Juan 20 - Chayahuita (Shahui)

Quisoso nanpiantarinsoꞌ

¹ Tomio tahuëri nipachina, tashiyachin Maria Mactarina paꞌnin Quisoso poꞌmopiquë nicapon. Co noya tahuëriyátërasohuëꞌ, canconin. Canconahuaton niꞌpirinhuëꞌ, naꞌpi paꞌcopitopisoꞌ chiꞌhuincapinan quënanconin.

² “Quisoso nonën nani quëpapi,” taꞌton, taꞌaquirin. Canquirahuaton, Simon Pitroroꞌcoi shaꞌhuitiirincoi. —¡Sinioro nonën poꞌmopi quëran, nani quëpapi! Intohuasoꞌ quëpapisoꞌ co nitotërahuëꞌ, itiirincoi.

³ Napotohuachincoira, naꞌpi naninꞌpaꞌ paꞌnai.

⁴ Napopianachin taꞌapiraihuëꞌ, Pitro naꞌhuëtërarahuato, caꞌton canconahuë.

⁵ Monshorahuato, nëhuëconahuë. Morinquë soꞌpinpisoachin quënanconahuë. Nipirinhuëꞌ, co yaꞌconahuëꞌ.

⁶ Ca piquëran Simon Pitro canconahuaton, yaꞌconin. Morin Quisoso soꞌpinpisoꞌ niꞌconin antaꞌ.

⁷ Nëꞌmëtëꞌ soꞌpinayapisontaꞌ quënanin. Inasoꞌ nisha quëhuëánin. Inantaꞌ soꞌpinpinan.

⁸ Ina quëran cantaꞌ yaꞌconahuë. Nëꞌmëtëꞌ soꞌpinpisoꞌ niꞌsahuato, natërahuë. “Tëhuënchachin Quisoso nanpiantarin,” tënahuë.

⁹ Yosë quiricanënquë iráca ninshitatonaꞌ: “Nanpiantararin,” topirinahuëꞌ, co yonquiyátëraraihuëꞌ.

¹⁰ Nani niꞌpatëira, yaꞌhuëraiꞌpaꞌ paantarai.

Maria Mactarina yaꞌnotërinsoꞌ

¹¹ Mariaso nipirinhuëꞌ huëantarahuaton, Quisoso poꞌmopisoꞌ aipiran huaniquiantarin. Chiníquën naꞌnërárin. Naꞌnëárin quëran monshorin naꞌpi naninquë nëhuëcaso marëꞌ.

¹² Nëhuëpirinhuëꞌ, catoꞌ anquëniroꞌsaꞌ quënanin, huiríchin aꞌmopisoꞌ. Quisoso nonën acopiquë huënsëapi. Aꞌnaꞌ motën quëran huënsëarin. Aꞌnantaꞌ nantën parti quëran huënsëarin.

¹³ —¿Onpoatontaꞌ naꞌnëaran? itërin anquëniri. —Sinioronëhuë nonën nani quëpapi. Intohuasoꞌ quëpapisoꞌ co nitotërahuëꞌ, itërin.

¹⁴ Tahuërëtahuaton, Quisoso chachin quënanaponahuëꞌ, co nohuitërinhuëꞌ.

¹⁵ —¿Onpoatontaꞌ imoya naꞌnëaran? ¿Intaꞌ yonisaran? itërin Quisosori. Mariaso napoaponahuëꞌ: “Sacatonaꞌpi taꞌmaꞌ,” tëcaton: —Quëmari imoya Quisoso nonën quëpahuatan, shaꞌhuitoco macontaꞌi, itërin.

¹⁶ —¡Maria! itërin Quisosori. Tahuërëtahuaton, nohuitërin huachi. Inaora nananquë nontaton; —¡Raponi! itërin. Maistro tapon naporin.

¹⁷ —Aꞌpoco imoya. Co tatahuë yaꞌhuërinꞌpaꞌ pantayátërarahuëꞌ. Apira paaton, iyahuëpita pochin niꞌnahuësopita shaꞌhuitonquëꞌ: “Yosë yaꞌhuërinꞌpaꞌ panantarahuë. Inasoꞌ: ‘Tata,’ itato chinotërahuë. Canpitantaꞌ imaramaco niꞌton, ‘Tata,’ itatomaꞌ chinotëramaꞌ, tënin Quisoso, itonquëꞌ,” itërin.

¹⁸ Ina natanahuaton, Maria paaton, itaponcoi: “¡Sinioro chachin nani niꞌnahuë!” itiirincoi. Yaꞌipi shaꞌhuitërinso chachin shaꞌhuitërincoi.

Caꞌtanoꞌsanënpitacoi yaꞌnotaantarincoisoꞌ

¹⁹ Naporoꞌ tahuëri Tomio tahuëri. Tashihuachina, pëiquë yaꞌhuarai. Cotioroꞌsaꞌ tëꞌhuatatoi, yaꞌcoana noyá oncotopiraihuëꞌ, Quisoso aꞌnanaya huancánachin yaꞌnotatoncoi: —Tashita iyaroꞌsaꞌ. Sano cancantocoꞌ, itërincoi.

²⁰ Itahuatoncoi, imirin aꞌnotërincoi. Nininpitëontaꞌ aꞌnotërincoi. Ohuanpisoꞌ niꞌnai. Sinioro chachin niꞌsahuatoi, “Ina mini,” taꞌtoi, nóya cancantërai.

²¹ —Sano cancantocoꞌ iyaroꞌsaꞌ. Tatahuë aꞌparincoso pochachin canpitantaꞌ aꞌpaaranquëmaꞌ piyapiꞌsaꞌ aꞌchintacamaso marëꞌ, itërincoi.

²² Ina quëran pihuirahuaton, —Ispirito Santo yaꞌcoancanchinquëma huachi. Ina catahuarinquëmaꞌ noꞌtëquën pënëntacamasoꞌ.

²³ Insosona natëhuachinquëmaꞌ, “Oshanën iyasha Yosë inquitarinquën,” itocoꞌ. Inquitarin mini. Nipirinhuëꞌ, co yanatëhuachinquëmahuëꞌ, “Co oshanën iyasha inquitarinquënhuëꞌ,” itocoꞌ. Tëhuënchachin co inquitarinhuëꞌ, itërincoi. Itahuatoncoi, paꞌnin.

Tomasëri quënanaton, natërinsoꞌ

²⁴ Naporoꞌ shoncayáchincoi yaꞌhuërai. Tomasësoꞌ co yaꞌhuërinhuëꞌ. Inasoꞌ: “Catopiaꞌhua,” itopi.

²⁵ Quisoso quënanahuatoi, Tomasë shaꞌhuitonai: —Sinioro niꞌnai, itopiraihuëꞌ, co yanatërincoihuëꞌ. —Imirin ohuantopisoꞌ nicato sëꞌhuata huarëꞌ, nininpitëontaꞌ ohuantopisoꞌ sëꞌhuata huarëꞌ, natëarahuëꞌ, itërincoi Tomasë.

²⁶ Posa tahuëri quëran niyontoantahuatoira, Tomasëntaꞌ inaquë nisarin. Naquëranchin yaꞌcoana noya oncotaantapiraihuëꞌ. Quisoso aꞌnaroáchin huancánachin yaꞌnoantarahuaton: —Tashita iyaroꞌsaꞌ. Sano cancantocoꞌ, itërincoi.

²⁷ Ina quëran anquirahuaton, Tomasë itërin: —Imirahuë iyasha nicaton, sëꞌhuaquëꞌ. Nininpitëhuëntaꞌ sëꞌhuatoco. Ama huachi nisha nisha yonquiquësohuëꞌ. Natëco huachi, itërin.

²⁸ —¡Quëma mini Sinioronëhuënquën! Natëranquën. Yosënëhuënquën niꞌton, chinotaranquën, itërin Tomasëri.

²⁹ —Niꞌnanco niꞌton iyasha, natëranco. Aꞌnapitasoꞌ co nicaponaracohuëꞌ, natëarinaco. Inapitasoꞌ noya noya cancantapi, itërin Quisosori.

Maꞌmarësona iso quirica ninshitërahuësoꞌ

³⁰ Quisoso nani maꞌsha Yosë pochin ninin piyapiꞌsari natëcaiso marëꞌ. Caꞌtanoꞌsanënpitacoi niꞌpiraihuëꞌ, co yaꞌipiya isëquë ninshitëranquëmahuëꞌ.

³¹ Iso quiricaquë ninshitërahuësopitasoꞌ, Quisoso natëcamaso marëꞌ ninshitërahuë: “Inasoꞌ tëhuënchachin Cristo, Yosë huiꞌnin. Inari aꞌpaimarinsoꞌ,” taꞌtomaꞌ, ina imaco huachi. Imapatamaꞌ, Yosë nohuitatomaꞌ nanpimiataramaꞌ.