌ.

Copirno marëꞌ coriqui maꞌpatërinsoꞌ

²⁰ Napoaton aꞌnaquën quëmapiꞌsaꞌ amatahuatonaꞌ, itaponaꞌ: “Nonpintatomaꞌ, Quisosoquë pacoꞌ. Yaimaramaso pochin nicatomaꞌ, ina nontocoꞌ atëhuëcaso marëꞌ. Ina quëran shaꞌhuirapihuatamaꞌ, huaꞌani sontaroꞌsaꞌ aꞌpaarin ina macacaso marëꞌ,” itopi.

²¹ Itohuachinara, paꞌpi Quisoso nontaponaꞌ: —Ma noya Maistro nontërancoi. Noꞌtëquën aꞌchinan. Yosë nanamën noꞌtëquën aꞌchintatoncoi, co huaꞌan tërantaꞌ tëꞌhuatëranhuëꞌ.

²² Napoaton yanatanainquën. Noma copirnosoꞌ nisha piyapi niponahuëꞌ, yaꞌipinpoaꞌ huaꞌanëntërinpoaꞌ. Coriqui maꞌpainpoaso marëꞌ comisionën aꞌparin. Huëꞌpachinaꞌ, ¿noya ipora quëtacasoꞌ ti? ¿Maꞌtaꞌ Yosë nohuantërin nicaꞌhuaisoꞌ? Shaꞌhuitocoi nitochii, itopi.

²³ Quisososo nipirinhuëꞌ yonquipisopita nitotërin. —¿Onpoatomataꞌ yaatëhuëramaco?

²⁴ Noma coriqui quëshico niꞌi, itërin. Napohuachina, quëtopi. —¿Intaꞌ isosoꞌ nonanpisoꞌ? itohuachina, —Noma copirno, itopi. —¿Intaꞌ nininëontaꞌ isëquë ninshitopi? itaantahuachina, —Noma copirno chachin, itaantapi.

²⁵ —Copirno maꞌshanën niꞌquëhuarëꞌ inachachin quëtaantacoꞌ. Naporahuaton, Yosësoꞌ nininpoaꞌ niꞌton, huaꞌanëntërinpoaꞌ. Yaꞌipi cancanëma quëran ina natëcasoꞌ yaꞌhuërin, itërin.

²⁶ Naꞌa piyapiꞌsari Quisoso yaatëhuëpirinahuëꞌ, co nanitopihuëꞌ: —Ma noyacha aꞌpanitërin paya, taꞌtonaꞌ, co huachi natanpihuëꞌ.

Piyapiꞌsaꞌ nanpiantarapisoꞌ

²⁷ Ina quëran aꞌnapita cotio huaꞌanoꞌsaꞌ huëꞌpi. Satosioroꞌsaꞌ itopisoꞌ. Inapitasoꞌ nisha aꞌchinpi. “Piyapinpoaꞌ chiminpatëhuaꞌ, co onporontaꞌ nanpiantarihuahuëꞌ,” toconpi. Inapitantaꞌ Quisoso yanonpintatonaꞌ, huëcapaipi.

²⁸ —Iráca Maistro Moisësë pënëninpoaꞌ: “Quëmapi saꞌaponahuë co huiꞌnin yaꞌhuëyátërasohuëꞌ saꞌin ayananpihuachin, ina iini chachin imoroën maantacasoꞌ yaꞌhuërin. Huiꞌnahuanpachin, iincoꞌ apoin inari yaꞌhuërëtacaso marëꞌ. Ina quëran mashotohuachin, maꞌshanën, noꞌpanën, inapita masarin,” tënin Moisësë ninshitaton.

²⁹ Canchisë iyaroꞌsaꞌ yaꞌhuërin. Paninansoꞌ saꞌapirinhuëꞌ. Co huiꞌnin yaꞌhuëyátërasohuëꞌ, saꞌin ayananpirin.

³⁰ Ina iini chachin imoroën maantarin. Moisësë tëninso chachin manin. Inantaꞌ co huiꞌnin yaꞌhuëyátërasohuëꞌ, chimiantarin.

³¹ Aꞌna iiontaꞌ inapoantarin. Canchisë iinpita chachin inapoantapi. Co aꞌnaya tërantaꞌ huiꞌnin yaꞌhuëyátërasohuëꞌ, yaꞌipi taquipi.

³² Ina quëran sanapintaꞌ chiminin huachi.

³³ Canchisë iinpitari chachin mapirinahuëꞌ, nanpiantacasoꞌ tahuëri nanihuachin, ¿inquën chachincha saꞌin ninëꞌpoya? itopi.

³⁴ —Co noꞌtëquën, iyaroꞌsaꞌ, yonquiramahuëꞌ. Isoroꞌpaquë piyapiꞌsaꞌ saꞌapi, soꞌyapi, inapopi. Ina quëran chiminpi.

³⁵ Aꞌnaquën Yosëri noya niꞌninsopita inápaquë pantarapi. Nanpiantahuachinaꞌ, co huachi saꞌaponahuëꞌ. Sanapiꞌsantaꞌ co soꞌyaponahuëꞌ.

³⁶ Co huachi chiminaponahuëꞌ. Anquëniroꞌsa pochin nisapi. Nanpiantarapi niꞌton, Yosë huiꞌninpita chachin nisapi.

³⁷ Chiminpisopita tëhuënchachin nanpiantarapi. Ina aꞌchinchinquëmaꞌ. Moisësë chachin ninshitërinsoꞌ. Naraꞌhuaya orotarinsoꞌ nicasoꞌ, Yosëri nontërin: “Casoꞌ Yosëco. Apraan chinotarinco. Isaco, Cacopo, inapitantaꞌ chinotarinaco,” tënin Yosë.

³⁸ Nanpirëhuasopitaráchin Yosë chinotarëhuaꞌ. Napoaton inapitantaꞌ nani chiminpirinahuëꞌ, nanpimiataantapi, itërin Quisosori.

³⁹ Cotio maistroꞌsaꞌ natanahuatonaꞌ, paꞌyanpi. —¡Ma noyacha, Maistro, yonquiran paya! tënin aꞌnaꞌ.

⁴⁰ Ina quëran tëꞌhuatatonaꞌ, co huachi nohuantopihuëꞌ nataantacaisoꞌ.

Yosëri aꞌpaimarinsoꞌ

⁴¹ Ina quëran Quisosori itantapon: —Iráca Yosë quiricanënquë shaꞌhuitërinpoaꞌ. “Aꞌna tahuëri aꞌna quëmapi acoarahuë piyapiꞌsaꞌ nichaꞌëcaso marëꞌ. Inasoꞌ Cristo,” tënin iráca. Cotio maistroꞌsasoꞌ aꞌchinpachinara: “Cristosoꞌ Tapicoꞌ shiin,” topi. Napopirinahuëꞌ,

⁴² iráca Ispirito Santo nohuanton, Tapiri chachin Cristo ninorin. Sarmoquë ninshitaton, naporin: Yosëri Sinioronëhuë shaꞌhuitërin: “Inchinanëhuë quëran huënsëquëꞌ

⁴³ inimiconënpita cari minsëchinquën,” itërin Yosëri, tënin Tapi.

⁴⁴ Shiaꞌhuain niponahuëꞌ, Cristo yonquiaton, “Sinioronëhuë,” tënin Tapi. Piyapi chachin nipirinhuëꞌ, Tapiri chinotërin. ¿Onpoatontaꞌ naporin? itërin Quisosori.

Cotio maistroꞌsaꞌ yanonpipisoꞌ

⁴⁵ Yaꞌipi piyapiꞌsaꞌ natantapaquë, caꞌtanoꞌsanënpita pënënaton, itapon:

⁴⁶ “Niꞌcona cotio maistroꞌsaꞌ nonpintochinënquëmaꞌ. ‘Noya noyacoi,’ taꞌtonaꞌ, naporopi aꞌmopi piyapiꞌsari nicacaiso marëꞌ. Cachiquë paꞌpachinara, naꞌa piyapiꞌsari nontopi. ‘Huëꞌcama maistro,’ itohuachinara, paꞌyatopi. Niyontonpiso pëiquë yaꞌconahuatonaꞌ, huaꞌanoꞌsapitarëꞌ yahuënsëconpi. Pita nipachinara, huancánachin yahuënsëconpi.

⁴⁷ Noya nonaponaraihuëꞌ, aꞌnaya aꞌnaya quëyoronoꞌsaꞌ nonpintatonaꞌ, maꞌshanënpita matopi. Ama noninacaiso marëhuëꞌ huaꞌquiꞌ Yosë nontopirinahuëꞌ, co cancanëna quëran natëpihuëꞌ. Ina marëꞌ aquë aquëtëꞌ Yosëri anaꞌintarin,” itërin.