Jueces 8 - Chayahuita (Shahui)

Matian copirnoroꞌsa Quitionori maninsoꞌ

¹ Iprain huënton sontaroꞌsasoꞌ noꞌhuitatonaꞌ, Quitiono chiníquën nontopi: “Matianoꞌsa ahuëcaso yonquiaponahuëꞌ: ¿Onpoatonta quiyanta amatërancoi catahuarainquënhuëꞌ?” itopi.

² Napotohuachinara, inariso itapon: —¡Canpita mini tëhuënchinsoꞌ cá quëran naꞌcon naꞌcon pochin ahuëtëramaꞌ! Quiya mini caniaritopiraihuëꞌ, canpitaso naꞌcon naꞌcon pochin ahuëtëramaꞌ.

³ Matian huaꞌanoꞌsa Oripi, Sipi, inapita nipirinahuëꞌ, Sinioro catahuarinquëma niꞌton, minsëramaꞌ. Caso co ina pochin ninahuëꞌ, itërin. Ina natanatona Iprain sontaroꞌsasoꞌ, noꞌhuitopisoꞌ sanoatona copi topi huachi.

⁴ Quitionosoꞌ, cara pasa sontaronënpitarë chachin Cortaniiꞌpaꞌ camapi. Inimicoroꞌsa imasápatona paꞌpi canotaponaraihuëꞌ, pëntoantapi.

⁵ Socotoquë canconpachinara, yaꞌhuëhuanoꞌsa itapon: —Yosë marëꞌ maꞌsha tëranta sontaronëhuëpita aꞌcacoꞌ. Matian copirnoroꞌsa Sipa, Saromona, inapita itopisoꞌ imasápatoi paꞌpi canotërai. Napoaton aꞌcaco topirahuë, itërin.

⁶ Napotopirinhuëꞌ, ninano huaꞌanoꞌsariso itaponaꞌ: —Sipa, Saromona, inapita nani manama naporini, sontaronënpita aꞌcaitoihuëꞌ, itopi.

⁷ —Sinioro catahuararinco inapita masarahuë. Mapato, huënantararahuë. Huënantahuato inotëroquë nahuanoꞌsaꞌ, ihuatatëroꞌsaꞌ, inapita mariapo. ¡Inapitaquë oquërëpiaranquëmaꞌ! itërin Quitionori.

⁸ Ina quëran Pinoiro ninanoquë paꞌpi. Inaquënta Socotoquë natantërinso chachin nataantarin. Natantopirinhuëꞌ, inahuanta Socotoroꞌsa aꞌpanitopiso pochachin aꞌpanitaantapi.

⁹ Napoaton Quitionori itapon: —Inimicoroꞌsa minsërahuë quëran huënantahuato, iso torinëma ohuatarahuë, itërin.

¹⁰ Sipa, Sarmona, inapitasoꞌ, Caracoro ninano itopiquë yaꞌhuërapi. Shonca aꞌnatërápo huaranca sontaronënapitarëꞌ inaquë nisapi. Inaíchin quëparitopi. Nani pasa cato shonca huaranca sontaroꞌsa chiminpi.

¹¹ Inotëro intontaquëchin ira paꞌninsoꞌ Quitionosoꞌ paꞌtërin. Nopa, Copia, inapita ninanoroꞌsa piꞌi pipirinso parti quëran acorahuaton, sontaronënpitarë chachin inimicoroꞌsa imarin. Nincantoonahuaton ahuërin. Co manta yonquiasoihuëꞌ, ahuërin.

¹² Napotohuachinara, Sipa, Sarmona, inapitaso taꞌapi. Taꞌapirinahuëꞌ, Quitionori sontaronënpitarë chachin imapi. Imatona cato chachin mapi. Napohuachinara yaꞌipi Matian sontaroꞌsa paꞌpi paꞌyanpi.

¹³ Quitionosoꞌ sontaronënpitarë chachin matianoꞌsa ahuërahuatona tahuërëantapi. Iris motopitaëchin huënantapi.

¹⁴ Inaquë aꞌnara huiꞌnapi Socoto ninanoquë yaꞌhuërinsoꞌ, manin. Ina masahuaton naꞌcon natanin. Natanpachina, inariso Socoto huaꞌanoꞌsaꞌ, ansianoroꞌsaꞌ, inapita nininënpita ninshitahuaton quëtërin. Canchisë shonca canchisë nininënpita ninshitërin.

¹⁵ Nani quëtohuachina Quitionosoꞌ Socoto ninanoquë paꞌnin. Inaquë yaꞌhuëhuanoꞌsa ayontonahuaton itapon: —Iꞌhua naꞌhuëpoi, sontaronëhuëpita canotatona tanapi. Ina marëꞌ cosharo natanpatënquëmara: ¿Apiratëramaco pora? “Sipa, Saromona, inapita nani manama naporini, sontaronënpita aꞌcaꞌitoihuëꞌ,” tënamaꞌ. Nocanatomaco napopiramahuëꞌ: ¡Maꞌtana cato chachin quënai! itërin.

¹⁶ Itahuaton, inotëroquë nahuanoꞌsaꞌ, ihuatatëroꞌsaꞌ, inapita maririnso manin. Inaquë Socoto ansianoꞌsa nohuantaso anaꞌintërin.

¹⁷ Naporahuaton Pinoiro ninanoquë tori yaꞌhuërinsonta ohuatërin. Yaꞌhuëhuanoꞌsanta tëparin.

¹⁸ Ina quëran Quitionosoꞌ Sipa, Sarmona inapita natanin: —Taporo motopiquë quëmapiꞌsa tëparamasoꞌ: ¿Onpopinta niꞌtopi? itërin. —Quëma pochachin niꞌtopi. Copirno huiꞌninpita pochin aꞌnaya aꞌnaya niꞌtopi, itopi.

¹⁹ Napotohuachinara: —¡Iya mashoroꞌsa napotëramaꞌ! Coꞌsoꞌ tëparamahuëꞌ naporini, Yoscoarëꞌ co carimantaꞌ, ipora tëpaꞌitënquëmahuëꞌ, itërin chiníquën nontaton.

²⁰ Napotahuaton huiꞌnin paninansoꞌ camairin: —Quitiri: ¡Pashi taꞌton isopita tëpaquëꞌ! itërin. Paꞌpini napotopirinhuëꞌ, inaso huaꞌhua niꞌton, co inapita tëpacaso nohuantërinhuëꞌ.

²¹ Napohuachina, inapitasoꞌ Quitiono itaponaꞌ: —¡Quëma chachin nipachin tëpacoi! ¡Quëmapisoꞌ, chiníquën cancantërin quëran nohuitërëꞌ! itopi. Napotohuachinara, inari chachin tëparin huachi. Inapotahuaton camiyonënapita tapatona apëꞌpëconotopisoꞌ, matërin.

²² Ina piquëran israiroꞌsari Quitiono itaponaꞌ: —Matianoꞌsa huaꞌanëntápirinpoahuëꞌ, quëma inapita quëran nichaꞌërancoi. Inapotërancoi niꞌquëhuarëꞌ, quëma huachi copirnonëhuëi niquë. Quëmá quëran pipipisopitanta huaꞌanënchincoi topiraihuëꞌ, itopi.

²³ Inariso napoaponahuëꞌ, itapon: —Co carima huaꞌanëntaranquëmahuëꞌ. Co huiꞌnahuëpita tëranta huaꞌanëntiinquëmaso yaꞌhuërinhuëꞌ. Sinioro chachin huaꞌanëntarinquëmasoꞌ.

²⁴ Pëꞌtëhuëratëroꞌsa inimico osërëtëramasoꞌ tëhuënchinsoꞌ quëshico, itërin. (Inimico sontaroꞌsasoꞌ inotëro parti yaꞌhuëpi. Ina niꞌtonaꞌ, inanpi pëꞌtëhuëratëroꞌsa oro quëran pëꞌtënpi.)

²⁵ Napotohuachina, aꞌnara aꞌmopiso huëtopi. Inaquë pëꞌtëhuëratëroꞌsa mapisoꞌ acopi. Acorahuatona itaponaꞌ: —Maꞌtana huachi maquëꞌ, itopi.

²⁶ Yaꞌipi quëtopisoꞌ shonca iscon quiro pochin quëꞌnin. Matian copirnoroꞌsa matopisopitantaꞌ, quëtopi: Nisha nisha nitapapisopita oro quëran nipisoꞌ, cani nëꞌmëtëroꞌsa paꞌton nipisopita, camiyonënapitanta apëꞌpëconotopisoꞌ, inapita quëtopi. Inapitasoꞌ co pëꞌtënpihuëꞌ.

²⁷ Ina oro asoquirahuaton Quitionosoꞌ aꞌnara corto huaꞌan cotonën pochin ninin. Inasoꞌ coton ipoto itopi. Ina nisahuaton ninanonën Opra itopiquë acorin. Inasáchin paꞌyatatona yaꞌipi israiroꞌsasoꞌ, co huachi Sinioroíchin paꞌyatopihuëꞌ. Ina moshaton Quitionontaꞌ, quëmopinënpitarë chachin nisha cancantopi.

²⁸ Ina pochin israiroꞌsari matianoꞌsa canarahuatona atapanpi. Naporo quëran huarëꞌ inapitasoꞌ, co huachi israiroꞌsa ahuëcaiso yonquipihuëꞌ. Israiroꞌsaso Quitiono nanpisoꞌ, catapini shonca piꞌipi noya yaꞌhuëpi.

Quitiono chimininsoꞌ

^29-30 Quitionoso yaꞌhuërinquë paꞌsahuaton, pëinënquë yaꞌhuëantarin. Naꞌa saꞌinpita yaꞌhuëtërin niꞌton, canchisë shonca huiꞌninpita yaꞌhuëtërin.

³¹ Siquimo ninanoquëntaꞌ, aꞌnara cosonanën yaꞌhuëtërin. Inaquënta huiꞌnahuanpachina Apimirico itërin.

³² Quitionosoꞌ mashoya nicaquë huarëꞌ chiminin. Chiminpachina, ninanonën Opra itopiquë paꞌpitopi. Paꞌpincoꞌ Coasë itopisoꞌ paꞌpitopiquë chachin inantaꞌ, paꞌpitopi. Oprasoꞌ, Apisiro huëntonaꞌhua ninanonënaꞌ.

³³ Quitiono chimininso piquëran israiroꞌsasoꞌ, Sinioro aꞌpoantapi. Paaro mamanshi nisha nisha nonanpisoꞌ moshacaiso marëꞌ aꞌpopi. Napoatona mamanshi Paaro-piri itopiso naꞌcon naꞌcon moshacaiso marëꞌ huayonpi.

³⁴ Sinioroso Yosënëna nipirinhuëꞌ, ina naniantopi. Yaꞌipi inimiconënapita quëran nichaꞌëpirinhuëꞌ, naniantopi.

³⁵ Quiropaarorinta naꞌcon catahuapirinhuëꞌ, quëmopinënpita co nosoropihuëꞌ.