Jueces 6 - Chayahuita (Shahui)

Israiroꞌsa catahuacaso marëꞌ Yosëri Quitiono acorinsoꞌ

¹ Israiroꞌsasoꞌ, co noyahuëꞌ niantapi. Siniorori chachin niꞌsápirinhuëꞌ, napoantapi. Napopiso marëꞌ Siniorori matianoꞌsa catahuarin niꞌton, israiroꞌsa minsëipi. Minsërahuatona canchisë piꞌipi huaꞌanëntopi.

² Huaꞌanëntatonaꞌ, naꞌcon naꞌcon israiroꞌsa aparisitopi. Napoatona inapitasoꞌ, matianoꞌsa tëꞌhuatatona naꞌpishinanoꞌsa nipi. Motopi naninoꞌsaquëntaꞌ, naꞌpipi. Sacaiꞌ pacacaso nininquëpita naꞌpipi.

³ Israiroꞌsa shaꞌtopisoꞌ nanitaso chachin matianoꞌsaꞌ, amaricoroꞌsaꞌ, piꞌi pipirinso parti yaꞌhuëroꞌsaꞌ, inapitari yáhuëcapaipi. Huëcapairahuatona ahuëipi.

⁴ Israiro noꞌpaquë huëꞌsahuatonaꞌ, shaꞌpisopita mapisoꞌ pëꞌyaquipi. Marë pancaiꞌ yaꞌcariꞌ, Casa parti itopi. Inaquë huarëꞌ pëꞌyaquipi. Napotopi niꞌton, israiroꞌsaso co manta capacaiso yaꞌhuëtopihuëꞌ. Ohuicaroꞌsaꞌ, ohuacaroꞌsaꞌ, moraroꞌsaꞌ, inapita quëran huarëꞌ matopi.

⁵ Nëꞌmëtë pëinënarë chachin huëꞌpi. Pëꞌtahuanënapitanta quëpi. Inapitarë chachin Israiro noꞌpaꞌ yaꞌcontatonaꞌ, yaꞌipi pëꞌyatopi. Camiyonënapitantaꞌ, huaꞌhuayátërahuë quëpi. Sëquërëꞌ yaꞌconquirinso pochin nipi.

⁶ Inapotopi niꞌton, israiroꞌsaso paꞌpi parisitopi. Napoin quëran catahuacaso marëꞌ Sinioro nontopi:

⁷ “Matianoꞌsa Sinioro aparisitarinacoi. Nosoroatoncoi nichaꞌëcoi,” itopi.

⁸ Napotohuachinara, aꞌnara pënëntonaꞌpi aꞌpatiirin. Inasoꞌ huëꞌsahuaton itapon: “Sinioro Israiroꞌsanpoa chinotërëhuaso naporin: ‘Canpita shimashonëmapitasoꞌ, Iquipito noꞌpaquë huaꞌanëntatona aparisitapirinahuëꞌ, cari ocoirahuë. Ina nitotëramaꞌ.

⁹ Co inahuasáchin Iquipito quëran ocoirahuëꞌ. Canpitantaꞌ, nisha nisha piyapiroꞌsa aparisitapirinënquëmahuëꞌ, nichaꞌëranquëmaꞌ. Canpita iso noꞌpaquë yaꞌconapoma pochin, inapitaso noꞌpanëna quëran aꞌparahuë. Inapita aꞌparahuato, noꞌpanëna quëtëranquëmaꞌ.

¹⁰ Caso Sinioroco. Yosënëmaco niꞌto, chinotëramaco. Amororoꞌsa noꞌpanënquë iporasoꞌ yaꞌhuëaramaꞌ. Inapitasoꞌ, nisha nisha mamanshiroꞌsa moshapi. Ama canpitaso inapita tëꞌhuatocosohuëꞌ, itëranquëmaꞌ. Napotopiranquëmahuëꞌ, canpitaso co natëramacohuëꞌ,’ tënin Sinioro,” itërin pënëntonaꞌpiri.

¹¹ Naporoꞌ Sinioro anquëninën oꞌmarin. Oꞌmarahuaton Opra ninanoquë paꞌnin. Ina yaꞌcariꞌ, aꞌnara insina nara yaꞌhuërin. Coasë itopisoꞌ noꞌpanënquë yaꞌhuërin. Ina insinasoquë huënsërin. Coasësoꞌ, Apisiro huëntonaꞌhua quëmapi. Inasoꞌ, aꞌnara huiꞌnin yaꞌhuëtërin Quitiono itërin. Naporo tahuëri inasoꞌ, trico toꞌnorarinsoꞌ paꞌtanayararin. Opa toꞌpoipiquë inapotarin. Ama matianoꞌsari quënanacaiso marëhuëꞌ naꞌpiton sacatarin.

¹² Inapoasoꞌ, Sinioro anquëninëni yaꞌnotahuaton itapon: —Quëmasoꞌ chiníquën mashonquën. Naporahuaton, chiníquën cancantëran. ¡Sinioro chachin catahuararinquën! itërin.

¹³ —¡Maꞌcha Sinioro napotaranquën paya! ¡Tëhuënchachin Sinioro catahuararincoi naporini, co poꞌsáitoihuëꞌ! Iráca shimashonëhuëipita Iquipito quëran ocoirin. Ocoicaso marëꞌ chiníquën nanantaton nani maꞌsha ninin. ¡Iporaso nipirinhuëꞌ co huachi inaporinhuëꞌ! Sinioro aꞌporahuatoncoi aparisitiincoiso marëꞌ matianoꞌsa catahuarin, itërin Quitionori.

¹⁴ Napotohuachina Siniorori niꞌsarin quëran itapon: —Matianoꞌsa aparisitarinquëmaꞌ. Napoaponahuëꞌ, quëmari inapita quëran quëmopinënpita nichaꞌëquëꞌ. Chiníquënquën niꞌton, nanitapapon. Carinquën chachin camaiaranquën, itërin.

¹⁵ Quitionoso napoaponahuëꞌ, naquëranchin taantapon: —¡Maꞌcha Sinioro napotaantaranquën paya! ¿Maquëcha israiroꞌsa nichaꞌërëꞌpoya? Yaꞌipi Manasisi huënton quëran, quiya huëntoaꞌhuayasoꞌ, naꞌcon popriyatërai. Naporahuaton yaꞌipi quëmopinëhuëpita quëran ca naꞌcon naꞌconsoꞌ maꞌsha pahuantërinco, itërin.

¹⁶ —Carinquën catahuaranquën niꞌton, noya nanitapaaran. Aꞌnaíchin quëmapi minsërëso pochin, yaꞌipi matianoꞌsa minsëaran, itërin Siniorori.

^17-18 —Tëhuënchachin nosorohuatancosoꞌ, Yosënquën ninansoꞌ anitotoco. Ofrendanëhuë apira quësarahuë. Ina aꞌnotaꞌhuanquënso marëꞌ ninaco topirahuë, itërin Quitionori. —Inta nipachin, isëranchin ninaranquën, itërin Siniorori.

¹⁹ Quitionosoꞌ paꞌsahuaton aꞌnara chipoaꞌhua tëparin. Tëparahuaton poꞌmorin. Ina poꞌmorahuaton cato shonca quiro pochin tricoroꞌmo manin. Ina quëraontaꞌ, pan co ahuëcatopinanhuëꞌ anpirin. Chipoaꞌhua noshinën anpirinsosoꞌ, aꞌna iꞌmëquë poꞌmorin. Noꞌhuiquënsoꞌ, huëꞌëtaquëranchin acorin. Yaꞌipi inapita insina narataquë quëparin.

²⁰ Canconpachina, anquëniri itapon: “Nosha, pan, inapita iso natëtë aipi acoquëꞌ. Nani acohuatan yaꞌipi ina aipi noꞌhuiquën opoquëꞌ,” itërin. Napotohuachina Quitionosoꞌ ina inachachin ninin.

²¹ Ina quëran anquënisoꞌ, pitananën quëran nosha, pan, inapita Quitionori acorinsoꞌ, caririn. Cariaso chachin natëtë quëran pën pipirin. Pan, nosha, inapita noyá ahuiquitërin. Ina quëran chachin Sinioro anquëninënsoꞌ, ayarin.

²² “Sinioro anquëninën chachin nontápirahuëꞌ,” tënin. Ina quëran Yosë nontaton: —¡Maꞌhuantacha Sinioro ninahuë paya! Anquëninën chachin nisapirinhuëꞌ, nirayarahuë, itërin.

²³ Siniororiso nipirinhuëꞌ, itapon: —Ama paꞌyanquësohuëꞌ. Co chiminaponhuëꞌ. Caso sano cancantërahuë. Inapochachin quëmanta sano cancantëquëꞌ, itërin.

²⁴ Napotohuachina Quitionosoꞌ aꞌnara artaro inaquë ninin. Sinioro chinotacaso marëꞌ ninin. Nani nisahuaton aninihuanin: “Sinioro asanocancaninpoaꞌ,” itërin. Ina artarosoꞌ, iso quirica ninshitasoco huarënta yaꞌhuërarin. Opra ninanoquë yaꞌhuërarin. Inaquësoꞌ, Apisiro huëntonaꞌhua israiroꞌsa yaꞌhuëpi.

²⁵ Naporo tashi chachin Siniorori Quitiono itapon: —Tata ohuacanënpita quëran aꞌnara toro maquëꞌ. Toro masho quëran naniamiachin nininsoꞌ maquëꞌ. Inasoꞌ, nani canchisë piꞌipitërin. Tataparin mamanshi Paaro itopisoꞌ chinotacaso marëꞌ artaro nininsontaꞌ, ohuatëquëꞌ. Naranta moshacaiso marëꞌ acopisoꞌ, aꞌnëquëꞌ. Inasoꞌ, artaro pirayan ahuanipi.

²⁶ Iso motopiaꞌhua huiꞌnimotënꞌpaꞌ, aꞌnara artaro ca marëꞌ niquëꞌ. Caso Yosënënco niꞌto, inapoquëꞌ. Ina quëran toro manansoꞌ, tëpaquëꞌ. Inapotahuaton ina artaro aipi yaꞌipi ahuiquitëquëꞌ. Nara moshacaiso marëꞌ acopiso aꞌnëhuatan, pëꞌcha pëꞌchataran. Ina ihuë aipi acorahuaton yaꞌipi noyá ahuiquitëquëꞌ, itërin.

²⁷ Napotohuachina Quitionosoꞌ catahuacaiso marëꞌ shonca piyapinënpita quëparin. Inapitari catahuarin niꞌton, yaꞌipi Siniorori camairinso ninin. Napoaponahuëꞌ, co tahuëri inaporinhuëꞌ. Paꞌpin quëmopinënpita, ina ninanoquë yaꞌhuëpisopita, inapita tëꞌhuataton, tashi inaporin.

²⁸ Tahuëririnquë piyapiꞌsa capayatohuachinara, Paaro artaronën ohuatopinan niꞌconpi. Ina pirayan nara moshacaiso marëꞌ acopisontaꞌ, aꞌnërahuatona pëꞌcha pëꞌchatopi. Naporahuatona ina ihuëquë chachin, nasha artaroquë aꞌnara toro yaꞌipi ahuiquitopi.

²⁹ Napohuachinara inahuara capini ninatanpi: —¿Incháchinta naporin nicaya? topi. Natantërapi quëran nitotopi huachi: —Coasë huiꞌnin Quitiono itopiso naporin, topi shaꞌhuirapitonaꞌ. Naporoꞌ Coasë paaparahuatona itaponaꞌ:

³⁰ —Huiꞌnan ocoiquë tëpaꞌi. Paaro artaronën ohuatërin niꞌton, tëpaarai. Ina pirayan nara moshacaso marëꞌ acorëhuasonta aꞌnërin niꞌton, napotarai, itopi.

³¹ Inariso napoaponahuëꞌ, yamopisopita itapon: —¡Co Paaro paꞌpoyatomaꞌ, ina marëꞌ ahuëtamaso yaꞌhuërinhuëꞌ! Insosona ina yapaꞌpoyahuachin, coꞌhuara tahuëriátërasohuë chimiꞌin, tënahuë. Paaro Yosë nipachinsoꞌ, inaora chachin ahuëchin. Artaro ohuatopisoꞌ inanquën niꞌquëhuarëꞌ, inapoꞌin, tënin.

³² Naporo quëran huarëꞌ Quiotionoso apoyatatonaꞌ: “Quiropaaro,” itopi. Paaro artaronën ohuatërinso marëꞌ: “Paarori chachin Quitiono ahuëcaso nohuantërëhuaꞌ,” taꞌtona ina pochin nohuitopi.

³³ Ina quëran matianoꞌsaꞌ, amaricoroꞌsaꞌ, piꞌi pipirinso parti yaꞌhuëroꞌsaꞌ, inapita niyontoantapi. Naporahuatona Cortaniiꞌ pëntontopi. Pëntontahuatonaꞌ, Quisiriro itopiso motopianaquë yaꞌhuëintapi. Nëꞌmëtë pëinëna ótënahuatona yaꞌhuëintarapi.

³⁴ Napoaponahuëꞌ, Yosë ispiritonëni Quitiono yaꞌcoancantërin huachi. Yaꞌcoancantohuachina, carniro pomon pihuirin. Yaꞌipi Apisiro huëntonaꞌhua sontaroꞌsa niyontonacaiso marëꞌ, pihuirin.

³⁵ Naporahuaton yaꞌipi Manasisi huënton sontaroꞌsa huëꞌsahuatonaꞌ, catahuacaiso marëꞌ comisionoꞌsa aꞌparin. Asiri, Saporono, Nipitari, inapita huëntonoꞌsanta huëcacaiso marëꞌ aꞌparin. Natanahuatonaꞌ, inahuanta Quitiono huëcapaipi.

^36-37 Napohuachinara Quitionosoꞌ, Yosë nontaton itapon: —Sinioro napotërancoso chachin cá quëran israiroꞌsa yanichaꞌëhuatan, anitotoco. Ohuica shaꞌhuëtë anporonënpitarë chachin, trico toꞌnoraraiquë acoarahuë. Tashiraya tashíramiachin poroncayori inasoꞌ, shipichin. Noꞌpaꞌ inainpichinsoꞌ, yaꞌsaꞌin. Inapohuachin, ca quëran israiroꞌsa yanichaꞌëranso nitotarahuë, itërin.

³⁸ Inapo yonquitaton acohuachina, naporinso chachin ninin. Tashiramiachin huënsëintarahuaton, ohuica shaꞌhuëtë acorinsoꞌ, shiꞌshirin. Shiꞌshihuachina, aꞌna tason mëntaísha poroncayo manin.

³⁹ Ina niponahuëꞌ, Quitionoso Sinioro nontaantarin: “Naquëranchin yanatëantaranquën niꞌton, ama noꞌhuicosohuëꞌ. Iporaíchin ohuica anporo quëran yatëniantarahuë. Iporasoꞌ, ohuica anporo yaꞌsaꞌin. Inainpichin noꞌpaso nipirinhuëꞌ, poroncayori shipichin,” itërin.

⁴⁰ Naporo tashi Siniorosoꞌ, ina inachachin niantarin. Ohuica anporosoꞌ, yaꞌsárin. Inainpichin noꞌpaso nipirinhuëꞌ, poroncayori shipitërin.