Lucas 19 - Chayahuita (Shahui)

Saquio anoyacancantërinsoꞌ

¹ Quiricoquë canconahuaton, ninano huáncana paꞌsarin.

² Inaquë aꞌna maꞌhuan yaꞌhuërin. Saquio itopisoꞌ. Inasoꞌ, coriqui copirno marëꞌ maꞌpatonaꞌpiroꞌsaꞌ huaꞌanën niꞌton, chiníquën nanantërin.

³ Quisoso inaquë huëꞌpachina, naꞌa piyapiꞌsari yamotërapi. Saquiontaꞌ: “Cantaꞌ Quisoso nohuichi,” taꞌton, huëꞌpirinhuëꞌ. Moꞌcopiya niꞌton, co nanitërinhuëꞌ quënanacasoꞌ.

⁴ Napoaton taꞌarëꞌnachin piyapiꞌsaꞌ naꞌhuëtërahuaton, naraquë nanpëconin. “Isëquëchin Quisoso huëꞌsarin,” taꞌton, inaquë huënsëarin Quisoso nococaso marëꞌ.

⁵ Quisososoꞌ inaquë canconahuaton, nëꞌpëconin. —Iya Saquio, manóton nohuaraquëꞌ. Ipora tahuëri quëma pëinënquë yacahuaranquën, itërin.

⁶ Napotohuachina, manorahuaton, nohuaraimarin. Paꞌyataton, “Noya Maistro. Huëquëꞌ niꞌquico,” itërin. Ina quëran pëinënquë quëparin.

⁷ Piyapiꞌsari quënanahuatonaꞌ, ninontapi. “¿Onpoatontaꞌ oshahuan pëinënquë yacahuatonin?” nitopi.

⁸ Saquioso nipirinhuëꞌ Quisoso aꞌchininsoꞌ natanahuaton, noya natërin. Napoaton itapon: —Nani maꞌsha Sinioro yaꞌhuëtërinco. Ipora patoma saꞌahuaroꞌsaꞌ quëtarahuë. Iráca aꞌnaya aꞌnaya nonpintato, ihuarahuësoꞌ naꞌcon naꞌcon quëtantarahuë. Aꞌna marëíchin nipirinhuëꞌ, catapini quëtantarahuë, itërin.

⁹ Itohuachina, Quisosori itërin: —Ipora tahuëri Yosë nichaꞌërinquën. Saꞌan, huiꞌnanpita, inapitantaꞌ nichaꞌërin. Apraan shinquën niꞌton, nichaꞌërinquën.

¹⁰ Naꞌa piyapiꞌsaꞌ co Yosë natëtonahuëꞌ, chihuëpi pochin nipi. Inapita yonicaꞌhuaso marëꞌ oꞌmarahuë. Cancanënaꞌ anoyacancantaꞌhuaso marëꞌ oꞌmarahuë, tënin Quisoso.

Canacaso marëꞌ coriqui quëtërinsoꞌ

¹¹ Naꞌa piyapiꞌsaꞌ natanapi. Paatonaꞌ, Quirosarinquë yaꞌcaritërapi. “Ipora tahuëriꞌsaꞌ Yosë huaꞌanëntarinpoa huachi,” topi. Napoaton Quisosori aꞌna pënënto nanan shaꞌhuitërin:

¹² “Aꞌna quëmapi aquë paꞌsarin huaꞌan yaꞌconacaso marëꞌ. Yapaꞌpachina, piyapinënpita nontërin: ‘Inatohuaꞌ paꞌpato, copirno chiníquën nanan quëtarinco naroꞌpaꞌ huaꞌanëntaꞌhuaso marëꞌ. Oshaquëran chiníquën nanan quëtohuachinco, huënantarahuë,’ tosahuaton,

¹³ shonca inpriatonën amatërin. Huëꞌpachinara, aꞌnaya aꞌnaya coriqui quëtërin. Napopináchin quëtëraꞌpiarin. ‘Iporasoꞌ aquë paꞌsarahuë. Iso coriqui quëchinquëmaꞌ maꞌsha paꞌanatomaꞌ, naꞌcon naꞌcon canacamaso marëꞌ,’ itërin. Itahuaton, paꞌnin.

¹⁴ Piyapinënpitaso nipirinhuëꞌ co nohuantopihuëꞌ. Noꞌhuipi. Napoaton comisionënpita aꞌpapi copirno shaꞌhuitacaiso marëꞌ. ‘Ina quëmapi co nohuantëraihuëꞌ huaꞌanëntiincoisoꞌ. Ama acoquësohuëꞌ,’ itoonpi.

¹⁵ Copirnoso nipirinhuëꞌ co comisionënpita natëtonhuëꞌ, chiníquën nanan quëtërin. Napotohuachina, yaꞌhuërinquë huëantarin. Canquirahuaton, inpriatonënpita amataantarin. Huëꞌpachinara, ‘¿Onpotaꞌ canaramaꞌ?’ itëraꞌpiarin.

¹⁶ Aꞌnasoꞌ huëꞌsahuaton, itërin: ‘Ina nápoꞌ coriqui sinioro quëtëranco. Maꞌsha paꞌanato, nani shoncaroꞌ aquëtë canarahuë,’ itërin.

¹⁷ ‘Ma noya sacatëran. Natëranco niꞌquëhuarëꞌ, huaꞌan acoꞌinquën. Shonca ninanoroꞌsaꞌ huaꞌanëntaran,’ itërin.

¹⁸ Ina quëran aꞌna inpriatonën huëꞌpachina, itërin: ‘Ina nápoꞌ coriqui, sinioro, quëtëranco cantaꞌ. Maꞌsha paꞌanato, aꞌnatëraporoꞌ aquëtë canarahuë,’ itërin.

¹⁹ ‘Natëranco niꞌquëhuarëꞌ, quëmantaꞌ huaꞌan acoꞌinquën. Aꞌnatërápo ninanoroꞌsaꞌ huaꞌanëntaran,’ itërin.

^20-21 Aꞌnantaꞌ nipirinhuëꞌ huëꞌsahuaton, itërin: ‘Quëmasoꞌ sinioro, co nosororancoihuëꞌ niꞌton, tëꞌhuatëranquën. Co sacataponahuëꞌ, canaran. Co shaꞌtopiranhuëꞌ, nitërinsoꞌ manan. Canahuato, topinan osërëtarinco, taꞌto, co sacatërahuëꞌ. Ina nápoꞌ coriqui quëtërancosoꞌ panioquë soꞌpinahuato, taparahuë. Maꞌtana yaꞌhuarin,’ toconin.

²² ‘Quëmasoꞌ co noyanquënhuëꞌ, chiroran. Co piꞌpisha tërantaꞌ natërancohuëꞌ. Quëmaora nanamën quëran napotaranquën. Co sacataponahuëꞌ, canaran, ¿itëranco ti?

²³ ¿Onpoatontaꞌ nipachin co bancoquë acoranhuëꞌ? Inaquë acoran naporini, piꞌpian tërantaꞌ canaitohuëꞌ,’ itërin.

²⁴ Ina quëran piyapinënpita shaꞌhuitërin. ‘Iso quëmapi topinan quëran coriqui quëtërahuë. Coriqui osërëtahuaton, pasoꞌ quëmapi quëtëquëꞌ, naꞌcon naꞌcon canarinsoꞌ,’ itërin.

²⁵ ‘Coꞌta, inasoꞌ nani huaꞌhuayátërahuë coriqui yaꞌhuëtërin. ¿Naquëranchin quëtantaꞌi ti?’ itërin piyapinëni.

²⁶ ‘Ina mini quëtëquëꞌ. Noya natërinco niꞌton, naꞌcon yaꞌhuëtarin. Naꞌcon naꞌcon quëtantarahuë. Aꞌnaso nipirinhuëꞌ co natërincohuëꞌ niꞌquëhuarëꞌ, piꞌpian yaꞌhuëtërinso tërantaꞌ osërëtarahuë.

²⁷ Co nohuantërinacosopitaso nipirinhuëꞌ maconcoꞌ. Isëquë chachin tëpacoꞌ,’ tënin,” itërin Quisosori.

Quirosarinquë canconinsoꞌ

²⁸ Ina tosahuaton, paantarin. Quirosarinquë yaꞌcaritëriarin.

²⁹ Yaꞌcaritahuaton, Oriposë panënquë canconin. Ina yaꞌcariya catoꞌ ninanoꞌ yaꞌhuërin. Aꞌnasoꞌ Pitipaqui itopi. Aꞌnantaꞌ Pitania itopisoꞌ. Inaquë canconahuaton, catoꞌ caꞌtanoꞌsanën shaꞌhuitërin.

³⁰ —Pasoꞌ ninanoquë pacoꞌ. Pëiꞌ yaꞌnatirinquë canconpatamaꞌ, mora huiꞌnapishin aꞌsonpinan quënanconaramaꞌ. Co incari tërantaꞌ huënsëchátërarinhuëꞌ. Iꞌquiritahuatomaꞌ, quëshico.

³¹ “¿Onpotaomataꞌ iꞌquiritaramaꞌ?” itohuachinquëmaꞌ, “Sinioro nohuantërin,” itocoꞌ, itërin.

³² Itohuachina, paꞌpi. Paꞌsahuatonaꞌ, mora aꞌsonpinan quënanconpi. Quisosori shaꞌhuitërinso chachin quënanconpi.

³³ Iꞌquiritaquëyaꞌ: —¿Onpotaomataꞌ morasoꞌ iꞌquiritaramaꞌ? itërin huaꞌanëni.

³⁴ —Siniorori nohuantërin, itohuachina: —Inta nipachin, quëpaquëꞌ, itërin.

³⁵ Napotohuachina quëpatopi. Mora aipi aꞌmopisoꞌ huëtohuachinara, ina aipi Quisoso huënsërahuaton, paꞌsarin.

³⁶ Naꞌa piyapiꞌsaꞌ quëchitahuatonaꞌ, aꞌmopisoꞌ iraquë huëtopi. Chiníquën huaꞌan pochin nicatonaꞌ, napotapi. Inaquë Quisoso paꞌsarin.

^37-38 Oriposë panën quëran nohuarapona pochin, imarinsopita chiníquën nonsapi. —¡Ma noyacha Quisososo paya! Nani maꞌsha nitotërin. Yosë nohuanton, naꞌa caniaꞌpiroꞌsaꞌ aꞌnaroáchin anoyatërin, niꞌnai. Yosëri aꞌpaimarin huaꞌanëntinpoaso marëꞌ. Siniorori chachin chiníquën nanan quëtërin. ¡Ma noyacha Yosëso paya! Nanan anoyatërinpoaꞌ niꞌton, noya yonquirinpoaꞌ, topi. Noya cancantatonaꞌ, napopi.

³⁹ Parisioroꞌsari natanahuatonaꞌ, noꞌhuipi. —Imarinënsopita Maistro, shaꞌhuitëquëꞌ taꞌchinaꞌ, itopi.

⁴⁰ —Taꞌtopi naporini, naꞌpiroꞌsa tërantaꞌ chiníquën nointonahuëꞌ, tënin Quisoso.

⁴¹ Ina quëran Quirosarin notënanquë canconpi. Canconpachina, piyapiꞌsaꞌ yonquiaton, Quisoso sëtërin. Sëtaton, naꞌnërin.

⁴² “Huaꞌquiꞌ pënënpiranquëmahuëꞌ, co yanatanamacohuëꞌ. Ipora tërantaꞌ noꞌtëquën yonquiramaꞌ naporini, noya cancanchitomahuëꞌ. Iporaso nipirinhuëꞌ co huachi nanitaramahuëꞌ. Co natantochináchinhuëꞌ cancantëramaꞌ.

⁴³ Napoaton aꞌna tahuëri parisitaramaꞌ. Inimiconëmapita huëcapairahuatënënquëmaꞌ, tancapitarinënquëmaꞌ. Yaꞌipi parti quëran ahuëarinënquëmaꞌ. Ninano pairapiramasoꞌ inápa niponahuëꞌ, maꞌsha aꞌmitë aꞌmitëtapi yaꞌconacaiso marëꞌ.

⁴⁴ Yaꞌconahuatonaꞌ, pëinëmapita ohuatapi. Co aꞌna naꞌpi tërantaꞌ niyaꞌhuiritarinhuëꞌ. Yaꞌipinquëmaꞌ taꞌhuantaramaꞌ. Nichaꞌëcaꞌhuanquëmaso marëꞌ oꞌmapirahuëꞌ. Co nohuantëramacohuëꞌ niꞌton, Yosë anaꞌintarinquëma huachi,” tënin Quisoso.

Nipaꞌantopisopita Yosë chinotopiso pëi quëran aꞌparinsoꞌ

⁴⁵ Ina quëran Yosë chinotopiso pëiquë yaꞌconahuaton, nipaꞌantopisopita aꞌparin.

⁴⁶ —Yosë quiricanën quëran tapon: “Ca nohuanto, pëinëhuë yaꞌhuëꞌin piyapiꞌsaꞌ nontiinacoso marëꞌ,” tënin Yosë. Canpitaso nipirinhuëꞌ, ihuatëroꞌsaꞌ yaꞌhuëpiquë pochin nitëramaꞌ, itërin Quisosori. Itahuaton, aꞌparin.

⁴⁷ Ina quëran nani tahuëri inaquë aꞌchinin. Corto huaꞌanoꞌsaꞌ, cotio maistroꞌsa, ninanoꞌ huaꞌanoꞌsaꞌ, inapitasoꞌ noꞌhuitonaꞌ, Quisoso yatëpapirinahuëꞌ.

⁴⁸ Naꞌa piyapiꞌsari nóya natanatonaꞌ yamotopi niꞌton, co nanitopihuëꞌ macacaisoꞌ.