Jueces 7 - Chayahuita (Shahui)

Quitionori matianoꞌsa minsërinsoꞌ

¹ Quitionosoꞌ Quiropaaro toquitopi huachi. Inasoꞌ, yaꞌipi sontaronënpitarëꞌ aꞌcayan capayatopi. Paꞌsahuatonaꞌ, Aroto itopiquë pirayan chinotopi. Inaquë, noꞌpa quëran iꞌsha pipirinso yaꞌhuërin. Nëꞌmëtë pëinëna ótënatonaꞌ, chinotopi. Inaquë chinotatonaꞌ, matianoꞌsa yaꞌhuëquiapisoꞌ, pëtëtë parti acopi. Inapitasoꞌ, Mori itopiso motopianaquë yaꞌhuëquiapi.

² Naporoꞌ Siniorori, Quitiono itapon: “Notohuaroꞌ sontaroꞌsa quësaran. Ina nápo chachin ahuëtopiquë matianoꞌsa minsëamaso catahuahuatënquëmaꞌ, sontaronënpitasoꞌ nocantapi: ‘Co Yosë catahuapirincoihuëꞌ, quiyaora ahuëtatoi canatërai,’ tëcaponaꞌ.

³ Napoaton napotëquëꞌ: ‘Inquëmaso tëꞌhuahuatamaꞌ, yaꞌhuëramaquë panantacoꞌ,’ itëquëꞌ,” itërin. Quitionori tëniton napotohuachina, cato shonca cato huaranca sontaroꞌsa yaꞌhuëpiꞌpaꞌ panantapi. Shonca huarancaraꞌ, quëparitopi.

⁴ Inanaporaꞌ quëparitopirinahuëꞌ, Siniororiso itaantarin: “Naꞌcon chachin nisapi. Iꞌsha oꞌocaiso marëꞌ quëpaquëꞌ. Inaquë cari tëniarahuë. Ina piquëran shaꞌhuitaranquën inpitasona quëpamaso yaꞌhuërinsoꞌ,” itërin.

⁵ Napotohuachina quëparin. Inaquë Siniorori anitotërin: “Iꞌsha imirina quëran maiatona niꞌnira pochin oꞌopisopita, nisha acoquëꞌ. Isonpi quëran piꞌpaitahuatona oꞌopisopitantaꞌ, nisha acoquëꞌ,” itërin.

⁶ Iꞌsha imirina quëran maiatona niꞌnira pochin oꞌopisopitasoꞌ, cara pasa icanpi. Aꞌnapitaso nipirinhuëꞌ, piꞌpapiquëranchin oꞌopi.

⁷ Naporoꞌ Siniorori, Quitiono itapon: “Isopita cara pasa sontaroꞌsarëꞌco matianoꞌsa quëran nichaꞌësaranquëmaꞌ. Aꞌnapitasoꞌ, noya paꞌinaꞌ,” itërin.

⁸ Napotohuachina Quitionosoꞌ, inapita yaꞌhuëpiꞌpaꞌ aꞌparin. Coꞌhuara paꞌshátërasoihuëꞌ napoaponahuëꞌ, yonshanënaꞌ, carniro pomonënaꞌ, inapita maꞌparin. Cara pasa quëmapiꞌsa huayoninsopitarëáchin quëparitërin. Matianoꞌsa motopianaquë yaꞌhuëasoiꞌ, inapitaso motopiꞌpaꞌ chinotopi. Nëꞌmëtë pëinëna ótënatona chinotopi.

⁹ Naporo tashi Siniorori Quitiono camaiapon: “Huënsërahuaton matianoꞌsa ahuëcaso marëꞌ paꞌmaquëꞌ. Carinquën catahuaranquën inapita minsëamasoꞌ.

¹⁰ Napoaponahuëꞌ, ahuëtamaso tëꞌhuatohuatan, yaꞌhuëapiꞌpaꞌ paꞌmaquëꞌ. Piyapinën Pora itëransoarëꞌquën paꞌmaquëꞌ.

¹¹ Inaquë paꞌmahuatan maꞌsona nonpisoꞌ natanquëꞌ. Naporoꞌ chiníquën cancantaton, ahuëtaran huachi,” itërin. Napotohuachina, piyapinënë chachin inimicoroꞌsa yaꞌhuëapiꞌpaꞌ paꞌmarin. Aquë aquë aꞌpaitopisopita nisapiquë huarëꞌ yaꞌcariimapi.

¹² Matianoꞌsaꞌ, amaricoroꞌsaꞌ, piꞌi pipirinso parti yaꞌhuëroꞌsaꞌ, inapitaso motopianaquë yanquëquën yaꞌhuëquiapi. Sëquërëꞌ yaꞌconquirinso pochin niquipi. Camiyonënapitanta huaꞌhuayátërahuë niꞌton, inotëraꞌhuaya marë yonsanquë yaꞌhuërinso pochin naꞌapi.

¹³ Quitiono, Pora, inapitasoꞌ, aꞌpaitoroꞌsa yaꞌhuëapiquë yaꞌcaritiimapi. Sontaro capini huaꞌnapiso nishaꞌhuitasoiꞌ, yaꞌcariimapi. Aꞌnasoꞌ, tapon: —Poꞌpin huaꞌnarahuë taꞌa. Aꞌnara pan sipata quëran nipisoꞌ, motopi quëran tanapitimararin. Yaꞌhuëarëhuaquë canquimarahuaton, aꞌnara nëꞌmëtë pëi ohuanquimarin. Ohuanquimaton tëꞌyatërin, tënin.

¹⁴ Napotohuachina aꞌnariso itapon: —Huaꞌnaransoso nipirinhuëꞌ, Coasë huiꞌnin Quitiono sahuëninën quëran ahuëinpoasoꞌ, tapon huaꞌnaran. Yosëri ina, sontaronënpitarë chachin catahuararin niꞌton, matianoꞌsanpoa minsëarinënpoaꞌ, tënin.

¹⁵ Ninapotopisoꞌ natanahuaton, Quitionoso Yosë chinotërin. Ina quëran israiroꞌsa chinotapiquë panantarahuaton, camaitërin: —¡Pashi toco paꞌahuaꞌ! Sinioro catahuararinpoa niꞌton, matianoꞌsa minsëarihuaꞌ, itontarin.

¹⁶ Aꞌnaroáchin cara pasa sontaronënpita cara huënton acorin. Inapotahuaton carniro pomonoꞌsa quëtëraꞌpiarin. Yonsharoꞌsanta quëtërin. Inaanaquë yanatëtë iꞌchinpitopinan nani poꞌmopi.

¹⁷ Inapita quëtahuaton itapon: “Quiyaso matianoꞌsa yaꞌhuëapiso aquëtëran, paꞌsarai. Inaquë cancopato, maꞌsona ninahuëso chachin canpitanta nicoꞌ.

¹⁸ Ca pomontohuato, carëꞌ paꞌpisopitanta pomontaponaꞌ. Naporoꞌ canpitantaꞌ, matianoꞌsa tancapitërama quëran pomontahuatoma chiníquën: ‘¡yai!’ tocoꞌ: ‘¡Sinioro minsëarinquëmaꞌ! ¡Ina nohuanton Quitiononta minsëarinquëmaꞌ!’ tocoꞌ,” itërin.

¹⁹ Inapoaton Quitionosoꞌ pasa sontaronënpitarë chachin, inatohua canconin. Huancana tashi sontaroꞌsa aꞌpaitacaiso marëꞌ nani niyaꞌhuërëtasoi chachin canconpi. Naporoꞌ carniro pomonoꞌsa pihuirapi huachi. Yonsharoꞌsanta quëpapisoꞌ paꞌquiraꞌpiapi.

²⁰ Cara huëntonoꞌsa chachin carniro pomonoꞌsa pihuipi. Yonsharoꞌsanta paꞌquiraꞌpiapi. Ahuënanëna quëran yanatëtëroꞌsa iꞌchinpitopisoꞌ, sëꞌquëpi. Inchinanëna quëraonta pomonoꞌsa sëꞌquëpi. Naporahuaton chiníquën, yaitopi: “¡Pashitoco huachi quëtochinaꞌahuaꞌ! ¡Sinioro nohuanton minsëtarihuaꞌ! ¡Quitiononta ina nohuanton catahuarinpoaꞌ!” topi.

^21-22 Naporahuatonaꞌ, inahuaso inaquëranchin quëparitopi. Yaꞌhuërëꞌ matianoꞌsasoꞌ naní quëran, yaitërëꞌnachin taꞌarapi. Napoasoi cara pasa Israiro sontaroꞌsasoꞌ, carniro pomonëna pihuirápi. Naporoꞌ Sinioro nohuanton co taꞌapisopitasohuëꞌ, inahuara capini niahuërapi. Aꞌnaquënsoꞌ, pëꞌnatë parti taꞌapi. Aꞌnaquëontaꞌ, Piti-sita ninanoquë huarëꞌ canconpi. Inaso ninanoꞌ, Sirira ninanoquë ira paꞌninso parti yaꞌhuërin. Yaꞌhuërëꞌ aꞌnapitasoꞌ, Apiri-miora ninano noꞌpaꞌ maninquë huarëꞌ taꞌapi. Ina pirayan Tapata ninanonta yaꞌhuërin.

²³ Napohuachinara Quitionosoꞌ, aꞌnapita israiroꞌsa huëcacaiso marëꞌ comisionoꞌsa aꞌparin: Nipitari, Asiri, yaꞌipi Manasisi huënton, inapita huëcacaiso marëꞌ aꞌparin. Matianoꞌsa imatona tëpacaiso marëꞌ naporin.

²⁴ Iprain huënton noꞌpanën parti, yaꞌipi motopitontarinso parti, inaquëpitanta comisionoꞌsa aꞌparin. Inapitasoꞌ canconahuatonaꞌ, itaponaꞌ: “Paꞌmatoma canpitantaꞌ, matianoꞌsa ahuëmacoꞌ. Cortaniiꞌ pëntoshinanoꞌsaquënta toꞌshitëcoꞌ. Coꞌhuara inapitaꞌton pëntonarai. Pitapara ninanoquë huarëꞌ inapotëraꞌpiacoꞌ,” tënin Quitiono, itopi. Napotohuachina Iprain huënton sontaroꞌsasoꞌ, Quitiono naporinso chachin nipi.

²⁵ Naporahuatonaꞌ, inapitaso cato Matian huaꞌanoꞌsa mapi: Oripi, Sipi, inapita itopisoꞌ. Oripisoꞌ: “Oripi natëtë,” itopiquë tëpapi. Napoaton iso quirica ninshitasoco huarëntaꞌ, ina natëtësoꞌ, ina pochin nohuitapi. Yaꞌhuërëꞌ Sipintaꞌ. “Sipi opa toꞌpoinan,” itopiquë tëpapi. Inanta opa toꞌpoinan, iso quirica ninshitasoco huarëꞌ ina pochin nohuitapi. Iprainoꞌsaso matianoꞌsa imapiso tananpitatonaꞌ, Quitiono yaꞌhuëarinquë panantapi. Oripi, Sipi, inapita tëpapisoꞌ motëna quëpatopi. Cortaniiꞌ yonsanꞌpaꞌ yaꞌhuëarin niꞌton, inatohua quëpatopi.