Levítico 19 - Chayahuita (Shahui)

Noya nicacaiso marëꞌ pënëninsopita

¹ Naquëranchin Siniorori Moisësë nontaton itapon:

² “Apira napotaranquënsoꞌ, yaꞌipi israiroꞌsa shaꞌhuitëquëꞌ: Caso Yosëco noyasáchin ninahuë. Napoaton canpitantaꞌ, noyasáchin nicoꞌ.

³ Tatama noya nicatoma natëcoꞌ. Mamamanta natëcoꞌ. Chinoto tahuëri shaꞌhuitëranquëmasoꞌ noya nicatoma chinotocoꞌ. Caso Yosëco napotaranquëma niꞌton, natëco.

⁴ Ama mamanshi chinotocosohuëꞌ. Ama huaꞌna asoquirama quëran mamanshi ca pochin chinotamaso marëꞌ nicosohuëꞌ. Caso Yosëco napotaranquëma niꞌton, natëco.

⁵ Nanan anoyatërëhuaso marëꞌ chinotatomaco, maꞌsha tëpahuatamaꞌ, noya cancantatoma inapocoꞌ. Noya niꞌinquëmaꞌ.

⁶ Maꞌsona ina marëꞌ tëparamasoꞌ noshinën, naporo tahuëri chachin capamaso yaꞌhuërin. Tahuëririnquënta noya capacaso niponahuëꞌ, ina tashirayasoꞌ, ahuiquitamaso yaꞌhuërin.

⁷ Inapotamaso nipirinhuëꞌ caꞌpatamaꞌ, maꞌsha tëparamaso co huachi noya niꞌsarahuëꞌ.

⁸ Inso tëranta ina caꞌpachin, anaꞌintaꞌhuaso yaꞌhuërin. Ca marëꞌ nininsoꞌ co tëꞌhuatërinhuëꞌ niꞌton, yaꞌhuërama quëran ocoicamaso yaꞌhuërin.

⁹ Sharoꞌsa nitërinsoꞌ macacaso nanihuachin, ama naniarin quëran huarëꞌ macosohuëꞌ. Piꞌpian piꞌpian quëparitërinsopita, ama oshatocosohuëꞌ.

¹⁰ Oparonëmanta nitërinsoꞌ, ama naniarin quëran huarëꞌ macosohuëꞌ. Shitatërinsopitanta ama oshatocosohuëꞌ. Saꞌahuaroꞌsaꞌ, nisharoꞌsaꞌ, inapita marëꞌ acotocoꞌ. Caso Yosëco napotaranquëma niꞌton, natëco.

¹¹ Ama ihuatocosohuëꞌ. Ama nonpincosohuëꞌ. Naporahuaton, ama ninonpintocosohuëꞌ.

¹² Ama Yoscoarëꞌ taꞌtomaꞌ, piyapiꞌsa nonpintocosohuëꞌ. Napohuatamaꞌ, co manta tëꞌhuatëramacosohuë pochin nisaramaꞌ. Ca Sinioroco napotaranquëmaꞌ.

¹³ Ama ahuëton nicosohuëꞌ. Ama ahuëtatomaꞌ, aꞌnapita maꞌshanëna matocosohuëꞌ. Sacato catahuarinëmasopita, naporo tahuëri chachin pahuërëcoꞌ.

¹⁴ Ama nëꞌhuëyaroꞌsa co noyahuë yaꞌhuëcaiso marëꞌ, shaꞌhuitocosohuëꞌ. Ama iraquë somarayaroꞌsa iꞌpacaiso marëꞌ maꞌsha acotocosohuëꞌ. Ca Sinioroco napotaranquëmaꞌ.

¹⁵ Huaꞌanquëma nipatamaꞌ, noꞌtëquënáchin anaꞌintocoꞌ. Saꞌhuaroꞌsa nisapirinhuëꞌ co noyahuëꞌ nipachinaꞌ, noꞌtëquën anaꞌintocoꞌ. Maꞌhuanoꞌsanta co noyahuëꞌ nipachinaꞌ, noꞌtëquën anaꞌintocoꞌ.

¹⁶ Ama nanan paꞌyatocosohuëꞌ. Aꞌna piyapi yatëparahuachinaꞌ, ama catahuatëquësohuëꞌ. Ca Sinioroco napotaranquëmaꞌ.

¹⁷ Aꞌna piyapi tëhuëtohuachinquën, ama cancanën quëran noꞌhuiráquësohuëꞌ. Aꞌna piyapi tëhuëhuachin, noꞌtëquën pënënamaso yaꞌhuërin. Co pënënpatanhuëꞌ, quëmarinta catahuaran oshahuanacasoꞌ.

¹⁸ Ama canpita capini ninoꞌhuitoma niiꞌhuërëtocosohuëꞌ. Canpitaora ninosororamaso pochachin aꞌnapitantaꞌ, nosorocoꞌ. Ca Sinioroco napotaranquëmaꞌ.

¹⁹ Ama topinan quëran pënënanquëmasopita, natancosohuëꞌ. Noꞌtëquën natëcoꞌ. Ama nisha pëꞌtahuaquë, pëꞌtahuanëma atoꞌquëtocosohuëꞌ. Shaꞌtohuatamaꞌ, ama ina iminquëráchin nisha nisha yaꞌpirin, shaꞌcosohuëꞌ. Aꞌmocamaso yanipatamaꞌ, ama nisha nisha quëran paꞌtocosohuëꞌ. Aꞌnaquësáchin paꞌtocoꞌ.

²⁰ Aꞌnaquën cosona nanon niꞌton, aꞌna quëmapiri macacaso marëꞌ nohuantërin. Nani anoyataponahuëꞌ, huaꞌanën quëran ocoicaso marëꞌ co pahuërëapichátërarinhuëꞌ. Napoaponahuëꞌ, aꞌnari ichihuëꞌërin nipachina, tëhuënaꞌpisoꞌ, tëhuërinso marëꞌ topinan pahuërëtapon. Onposona pahuërëtacaso shaꞌhuitohuachinaꞌ, pahuërëtapon. Co tëpacaiso yaꞌhuërinhuëꞌ. Ina cosonasoꞌ, paꞌanatona huaꞌanëntopi niꞌton, co tëpaponahuëꞌ.

²¹ Oshanën inquicaso marëꞌ tëhuënaꞌpisoꞌ, aꞌnara carniro quëcapon. Chinotëramacoso nëꞌmëtë pëiꞌ, yaꞌcoananënquë huarëꞌ quësarin.

²² Ina carnirosoꞌ, tëhuënaꞌpi oshanën marëꞌ tëparapi. Inapotohuachinaꞌ, corto huaꞌan ina marëꞌ nontarinco niꞌton, oshanën inquitarahuë.

²³ Noꞌpaꞌ quihuitëranquëmaquë yaꞌconpatamaꞌ, nisha nisha huayoroꞌsa shaꞌsaramaꞌ. Nitohuachinaꞌ, co aꞌnaroáchin iroaramahuëꞌ. Cara piꞌipi nitërinsoꞌ, piyapi co marcahuanhuë pochin nitaramaꞌ.

²⁴ Catapini piꞌinquësoꞌ yaꞌipi nitërinsoꞌ ca marëꞌ acoaramaꞌ. Naporoꞌ chinotatomaco, capa cancantaramaꞌ.

²⁵ Aꞌnatërápo piꞌipinquë tëhuënchinsoꞌ, noya huachi iroaramaꞌ. Inapohuatamaꞌ, shanëma naꞌcon naꞌcon nitapon. Caso Yosëco napotaranquëma niꞌton, natëco.

²⁶ Maꞌsha capamaso marëꞌ tëpahuatamaꞌ, huënainën noyá inquicoꞌ. Ama aniꞌtacaso marëꞌ pënotonquë pacosohuëꞌ. Ama pënotatoma aꞌna tahuëri maꞌsona onpocaiso shaꞌhuicamaso nohuantocosohuëꞌ.

^27-28 Nichimiantohuatamaꞌ, ama canpitaso niyaꞌitocosohuëꞌ. Co shinoratë tëranta yaquicaso yaꞌhuërinhuëꞌ. Co máquëma tëranta ina marëꞌ niyanocamaso yaꞌhuërinhuëꞌ. Naporahuaton ama nonëmaquë marca pochin, maꞌsha nonancosohuëꞌ. Ca Sinioroco napotaranquëmaꞌ.

²⁹ Ama huiꞌnama sanapi nininsoꞌ, mamanshi marëꞌ monshihuainasohuëꞌ. Ama inapotatoma yaꞌhuëramaso noꞌpaꞌ tapicosohuëꞌ.

³⁰ Chinoto tahuëri shaꞌhuitëranquëmasoꞌ, noya nicatoma chinotocoꞌ. Chinotëramacoso nëꞌmëtë pëintaꞌ, noya niꞌcoꞌ. Caso Sinioroco napotaranquëmaꞌ.

³¹ Ama chimipiroꞌsa përahuaꞌyancosohuëꞌ. Ama pënotonquë maꞌsha nitotacaso marëꞌ pacosohuëꞌ. Ina pochin nipatamaꞌ, amirotochináchin nisaramaꞌ. Caso Yosëco napotaranquëma niꞌton, natëco.

³² Mashoyaroꞌsaꞌ, paiyaroꞌsaꞌ, inapita noya niꞌquëꞌ. Huëꞌpachinaꞌ, huanirahuaton noya nontëquëꞌ. Canta tëꞌhuatatomaco, noya niꞌco. Ca Sinioroco napotaranquëmaꞌ.

^33-34 Nisharoꞌsa yacapahuachinquëmaꞌ, ama aparisitocosohuëꞌ. Canpita capini pochachin nicatomaꞌ, nosorocoꞌ. Iquipitoquë canpitantaꞌ, nisharoꞌsa pochin nicatoma yacapatëramaꞌ. Ina yonquicoꞌ. Caso Yosëco napotaranquëma niꞌton, natëco.

³⁵ Ama ihuatamaso marëꞌ aꞌnitiinanoꞌsaꞌ, pëꞌtënanoꞌsaꞌ, inapita tapicosohuëꞌ: Naporopitërinso aꞌnicasoꞌ, quëquëninsoꞌ pëꞌtënacasoꞌ, noꞌhuiquën aꞌnicasoꞌ, inapita ama tapicosohuëꞌ.

³⁶ Noꞌtën pëꞌtënanquë pëꞌtëncoꞌ. Naꞌcon pëꞌtëna marëꞌ nininsoꞌ, noꞌtëquënáchin acotocoꞌ. Naporopitërinsoꞌ, pancanatërinsoꞌ, inapitanta noꞌtëquën aꞌnicoꞌ. Caso Yosëco Iquipito quëran ocoiranquëma niꞌton, natëco.

³⁷ Yaꞌipi pënënanquëmasopita, yaꞌipi camairanquëmasopita, inapita natëcoꞌ. Ca Sinioroco napotaranquëma niꞌton, natëco,” itërin.