Lucas 10 - Chayahuita (Shahui)

Canchisë shonca catoyaꞌpi aꞌparinsoꞌ

¹ Ina quëran aꞌnapitantaꞌ shaꞌhuitërin pënëntacaisoꞌ. Canchisë shonca catoꞌ quëmapiꞌsaꞌ huayonahuaton, catoya catoya aꞌparin. Nisha nisha ninanoquë aꞌparin. Oshaquëran ina ninanoroꞌsaquë chachin paꞌsarin niꞌton, inapitaꞌton aꞌparin pënëntacaiso marëꞌ. Yapaꞌpachinara itapon:

² “Tëhuënchachin iyaroꞌsaꞌ, isoroꞌpaꞌ panca imin pochin ninin. Cayarinsoꞌ manëso pochachin piyapiꞌsaꞌ manëꞌ Yosë imacaiso marëꞌ. Naꞌa piyapiꞌsaꞌ yaꞌhuëpirinahuëꞌ, caraíchin pënëntarin. Napoaton Yosë nontocoꞌ aꞌnapitantaꞌ aꞌpaꞌin pënënchinaꞌ. Inasoꞌ yaꞌipiya huaꞌanëntarin.

³ Iporasoꞌ aꞌparanquëmaꞌ. Niꞌcoꞌ. Carniroaꞌhuaroꞌsaꞌ co nanitopihuëꞌ niaꞌpaicaisoꞌ. Aꞌnaroáchin tanan niꞌniroꞌsari manin. Aꞌnaquën piyapiꞌsaꞌ niꞌniroꞌsa pochin cancantatonaꞌ, noꞌhuiponënquëmaꞌ.

⁴ Paꞌpatamaꞌ, ama mantaꞌ quëpacosohuëꞌ. Pëꞌpëto, coriqui, sapatë co inapita tërantaꞌ quëpacasoꞌ yaꞌhuërinhuëꞌ. Piyapiꞌsaꞌ nacapihuatamaꞌ, ama huaꞌquiꞌ nontocosohuëꞌ. Manóton pacoꞌ.

⁵ Aꞌna pëiquë canconpatamaꞌ, huaꞌanën nontocoꞌ: ‘Iꞌhuata iya. Yosë catahuainquëmaꞌ,’ itocoꞌ.

⁶ Noya nontohuachinënquëmaꞌ, Yosëri catahuaarin mini. Coꞌsoꞌ noya nontohuachinënquëmahuëꞌ, co Yosëri catahuaarinhuëꞌ.

⁷ Nohuantohuachinënquëmaꞌ, ina pëinënquë yacahuacoꞌ. Aꞌcahuachinënquëmaꞌ, caꞌcoꞌ. Oꞌshitohuachinënquëmaꞌ, oꞌocoꞌ. Aꞌchintaramaꞌ niꞌton, topinan caꞌcoꞌ. Ama nisha nisha pëiquë yaca yacapatë́rantacosohuëꞌ.

⁸ Aꞌna ninanoquë paꞌpatamaꞌ, noya nontohuachinënquëmaꞌ, inaquë aꞌchintocoꞌ. Maꞌsona aꞌcahuachinënquëmaꞌ, caꞌcoꞌ.

⁹ Caniaꞌpiroꞌsaꞌ inaquë yaꞌhuëhuachinaꞌ, anoyatocoꞌ. ‘Iso tahuëriꞌsaꞌ Yosë yahuaꞌanëntarinquëmaꞌ,’ itocoꞌ.

¹⁰ Aꞌnaquën piyapiꞌsaso nipirinhuëꞌ co nohuantarinënquëmahuëꞌ. Ina ninanoquë canconpatamaꞌ, cachiquë paatomaꞌ, pënëntocoꞌ.

¹¹ ‘Nani shaꞌhuitopirainquëmahuëꞌ. Co nohuantëramahuëꞌ niꞌton, canpitaora tëhuënëmaquë ninaꞌintaramaꞌ. Co natëpiramahuëꞌ, Yosësoꞌ yahuaꞌanëntarinquëmaꞌ,’ itocoꞌ.

¹² Ayaroꞌ tahuëri nanihuachin, inapitasoꞌ chiníquën parisitapi, tënahuë. Iráca Sotomaroꞌsasoꞌ paꞌpi co noyahuëꞌ nipi niꞌton, Yosëri chiníquën anaꞌintërin. Co natërinacosopitaso nipirinhuëꞌ, chini chiníquën anaꞌintarin huachi,” itërin.

Nisha nisha ninanoquë yaꞌhuëpisopita pënëninsoꞌ

¹³ Ina quëran Quisoso taantarin: “Corasinoquë, Pitsaitaquë inaquëpita yaꞌhuëramasoꞌ, ¡maꞌhuantacha nisarama paya! Naꞌcon pënënpiranquëmahuëꞌ, co natëramacohuëꞌ. Ina marëꞌ parisitaramaꞌ. Tiroquë, Sitonquë, inaquëpitaso nipirinhuëꞌ co pënëntërahuëꞌ. Co inaquë caniaꞌpiroꞌsaꞌ aꞌnaroáchin anoyatërahuëꞌ. Inaquë naporahuë naporini, oshanëna marëꞌ sëtatonaꞌ, saꞌcatën nininsoꞌ aꞌmoitonahuëꞌ. Huarianoquënta nipaꞌsamototatonaꞌ co noyahuëꞌ yonquipisopita nanianchitonahuëꞌ.

¹⁴ Napoaton iyaroꞌsaꞌ ayaroꞌ tahuëri nanihuachin, Yosë chini chiníquën anaꞌintarinquëmaꞌ. Tiroquësoꞌ, Sitonquësoꞌ, co onpopinchin anaꞌintarinhuëꞌ.

¹⁵ Capinaomoquë yaꞌhuëramasopitantaꞌ co noꞌtëquën yonquiramahuëꞌ. ‘Noyacoi niꞌtoi, Yosëꞌpaꞌ paꞌsarai, ¿topiramahuëꞌ ti? Co inatohuaꞌ paꞌsaramahuëꞌ. Parisitopiquë tëhuënchinsoꞌ paꞌmiatarama huachi,’ tënahuë,” itërin.

¹⁶ Ina quëran yaaꞌparinsopita itaantarin: “Iporasoꞌ pënëntacamaso marëꞌ aꞌpararanquëmaꞌ. Ca yaꞌhuërënamëhuë pënëntaramaꞌ. Noya natanpachinquëmaꞌ, natanarinaco cantaꞌ. Coꞌsoꞌ nohuantohuachinënquëmahuëꞌ, co cantaꞌ nohuantarinacohuëꞌ. Co nohuantohuachinacohuëꞌ, co Yosëntaꞌ nohuantapihuëꞌ,” itërin Quisosori. Itohuachina, paꞌpi huachi. Nisha nisha ninanoquë pënëntëraꞌpiapi.

Aꞌparinsopita huëantapisoꞌ

¹⁷ Nani pënëntohuachinara, canchisë shonca catoyaꞌpi chachin nóya cancantatonaꞌ, Quisosoquë huëantapi. —Sopairoꞌsantaꞌ Sinioro nontërai. “Quisoso nanan quëtërincoi niꞌton, aꞌparainquën,” itohuatëira, pipipi, itopi.

¹⁸ Napotohuachinara, Quisosori itërin; —Sopai huaꞌan chachin iráca inápaquë yaꞌhuëpirinhuëꞌ, Yosëri tëꞌyatërin. Oꞌcori pochin aꞌnaroáchin anotërinsoꞌ niꞌnahuë.

¹⁹ Nani nanan quëtëranquëmaꞌ canpitantaꞌ sopai minsëcamaso marëꞌ. Ca yonquiatomaco, sopairoꞌsaꞌ nontohuatamaꞌ, patarinquëmaꞌ. Yaꞌhuan, yonpinca inapita iꞌnatohuatamaꞌ, co mantaꞌ onpotarinquëmahuëꞌ. Yaꞌhuan yaquëtërinposo pochin sopaintaꞌ yaacorinquëmaꞌ. Canpitariso nipirinhuëꞌ minsëaramaꞌ. Co mantaꞌ nanitarinhuëꞌ minsëinquëmasoꞌ.

²⁰ Sopairoꞌsaꞌ aꞌpapiramahuëꞌ, ama ina marëáchin noya cancantocosohuëꞌ. Imaramaco niꞌton, Yosëꞌpaꞌ paꞌsaramaꞌ. Inatohuaꞌ nininëmaꞌ nani ninshitërinquëmaꞌ. Ina marëꞌ tëhuënchinsoꞌ nóya cancantocoꞌ, itërin.

Tata Yosë anitotërinpoasoꞌ

²¹ Naporoꞌ Ispirito Santo nohuanton, Quisoso nóya cancantërin. Noya cancantaton, Yosë nontarin. “Ma noyacha, Tata, yonquiran paya. Quëmasoꞌ chini chiníquën nanantëran. Inápaquë, isoroꞌpaquë, yaꞌipi parti huaꞌanëntaran. Quëma nohuanton, aꞌnaquën nani maꞌsha nitotaponaraihuëꞌ, co nanamën nitotopihuëꞌ. ‘Quiyaora noya noya nitotarai,’ topiso marëꞌ, co nanamën anitotëranhuëꞌ. Imarinacosopitaso nipirinhuëꞌ catahuaran. ‘Catahuaco Sinioro co caora nanitërahuëꞌ,’ itohuachinën, quëma nanamën chachin anitotëran. Ina marëꞌ Tata, ‘Yosparinquën,’ itëranquën,” tënin, Yosë nontaton.

²² Ina quëran aꞌparinsopita itantarin. “Tata Yosë nohuanton, chiníquën nanantërahuë. Yaꞌipi nanamën anitotërinco piyapiꞌsaꞌ aꞌchintaꞌhuaso marëꞌ. Huiꞌninco niꞌto, tatahuësáchin noyá nohuitërinco. Inapochachin cantaꞌ Tata Yosë nohuitërahuë. Casáchin noyá nohuitërahuë. Aꞌnaquën piyapiꞌsantaꞌ caora nohuanto, anohuitërahuë. Inapitantaꞌ Yosë nohuitapi huachi,” itërin.

²³ Nani aꞌchintohuachina, caꞌtanoꞌsanënpita amasha quëparahuaton, shaꞌhuitërin: “Isoroꞌpaquë oꞌmato, nani maꞌsha ninahuë. Ma noya Yosë nosororinquëmaꞌ niꞌton, niꞌnamaꞌ.

²⁴ Iráca quëran huarëꞌ naꞌa copirnoroꞌsaꞌ, pënëntonaꞌpiroꞌsaꞌ, inapita niꞌnamasopita yaniꞌpirinahuëꞌ, co niꞌpihuëꞌ. Aꞌchintëranquëmasopitantaꞌ yanatanpirinahuëꞌ, co natanpihuëꞌ,” itërin.

Nosorotonaꞌpi naporinsoꞌ

²⁵ Ina quëran aꞌna maistro iráca nanan noya nitotërinsoꞌ huanirahuaton, Quisoso tënicaso marëꞌ itapon: —¿Maꞌtaꞌ Maistro onpoꞌi nanpimiataꞌhuaso marëꞌ? itërin.

²⁶ —Iráca Yosë quiricanën quëran ninshitaton, pënëninpoaꞌ. ¿Maꞌtaꞌ tënin? itërin.

²⁷ —“Tata Yosë huaꞌanëntërinpoaꞌ. Ina nosorocoꞌ. Yaꞌipi cancanëma quëran, yaꞌipi huaꞌyanëma quëran, yaꞌipi chinirama quëran, yaꞌipi yonquinëma quëran, yaꞌipi inaquëranpita nosoromiatocoꞌ. Isontaꞌ Yosë nohuantërin: Quëmaora ninosororanso pochachin aꞌnapitantaꞌ nosorocoꞌ,” tënin, itërin.

²⁸ —Noꞌtëquën naporan. Ina pochin nipatan, Yosë pochin cancantaton, nanpimiataran huachi, itërin Quisosori.

²⁹ —Ina nitotaporahuëꞌ, ¿maꞌtaꞌ onpoꞌi? ¿Inpitaquë huarëtaꞌ nosoroꞌi? itaantarin.

³⁰ —Inta nipachin aꞌchinchinquën. Aꞌna cotio quëmapi Quirosarinquë yaꞌhuërin. Aꞌna tahuëri Quiricoquë paꞌsapirinhuëꞌ. Paasoꞌ, tëpatoroꞌsari mapi. Ahuëatonaꞌ, ihuapi. Aiꞌnanpiratopi. Yachimiánin patopi.

³¹ Ina quëran cotio corto huaꞌan ina ira chachin paꞌtapirinhuëꞌ. Quëmapi quënanconaponahuëꞌ, pëshonanpirahuaton naꞌhuëtërin.

³² Ina piquëran aꞌna quëmapintaꞌ paꞌsarin. Inasoꞌ Nihui huënton quëmapi niꞌton, corto huaꞌan catahuarinsoꞌ. Inarintaꞌ quënanconaponahuëꞌ, inapotaantarin.

³³ Ina quëran Samaria quëmapirintaꞌ quënancoantarin. Inasoꞌ nisha quëmapi niponahuëꞌ, nosororin.

³⁴ Yaꞌcariconahuaton, catahuarin. Pëꞌshapisoꞌ tomaquë, huinoquë, inaquëpita pashitërin. Inapotahuaton tonpotërin. Ina quëran inaora moranënquë acorahuaton, huëꞌëpatacaso pëiquë quëparin. Inaquë aꞌpairin.

³⁵ Tahuëririnquë catotëꞌ coriqui prata quëran nininsoꞌ pëiꞌ huaꞌanën quëtërin. “Pasoꞌ ninanoquë paꞌsarahuë. Quëmari aꞌpaiquëꞌ. Coriqui pahuanpachin, quëmaora coriquinën castaquëꞌ. Huënantahuato, iꞌhuërëchinquën,” itërin.

³⁶ Niꞌquëꞌ iyasha. Carayaꞌpiri ahuëpisoꞌ quënanconpi. ¿Insoaritaꞌ iin pochin nosororin? itërin Quisosori.

³⁷ —Nisha piyapiri nosororinsoꞌ, tënin. —Ina mini. Paaton, quëmarintaꞌ inapochachin nosoroquëꞌ, itërin.

Marta, Maria, inapita napopisoꞌ

³⁸ Ina quëran paantahuaton, aꞌna ninanoquë canconin. Inaquë Marta yaꞌhuërin: —Huëquëꞌ Sinioro niꞌquicoi, itohuachina, yaꞌconapatërin.

³⁹ Martasoꞌ cain yaꞌhuëtërin, Maria itopisoꞌ. Quisoso huëꞌpachina, yaꞌcariya huënsëquirin. Aꞌchininsoꞌ noya natanarin.

⁴⁰ Martaso nipirinhuëꞌ cosharo nicaton sacatárin. Nisha nisha yonquiaton, Quisoso huëcapairin: —Caihuë Sinioro topinan huënsëárin. Caora cosharoꞌ nisarahuë. Shaꞌhuitëquëꞌ catahuainco, itërin.

⁴¹ —Imoya. Nisha nisha maꞌsha yonquiaton, co noya cancantëranhuëꞌ.

⁴² Casáchin natancosoꞌ naꞌcon naꞌcon nohuantërahuë. Mariasoꞌ natanatonco, noya noya nisarin. Naꞌcon yonquirinco niꞌton, noya cancantomiatarin tënahuë, itërin Quisosori.