Juan 17 - Chayahuita (Shahui)

Quisoso, imarinsopita marëꞌ Yosë nontërinsoꞌ

¹ Ina tosahuaton, inápaquë nëꞌpëtërin Yosë nontacaso marëꞌ: “Nani Tata ora naniarin chiminaꞌhuasoꞌ. Aparisitohuachinaco, catahuaco quëma pochachin cancantato, noya natëinquën. Ina quëran aꞌnapita nicatonaco, noya noya yonquiarinënquën. Quëma huiꞌnanco niꞌto, napotaranquën.

² Nani chiníquën nanan quëtëranco yaꞌipi piyapiꞌsaꞌ huaꞌanëntaꞌhuaso marëꞌ. Quëma nohuanton, aꞌnaquën imasarinaco. Inapitasoꞌ anoyacancantërahuë quëma nohuitatënën nanpimiatacaiso marëꞌ.

³ Quëmasáchin Yosënquën. Isoroꞌpaquë aꞌpaimaranco. Piyapiꞌsaꞌ nohuitahuatënënquën, cantaꞌ nohuitohuachinaco, nanpimiatapi.

⁴ Piyapiꞌsaꞌ nichaꞌëcaꞌhuaso marëꞌ aꞌpaimaranco. Yaꞌipi shaꞌhuitërancosoꞌ natëarahuë. Yaꞌipi tiquirahuë. Quëmasáchin natëranquën niꞌton, piyapiꞌsaꞌ noya niꞌsarinënquën.

⁵ Iráca coꞌhuara isoroꞌpaꞌ yaꞌhuëyátërasohuëꞌ, quëmaroꞌco noya noya yaꞌhuëpirahuëꞌ, aꞌpaimaranco. Iporasoꞌ, Tata, quëmataquë naquëranchin acoantaco quëmaroꞌco chachin yaꞌhuantaꞌi.

⁶ Quëma nohuanton, aꞌnaya aꞌnaya imasarinaco. Isoroꞌpaquë yaꞌhuëpirinahuëꞌ, huayonan imainacoso marëꞌ. Napoaton, imasarinaco. Nani aꞌchintërahuë. Onpopinsona quëma cancantëransoꞌ nani anitotërahuë niꞌton, nohuitërinënquën. Inapitasoꞌ quëma piyapinënpita. Iráca quëran huarëꞌ yonquiran imainacosoꞌ. Quëma nanamën natëpi.

⁷ Caora yonquinëhuë quëran co mantaꞌ ninahuëꞌ. Quëma shaꞌhuitohuatancora, natëranquën. Ina nitotopi.

⁸ Shaꞌhuitohuatancora, inachachin aꞌchintërahuë, natëtopi. Quëmá quëran oꞌmarahuë. Quëma chachin aꞌpaimarancosontaꞌ natëpi.

⁹ Imarinacosopita marëꞌ chiníquën nontaranquën. Huiꞌnanpita pochin niꞌnan. Iráca quëran huarëꞌ yonquiran imainacosoꞌ. Aꞌnapitasoꞌ co imarinacohuëꞌ. Co inapita marëꞌ nontaranquënhuëꞌ.

¹⁰ Yaꞌipi imarinacosopita imarinënquën quëmantaꞌ. Quëmari huiꞌnanpita pochin cancantëran. Napopianachin imarinënpoꞌ. Noya natërinaco niꞌton, piyapiꞌsaꞌ noya niꞌsarinaco.

¹¹ Co huaꞌquiya quëranhuëꞌ quëmataquë paantarahuë. Isoroꞌpasoꞌ patarahuë. Imarinacosopitaso nipirinhuëꞌ, isëquë yaꞌhuaponaꞌ. Quëma nohuanton, imasarinaco. Quëmasoꞌ Tata nóyanquën niꞌton, noya aꞌpaiquëꞌ imamiachinaco. Yaꞌipiya nanitaparan niꞌton, catahuaquëꞌ napopianachin yonquiꞌinaꞌ. Canpoꞌ ninosororëso pochin ninosoroꞌinaꞌ.

¹² Inapitaroꞌco yaꞌhuasoco, quëma nanamën aꞌchintërahuë, pënënahuë, naꞌcon catahuarahuë imamiatinacoso marëꞌ. Noya aꞌpairahuë. Co aꞌnaya tërantaꞌ aꞌpoarinacohuëꞌ. Aꞌnaíchin pipirin, parisitopiquë pacacasoꞌ yaꞌhuërinsoꞌ. Quëma quiricanënquë ninoranso chachin nanirin.

¹³ Iporaso nipirinhuëꞌ yaꞌhuëranquë paantarahuë. Coꞌhuara pantayatërapohuëꞌ, isoroꞌpa quëran chachin, nontaranquën imarinacosopita noya cancantacaiso marëꞌ. Yaꞌipi cancanëhuë quëran natëranquën niꞌton, noya cancantërahuë. Catahuaquë inapitantaꞌ ca pochachin noya cancanchinaꞌ.

¹⁴ Quëma nanamën chachin nani aꞌchintërahuë. Co imarinacosopitarihuëꞌ noꞌhuipi. Co inapita pochin cancantopihuëꞌ niꞌton, noꞌhuipi. Cantaꞌ co inapita pochin cancantërahuëꞌ.

¹⁵ Co nohuantërahuëꞌ isoroꞌpa quëran ocoicamasoꞌ. Isëquë yaꞌhuëpirinahuëꞌ, catahuaquëꞌ ama sopairi minsëinsohuëꞌ.

¹⁶ Naꞌa piyapiꞌsaꞌ co noyahuëꞌ nipirinahuëꞌ, co casoꞌ inapita pochin cancantërahuëꞌ. Imarinacosopitantaꞌ co inapita pochin cancantopihuëꞌ.

¹⁷ Catahuaquëꞌ quëmasáchin cancanchinën. Noꞌtëquën ayonquiquëꞌ noya nicacaiso marëꞌ. Quëma nanamën quëran noꞌtëquën anitotëran.

¹⁸ Isoroꞌpaquë aꞌpaimaranco. Inapochachin inapitantaꞌ aꞌparahuë piyapiꞌsaꞌ aꞌchintacaiso marëꞌ.

¹⁹ Imarinacosopita nosoroato, yaꞌipi cancanëhuë quëran quëmasáchin natëaranquën. Inapitantaꞌ noꞌtëquën yonquiatonaꞌ, nóya natëinënquën.

²⁰ Co isopita marëáchin nontaranquënhuëꞌ. Aꞌna tahuëri inapitanta aꞌnapita aꞌchintohuachinaꞌ, imasarinaco.

²¹ Inapitantaꞌ catahuaquëꞌ napopianachin yonquiꞌinaꞌ. Canpoꞌ ninosororëso pochin ninosoroꞌinaꞌ. Quëma huiꞌnanco niꞌto, yonquiranso chachin yonquirahuë. Inapitantaꞌ catahuaquëꞌ canpo pochachin yonquiꞌinaꞌ. Ina quëran aꞌnapitantaꞌ natëarinaco. ‘Yosëri chachin aꞌpaimarin,’ tosapi.

²² Quëma nohuanton, noyápiachin cancantërahuë. Imarinacosopitantaꞌ catahuarahuë noyápiachin cancantacaiso marëꞌ. Ina quëran aꞌna huënton pochin napopianachin yonquiapi. Canpo pochachin cancantapi.

²³ Quëma pochachin yonquiato, inapita yaꞌcoancantërahuë canpo pochachin yonquicaiso marëꞌ. Ina quëran co imapisopitahuëntaꞌ nicatonaꞌ: ‘Tëhuënchachin Yosëri huiꞌnin aꞌpaimarin. Huiꞌnin nosororinso pochin imarinsopitantaꞌ nosororin,’ tosapi.

²⁴ Quëma nohuanton Tata, isopitasoꞌ imasarinaco. Inapita nohuantërahuë carëꞌ yaꞌhuëcaisoꞌ. Iráca quëran huarëꞌ quëma nosororanco. Coꞌhuara isoroꞌpaꞌ yaꞌhuëyátërasohuëꞌ, nosoroatonco, nóya acoranco. Inatohuaꞌ inapitantaꞌ pantahuachinaꞌ, noya noya niꞌsarinaco. Ina naꞌcon nohuantërahuë.

²⁵ Quëmasoꞌ Tata noꞌtëquënáchin yonquiaton, noyasáchin ninan. Co imarinacosopitahuëꞌ co nohuitërinënquënhuëꞌ. Caso nipirinhuëꞌ nohuitëranquën. Quëma isoroꞌpaquë aꞌpaimaranco. Imarinacosopita nitotopi.

²⁶ Quëma nanamën nani aꞌchintërahuë nohuitinënquënso marëꞌ. Ipora huantaꞌ aꞌchintarahuë niꞌton, noya noya nohuitarinënquën. Quëma nosororancoso pochachin ninosorocaiso marëꞌ. Inapohuachinaꞌ, inapita yaꞌcoancantato, yaꞌhuëmiatarahuë,” itërin.