Juan 5 - Chayahuita (Shahui)

Apia anoyatërinsoꞌ

¹ Ina quëran cotio niyontonpiso tahuëri naniriarin. Naporoꞌ Quisoso Quirosarinquë paantarin.

² Inaquë iꞌsha yaꞌhuërin, anpomiachin. Cotio nananquë Pitista itopi. Ninano yaꞌcoana pirayan yaꞌhuërin, ohuicaroꞌsaꞌ yaꞌcoananën itopiquë. Iꞌsha pirayan aꞌnatërápo imënamë pochin nininsoꞌ yaꞌhuërin.

^3-4 Inaquë naꞌa caniaꞌpiroꞌsaꞌ quëhuënapi. Aꞌnaquën somaraya. Aꞌnaquën sonpacha. Aꞌnaquën nantën tachitërin niꞌton, co nanitërinhuëꞌ huanicasoꞌ. Inaquë ninarapi. [“Huaꞌqui quëran huaꞌqui quëran Sinioro anquëninën oꞌmaton, iꞌsha acoꞌsacaitërin,” topi. “Napohuachina, insoꞌton iꞌquë yaꞌconpachina, aꞌnaroáchin noyatërin,” taꞌtonaꞌ, ninarapi.]

⁵ Inaquë aꞌna quëmapi yaꞌhuërin. Nani cara shonca posa piꞌipi caniorin. Co nanitërinhuëꞌ huanicasoꞌ.

⁶ Inaquë quëhuënápirinhuëꞌ, Quisosori quënanquirin. “Nani huaꞌquiꞌ caniorin,” itohuachina, apia itapon: —¿Nohuantëran noyatamaso ti? itërin.

⁷ —Nohuantopirahuëꞌ Sinioro. Saꞌahuaco. Co insontaꞌ yaꞌhuërinhuëꞌ iꞌquë poꞌmoincosoꞌ. Iꞌsha coꞌsacaitohuachina, yayaꞌconpirahuëꞌ. Aꞌnaꞌton yaꞌconin, itërin.

⁸ —Huaniquëꞌ iyasha. Pëꞌsaraꞌhuaya masahuaton, iratëquëꞌ, itërin.

⁹ Napotohuachina, aꞌnaroáchin apia noyatërin. Pëꞌsaraꞌhuaya masahuaton, iratërin. Chinoto tahuëri chachin naporin.

¹⁰ Cotio huaꞌanoꞌsari quënanahuatonaꞌ, apia huëcapaipi. —Ipora tahuërisoꞌ, chinoto tahuëri niꞌton, co maꞌsha quëpacasoꞌ yaꞌhuërinhuëꞌ, itopi.

¹¹ —Quëmapi anoyatërincosoꞌ nani shaꞌhuitërinco. “Pëꞌsaraꞌhuaya masahuaton, iratëquëꞌ,” itërinco, tënin.

¹² —¿Ma quëmapitaꞌ napotërinquën? itopi.

¹³ “Ahuën. Co nohuitërahuëꞌ,” tënin. Huaꞌhuayatërahuëꞌ piyapi inaquë yaꞌhuërin niꞌton, nani Quisoso paꞌnin.

¹⁴ Ina quëran chinotopiso pëiquë paꞌsahuaton, apia anoyatërinsoꞌ quënancoantarin. —Niꞌquëꞌ iyasha. Nani quëmasoꞌ noyatëran. Ama huachi oshahuaantaquësohuëꞌ, naꞌcon naꞌcon maꞌsha onpotan, itërin.

¹⁵ Ina natanahuaton, Yosë chinotopiso pëi quëran pipirahuaton, cotioroꞌsaꞌ shaꞌhuitonin. “Quisoso anoyatërinco,” itoonin.

¹⁶ Napoaton Quisoso noꞌhuipi. Chinoto tahuëri anoyatërinso marëꞌ co quëꞌyapihuëꞌ.

¹⁷ Quisosoriso nipirinhuëꞌ itërin: —Tatahuësoꞌ co ipora huantaꞌ chinotërinhuëꞌ. Sacatárin piyapiꞌsaꞌ catahuacaso marëꞌ. Cantaꞌ co chinotërahuëꞌ. Nani tahuëri piyapiꞌsaꞌ catahuarahuë, tënin.

¹⁸ Chinoto tahuëri piyapi anoyatërin niꞌton, cotioroꞌsari yatëpapi. “ ‘Yosësoꞌ tatahuë chachin,’ topachina, Yosë pochachin niconin,” taꞌtonaꞌ, aquë aquëtëꞌ yatëpapi.

Yosë huiꞌnin niꞌton chiníquën nanantërinsoꞌ

¹⁹ Ina quëran Quisosori itantarin: “Noꞌtëquën itaranquëmaꞌ. Caora yonquinëhuë quëran co mantaꞌ ninahuëꞌ. Tatahuëráchin nonanahuë. Huiꞌninco niꞌto, inapochachin cantaꞌ ninahuë.

²⁰ Tatahuë naꞌcon nosororinco. Nosoroatonco, yonquirinso chachin anitotërinco. Aꞌna tahuëri catahuaarinco saca sacaiꞌ nininsoꞌ nicaꞌhuasoꞌ. Canpitasoꞌ niꞌpatamaꞌ, paꞌyanaramaꞌ.

²¹ Tatahuë chimipi ananpitaantarin. Inapochachin cantaꞌ insosona nohuantërahuësoꞌ ananpitaantarahuë.

²² Aꞌna tahuëri coisë pochin nicato, yaꞌipi piyapiꞌsaꞌ noꞌtëquën shaꞌhuitarahuë. Noya nipisopita noya acoarahuë. Oshahuanoꞌsaso nipirinhuëꞌ noꞌtëquën anaꞌintarahuë. Co tatahuëri anaꞌintarinhuëꞌ. Nani nanan quëtërinco anaꞌintaꞌhuaso marëꞌ.

²³ Ina quëran yaꞌipi piyapiꞌsaꞌ noya niꞌsarinaco. Tatahuë noya niꞌpiso pochachin niꞌsarinaco. Ina marëꞌ nanan quëtërinco. Co noya niꞌpatamacohuëꞌ, Tatahuëntaꞌ co noya niꞌnamahuëꞌ. Ina aꞌpaimarinco.

²⁴ Noꞌtëquën itaranquëmaꞌ. Yosë chachin aꞌpaimarinco. Noya natanpatamaco, cancanëma quëran huarëꞌ ina imapatamaꞌ, nanpimiataramaꞌ. Co onporontaꞌ anaꞌintaranquëmahuëꞌ. Chiminpatamaꞌ, co parisitomiataramahuëꞌ. Nani Yosë nohuitaramaꞌ niꞌton, nanpimiataramaꞌ.

²⁵ Casoꞌ Yosë huiꞌninco. Iporaso huachi aꞌnaquën chimipi pochin nipisopita natanarinaco. Inapita noya natanpachinaco, Yosë anohuitarahuë. Ina nohuitohuachinaꞌ, nanpimiatapi.

²⁶ Tata Yosë inaora nohuanton, nanpirin. Inari piyapiꞌsaꞌ nanpicasoꞌ quëtërin. Inapochachin cantaꞌ ina nohuanton, nanpirahuë. Naporahuaton, aꞌnapitantaꞌ ananpitaꞌhuasoꞌ nanitaparahuë.

²⁷ Yosë quëran quëmapico niꞌto, nanan quëtërinco piyapiꞌsaꞌ anaꞌintaꞌhuaso marëꞌ.

²⁸ Ama ina yonquiatomaꞌ, paꞌyancosohuëꞌ. Aꞌna tahuëri yaꞌipi chiminpisopita natanarinaco.

²⁹ Natanpachinaco, poꞌoro quëran pipiapi. Noya nipisopita noya noya nanpiantarapi. Co noyahuëꞌ nipisopitaso nipirinhuëꞌ, anaꞌintarahuë,” tënin Quisoso.

Yosëri aꞌpaimarinsoꞌ

³⁰ Ina quëran Quisosori itantarin: “Co caora nohuanto mantaꞌ ninahuëꞌ. Tata Yosë shaꞌhuitohuachincora, inachachin shaꞌhuirahuë. Co casoꞌ nisha yonquirahuëꞌ. Tata yonquirinsoráchin nohuantërahuë. Napoaton noꞌtëquën anaꞌintarahuë.

³¹ Casoꞌ Cristoco. Yosë quëran oꞌmarahuë, tënahuë. Casáchin naporahuë naporini, co natëinacosoꞌ yaꞌhuëitonhuëꞌ.

³² Nipirinhuëꞌ, Tata Yosëntaꞌ inachachin shaꞌhuitarinquëmaꞌ. Noꞌtëquën nonin, tënahuë.

³³ Iꞌhua piyapiꞌsaꞌ aꞌparamaꞌ Coansha natanacaiso marëꞌ. ‘Co casoꞌ Cristocohuëꞌ. Inasoꞌ Cristo, Yosëri aꞌpaimarinsoꞌ,’ itërin. Noꞌtëquën naporin.

³⁴ Casoꞌ co piyapi noninsoachin yonquirahuëꞌ. Nipirinhuëꞌ, isoꞌ shaꞌhuitaranquëmaꞌ canpita natëtomaꞌ chaꞌëcamaso marëꞌ.

³⁵ Coanshasoꞌ noya quëmapi. Huaroro noya orotërinso pochin niꞌton, noya anitotërinquëmaꞌ. Yaꞌnan natanpatamara, huaꞌquimiachin paꞌyatëramaꞌ.

³⁶ Inasoꞌ noꞌtëquën shaꞌhuitërinquëmaꞌ. ‘Yosëri chachin Quisoso aꞌpaimarin,’ itërinquëmaꞌ. Nipirinhuëꞌ, co inasáchin anitotërinquëmahuëꞌ. Yosësoꞌ chini chiníquën nanantaton, catahuarinco niꞌton, sacaiꞌ nininsoꞌ ninahuë. Caniaꞌpiroꞌsaꞌ aꞌnaroáchin anoyatërahuë. Yosë nohuanton, ina pochin ninahuë. Ina marëꞌ naꞌcon naꞌcon natëamacosoꞌ yaꞌhuërin.

³⁷ Tatahuë aꞌpaimarincosontaꞌ nani shaꞌhuitërinquëmaꞌ. Co onporontaꞌ noninsoꞌ natanchinamahuëꞌ. Co niꞌchinamahuëꞌ.

³⁸ Nanamëntaꞌ co natëramahuëꞌ. Aꞌpaimapirincohuëꞌ co natëramacohuëꞌ niꞌton, naporamaꞌ.

³⁹ Yosë quiricanën naꞌcon nontëramaꞌ. ‘Ina nontohuatëhuaꞌ, nanpimiatacaiso marëꞌ anitotarinpoaꞌ,’ tënamaꞌ. Napopiramahuëꞌ, co tëhuënchachin natëramahuëꞌ. Ina quiricaquë chachin ninorinaco.

⁴⁰ Noꞌtëquën ninopirinacohuëꞌ, co yaimaramacohuëꞌ. Ananpimiataꞌhuanquëmasoꞌ yaꞌhuëpirinhuëꞌ, co nohuantëramacohuëꞌ.

⁴¹ Co canpita noya nicamacoso marëꞌ napotëranquëmahuëꞌ.

⁴² Nani nohuitëranquëmaꞌ. Co cancanëma quëran Yosë nosororamahuëꞌ, tënahuë.

⁴³ Yosë chachin aꞌpaimarinco niꞌton, oꞌmapirahuëꞌ, co nohuantëramacohuëꞌ. Aꞌnaquënso nipirinhuëꞌ inaora yonquinën quëran aꞌchintohuachinquëmaꞌ, nohuantaramaꞌ.

⁴⁴ Canpita capini nipaꞌyatacasoráchin yonquiatomaꞌ, co Yosë noya nicainquëmasoꞌ yonquiramahuëꞌ. Napoaton co natëramacohuëꞌ.

⁴⁵ Co carinquëmaꞌ Yosëquë shaꞌhuirapiaranquëmahuëꞌ. Moisësë tëhuënchinsoꞌ shaꞌhuirapiarinquëmaꞌ. ‘Ina catahuarinpoaꞌ,’ taꞌtomaꞌ, imapiramahuëꞌ, co natëramahuëꞌ niꞌton, shaꞌhuirapiarinquëmaꞌ.

⁴⁶ Inasoꞌ, iráca ninotonco ninshitërin. Ina natëramaꞌ naporini, cantaꞌ natëitomacohuëꞌ.

⁴⁷ Ninshitopirinhuëꞌ, co natëramahuëꞌ niꞌton, carinquëmantaꞌ aꞌchintopiranquëmahuëꞌ, ‘Co noꞌtëquën nonanhuëꞌ,’ itëramaco,” itërin Quisosori, cotio huaꞌanoꞌsaꞌ nontaton.