Lucas 1 - Chayahuita (Shahui)

Maꞌmarësona ninshitërinsoꞌ

¹ Quisocristo isoroꞌpaquë oꞌmaton, nóya ninin. Naꞌa piyapiꞌsari ina naporinsoꞌ nani ninshitopi.

² Caꞌtanoꞌsanënpitasoꞌ iráca quëran huarëꞌ imatonaꞌ, naporinsoꞌ niꞌpi. Nani yaꞌipi noꞌtëquën shaꞌhuitërinacoi.

³ Cantaꞌ yaꞌipi nanamën nitotërahuë. Huaꞌquiꞌ natanato, nani noyá nitotërahuë. Napoaton, iya Tiohuiro ninshichinquën, tënahuë. Quëmasoꞌ paꞌpi noya piyapinquën niꞌton, ninshitaranquën. Yaꞌnan nininso quëran huarëꞌ yaꞌipiya ninshitaranquën.

⁴ Naꞌa piyapiꞌsaꞌ nani shaꞌhuitopirinënquënhuëꞌ, iporasoꞌ cariontaꞌ ninshitaranquën noꞌtëquën nitotamaso marëꞌ.

Coansha Paotista nasitacasoꞌ ninorinsoꞌ

⁵ Iráca Irotisë Cotia parti huaꞌanëntasoꞌ, aꞌna corto huaꞌan yaꞌhuërin, Sacariasë itopisoꞌ. Ina huëntoaꞌhuanënsoꞌ, Apiasë huëntoaꞌhua, itopi. Saꞌinsoꞌ Isapira itopi. Inantaꞌ Aaron shiin, iráca corto huaꞌan yaꞌconinsoꞌ.

⁶ Cato chachin noya Yosë imapi. Yaꞌipi pënëntërinsoꞌ noꞌtëquën natëpi.

⁷ Saꞌinso nipirinhuëꞌ co huaꞌhuanaꞌpihuëꞌ. Co aꞌnaya tërantaꞌ huaꞌhuin yaꞌhuëtërinhuëꞌ. Nani paiya. Soꞌiontaꞌ nani mashoya.

⁸ Aꞌna tahuëri Sacariasë huëntoaꞌhuanën Yosë chinotopiso pëiquë paꞌpi sirihuitacaiso marëꞌ. Naporoꞌ tahuëri sirihuitacaisoꞌ yaꞌhuërin.

⁹ Cotioroꞌsaꞌ inachintopisoꞌ imatonaꞌ, Sacariasë huayonpi yonarin pochin nininsoꞌ aꞌpëcaso marëꞌ. Acohuana yaꞌconahuaton, pimóton nininsoꞌ aꞌpërin Yosë yonquicaiso marëꞌ.

¹⁰ Aꞌpësoꞌ, naꞌa piyapiꞌsaꞌ aipiran huanirahuatonaꞌ, Yosë nontapi.

¹¹ Naporoꞌ acohuana Sinioro anquëninëni yaꞌnotimarin. Misaꞌhuaya inchinan quëran huanitimarin.

¹² Anquëni quënanahuaton, paꞌyanin. Paꞌpi tëꞌhuarin.

¹³ Anquëniriso nipirinhuëꞌ noya nontërin. —Ama paꞌyanquësohuëꞌ. Quëmasoꞌ Sacariasënquën, nohuitëranquën. Huaꞌquiꞌ huiꞌnahuanacasoꞌ nohuantopiranhuëꞌ. Ina marëꞌ Yosë nontëransoꞌ nataninquën. Saꞌan huaꞌhuanarin. Huaihuachin, nininën cari shaꞌhuitaranquënsoꞌ acotëquëꞌ. Coansha itëquëꞌ.

¹⁴ Nasitohuachin, noya cancantaran. Naꞌa piyapiꞌsari paꞌyatapi.

¹⁵ Inasoꞌ nóya quëmapi nipon. Yosëri catahuaarin niꞌton, noya noya nisarin. Naporahuaton, co piꞌpian tërantaꞌ main oꞌoponhuëꞌ. Coꞌhuara nasichátëraponhuëꞌ, Ispirito Santori yaꞌcoancantarin. Inasáchin natëarin.

¹⁶ Mashotohuachin, pënëntapon. Pënëntohuachin, naꞌa israiroꞌsaꞌ Yosë yonquiantapi.

¹⁷ Iráca Iniasë pënëntërinso pochin nóya pënëntarin. Ina pochin chiníquën nanantarin inantaꞌ. Sinioro yaoꞌmahuachin, pënëntapon. Pënëntohuachin, quëmapiꞌsaꞌ huiꞌninpitarëꞌ noya ninontantaponaꞌ. Iporasoꞌ aꞌnaquën co Yosë natëpirinahuëꞌ. Ina natanahuatonaꞌ, noꞌtëquën yonquiaponaꞌ. Inari aꞌchintohuachin, Sinioro nohuantapona huachi, itërin anquëniri.

¹⁸ —Casoꞌ mashoyaco. Saꞌahuëntaꞌ nani paiya. ¿Inaporoꞌpocoitaꞌma nica? ¿Onporahuatotaꞌ noꞌtëquën nitochi? tënin Sacariasë.

¹⁹ —Casoꞌ Capirico. Yosë yaꞌhuërin quëran oꞌmarahuë. Ina aꞌpaimarinco nontaꞌhuanquënso marëꞌ. Noya nanan shaꞌhuitopiranquënhuëꞌ.

²⁰ Co natërancohuëꞌ niꞌquëhuarëꞌ, huaꞌquiꞌ co nonsaranhuëꞌ. Huiꞌnan nasitaquë huarëꞌ co nonacamasoꞌ nanitaranhuëꞌ. Napoaponahuëꞌ, noꞌtëquën nontëranquën. Huiꞌnahuanaran. Tahuërinën nanihuachin, saꞌan huaiarin, itërin anquëniri.

²¹ Piyapiꞌsaso nipirinhuëꞌ Sacariasë ninatonaꞌ: “¿Onpoatontaꞌ huaꞌquiarin?” topi.

²² Ina quëran acohuana quëran pipipirinhuëꞌ, co huachi nanitërinhuëꞌ nonacasoꞌ. Imirin quëran anquitaponahuëꞌ, co nanitërinhuëꞌ piyapiꞌsaꞌ nontacasoꞌ. “Acohuana yaꞌconin quëran, Yosë nohuanton, huaꞌnarëso pochin quënamara,” topi.

²³ Nani Yosë chinotopiso pëiquë sirihuitohuachina, Sacariasësoꞌ yaꞌhuërinꞌpaꞌ paantarin.

²⁴ Ina quëran co huaꞌquiya quëranhuëꞌ saꞌin cayorin huachi. Aꞌnatërápo yoqui pochin co intoasoꞌ paꞌninhuëꞌ. Pëinënquë yaꞌhuárin.

²⁵ “Ma noyacha Yosë catahuarinco niꞌton, huaꞌhuanarahuë paya. Ina nohuanton, co huachi tapan yaꞌhuëtarincohuëꞌ,” tënin yonquiaton.

Anquëniri Maria nontërinsoꞌ

²⁶ Nani saota yoquitohuachina, naquëranchin anquëni isoroꞌpaquë oꞌmantarin, Capiri itopisoꞌ. Nasaritoquë Yosëri aꞌpaimarin, Cariria parti yaꞌhuërinsoꞌ.

²⁷ Inaquë aꞌnara nanon yaꞌhuërin, Maria itopisoꞌ. Cosiri nani nontërin macacaso marëꞌ. Tata masho Tapi shiin inasoꞌ.

²⁸ Anquëni oꞌmarahuaton, Maria itapon: —Iꞌhuata Maria. Sinioro noya niꞌninquën. Ina chachin catahuarinquën, itërin.

²⁹ Ina natanahuaton, Maria paꞌyanin: “¿Maꞌmarëtaꞌ napotërincosoꞌ?” tënin yonquinënquë.

³⁰ —Ama Maria, paꞌyanquësohuëꞌ. Yosë noya niꞌninquën.

³¹ Natanco shaꞌhuichinquën. Quëmasoꞌ huaꞌhuanaran. Quëmapiaꞌhuaya huaihuatan, Quisoso itëquëꞌ.

^32-33 Mashotohuachin, chiníquën nanantarin. Inasoꞌ Yosë huiꞌnin. Yosë nohuanton, copirno yaꞌconarin. Iráca Tata masho Tapi israiroꞌsaꞌ noya huaꞌanëntopirinhuëꞌ. Ina quëran chiminin. Iporaso nipirinhuëꞌ huaꞌhuani huaꞌanëntomiatarin. Co onporontaꞌ pipirarinhuëꞌ, itërin anquëniri.

³⁴ —¿Onporahuatotaꞌ huaꞌhuanapo? Co casoꞌ quëmapi sëꞌhuayátërarincohuëꞌ, itërin Mariari.

³⁵ —Ispirito Santo nohuanton, quëmaora huaꞌhuanaran. Yosë topinan yonquiarapirinquënhuëꞌ, cayoaran. Napoaton huaꞌhuan, Yosë huiꞌnin chachin nisarin. Co piꞌpisha tërantaꞌ oshahuanaponhuëꞌ.

³⁶ Niꞌquëꞌ. Quëmopinën Isapira itopisoꞌ paiya niponahuëꞌ, Yosë nohuanton nani cayorin. Co huaꞌhuanaꞌpihuëꞌ niponahuëꞌ, nani saota yoquitarin. Quëmapiaꞌhuaya huaipon.

³⁷ Yosë yaꞌipi nanitaparin, itërin anquëniri.

³⁸ —Inta nipachin. Yosëíchin casoꞌ natëarahuë. Ina nohuanton, huaꞌhuahuë yaꞌhuëꞌin nipachin, tënin Maria. Napotohuachina, anquëni paꞌnin.

Isapira nicapon paꞌninsoꞌ

³⁹ Ina quëran manorahuaton, Mariasoꞌ Cotia motopiroꞌsa parti paꞌnin quëmopinën nicapon. Inaquë canconahuaton,

⁴⁰ Sacariasë pëinënquë yaꞌconconin. Isapira quënanconahuaton, —Iꞌhuata aꞌshacha, itërin.

⁴¹ Ina natanahuaton, huaꞌhuin yoꞌnamënquë toꞌmo toꞌmótarin. Isapirantaꞌ nóya cancantërin. Ispirito Santori noyá yaꞌcoancantërin niꞌton,

⁴² paꞌyataton, chiníquën itapon: —Iꞌhuata huaꞌhuataꞌhua. ¡Ma noya Yosë catahuarinquën! Aꞌnapita sanapiꞌsa quëran noya noya niꞌninquën. Huaꞌhuaontaꞌ noya noya niꞌsarin.

⁴³ Inasoꞌ yaꞌipiya huaꞌanëntarinpoaꞌ. Co casoꞌ chiníquën nanantopirahuëꞌ, ¡ma noyacha ina aꞌshinquën nipiranhuëꞌ, nicaponco huëꞌnan paya!

⁴⁴ Quëma nontohuatancora, aꞌnaroáchin huaꞌhuahuëntaꞌ yoꞌnamëhuëquë toꞌmo toꞌmótarin. Noya cancantaton, naporin.

⁴⁵ “Yosë noꞌtëquën nontërinco,” tënanso marëꞌ inasoꞌ noya niꞌninquën. Shaꞌhuitërinquënso chachin acotarinquën, itërin Isapirari.

⁴⁶ Ina quëran Maria tapon: “Ma noyacha Tata Yosëso paya, tënahuë cantaꞌ.

⁴⁷ Anoyacancantërinco niꞌton, nóya cancantërahuë.

⁴⁸ Topinan piyapico nipirahuëꞌ, yonquirinco. Ipora quëran huarëꞌ naꞌa piyapiꞌsaꞌ nohuitarinaco. ‘Ma noyacha Yosëri catahuarin paya,’ tosapi.

⁴⁹ Yosësoꞌ yaꞌipi nanitaparin. Inasoꞌ nóya catahuarinco. Noya noya ninin.

⁵⁰ Iráca chinotopisopitantaꞌ nosororin. Ipora huantaꞌ ina chinotohuatëhuaꞌ, nosoroarinpoaꞌ.

⁵¹ Chiníquën nanantaton, nani maꞌsha ninin. Nocantopisopita atapanin.

⁵² Copirnoroꞌsantaꞌ co noyahuëꞌ nipachinara, ocoirin. Topinan piyapiꞌsaꞌ yaꞌhuërëꞌ noya acorin.

⁵³ Pahuantërinsopita catahuarin nóya yaꞌhuëcaiso marëꞌ. Maꞌhuanoꞌsaso nipirinhuëꞌ, topinan aꞌparin.

⁵⁴ Israiroꞌsaꞌ naꞌcon catahuarin. Piyapinënpita niꞌton, nosororin.

⁵⁵ Iráca Apraan nontaton, ‘Nosororanquën. Quëma shiparinpitantaꞌ nosoroato, catahuaarahuë,’ itërin Yosëri. Ina yonquiaton, ipora catahuarinpoa huachi,” tënin Maria.

⁵⁶ Cara yoqui pochin inaquë yacapatërin. Ina quëran yaꞌhuërinꞌpaꞌ paantarin.

Coansha Paotista nasitërinsoꞌ

⁵⁷ Isapira nani tahuërinën nanihuachina, huairin. Quëmapiaꞌhuaya huairin.

⁵⁸ Quëmopinënpita, yaꞌcariya yaꞌhuëpisopita, inapita natantopi. “¡Ma noya Yosëri catahuarin niꞌton, noya huairin! taꞌtonaꞌ,” nóya cancantopi.

⁵⁹ Huaꞌhuasha posa tahuëritohuachina, marca yaacotopi. “Niapoquëꞌ. Sacariasë itëquëꞌ,” itopi aꞌnaquëni.

⁶⁰ Aꞌshinso nipirinhuëꞌ, co nohuantërinhuëꞌ. —Coansha itarai, tënin.

⁶¹ —Ama nisha nininën acotëquësohuëꞌ. Quëmopinënáchin apoquëꞌ. Ina noya, itopi.

⁶² Ina quëran paꞌpin ipora huantaꞌ nëꞌhuë niꞌton, imirin quëran tasatopi nininën nitotacaiso marëꞌ.

⁶³ Paꞌpinsoꞌ quirica maꞌpatahuaton, ninshitërin. “Coansha itarahuë,” tënin ninshitaton. Ina nicatonaꞌ: “¡Maꞌpitacha yonquirin paya!” topi.

⁶⁴ Naporoꞌ nëꞌhuërinsoꞌ inquirahuaton, aꞌnaroáchin noantarin huachi. “¡Ma noyacha Tata Yosësoꞌ niꞌton, catahuarinco paya!” tënin.

⁶⁵ Ina niꞌsahuatonaꞌ, piyapiꞌsaꞌ paꞌyanpi. Yaꞌipi Cotia parti nanan nahuinin.

⁶⁶ Ina natanatonaꞌ, yonquiapi. “¿Maꞌtaꞌ onpoapon iso huaꞌhuasha niꞌton, ipora quëranchin Yosëri naꞌcon naꞌcon catahuararin?” topi.

Sacariasë ninorinsoꞌ

⁶⁷ Ina quëran Ispirito Santori noyá yaꞌcoancantohuachina, Sacariasëntaꞌ tapon:

⁶⁸ “¡Ma noyacha Tata Yosësoꞌ huaꞌanëntërinpoa paya! Piyapinënpitanpoaꞌ yonquiatonpoaꞌ, nichaꞌësarinpoaꞌ.

⁶⁹ Ina nohuanton, Tata masho Tapi shiin chachin nichaꞌësarinpoaꞌ. Inasoꞌ chini chiníquën nanantapon.

⁷⁰ Iráca quëran huarëꞌ pënëntonaꞌpiroꞌsaꞌ ninopi. Yosë nohuanton, shaꞌhuitërinënpoaꞌ:

⁷¹ ‘Aꞌna tahuëri nichaꞌësaranquëmaꞌ. Co huachi inimicoroꞌsaꞌ minsëarinënquëmahuëꞌ. Noꞌhuipirinënquëmahuëꞌ, nichaꞌësaranquëmaꞌ,’ tënin Yosë, topi.

⁷² Iráca shimashonënpoapita nosoroaton, naporin. Ipora huantaꞌ nosororinpoaꞌ. Shaꞌhuitërinsoꞌ co Yosëri naniantërinhuëꞌ.

⁷³ Tata masho Apraan shaꞌhuitërinsoꞌ yonquirárin.

⁷⁴ Napoaton nichaꞌësarinpoaꞌ. Co huachi inimiconënpoapitaꞌ minsëarinënpoahuëꞌ. Ina quëran co tëꞌhuatatëhuahuëꞌ, Yosë chinotarihuaꞌ.

⁷⁵ Ina pochin cancantatëhuaꞌ, inasáchin chinotarihuaꞌ. Chiminaquë huarëꞌ nóya nisarihuaꞌ.

⁷⁶ Quëmantaꞌ, conpa, Yosë aꞌpaarinquën piyapinënpita pënënacaso marëꞌ. Sinioro isoroꞌpaquë yaoꞌmarin niꞌton, pënëntaran piyapiꞌsari natëcaiso marëꞌ.

⁷⁷ Yosë piyapinënpita itapon: ‘Oshanëmaꞌ inquitatënquëmaꞌ, Sinioro anoyacancantarinquëmaꞌ,’ itaran.

⁷⁸ Yosë nosoroatonpoaꞌ, inápa quëran aꞌpintimarinpoaꞌ. Piꞌi aꞌpintërinpoaso pochin noꞌtëquën anitotërinpoaꞌ.

⁷⁹ Tashinan pochin cancantopirëhuahuëꞌ, aꞌpintatë pochin nitarinpoaꞌ noya nanpicaso marëꞌ. Anoyacancantohuachinpoaꞌ, sano cancantarihuaꞌ,” tënin Sacariasë.

⁸⁰ Ina quëran huiꞌninsoꞌ soꞌsorahuaton, huiꞌnapitarin huachi. Yosë yonquiarin niꞌton, chiníquën cancantarin. Inotëro parti yaꞌhuëárin. Ina quëran oshaquëran Yosëri shaꞌhuitërin israiroꞌsaꞌ pënënacaso marëꞌ.