Levítico 23 - Chayahuita (Shahui)

Niyontonacaiso tahuëriꞌsa

¹ Siniorori Moisësë nontaton itapon:

² “Isontaꞌ, israiroꞌsa camaitërahuëso shaꞌhuitëquëꞌ: Nisha nisha yoquiquë, nisha nisha tahuëri nani huayonahuë. Canpita niyontonatomaꞌ, casáchin chinotamacoso marëꞌ huayonahuë. Ina tahuëriꞌsa nohuitatomaꞌ: ‘Sinioro marëꞌ niyontonëhuaso tahuëriꞌsaꞌ,’ tosaramaꞌ.

³ Nani simanaquë saota tahuëri sacataramaꞌ. Tahuëririnquëso nipirinhuëꞌ, co sacataramahuëꞌ. Ina tahuëri noya nicatoma chinotaramaco. Naporo tahuëri chinotamacoso marëꞌ niyontonaramaꞌ. Insëquë tëranta yaꞌhuëpatamaꞌ, naporo tahuëri chinotamacoso marëꞌ chinotaramaꞌ.

⁴ Isopita tahuëriꞌsantaꞌ, noya nicatoma chinotaramaco. Naporo niyontonatomaꞌ, chinotoco:

⁵ Nani piꞌiquë canpita marëꞌ yaꞌnatiirinso yoqui nanihuachin, pascoa pita ca marëꞌ naꞌhuëaramaꞌ. Shonca catapini tahuëri nanihuachin iꞌhuanahuanquë, nispirataramaꞌ.

⁶ Tahuëririnquësoꞌ, pan co ahuëcatopisohuëꞌ capacaso pita caniaritaramaꞌ. Canchisë tahuëri ca yonquiatomaco ina pochin pan caꞌsaramaꞌ.

⁷ Ina pita caniaritërinso tahuëri chinotamacoso marëꞌ, niyontoanamaꞌ. Naporo tahuëri co sacataramahuëꞌ.

⁸ Canchisë tahuëriꞌsa chachin chinotamacoso marëꞌ, maꞌsha tëparahuatoma ahuiquitaramaꞌ. Ina pita nitiquirinso tahuërintaꞌ, chinotamacoso marëꞌ niyontoantaramaꞌ. Naporo tahuërintaꞌ, co sacataramahuëꞌ,” itërin Yosëri Moisësë nontaton.

Yaꞌnan cayarinsopita mapisoꞌ pita

⁹ Naquëranchin Siniorori Moisësë nontaantarin:

^10-11 “Israiroꞌsa shaꞌhuitëquëꞌ: Noꞌpaꞌ quëtaranquëmataquë yaꞌhuëhuatamaꞌ, sipata shaꞌnamaso cayahuachin, quëshico. Noya noyatërinsopita quëran yaꞌnan sëꞌtamo manamasoꞌ, corto huaꞌan quëtoncoꞌ. Inari chinoto tahuëri tahuëririnquë aꞌnotaponco. Aꞌnotohuachinco carinta israiroꞌsa noya niꞌsarahuë.

¹² Sipata sëꞌtamo aꞌnotëramacoso tahuëri chachin aꞌnara carniroaꞌhuanta aꞌna piꞌipitërinsoꞌ aꞌnotapomaco. Co máquën tëranta tëhuërinsohuëꞌ, aꞌnotapomaco. Corto huaꞌani ina tëparahuaton, chinotincoso marëꞌ, yaꞌipi ahuiquitapon.

¹³ Catapini quiro miria pochin noya noya sipata roꞌmonta quëshipomaco. Inasoꞌ, tomaquë ayontatoma taparamasoꞌ. Inantaꞌ, corto huaꞌani ca marëꞌ pimóchin ahuiquitarin. Ina aipi opocaso marëntaꞌ, cato tason pochin huino quësaramaꞌ.

¹⁴ Yaꞌipi inapita ca marëꞌ quënamasoꞌ, corto huaꞌani ahuiquitarin. Coꞌhuara inapochátërasohuëꞌ, co canpitaso ina sipata quëran pan nicatoma capamaso yaꞌhuërinhuëꞌ. Co iyanatoma tërantaꞌ, co nanpira tërantaꞌ, capamaso yaꞌhuërinhuëꞌ. Yaꞌipi ipora camairanquëmasopita, co canpitasáchin camairanquëmahuëꞌ. Shiparimapitantaꞌ, natëcaiso yaꞌhuërin. Insëquë tëranta yaꞌhuëpatamaꞌ, ina pochin nicacamaso yaꞌhuërin.

Trico nanquipisoꞌ pita

^15-17 Noya noyatërinsopita sipata sëꞌtamo aꞌnotëramacoso tahuëri, yonquicoꞌ. Chinoto tahuëri tahuëririnquë, corto huaꞌani ca marëꞌ ina ahuiquitarin. Inapotërinso tahuëri quëran, canchisë chinoto tahuëri pichisaramaꞌ. Tahuëririnquësoꞌ, aꞌnatërápo shonca tahuëri icanin. Naporoꞌ yaꞌhuëramaquë, nasha trico masaramaꞌ. Ina manama quëran, ca marëꞌ pan ninamasoꞌ, quëshipomaco. Iso pochin nisaramaꞌ: Trico roꞌmo noya noya nininsoꞌ quëran, cato pan ahuëpocatopinan nisaramaꞌ. Aꞌnaya aꞌnaya catapini quiro quëꞌninsoꞌ. Yaꞌnan nitërinsopita noya noyatërinsoꞌ quëran, ca marëꞌ nicapomaꞌ.

¹⁸ Inapitarë chachin isopitantaꞌ, quësaramaꞌ: Canchisë carniroaꞌhua aꞌna piꞌipitopisoꞌ co máquëna tëranta tëhuërinsohuëꞌ quësaramaꞌ. Aꞌna toroaꞌhua, cato carniroaꞌhua, inapitanta quësaramaꞌ. Inapitasoꞌ corto huaꞌani tëparahuaton ca marëꞌ pimóchin yaꞌipi ahuiquitarin. Inapitarë chachin trico roꞌmoꞌ, huino, inapitanta quëshiaramaco.

¹⁹ Naporo chachin aꞌnara chipo tëpaarin oshanëma marëꞌ. Nanan anoyatërëhuaso marëꞌ nininsontaꞌ, cato carniroaꞌhua aꞌna piꞌipitërinsoꞌ tëpapon.

²⁰ Nani tëparahuaton corto huaꞌani, inapita ofrenda huënshopinan aꞌnotaponco. Panoꞌsa nasha trico quëran ninamasorë chachin aꞌnotaponco. Inapitasoꞌ ca marëꞌ quënama niꞌton, corto huaꞌanquën nisarin.

²¹ Naporo tahuëri chachin canpitantaꞌ, niyontonatoma chinotaramaco. Co manta sacatamaso yaꞌhuërinhuëꞌ. Ipora camairanquëmasopita, co canpitasáchin camairanquëmahuëꞌ. Shiparimapitantaꞌ, natëcaiso yaꞌhuërin. Insëquë tëranta yaꞌhuëpatamaꞌ, ina pochin nicacamaso yaꞌhuërin.

²² Sharoꞌsa nitërinsoꞌ macacaso nanihuachin, ama naniarin quëran huarëꞌ macosohuëꞌ. Piꞌpian piꞌpian quëparitërinsopita, ama oshatocosohuëꞌ. Saꞌahuaroꞌsaꞌ, nisharoꞌsaꞌ, inapita marëꞌ acotocoꞌ. Caso Yosëco napotaranquëma niꞌton, natëco,” itërin.

Tronpitaroꞌsa pihuipiso pita

²³ Naquëranchin Siniorori Moisësë itaantapon:

²⁴ “Isontaꞌ camaitërahuësoꞌ, israiroꞌsa shaꞌhuitëquëꞌ: Pascoa yoqui naꞌhuërin quëran huarëꞌ, saota yoqui pichisaramaꞌ. Canchisë nanicaso marëꞌ caniaritërinso tahuëri chachin chinotaramaꞌ. Nani piꞌiquë naporo tahuëri yonquiamacoso marëꞌ niyontoanamaꞌ. Tronpitaroꞌsa pihuitoma niyontoanamaꞌ.

²⁵ Naporo tahuëri chinotamacoso marëꞌ corto huaꞌani maꞌsha tëpaton ahuiquitarin. Co manta sacatamaso yaꞌhuërinhuëꞌ,” itërin.

Nanan anoyatacaso tahuëri

²⁶ Naquëranchin Siniorori Moisësë itaantapon:

²⁷ “Isontaꞌ camaitërahuësoꞌ, israiroꞌsa shaꞌhuitëquëꞌ: Tronpitaroꞌsa pihuipisoꞌ pita yoquiquë chachin, shonca tahuëri nanihuachin, nanan anoyatacaso tahuëri nisarin. Naporoꞌ co coshatatomarahuëꞌ, chinotamacoso marëꞌ niyontoanamaꞌ. Naporoꞌ chinotamacoso marëꞌ, corto huaꞌani maꞌsha tëparinsoꞌ ahuiquitarin.

²⁸ Nanan anoyatacaso tahuëri niꞌton, co manta sacatacaso yaꞌhuërinhuëꞌ. Naporo tahuëri oshanëma inquitaranquëmaꞌ.

²⁹ Inso tëranta naporo tahuëri coshatohuachin, yaꞌhuërama quëran ocoiaramaꞌ.

³⁰ Inapochachin naporo tahuëri sacatohuachinantaꞌ, cari chachin ataꞌhuantarahuë huachi.

³¹ Ama naporo tahuëri manta sacatocosohuëꞌ. Ipora camairanquëmasopita, co canpitasáchin camairanquëmahuëꞌ. Shiparimapitantaꞌ, natëcaiso yaꞌhuërin. Insëquë tëranta yaꞌhuëpatamaꞌ, ina pochin nicacamaso yaꞌhuërin.

³² Canpitaso naporo tahuëri ca yonquiatomaco co coshatatomarahuëꞌ, chinotaramaco. Iscon tahuëri nanihuachin iꞌhuanahuanquë iso pita caniaritarin. Tahuëririnquë iꞌhuaraya huarëꞌ nitiquiarin,” itërin.

Imënamëroꞌsa pita

^33-34 Naquëranchin Siniorori Moisësë itaantapon: “Isontaꞌ camaitërahuësoꞌ, israiroꞌsa shaꞌhuitëquëꞌ: Nanan anoyatacaso tahuëri yoquiquë chachin shonca aꞌnatërápo tahuëri nanihuachin, imënamëroꞌsa pita naꞌhuëaramaꞌ. Canchisë tahuëri ca yonquiatomaco pita nisaramaꞌ.

³⁵ Caniaritërinso tahuëri niyontonatoma chinotaramaco. Ama manta naporo tahuëri sacatocosohuëꞌ.

³⁶ Canchisë tahuëri chachin corto huaꞌani maꞌsha tëpapisoꞌ, ca marëꞌ ahuiquitarin. Nani canchisë tahuëri naꞌhuëpachin, tahuëririnquëso niyontoantarahuatoma chinotaramaco. Naporonta maꞌsha tëpapisoꞌ, corto huaꞌani ca marëꞌ ahuiquitarin. Naporonta pita tahuëri niꞌton, co manta sacatamaso yaꞌhuërinhuëꞌ.

^37-38 Inapita pitaroꞌsaquë, yonquiaramaco: ‘Sinioro chinotacaso tahuëriꞌsaꞌ,’ tosaramaꞌ. Naporo tahuëriꞌsa ca marëꞌ ofrenda quënamasoꞌ ahuiquitaramaꞌ. Oshanëma marëꞌ maꞌsha quënamasosoꞌ, yaꞌipi ahuiquitaramaꞌ. Trico, sipata, inapita noꞌmoquëontaꞌ, ca marëꞌ quësaramaꞌ. Nanan anoyatërëso marëꞌ nininsontaꞌ, maꞌsha quëshipomaco. Huinonta ofrenda quëcacasoꞌ nininsoꞌ, inanta quësaramaꞌ. Nisha nisha pitaquë quëcamasoꞌ nininsoꞌ quësaramaꞌ. Naporahuaton nani simanaquë chinoto tahuëriꞌsa nanihuachin, chinotamacoso yaꞌhuërin. Maꞌsona tëranta quëtamacosoꞌ shaꞌhuitohuatamaco, quëcatoma aꞌnotamacoso yaꞌhuërin. Canpitaora yonquinëma quëraonta ofrenda yaquëtohuatamaco, quëshitomaco aꞌnotaramaco.

³⁹ Nanan anoyatacaso tahuëri yoquiquë chachin shonca aꞌnatërápo tahuëri nanihuachin, canchisë tahuëri pita nisaramaꞌ. Trico nani nanquiramaso piquëran, chinotamacoso marëꞌ inapoaramaꞌ. Caniaritërinso tahuëri chinotatomaꞌ, yonquiaramaco. Nitiquirinso tahuëririnquënta chinotatomaꞌ, yonquiantaramaco.

⁴⁰ Caniaritërinso tahuëri, sharoꞌsa noya noyatërinsopita nitërinsoꞌ masaramaꞌ. Palmeraroꞌsa monoquëntaꞌ, masaramaꞌ. Panca taꞌan nara sëꞌpaquëontaꞌ, masaramaꞌ. Iꞌ yonsanquë huanirinsopita aramo nara itopisoꞌ sëꞌpaquëonta masaramaꞌ. Inapita quëran imënamëtatomaꞌ, chinotamacoso huayonahuëquë canchisë tahuëri ca yonquiatomaco nóya cancantaramaꞌ.

⁴¹ Pascoa yoqui naꞌhuërin quëran huarëꞌ canchisë yoquitapasoꞌ, nani piꞌiquë ca marëꞌ pita nisaramaꞌ. Canchisë tahuëri niyontonatoma chinotaramaco. Ipora camairanquëmasopita, co canpitasáchin camairanquëmahuëꞌ. Shiparimapitantaꞌ, natëcaiso yaꞌhuërin.

⁴² Ina canchisë tahuëriꞌsa chachin canpitaso israiroꞌsanquëmaꞌ, chinotatomaco imënamëroꞌsaquë yaꞌhuëaramaꞌ.

⁴³ Ca Sinioroco Iquipito quëran ocoiranquëmaꞌ. Inotëro parti quëcaponquëmaꞌ, imënamëroꞌsaquë ichiyaꞌhuëranquëmaꞌ. Yaꞌipi shiparimapitanta nitotacaiso marëꞌ ina pita naꞌhuëaramaꞌ,” itërin.

⁴⁴ Siniorori napotërinso chachin Moisësëri israiroꞌsaꞌ, shaꞌhuitërin. Nisha nisha tahuëriꞌsaquë, nisha nisha pita Sinioro yonquiatonaꞌ, noya naꞌhuëcaiso marëꞌ shaꞌhuitërin.