Juan 18 - Chayahuita (Shahui)

Quisoso mapisoꞌ

¹ Nani Yosë nontohuachina, Sitron itopisoꞌ iꞌshanantëꞌ aquëtëran paꞌnai. Inaquë nararoaꞌhua yaꞌhuërin.

² Inatohuaꞌ naꞌaroꞌ niyontonai niꞌton, Cotasërintaꞌ nohuitërin. Inasoꞌ yashaꞌhuirapirinsoꞌ.

³ Corto huaꞌanoꞌsaꞌ, parisioroꞌsaꞌ, inapita nani shaꞌhuitonin. Natanahuatonaꞌ, sontaroꞌsaꞌ, ponisiaroꞌsaꞌ, inapita aꞌpapi Quisoso macacaiso marëꞌ. Nansa, sahuëni, inapita quëpapi. Tashiꞌ niꞌton, nanparin, yonarin, inapitantaꞌ quëpapi. Cotasëri quëchitërahuaton, aꞌnotërin.

⁴ Quisososoꞌ yaꞌipiya ninoponahuëꞌ, co taꞌarinhuëꞌ. Nacapiapon paꞌnin. —¿Intaꞌ yonisaramaꞌ? itërin.

⁵ —Quisoso Nasaritoquë yaꞌhuërinsoꞌ, itopi. —Ca mini inaco, itërin. Cotasëntaꞌ inaquë huaniarin antaꞌ.

⁶ —Ca mini inaco, itohuachina, paꞌyanpi. Aꞌna achiraꞌ pinën parti paꞌsahuatonaꞌ, pinëna quëran anotopi.

⁷ Ina quëran naquëranchin itantarin: —¿Intaꞌ yonisaramaꞌ? itantarin. —Quisoso Nasaritoquë yaꞌhuërinsoꞌ, itantapi.

⁸ —Nani shaꞌhuitëranquëmaꞌ. Ca mini. Ca nohuantohuatamaco, isopitasoꞌ tananpitocoꞌ paꞌinaꞌ, itërin.

⁹ Achin Yosë nontaton, itërin: “Quëma nohuanton, isopita imasarinaco. Noya aꞌpaiarahuë. Co aꞌnaya tërantaꞌ aꞌpoarinacohuëꞌ,” itërin. Ina nanicaso marëꞌ: “Tananpitocoꞌ paꞌinaꞌ,” itërin.

¹⁰ Napopirinhuëꞌ, Simon Pitrosoꞌ sahuëninën ocoirahuaton, corto huaꞌan inpriatonën Marco itopisoꞌ ahuërin. Inapotaton, inchinan huëratën nishitëhuëratëtërin.

¹¹ Quisososo nipirinhuëꞌ co nohuantërinhuëꞌ. —Sahuëni iyasha poꞌmoantaquëꞌ. Tananpitëquëꞌ mainaco. Tatahuë nohuanton, masarinaco. Main oꞌorëso pochin chiníquën parisitarahuë. ¿Co ina nitotëranhuëꞌ ti? itërin.

Corto huaꞌan pëinënquë quëpapisoꞌ

¹² Ina quëran sontaroꞌsaꞌ, capitan, cotio ponisiaroꞌsaꞌ, inapita huëꞌsahuatonaꞌ, Quisoso mapi. Masahuatonaꞌ, tanpaquën noyá tonporahuatonaꞌ,

¹³ Anasëtaquë quëpapi. Inasoꞌ Caihuasë miꞌsën. Naporoꞌ piꞌipi Caihuasë corto huaꞌan chini chiníquën nanantërinsoꞌ yaꞌconin.

¹⁴ Iꞌhua inasoꞌ cotioroꞌsaꞌ shaꞌhuitërin: “Ama yaꞌipinpoaꞌ chiminacaso marëhuëꞌ ina chimiꞌin, tënahuë,” itërin. Inaquë quëpapi natanacaiso marëꞌ.

Pitrori nonpinapirinsoꞌ

¹⁵ Caꞌtanoꞌsanënpitasoꞌ paꞌpi. Simon Pitroso nipirinhuëꞌ, Quisoso imaquirin. Cantaꞌ imaquirahuë. Casoꞌ corto huaꞌan nohuitërinco niꞌton, Quisoso acoana quëpahuachinara, pairanaquë chachin yaꞌconahuë.

¹⁶ Pitrosoꞌ yaꞌcoana aipiran huaniárin. Napohuachina, yaꞌcoana aꞌpairinsoꞌ sanapi nontërahuë Pitrontaꞌ yaꞌconacaso marëꞌ. Nontohuatëra, yaꞌconin antaꞌ.

¹⁷ Pitro yaꞌconpachina, sanapiri itërin: —Quëmantaꞌ mini Quisoso imaran, itërin. —Coꞌchi casoꞌ imarahuë paya, itërin Pitrori.

¹⁸ Naporoꞌ tashiꞌ sëhuën niꞌton, ponisiaroꞌsaꞌ, inpriatoroꞌsaꞌ, inapita pëyara quëran nani aꞌpëtopi. Inaquë huanirahuatonaꞌ, napëntapi. Pitrontaꞌ inaquë napëntapatarin.

Corto huaꞌani nataninsoꞌ

¹⁹ Ina quëran Quisososoꞌ natanapi: —¿Maꞌtaꞌ aꞌchinan? ¿Inpitataꞌ imarinënquën? itërin corto huaꞌani.

²⁰ —Casoꞌ aꞌninquëchin piyapiꞌsaꞌ aꞌchintërahuë. Niyontonpiso pëiquë, Yosë chinotopiso pëiquë, inaquëpita cotioroꞌsaꞌ niyontonpachinara, aꞌchintërahuë. Co poꞌoana quëran aꞌchinahuëꞌ.

²¹ ¿Onpoatontaꞌ natananco? Naꞌa piyapiꞌsaꞌ nataninaco, nani nitotopi. Inapita natanquëꞌ shaꞌhuichinën, itërin.

²² Itohuachina, ponisiari panpirayarin. —Corto huaꞌan chini chiníquën nanantërinso nipirinhuëꞌ, ¿ina pochin aꞌpaniran ti? itërin ponisiari.

²³ —Co noyahuëꞌ nonahuë nipachin, shaꞌhuitoco maquëta tëhuërahuë. Nipirinhuëꞌ, noꞌtëquën nonahuë nipachinsoꞌ, ¿onpoatontaꞌ ahuëranco? itërin.

²⁴ Ina natanahuaton, huaꞌani aꞌparin Caihuasë nontacaso marëꞌ. Tonpopinan quëpapi.

Naquëranchin Pitrori nonpinapiantarinsoꞌ

²⁵ Simon Pitroso nipirinhuëꞌ huaniton, napëntarin. —¿Quëmarintaꞌ iso quëmapi imamaranquën ti? itërin ponisiari. —Coꞌchi imarahuë paya, itantarin.

²⁶ Ina quëran cotio huaꞌan piyapinëni quënanin. Ina quëmopinën chachin Pitrori nishitëhuëratëtërinsoꞌ niꞌton, piꞌpian nohuitërin. Pitro quënanahuaton, itërin: —¿Coꞌta Quisoso mapiquë quënananquën pora? itërin.

²⁷ —Coꞌchi cahuë paya, itaantarin Pitrori. Naporoꞌ atari përarin, natanin.

Pirato quëtonpisoꞌ

²⁸ Tashíramiachin nisahuasoꞌ, Caihuasë pëinën quëran quëparahuatonaꞌ, Noma huaꞌan pëinënquë quëpapi. Cotioroꞌsaso nipirinhuëꞌ co inaquë yaꞌconpihuëꞌ. “Nisha piyapiꞌsaꞌ pëinënquë yaꞌconpatëhuaꞌ, oshahuanarihuaꞌ. Ina quëran co nanitarihuahuëꞌ Pascoa cosharoꞌ capacasoꞌ,” topi.

²⁹ Napoaton Pirato pipirahuaton, inapita nontërin. —¿Maꞌtaꞌ onporin iso quëmapi? itërin.

³⁰ —Paꞌpi co noyahuëꞌ. Noya ninin naporini, co quëshiitënquënhuëꞌ, itopi.

³¹ —Canpitari quëpacoꞌ. Iráca quëran huarëꞌ nipënënamasoꞌ co natëhuachinhuëꞌ, anaꞌintocoꞌ, itërin. —Co quiyasoꞌ nanitëraihuëꞌ. Co nanan yaꞌhuëtërincoihuëꞌ piyapiꞌsaꞌ tëpacaꞌhuaisoꞌ, itopi.

³² Iꞌhua Quisoso ninoton nani shaꞌhuirin: “Aꞌna tahuëri inápaquë achinpiarinaco,” tënin. Yosë nohuanton, onpotatonasona tëpacaisoꞌ naniarin.

³³ Ina quëran Piratori pëiquë yaꞌcoantarahuaton, Quisoso itapon: —¿Quëmasoꞌ cotio copirnonquën ti? itërin.

³⁴ —¿Quëmaora yonquinën quëran napoaran? ¿Aꞌnapita shaꞌhuitërinquën nica? itërin.

³⁵ —“Cotio piyapi inantaꞌ,” ¿topiranhuëꞌ ti? Casoꞌ nishaco. Cotioroꞌsaꞌ shaꞌhuirapirinënquën. Corto huaꞌanoꞌsa chachin yoꞌquirinën anaꞌintaꞌhuanquënso marëꞌ. ¿Maꞌtaꞌ onporan niꞌton, yatëparinënquën? itërin.

³⁶ —Co casoꞌ isoroꞌpaquë huaꞌanëntarahuëꞌ. Ina nohuantërahuë naporini, imarinacosopita sontaroꞌsa pochin niitonahuëꞌ. Ama cotioroꞌsaꞌ macainacoso marëhuëꞌ chiníquën ahuëchitonahuëꞌ. Caso nipirinhuëꞌ nisha pochin huaꞌanëntarahuë, itërin.

³⁷ —Napoahuarëꞌ ¿quëmasoꞌ copirnonquën? itërin Piratori. —Inaco mini. Ina marëꞌ nasitimarahuë. Oꞌmarahuë noꞌtën nanan pënëntaꞌhuaso marëꞌ. Noꞌtëquën yonquipisopita natëarinaco, itërin.

³⁸ —¿Ma noꞌtën nanancha napotëran nicaya? itërin Piratori. Ina tosahuaton, pipiantarahuaton, cotioroꞌsaꞌ itantarin: —Iso quëmapi noya, tënahuë. Co mantaꞌ onporinhuëꞌ. Co anaꞌintacasoꞌ yaꞌhuërinhuëꞌ.

Quisoso tëpacasoꞌ shaꞌhuirinsoꞌ

³⁹ Napoaton shaꞌhuichinquëmaꞌ. Nani Pascoa tahuëri aꞌnaraꞌ apinaꞌpi tashinan pëi quëran ocoirahuë pipicaso marëꞌ. ¿Nohuantëramaꞌ cotio copirno ocoicaꞌhuasoꞌ? itërin.

⁴⁰ Natanahuatonaꞌ, chiníquën aꞌpanitopi: —¡Ama ina ocoiquësohuëꞌ! ¡Parapasë ocoiquëꞌ! itopi. Inasoꞌ matararo nipirinhuëꞌ napotopi.