Jueces 15 - Chayahuita (Shahui)

^1-2 Huaꞌquimiachin quëran trico nitërinsoꞌ macacaso tahuëriꞌsa nanirin. Naporoꞌ Sansonsoꞌ saꞌin nicapon paꞌmantarin. Ina quëtacaso marëꞌ chipoaꞌhua quëpatomarin. Camarahuaton miꞌsën itapon: —Saꞌahuë patoananënquë nicapo yaꞌcoanahuë, itërin. Miꞌsëniso napoaponahuëꞌ, co nohuantërinhuëꞌ. Napoaton itapon: —Coꞌtama nohuantëranhuëꞌ, taꞌto, aꞌnara amiconën naporo caꞌtaninquënsoꞌ, quëtërahuë. Napoaponahuëꞌ, caiaꞌhuainso noya noyaron nichinapon chachin, ina maquëꞌ. Cainpain yaꞌhuërënamën maquë topirahuë, itërin.

³ Napotopirinhuëꞌ, Sansonisoꞌ itapon: —¡Iꞌyan! Napotëramaco niꞌquëhuarëꞌ, iporasoꞌ huiristinoꞌsanquëma maꞌsha onpotaranquëmaꞌ. Inapotohuatënquëma canpitaora tëhuënëmaquë napotaranquëmaꞌ, itërin.

⁴ Napotahuaton paꞌnin. Cara pasa anporo huinan anashi maconin. Inapita masahuaton, cato cato tonporin. Huinamëna quëran inapotëraꞌpiarin. Inapotahuaton ina huáncana ina huáncana aꞌnara yanatëtë tonpoantëraꞌpiarin.

⁵ Yaꞌipi tonpoantohuachina, yanatëtëroꞌsa iꞌchinpitëraꞌpiarin. Inapotahuaton huiristinoꞌsa tricoronëna huáncana aꞌparin. Inapotohuachina trico macatona imopisopita huëyarin. Co mashátërapisopitahuëntaꞌ huëyarin. Oparoroꞌsanta huëyarahuaton, oripororoꞌsa quëran huarëꞌ huëyarin.

⁶ Huiristinoꞌsasoꞌ, natantápatona nitotopi huachi: “Sanson naporin. Miꞌsëni saꞌin osërëtahuaton, amiconën acoantërin. Ina iꞌhuërëtacaso marëꞌ naporin,” itopi. Ina natantatonaꞌ, sanapisoꞌ paꞌpinë chachin maconpi. Aꞌpërahuatonaꞌ, cato chachin tëpapi.

⁷ Naporoꞌ Sansonsoꞌ taantarin: —Naporamaso marëꞌ ¡Yosë niꞌsárinco iꞌhuërëtaranquëmaꞌ! Inapotaꞌhuanquëma huarëꞌ tananpitaranquëmaꞌ, tënin.

⁸ Napotaton huiristinoꞌsa ahuëmiatërin. Inapotaton notohuaroꞌ tiquirin. Ina piquëran Itan natëtëana itopiquë paꞌsahuaton yaꞌhuëconin.

Mora cohuiratëquë huiristinoꞌsa tiquirinsoꞌ

⁹ Huiristinoꞌsasoꞌ, israiroꞌsa huëcapaipi. Nii itopiquë huarëꞌ huëꞌpi. Inaquë nëꞌmëtë pëinëna ótënaꞌpiapi. Ina noꞌpasoꞌ, Cota huënton noꞌpanënquë yaꞌhuërin.

¹⁰ Napohuachinara, inahuariso huiristinoꞌsa natanpi: —¿Onpoatonta iporaso huëcatoma yaahuëtaantaramaꞌ? itopi. —Sanson macapoi huëꞌnai. Ahuërincoi niꞌton, iꞌhuërëtaꞌhuaiso marëꞌ huëꞌnai, itopi huiristinoꞌsari.

¹¹ Ina natanatonaꞌ, cara huaranca Cota huënton sontaroꞌsari Sanson paapapi. Itan natëtëanataquë paaparahuatonaꞌ: —¡Huiristinoꞌsasoꞌ, canpoa quëran chini chiníquënoꞌsa nipisoꞌ, nani nitotëran! ¡Noꞌhuipirinënhuëꞌ isëquë huëcaton quiyanta naꞌintarancoi! itopi. —Canta maꞌsha onpotërinaco niꞌton, topinan iꞌhuërëtërahuë, tënin Sanson.

¹² Napotohuachina: —Quiyaso macatëinquën huiristinoꞌsaquë yocaꞌhuainquënso marëꞌ huëꞌnai, itopi. —Yoscoarëꞌ taꞌtoma nipachin, ama canpita chachin tëpamacoso marëhuëꞌ shaꞌhuitoco, itërin Sansoni.

¹³ —Yoscoarëꞌ co tëparainquënhuëꞌ. Topinan masahuatëinquën huiristinoꞌsaquë yoꞌcoanainquën, itopi. Napotatona cato caporin nasharinquë tonpopi. Inapotatona naꞌpirin quëran ocoipi.

¹⁴ Nii itopiquë canconpachinara huiristinoꞌsasoꞌ, capa cancantatona noncarorëꞌnachin nacapitapi. Capa cancantapirinahuëꞌ, Sinioro ispiritonëni Sanson yaꞌcoancantërin. Naporoꞌ tanpaquën, imirin, inapita tonpopisoꞌ oshitërin. Rino piꞌshi pënquë aꞌpërëso pochin nitaton oshitërin.

¹⁵ Naporahuaton mora cohuiratë manin. Co noya yaniyátërarinsohuëꞌ masahuaton, inaquë ahuëaton huaranca huiristinoꞌsa tëparin.

¹⁶ Inapotahuaton tapon: —Mora cohuirachaquë, aꞌna imo, cato imo imorahuë. Mora cohuirachaquë huaranca huiristino sontaroꞌsa tëparahuë, tënin.

¹⁷ Ina quëran mora cohuiratë tëꞌyatërin. Napoaton ina noꞌpasoꞌ: Namato-nii, itopi.

¹⁸ Naporahuaton Sansonsoꞌ paꞌpi yamororin. Yamoroton Sinioro nontërin: “Quëma catahuaranco niꞌton, ina nápo inimicoroꞌsa minsërahuë. Inaporahuë piquëransoꞌ, co ipora yamoro tëpaincoso nohuantëranhuëꞌ. Yamoro tëpahuachincosoꞌ, isopita piyapiroꞌsa nonëhuë tëhuaponaꞌ. Co marcahuanpirinahuëꞌ, nonëhuë tëhuaponaꞌ,” itërin.

¹⁹ Naporoꞌ Siniorori, Niiquë nanin yaꞌhuërinsoꞌ, iꞌsohuatërin. Iꞌsohuatohuachina iꞌsha pipirin niꞌton, ina oꞌoton chiníquën cancantërin. Napoaton inaquë noꞌpa quëran iꞌsha pipirinsosoꞌ, iso quirica ninshitasoco huarëntaꞌ, In-acori itapi.

²⁰ Sansonsoꞌ, cato shonca piꞌipi israiroꞌsa huaꞌanëntërin. Huiristinoꞌsari ina parti huaꞌanëntasoiꞌ, naporin.