Jueces 14 - Chayahuita (Shahui)

Sanson saꞌarinsoꞌ

¹ Aꞌna tahuëri Sansonsoꞌ Timina itopisoꞌ ninanoquë paꞌmarin. Inaquë nicasoꞌ, aꞌnara huiristino sanapi quënanin. Costarin niꞌton, yamanin.

² Yaꞌhuërinquë huënantarahuaton, paꞌpin, aꞌshin, inapita shaꞌhuitiintarin: —Huiristino sanapi Timina ninanoquë quënanahuësoꞌ, yamanahuë. Paꞌmatoma ina macaꞌhuaso marëꞌ anoyatomaco topirahuë, itërin.

³ Napotohuachina paꞌpin, aꞌshin, inapitari: —¡Yasaꞌapatan co huiristino sanapi yonicaso yaꞌhuërinhuëꞌ! Inapitasoꞌ, co canpoa pochin Yosë chinotopihuëꞌ. ¡Naꞌcon nanoꞌsa canpoa huëntonënpoaquë yaꞌhuërin! Aꞌnapita Israiro huëntonoꞌsaquënta yaꞌhuërin, itopi. Napotopirinahuëꞌ, Sansonso tapon: —Ina mini nipirinhuëꞌ, inaso nanon paꞌpi nohuantomiatërahuë. Napoaton ina macaꞌhuaso marëꞌ anoyatomacoꞌ, itaantarin.

⁴ Naporo tahuëriꞌsa huiristinoꞌsari israiroꞌsa huaꞌanëntapi. Napoaton Sinioro nohuanton Sansonsoꞌ huiristino sanapi yamanin. Oshaquëranchin huiristinoꞌsa ahuëcaso marëꞌ yamanin. Paꞌpin, aꞌshin, inapitasoꞌ: “Sinioro nohuanton napoarin,” co topihuëꞌ. Co inaora tëranta ina nitotërinhuëꞌ.

⁵ Inapoaton Sansonsoꞌ, Timina ninanoquë paꞌmarin. Paꞌpin, aꞌshin, inapitarë chachin anoyatacaso marëꞌ paꞌmarin. Ninano yaꞌcariꞌ, oparoroꞌsa yaꞌhuërin. Inaquë Sansonso yaꞌconahuaton, opa cayarinso yonisarin. Yonisoꞌ, paꞌpiniꞌ huiꞌnapishini përantahuaton niitërin.

⁶ Naporoꞌ Sinioro ispiritonëni noyá yaꞌcoancantërin. Yaꞌcoancantohuachina, paꞌpiniꞌ manin nicaso chipoaꞌhua onoatë pochin nitërin. Co maꞌsha tëranta sëꞌquëaponahuëꞌ napotërin. Napoaponahuë naporinsoꞌ, co paꞌpin, aꞌshin, inapita shaꞌhuitërinhuëꞌ.

⁷ Ina quëran paꞌsahuatonaꞌ, nanon costarinso nontomapi. Nani nontahuatonaꞌ, yaꞌhuëpiꞌpaꞌ panantapi.

^8-9 Huaꞌquimiachin quëran Sansonsoꞌ, sanapi yamaninso macapon paꞌmarin huachi. Paꞌmapon pochin, ira quëran pëshonahuaton paꞌpiniꞌ tëparinso nicapon paꞌnin. Niꞌconpirinhuëꞌ, ina chanatërinquë ninori yaꞌhuëtërin quënanconin. Imirin quëran oquirahuaton niꞌpirinhuëꞌ, noꞌhuiquën nipachina, manin. Masahuaton irorachinin paantarin. Paꞌpin, aꞌshin, inapitanta icantahuaton quëtërin. Quëtohuachina, inapitanta iropi. Napoaponahuëꞌ, paꞌpiniꞌ chanatëquë maninsoꞌ, co shaꞌhuitërinhuëꞌ.

¹⁰ Sanson paꞌpinsoꞌ shiin nicapon paꞌmarin. Inachintopi niꞌton, nasha miꞌsë nichinapon chachin Sansonsoꞌ pita ninin. Canchisë tahuëri marëꞌ pita ninin. Inatohuaso nimapachinara, ina nápo tahuëri pita imapi.

¹¹ Ina pochin pitaquësoꞌ saꞌanaꞌpi caꞌtanacaso marëꞌ naꞌa huiꞌnapiꞌsari caꞌtanin. Napoaton cara shonca huiristino quëmapiꞌsari Sanson caꞌtanpi.

¹² Inapita cara shonca yaꞌpi Sansoni itapon: —Aꞌnara ninocaso nanan shaꞌhuichinquëmaꞌ. Canchisë tahuëri pita imarëhuaquë, maꞌsona tapo naporahuësoꞌ shaꞌhuitoco. Noꞌtëquën shaꞌhuitohuatamaco, noꞌtëquën pahuërëaranquëmaꞌ. Noya noya rino piꞌshi quëran aꞌmocaso nipisoꞌ, aꞌnaya aꞌnayanquëma quëtaranquëmaꞌ. Pitaquë aꞌmotë niꞌtacaso marëntaꞌ, aꞌnaya aꞌnaya quëchinquëmaꞌ.

¹³ Napoaponahuë co noꞌtëquën shaꞌhuihuatamahuëꞌ, aꞌnaya aꞌnayanquëma casaꞌ nisha quëtapomaco, itërin. Napotohuachina inapitasoꞌ: —Shaꞌhuitocoi nipachin. Yaꞌipicoi noya natanarainquën, itopi.

¹⁴ Naporoꞌ Sansonso tapon: “Mapinton maꞌsha quëran, cosharo pipirin. Chiníquën masho quëran, cashi cashin nininso pipirin,” itërin. Napotopirinhuëꞌ, co yayonquipihuëꞌ. Nani cara tahuëri pita imapiso naꞌhuëponahuëꞌ, co nitochátërapihuëꞌ.

¹⁵ Catapininquëso nipirinhuëꞌ, Sanson saꞌin paapapi. Paaparahuatonaꞌ: —Quëmari soꞌyan natanquë maꞌsona tapon ninocaso nanan shaꞌhuitërincoisoꞌ. Coꞌsoꞌ shaꞌhuitohuatancoihuëꞌ, pënquë ahuiquitarainquën. Yaꞌipi quëmopinënpitarëꞌquën chachin inapotarainquëmaꞌ. ¿Ihuaancoiso marëꞌ përamarancoi ti? itopi.

¹⁶ Napotohuachinara, sanapiso soꞌin paaparahuaton itapon: —Quëmaso co tëhuënchachin nosororancohuëꞌ. ¡Noꞌhuiranco tënahuë! Yaꞌhuërai capini ninaisopitarëꞌquën nicanaton, ninocaso nanan shaꞌhuitëran. Caso napoaponahuëꞌ, maꞌsona tapon naporansoꞌ, co shaꞌhuitërancohuëꞌ, itërin. —Tatahuë, mamahuë, co inapita tëranta shaꞌhuitërahuëꞌ. Aquëtë huarëꞌ quëmasoꞌ, co shaꞌhuitaꞌhuanquënso yaꞌhuërinhuëꞌ, itërin Sansoni.

¹⁷ Napotopirinhuëꞌ, saꞌinisoꞌ naꞌnëtárin. Canchisë tahuëri pita imapiso nápo chachin naꞌnëtárin. Napotápachina, Sansonso pita taꞌhuantërinso tahuëri maꞌsona tapon naporinso shaꞌhuitërin. Shaꞌhuitohuachina, inaso paꞌsahuaton, inahua capini nishaꞌhuitopi.

¹⁸ Naporo tahuëri chachin coꞌhuara piꞌi yaconyátërasohuëꞌ, inahuaso Sanson paaparahuatona itoonpi: “Ninoíchin yaꞌipi quëran cashi cashinsoꞌ. Paꞌpiníchin yaꞌipiya quëran chini chiníquënsoꞌ,” itoonpi. Napotohuachina Sansonso tapon: “Ohuaca nanon chiníquën niꞌton, catahuarinpo noꞌpaꞌ ohuërërëꞌ. Ina pochachin canpitantaꞌ coꞌsoꞌ saꞌahuë shaꞌhuitërinquëmahuëꞌ naporini, maꞌsona tapo naporahuësoꞌ co noꞌtëquën shaꞌhuichitomacohuëꞌ,” itërin.

¹⁹ Naporoꞌ Sinioro ispiritonëni Sanson yaꞌcoancantërin. Yaꞌcoancantohuachina, Ascaron ninano itopiquë paꞌnin. Inaquë paꞌsahuaton cara shonca yaꞌhuëhuanoꞌsa tëparahuaton aꞌmopiso ocoitëraꞌpiarin. Ina quëparahuaton canapiso marëꞌ pahuërëtërin. Ninocaiso nanan noꞌtëquën shaꞌhuipiso marëꞌ Sansonsoꞌ nihuitërin niꞌton, ina pochin pahuërëtërin. Ina piquëran Sansonsoꞌ paꞌpi noꞌhuitahuaton, paꞌpin, aꞌshin, inapita yaꞌhuërinquë panantarin. Co sanapi ichiyaꞌhuëyátërasohuëꞌ, panantarin.

²⁰ Sansonso co huachi saꞌin paaparinhuëꞌ niꞌton, paꞌpini aꞌna quëmapi acoantërin. Sanson saꞌapon caꞌtaninso chachin acoantërin.