Jueces 13 - Chayahuita (Shahui)

Sanson huaꞌhuatërinsoꞌ

¹ Israiroꞌsasoꞌ, co noyahuëꞌ niantapi. Siniorori chachin niꞌsápirinhuëꞌ, napoantapi. Napopiso marëꞌ Siniorori huiristinoꞌsa catahuarin niꞌton, israiroꞌsa minsëpi. Minsërahuatona catapini shonca piꞌipi huaꞌanëntopi.

² Tano israiroꞌsa huënton noꞌpanënquë aꞌnara ninano yaꞌhuërin. Inaso ninanoꞌ, Sora itopi. Inaquë aꞌna quëmapi saꞌinë chachin yaꞌhuërin. Inasoꞌ quëmapi Manoa itopi. Saꞌinsoꞌ co nito huaꞌhuaninhuëꞌ.

³ Napoaponahuëꞌ, Sinioro anquëninëni yaꞌnotahuaton, itapon: “Iꞌhuata imoya. Apira nanan shaꞌhuitaranquën noya natanquëꞌ. Quëmasoꞌ, co onporonta huaꞌhuanchinanhuëꞌ. Ina nipirinhuëꞌ, iporaso cayorahuaton quëmapiaꞌhuaya huaiaran.

⁴ Napoaton co huino oꞌocamaso yaꞌhuërinhuëꞌ. Co maꞌsha tëranta sairinsoꞌ oꞌosaranhuëꞌ. Naporahuaton Yosë huayontërinquëmasoráchin nininsoꞌ, caꞌsaran.

⁵ Huaꞌhuanso coꞌhuara nasichátëraponhuëꞌ, Siniorori huaꞌanëntapon. Inaso co onporonta ayaꞌitaranhuëꞌ. Napoaton nasario nisarin. Ina mini huiristinoꞌsa huaꞌanëntërima quëran, nichaꞌëinquëmasoꞌ caniaritapon. Napoaton inasoꞌ, ina pochin nisarin,” itërin.

⁶ Ina natanaton, sanapiso soꞌin shaꞌhuitapon paꞌnin: “Aꞌnara quëmapi Yosëri aꞌpaimarinso huëcapairinco. Sinioro anquëninën chachin yaꞌnorin niꞌton, paꞌpi paꞌyantërahuë. Co cariso natanahuëꞌ, nininën. Co inantaꞌ, shaꞌhuitërincohuëꞌ.

⁷ Quëmapiaꞌhua yaꞌhuëtiincoso shaꞌhuitërinco: ‘Ina marëꞌ co huino oꞌocamaso yaꞌhuërinhuëꞌ. Co maꞌsha tëranta sairinsoꞌ, oꞌocamaso yaꞌhuërinhuëꞌ. Naporahuaton Yosë huayontërinquëmasoráchin nininsoꞌ, caꞌsaran. Ina huaꞌhuashasoꞌ, coꞌhuara nasichátëraponhuëꞌ Sinioronquën nisarin niꞌton, nasario nisarin. Chiminaquë huarëꞌ co ayaꞌitaponhuëꞌ,’ itërinco,” itërin.

⁸ Ina natanaton, Manoaso Sinioro nontaton itapon: “Sinioro, piꞌpian nonchinquën topirahuë. Saꞌahuë nontërinso quëmapi, naquëranchin aꞌpatiimantaco. Huaꞌhuasha nasitarinsoꞌ, maꞌsona onpotaꞌhuaiso anitochincoi,” itërin.

^9-10 Yosëri Manoa aꞌpaniton anquëninën aꞌpaimantarin. Saꞌin inaoráchin iminquë niꞌsoꞌ yaꞌnotaantarin. Ina nicaton sanapisoꞌ taꞌarëꞌnachin soꞌin shaꞌhuitapon paꞌnin: —¡Isochi! ¡Quëmapi iꞌhua yaꞌnotërincoso yaꞌnotaantarinco! itërin.

¹¹ Manoasoꞌ saꞌinë chachin paꞌsahuaton quënanconin. Quënanconahuaton itapon: —¿Quëmana iꞌhua saꞌahuë yaꞌnotëran? itërin —Ca mini, itërin quëmapiri.

¹² —Quëma shaꞌhuiransoꞌ nanihuachin: ¿Maꞌta onpotatoi huaꞌhuasha asoꞌsoi? itërin Manoari.

^13-14 —Yaꞌipi shaꞌhuitërahuësopita saꞌan nicacaso yaꞌhuërin: Co huino oꞌocaso yaꞌhuërinhuëꞌ. Co manta opa quëran nipisoꞌ, co maꞌsha tëranta sairinsoꞌ oꞌocaso yaꞌhuërinhuëꞌ. Naporahuaton Yosë huayontërinquëmasoráchin, caꞌsarin. Yaꞌipi shaꞌhuitërahuësoráchin niin, itërin anquëniri.

^15-16 Manoasoꞌ, quëmapi yaꞌnorinso co nohuitërinhuëꞌ: “Isoso Sinioro anquëninën,” co taꞌtonhuëꞌ, itapon: —Ama pataquësohuëꞌ. Chipoaꞌhua tëparahuato anpiriꞌi caꞌa topirahuë, itërin. —Quëparitopirahuë tëranta co quëma cosharonën caꞌpaitënquënhuëꞌ. Napoaponahuëꞌ, chipoaꞌhua tëpahuatan nanitëran Sinioro marëꞌ yaꞌipi ahuiquitacasoꞌ, itërin anquëniri.

¹⁷ —Nininën tëranta nipachin shaꞌhuitocoi topiraihuëꞌ. Shaꞌhuitërancoisoꞌ nanihuachin yonquiatënquën: “Yosparinquën” itaꞌhuainquënso marëꞌ nohuantërai, itërin Manoari.

¹⁸ —¿Maꞌmarëta nininëhuëso yanitotëran? Inaso paꞌyapiroꞌ, co shaꞌhuichináchinhuëꞌ, itërin anquëniri.

^19-20 Napotohuachina Manoasoꞌ, chipoaꞌhua quëpatërin. Aꞌnocaiso tricoroꞌmonta quëpatahuaton, panca natëtë aipi inapita Sinioro marëꞌ noyá ahuiquitërin. Ahuiquitasoꞌ, Sinioroso paꞌyapiro nininsoꞌ aꞌnorin. Manoa saꞌinë chachin nicasoi aꞌnorin. Artaroquë pën panca tënëntohuachina, Sinioro anquëninënso pën huáncana inápaquë panantarin. Ina nicatona isonpi quëran noꞌpaquë huarëꞌ monshomapi.

²¹ Manoaso naporo huarëꞌ: “Tëhuënchachin inaso quëmapi, Yosë anquëninën chachin,” tënin. Ina piquëran co huachi onporonta yaꞌnotërinhuëꞌ. Co saꞌin tëranta yaꞌnotërinhuëꞌ.

^22-23 Naporoꞌ saꞌin itapon: —Yosë chachin canposo quënanatëꞌ, tëhuënchachin chiminarëꞌ, itërin. Napotopirinhuëꞌ: —Co ipora napoarihuëꞌ. Sinioro yatëparinpo naporini, chipoaꞌhua, tricoroꞌmo, inapita yaꞌipi ahuiquitërësoꞌ, co maꞌpaitonpohuëꞌ. Niꞌnësopitantaꞌ, co aꞌnochitonpohuëꞌ. Maꞌpitaso nicacasonta co shaꞌhuichitonpohuëꞌ, itërin saꞌini.

²⁴ Tahuëri nanihuachina sanapisoꞌ quëmapiaꞌhuaya huairin. Ina nohuitaton: Sanson itërin. Huaꞌhuasha noya soꞌsorarin. Naporahuaton Siniororinta catahuararin.

²⁵ Sansonsoꞌ Tano huënton israiroꞌsa yaꞌhuëpiquë yaꞌhuërin. Sora quëran, Istaoro ninanoꞌpaꞌ ira paꞌninsoꞌ huáncana yaꞌhuërin. Aꞌna tahuëri inaquë niꞌsoꞌ, Sinioro ispiritonëni yaꞌcoancantërin. Yaꞌcoancantaton chini chiníquën nicacaso catahuararin.