Jueces 16 - Chayahuita (Shahui)

Sanson Casa ninanoquë naporinsoꞌ

¹ Aꞌna tahuëri Sansonsoꞌ, Casa ninano itopiquë paꞌnin. Inaquë aꞌnara monshihuantë sanapi quënanin. Quënanaton pëinënquë huëꞌëpacaso marëꞌ yaꞌconaparin.

² Yaꞌhuëhuanoꞌsasoꞌ, Sanson oꞌmarinso natantopi. Natantatonaꞌ, ninano tahuirapitopi. Naporahuaton ninano yaꞌcoanaroꞌsanta yaꞌipi ina tahuëri noya aꞌpairápi. Tashihuachina huëꞌëpona paꞌpi: “Tashiraya tashíramiachin tëpaꞌahuaꞌ,” taꞌtona paꞌpi.

³ Sansonso napoaponahuëꞌ, huáncana tashiquë huarëꞌ quëhuënarin quëran huënsëintarin. Paꞌsahuaton ninano onconan masho opashorahuaton pitënin. Chinpirinsopita, huaꞌnanënpita, inapitarë chachin pitënahuaton paꞌnin. Ipron ninano notënanquë motopi yaꞌhuërinso huiꞌnimotënꞌpaꞌ, acoontarin.

Tarirari Sanson shaꞌhuirapirinsoꞌ

⁴ Aꞌna tahuëri Sansonsoꞌ, aꞌna yaꞌhuërëꞌ sanapi quënaantarin. Inasoꞌ sanapi Tarira itopi. Sorico motopiana itopiquë yaꞌhuërin.

⁵ Huiristino huaꞌanoꞌsari Tarira paaparahuatona itaponaꞌ: —Sansonsoꞌ chini chiníquën niꞌton, aꞌnaroáchin yaminsërincoi. Onporahuatonsona chinirinsoꞌ, natanquëꞌ. Naporahuaton, onpo minsëcaꞌhuaisontaꞌ, quëmari noyasha nontaton natanquëꞌ. Shaꞌhuitohuachinquën quiyanta shaꞌhuitocoi. Ina marëꞌ aꞌnaya aꞌnayacoi, huaranca aꞌna pasa coriqui prata quëran nininsoꞌ pahuërëarainquën, itopi.

⁶ Napotohuachinara, inariso Sanson itapon: —Shaꞌhuitoco: ¿Onpoatonta quëmaso napoin chiniran? Naporahuaton ¿Onpo tonpotohuatënquënta co huachi oquiaranhuëꞌ? itërin.

⁷ —Canchisërin pëꞌchinan nonin co yaniyátërarinsohuëquë tonpohuachinaco, co huachi chiniarahuëꞌ. Piyapimia pochin nicato co huachi chiniarahuëꞌ, itërin Sansoni.

⁸ Napotohuachina, inaso huiristino huaꞌanoꞌsa inachachin shaꞌhuitërin. Shaꞌhuitohuachina, inanapo pëꞌchinan nonin quëpatopi. Ina quëran Sanson ahuëꞌëtaton, inaquë noyá tonporin.

⁹ Coꞌhuara tonpoyátëraponhuëꞌ, caraya huiristinoꞌsa patoananënquë poꞌorin. Napoaton tënicaso marëꞌ chiníquën ochinanin: —¡Pashi tëquë Sanson! ¡Huiristinoꞌsa ahuëarinquën! itërin. Naporo inasoꞌ, capayatahuaton tonporinsoꞌ oshitërin. Oꞌsërinaꞌhuaya aꞌpërëso pochin nitërin. Napoaton huiristinoꞌsasoꞌ, co nitotopihuëꞌ onporahuatonsona chinirinsoꞌ.

¹⁰ Napoaton Tarirari itapon: —¡Niꞌquëchi nonpintëranco! Nonpintopirancohuëꞌ, iporasoꞌ tëhuënchachin noꞌtëquën shaꞌhuitoco huachi, itërin.

¹¹ —Nasha caporin co maꞌmarë tëranta camaipinanhuë nininquë tonpohuachinaco, co huachi chiniarahuëꞌ. Piyapimia pochin nicato inapoarahuë, itërin Sansoni.

¹² Napotohuachina, ahuëꞌëtaantarahuaton nasha caporin manin. Inaquë tonporahuaton, chiníquën ochinaantarin: —¡Pashi tëquë Sanson! ¡Huiristinoꞌsa ahuëarinquën! itaantarin. Naporonta caraya huiristinoꞌsa patoananënquë nani poꞌorin. Sansonso napoaponahuëꞌ, capayatahuaton caporinoꞌsaquë tonporinsoꞌ oshitaantarin. Piꞌshirin oshitatë pochin nitërin.

¹³ Naporoꞌ Tarirari itaantapon: —¡Iporanta nonpintaantaranco! Iporaso nipirinhuëꞌ, noꞌtëquën shaꞌhuitoco huachi, itërin. —Aꞌnantacaso marëꞌ ótënanquë, ainëhuë canchisë huënton nininsoꞌ sihuiantëquëꞌ. Inapotahuaton aꞌnan aꞌsonanso nara, aco acopo paꞌhuacorahuaton pasaantëquëꞌ. Inapotohuatanco, co huachi chiniarahuëꞌ. Piyapimia pochin nicato napoarahuë, itërin. Napotohuachina, Sanson ahuëꞌëtaantarin. Inapotahuaton, ainën canchisë sihuirin nininsoꞌ aꞌnantacaso marëꞌ ótëninsoarëꞌ, sihuiantërin.

¹⁴ Inapotahuaton, aꞌsoninso nara aco acopo paꞌhuacorin. Inapotahuaton pasaantërin. Naporoꞌ chiníquën ochinaantarin: —¡Pashi tëquë Sanson! ¡Huiristinoꞌsa ahuëarinquën! itaantarin. Inaso napoaponahuëꞌ, capayatahuaton nara pasaantërinsoꞌ aꞌnanë chachin ocoirin. Napoaton huiristinoꞌsa patoanaquë Tarirari poꞌorinsoꞌ, co nanitopihuëꞌ macacaisoꞌ.

¹⁵ Napohuachina, Tarirari itapon: —¡Quëmasoꞌ nonpintënquën! “Nohuantëranquën,” topatana, nonpiánan. Isoarëꞌ nani cararo monaranco. Inapoaton, chiniranso co yashaꞌhuitërancohuëꞌ, itërin.

¹⁶ Tarirarisoꞌ, inachin inachin natanárin. Nani oraquë pochin inachachin natanápachina, Sanson ami ami natanin. Napotárin niꞌton, chiminchináchin cancantërin.

¹⁷ Napoin quëran onporahuatonsona chinirinsoꞌ, shaꞌhuitërin huachi: —Sinioro piyapinën nicaꞌhuaso marëꞌ acorinaco niꞌto, nasarioco. Coꞌhuara nasichátërapohuëꞌ ina marëꞌ acorinaco. Napoaton co intëranta yaꞌichinincohuëꞌ. Yaꞌirinaco naporini, co huachi chiniitohuëꞌ. Piyapimia pochin nicato co huachi inapoꞌitohuëꞌ, itërin.

¹⁸ Napotohuachina Tarirasoꞌ: “Ipora tëhuënchinsoꞌ noꞌtëquën shaꞌhuitërinco huachi,” tënin. Napoaton huiristino huaꞌanoꞌsa shaꞌhuitacaiso marëꞌ nanan aꞌpatërin: “Ipora tëhuënchinsoꞌ huëcoꞌ. Onporahuatonsona chinirinsoꞌ, nani Sanson shaꞌhuitërinco,” taꞌcaso nanan aꞌparin. Napohuachina, inahuaso coriquirë chachin huëcapaipi.

¹⁹ Naquëranchin Tariraso Sanson ahuëꞌëtaantarin. Tonanënquë ahuëꞌëtahuaton, aꞌna quëmapi përarin yaꞌicaso marëꞌ. Ainën canchisë sihuirin acorinso napochachin inari yaquirin. Inapotahuaton macacaiso marëꞌ napotërin.

²⁰ Nani yaꞌihuachina ochinaantarin: —¡Pashi tëquë Sanson! ¡Huiristinoꞌsa ahuëarinquën! itërin. Inaso napoaponahuëꞌ, capayatahuaton tapon: “Iꞌhua pochin naquëranchin chaꞌëantarahuë,” tënin. Napopirinhuëꞌ, Siniorori tananpitërinso co nitotërinhuëꞌ.

²¹ Naporoꞌ huiristinoꞌsari mapi huachi. Masahuatona papoirayatopi. Ina quëran Casa ninanoquë quëpapi. Inaquë shaꞌpi huaꞌna catinaquë catinaquëtopi. Inapotahuatona tashinan pëiquë pëꞌsanto raꞌpi masho ohuërërápaso marëꞌ acopi.

²² Napoaponahuëꞌ, ainënso naquëranchin aꞌshiantararin.

Sanson chimininsoꞌ

²³ Aꞌna tahuëri huiristino huaꞌanoꞌsa niyontonpi. Sanson canapiso yonquiatonaꞌ, capa cancantacaiso marëꞌ niyontonpi. Naporahuaton, mamanshinëna Tacon itopisoꞌ chinotacaiso marëꞌ maꞌsharoꞌsa tëparapi. Capa cancantatona iso pochin cantarapi: “Sansonsoꞌ inimiconënpoa nipirinhuëꞌ. Mamanshinënpoa catahuarinpoa niꞌton, ina canarëhuaꞌ,” tosápi.

²⁴ Ina nicatona aꞌnapita huiristinosantaꞌ, cantarapi. Cantatonaꞌ, mamanshinëna chinotopi. Napopi: “Mamanshinënpoa catahuarinpoa niꞌton, Sanson canarëhuaꞌ. Inasoꞌ inimiconënpoa niꞌton, shaꞌtërëhuasopita tapirin. Naporahuaton naꞌaquënpoa tiquirinpoaꞌ,” topi cantatonaꞌ.

²⁵ Naporápatona capa cancantopi. Capa cancantonënaquë: “Sanson macontaco tëhuahuaꞌ,” topachinara, tashinan pëi quëran ocoipi. Ocoirahuatona tëhuarápi. Niyontopiso pëisoꞌ, naꞌpi quëran niꞌton, achinicaso marëꞌ cato onëroꞌsa pochin yaꞌhuëtërin. Pëi huáncana acopi.

²⁶ Sansonsoꞌ, somaraya niꞌton, aꞌna huiꞌnapishari sëꞌquëaton quëntarin. Naporoꞌ ina huiꞌnapi itapon: —Moshatacaiso pëi achinirinsopita cato yaꞌhuëtërin. Inaquë pisanaꞌhuaso marëꞌ quëpatonco asëꞌhuaco, itërin.

²⁷ Yaꞌipi huiristino huaꞌanoꞌsa moshatacaiso pëiquë nisapi. Notohuaroꞌ huiristino quëmapiꞌsaꞌ, sanapiꞌsaꞌ, inapitanta yaꞌconpi. Aipi paꞌcotëquëntaꞌ, cara huaranca pochin huiristinoꞌsa nocotatonaꞌ, Sanson tëhuapiso costarápi.

²⁸ Naporo inasoꞌ, chiníquën Yosë nontërin: “¡Sinioro nosoroco! Iporaíchin yonquirahuatonco catahuaco. Achiniantaco papoirayatërinacoso marëꞌ huiristinoꞌsa iꞌhuërëchi,” itërin.

²⁹ Napotahuaton moshatacaiso pëi achinirinsopita, cato tanpanquëranchin caririn. Carirahuaton piquëëconin.

³⁰ Inapotahuaton chiníquën nonin: “¡Carëꞌquëma napopináchin canpitanta huiristinoꞌsanquëma chimincoꞌ!” tënin. Ina tosahuaton, yaꞌipi chinirin quëran pitarin. Pitahuachina, moshatacaiso pëi nohuatiimarin. Nohuatahuaton huiristino huaꞌanoꞌsa niꞌpirin. Aꞌnapita huiristinoꞌsanta inapotërin. Inapoaton Sansonsoꞌ chiminapon pochin naꞌcon naꞌcon huiristinoꞌsa tëparin. Nanpiponsoꞌ naꞌa tëpaponahuëꞌ, co ina nápo tëparinhuëꞌ.

³¹ Ina piquëran iyaꞌhuainpita, quëmopinënpita, inapita oꞌmapi. Nonën masahuatona paꞌpincoꞌ Manoa itopisoꞌ poꞌoronënquë poꞌmoonpi. Inasoꞌ poꞌoroꞌ, Sora ninano quëran Istaoro ninanoquë ira paꞌninsoꞌ huáncana yaꞌhuërin.