Juan 15 - Chayahuita (Shahui)

Opa naraꞌhuaya nitërinso pochin nininsoꞌ

¹ Ina quëran itantarincoi: “Casáchin noꞌtëquën aꞌchintatënquëmaꞌ, opa naraꞌhuaya pochin ninahuë. Tata Yosësoꞌ huaꞌanën pochin ninin.

² Aꞌna sëꞌpaquën co nitohuachinahuëꞌ, nishitëtërin. Aꞌnaquënso nipirinhuëꞌ piꞌpian nitërin. Ina sëꞌparaꞌhuainpita piꞌpian niꞌquitërin naꞌcon naꞌcon nitacaso marëꞌ. Co niꞌquitohuatërahuëꞌ, co noya nitërinhuëꞌ.

³ Carinquëmaꞌ nani anoyacancantëranquëmaꞌ. Aꞌchintëranquëmasoꞌ natëramaꞌ niꞌton, anoyacancantëranquëmaꞌ.

⁴ Imamiatatomaco, nani tahuëri yonquiráco catahuainquëmaꞌ. Noya nichinpitërinso pochin nicoꞌ. Nara sëꞌpaꞌ nohuishatohuachina, co nitërinhuëꞌ. Inapochachin co imamiatohuatamacohuëꞌ, co nanitaparamahuëꞌ noya nicacamasoꞌ.

⁵ Ca opa yaꞌhuë pochinco. Canpitasoꞌ sëꞌpaquën pochinquëmaꞌ. Yaꞌcoancantaranquëmaꞌ. Nani tahuëri yonquihuatamaco, catahuaaranquëmaꞌ. Opa noya nitërinso pochin noya nisaramaꞌ. Canpitaora co nanitaramahuëꞌ Yosë pochin cancantacamasoꞌ.

⁶ Nara sëꞌpaꞌ nohuishatohuachina, ahuirin. Masahuatonaꞌ, pënquë tëꞌyatopi ahuiquitacaiso marëꞌ. Inapochachin co imamiatohuatamacohuëꞌ, Yosë anaꞌintarinquëmaꞌ.

⁷ Casáchin yonquihuatamaco, naꞌcon catahuaaranquëmaꞌ. Aꞌchintëranquëmasontaꞌ ama naniantocosohuëꞌ. Ina yonquiatomaꞌ, Yosë nontocoꞌ. Tëhuënchachin imamiatohuatamaco, maꞌsona nohuantohuatamaꞌ, shaꞌhuitoco acochinquëmaꞌ.

⁸ Opa naꞌcon nitërinso pochin canpitantaꞌ noya noya nicoꞌ. Ina quëran aꞌnapitantaꞌ nicatënënquëmaꞌ, Yosë yonquiaponaꞌ. Naporahuatomaꞌ, noya noya imasaramaco.

⁹ Tata Yosë nosororincoso pochachin nosororanquëmaꞌ. Casáchin yonquico naꞌcon nosoroꞌinquëmaꞌ.

¹⁰ Tata Yosë noꞌtëquën natërahuë niꞌton, paꞌpi nosororinco. Inapochachin natëhuatamaco, carinquëmantaꞌ paꞌpi nosoroaranquëmaꞌ.

¹¹ Yaꞌipi cancanëhuë quëran Tatahuë natërahuë niꞌton, nóya cancantërahuë. Natëhuatamaco, ca pochachin noya cancantaramaꞌ. Co sëtaramahuëꞌ. Ina marëꞌ aꞌchintëranquëmaꞌ.

¹² Nani pënënanquëmaꞌ noya ninosorocamaso marëꞌ. Carinquëmaꞌ nosororanquëmaso pochachin canpitantaꞌ ninosorocoꞌ. Ina paꞌpi nohuantërahuë nicacamasoꞌ.

¹³ Niꞌcoꞌ iyaroꞌsaꞌ. Nipayarësoꞌ naꞌcon nosorohuatëra, ina nichaꞌëcaso marëꞌ chiminëꞌ. Inapochachin cantaꞌ naꞌcon nosoroatënquëmaꞌ, canpita nichaꞌëcaꞌhuanquëmaso marëꞌ chiminarahuë. Co insontaꞌ ina pochin nosororinquëmahuëꞌ.

¹⁴ Natëhuatamaco, tëhuënchachin nipayarahuëso pochin niꞌsaranquëmaꞌ.

¹⁵ Co casoꞌ patron pochin cancantërahuëꞌ. Patronsoꞌ piyapinënpita camairin. Camaipirinhuëꞌ, yonquirinso chachin co shaꞌhuitërinhuëꞌ. Nipayarinso nipirinhuëꞌ yaꞌipiya shaꞌhuitërin. Inapochachin carinquëmantaꞌ yaꞌipiya shaꞌhuitëranquëmaꞌ. Co piyapinëhuë pochin niꞌnanquëmahuëꞌ. Nipayarahuëso pochachin niꞌnanquëmaꞌ. Yaꞌipi Tatahuë shaꞌhuitërincosopita anitotëranquëmaꞌ.

¹⁶ Co canpitaora nohuanton imaramacohuëꞌ. Ca nohuanto, imaramaco. Carinquëmaꞌ huayonanquëmaꞌ. Nani acoranquëma opa sëꞌpaquën naꞌcon nitërinso pochin nisápamaso marëꞌ. Inapohuatamaꞌ: ‘Quisoso nanan quëtërinco,’ taꞌtomaꞌ, Yosë nontocoꞌ catahuainquëmaꞌ. Ca pochin yonquiatomaꞌ, maꞌsona nipatamaꞌ, acochinquëmaꞌ.

¹⁷ Nani pënënanquëmaꞌ. ‘Imaramacosopita capini ninosorocoꞌ,’ itëranquëmaꞌ,” tënin.

Piyapiꞌsaꞌ noꞌhuirinënpoasoꞌ

¹⁸ Ina quëran itantarincoi: “Co imarinacosohuëꞌ noꞌhuihuachinënquëmaꞌ, ama paꞌyancosohuëꞌ. Caꞌton noꞌhuirinacoso, nitotëramaꞌ.

¹⁹ Inapita pochin cancantëramaꞌ naporini, noya niꞌitënënquëmahuëꞌ. Inahua capiniráchin nipaꞌyatopi. Nipirinhuëꞌ, nani huayonanquëmaꞌ. Ca nohuanto, co inapita pochin cancantëramahuëꞌ. Imaramaco niꞌton, noꞌhuiarinënquëmaꞌ.

²⁰ Noꞌhuirinaco niꞌton, canpitantaꞌ noꞌhuiarinënquëmaꞌ. Nani shaꞌhuitëranquëmaꞌ: ‘Huaꞌanëmaco niꞌton, co canpitasoꞌ noya noya niꞌsarinënquëmahuëꞌ,’ itëranquëmaꞌ. Aparisitërinaco niꞌton, canpitantaꞌ aparisitarinënquëmaꞌ. Aꞌchinahuësoꞌ natëhuachinaꞌ, canpitantaꞌ natëarinënquëmaꞌ.

²¹ Napoaponahuëꞌ, imaramaco niꞌton, naꞌcon naꞌcon piyapiꞌsaꞌ aparisitarinënquëmaꞌ. Tata Yosë aꞌpaimarincosoꞌ co nohuitopihuëꞌ niꞌton, noꞌhuiarinënquëmaꞌ.

²² Co oꞌmato, aꞌchintërahuëꞌ naporini, co aꞌporinacoso marëꞌ oshahuaintonahuëꞌ. Nani aꞌchintopirahuëꞌ. Co natëtonacohuëꞌ, oshahuanpi niꞌton, Yosëri anaꞌintarin.

²³ Insopitasoꞌ noꞌhuihuachinaco, Tata Yosëntaꞌ noꞌhuiapi.

²⁴ Naꞌa piyapiꞌsaꞌ aꞌnaroáchin anoyatërahuë. Nani maꞌsha Yosë pochin ninahuë. Aꞌnapita piyapiꞌsasoꞌ co nanitapapihuëꞌ. Yosë anohuitaꞌhuaso marëꞌ sacaiꞌ nininsoꞌ aꞌnotërahuë. Co aꞌnotërahuëꞌ naporini, co ina marëꞌ oshahuaintonahuëꞌ. Nani nicaponaracohuëꞌ, noꞌhuirinaco. Tata Yosëntaꞌ noꞌhuipi.

²⁵ Iráca Yosë quiricanënquë ninshitopi. ‘Topinan quëran noꞌhuirinaco,’ tënin ninshitaton. Iporasoꞌ naporinso chachin topinan quëran noꞌhuiarinaco.

²⁶ Yosëꞌpaꞌ pantahuato, Ispirito Santo aꞌpatimaranquëmaꞌ. Inasoꞌ achinicancanarinquëmaꞌ. Noꞌtëquënáchin nonin. Yosë quëran oꞌmarahuaton, piyapiꞌsaꞌ ayonquiarin. Nonahuëso chachin noꞌtëquën ayonquiarinquëmaꞌ.

²⁷ Canpitantaꞌ aꞌchinaramaꞌ aꞌnapitantaꞌ nohuitinacoso marëꞌ. Yaꞌnan aꞌchinahuë quëran huarëꞌ nohuitëramaco niꞌton, naporahuësoꞌ shaꞌhuitaramaꞌ.