Juan 21 - Chayahuita (Shahui)

Yonsanquë yaꞌnotantarincoisoꞌ

¹ Ina quëran Tipiriasë sonoꞌ yonsanquë Quisoso yaꞌnotantarincoi. Niꞌnaisoꞌ shaꞌhuichinquëmaꞌ.

² Inaquë canchisë yaꞌpicoi nisarai. Aꞌnasoꞌ Simon Pitro. Aꞌnantaꞌ Tomasë, catopiaꞌhua itopisoꞌ. Aꞌnantaꞌ Natanino, Canaquë yaꞌhuërinsoꞌ. Sipitio huiꞌninpitacointaꞌ yaꞌhuërai. Aꞌnapitantaꞌ Quisoso caꞌtanpisopita, catoyaꞌpi, inapitaroꞌcoi canchisëcoi yaꞌhuërai.

³ —Riti tëꞌyatapo paꞌsarahuë, itërincoi Simon Pitro. —Paꞌsarai quiyantaꞌ, itërai. Potiquë yaꞌconconahuatoi, paꞌnai. Paꞌpiraihuëꞌ, yaꞌipi tashiꞌ riti tëꞌyatopiraihuëꞌ, co mantaꞌ manaihuëꞌ.

⁴ Piꞌi yapipirirahuasoꞌ, Quisoso yonsanquë huaniarin, niꞌpiraihuëꞌ, co nohuitëraihuëꞌ.

⁵ —¿Co iyaroꞌsaꞌ, mantaꞌ manamahuëꞌ ti? itërincoi. —Coꞌchi mantaꞌ manaihuë paya, itërai.

⁶ —Inchinan quëran tëꞌyatocoꞌ. Inaquë tëhuënchinsoꞌ masaramaꞌ, itërincoi. Ina quëran inchinan quëran tëꞌyatohuatëira, notohuaroꞌ sami manai. Naꞌa niꞌton, co nanitaparaihuëꞌ oshicaꞌhuaisoꞌ.

⁷ Naporoꞌ Sinioro nohuitërahuë huachi. —Pasosoꞌ Sinioro chachin, itërahuë Pitro. Itohuatëra, iꞌnanpirapi sacatarin niꞌton, aipi aꞌmorinsoꞌ aꞌnaroáchin masahuaton, aꞌmorin. Manorahuaton, iꞌquë niitërin.

⁸ Quiyasoꞌ potiquë paꞌnai. Riti ohuararahuatoi, yonsaiꞌpaꞌ quëparai. Co aquëyahuëꞌ. Pasa mitro pochin aquërinsoꞌ.

⁹ Nonshiconahuatoi, pën quënanconai. Inaquë sami chinsarin, niꞌconai. Paontaꞌ yaꞌhuërin.

¹⁰ —Sami manamasoꞌ caraya mamacoꞌ, itërincoi Quisoso.

¹¹ Simon Pitro potiquë yaꞌconahuaton, riti yonsanquë oshirin. Pasa aꞌnatërápo shonca cara sami yaꞌhuërin, panca samisachin. Ina nápoꞌ niponahuëꞌ, co riti oquirinhuëꞌ.

¹² —Huëcoꞌ iyaroꞌsaꞌ coshatahuaꞌ, itërincoi Quisoso. “¿Inquëntaꞌ quëmasoꞌ?” co itapoirahuëꞌ, Sinioro nohuitërai.

¹³ Pan masahuaton, quëtërincoi. Samintaꞌ quëtërincoi caꞌnai.

¹⁴ Nanpiantarin piquëran nani cararoꞌ caꞌtanoꞌsanënpitacoi quënanai.

Simon Pitro nontërinsoꞌ

¹⁵ Nani coshatohuatoira, Quisosori itërin: —Iya Simon, ¿isopita quëran naꞌcon naꞌcon nosoromiatëranco ti? itërin. —Nosororanquën Sinioro ina nitotëran, itërin. —Imarinacosopita carniroaꞌhuaroꞌsa pochin niꞌnahuë. Patontahuato, co incarisoꞌ aꞌpairarinhuëꞌ. Quëmari noya aꞌpaiton, aꞌchintëquëꞌ, itërin.

¹⁶ Ina quëran itaantarin: —¿Nosoromiatëranco ti? itërin. —Nosororanquën mini, Sinioro, ina nitotëran, itantarin. —Imarinacosopitasoꞌ, ohuicaroꞌsa pochin nipi niꞌton, aꞌpaiquëꞌ noya imamiachinaco, itërin.

¹⁷ Ina quëran naquëranchin itantarin: —Iya Simon, ¿tëhuënchachin nosororanco ti? itantarin. Cararoꞌ natanin niꞌton, Pitro sëtërin. —Yaꞌipi Sinioro nitotëran. Nosororanquën mini, ina nitotëran, itërin. —Imarinacosopitasoꞌ, ohuicaroꞌsa pochin nipi niꞌton, noya aꞌpaiquëꞌ.

¹⁸ Noꞌtëquën, iyasha, itaranquën. Quëmasoꞌ huiꞌnapitapon, quëmaora nohuanton, maꞌsha ninan. Intohuasoꞌ yapaꞌpatana, nitaparahuaton, paꞌnan. Nipirinhuëꞌ, aꞌna tahuëri mashotohuatan, maꞌsha onpotarinënquën. Cato quëran chachin anquiranꞌsoꞌ tonpoarinënquën. Co nohuantopiranhuëꞌ, quëpararinënquën, itërin Pitro.

¹⁹ Aꞌna tahuëri Yosë imarin niꞌton, inapotatonaꞌ, tëparapi. Ina niꞌpachinaꞌ, naꞌa piyapiꞌsari Yosë nóya niꞌsapi huachi. Ina ninoton, Quisoso naporin. Ina quëran: —Imamiatoco iyasha, itërin.

Tiquinamënquë ninshitërahuësoꞌ

²⁰ Iꞌhua coshatapoi, Quisoso pirayan coshatërahuë. Naporoꞌ “¿Intaꞌ Sinioro shaꞌhuirapiarinquënsoꞌ?” itërahuë Pitro nitotacaso marëꞌ. Iporasoꞌ sonoꞌ yonsanquë Pitro tahuërërahuaton, quënaninco.

²¹ Quënanahuatonco, Quisoso itapon: —Iso quëmapisoꞌ Sinioro, ¿maꞌtaꞌ onpoapon? itërin Pitrori.

²² —¿Onpoatontaꞌ iyasha, ina yonquiran? Nohuantohuato, oꞌmacaꞌhuaso tahuëri huarëꞌ nanpihuachin, co ina quëmasoꞌ yonquicamasoꞌ yaꞌhuërinhuëꞌ. Quëma imaco, itërin.

²³ Naporo quëran huarëꞌ imapisopita ninontopi. “Inasoꞌ co onporontaꞌ chiminarinhuëꞌ,” nitopi. Quisososo nipirinhuëꞌ co naporinhuëꞌ. “Nohuantohuato, oꞌmacaꞌhuaso tahuëri huarëꞌ nanpihuachin,” topachina, “co chiminaponhuëꞌ,” co tapon naporinhuëꞌ.

²⁴ Nani carinquëmasoꞌ shaꞌhuitëranquëmaꞌ. Noꞌtëquën ninshitëranquëmaꞌ. Yaꞌipiya nicatoi, nitotërai.

²⁵ Naꞌcon Quisoso aꞌchinin. Nani maꞌsha ninin. Co insontaꞌ nanitaparinhuëꞌ yaꞌipiya ninshitacasoꞌ. Ina nápoꞌ quirica ninshitërai naporini, co isoroꞌpaquë tërantaꞌ naniitonhuëꞌ, topirahuëꞌ. Nani huachi.