Juan 11 - Chayahuita (Shahui)

Nasaro chimininsoꞌ

^1-2 Pitaniaquë aꞌna caniaꞌpi yaꞌhuërin, Nasaro itopisoꞌ. Catoꞌ oshinpita yaꞌhuëtërin, Maria, Marta inapita itopisoꞌ. Ina Maria aꞌna tahuëri Quisoso paꞌmorantëarin. Huaꞌsaiꞌ paꞌton nininsoquë paꞌmorantërahuaton, ainën quëran amirantërarin. Coꞌhuara inapoyátërasohuëꞌ, yoꞌin chiníquën caniorin.

³ Caniohuachina, oshinpitari piyapi aꞌpapi Quisoso shaꞌhuitacaso marëꞌ: —Nosororansoꞌ Sinioro, chiníquën caniorin. Huëcaton niꞌquiquëꞌ, itërin.

⁴ Ina natanahuaton, caꞌtanoꞌsanënpita itapon: —Tëhuënchachin yoꞌin chiníquën canioponahuëꞌ, co chiminacaso marëꞌ caniorinhuëꞌ. Noyatohuachin, naꞌa piyapiꞌsari nicatonaꞌ, naꞌcon naꞌcon Yosë yonquiapi. “Ma noyacha Yosësoꞌ niꞌton, anoyatërin paya,” tosapi. Cantaꞌ ina huiꞌninco niꞌton, noya niꞌsarinaco. Ina marëꞌ caniorin, itërin.

⁵ Nasaro, Marta, Maria, inapita paꞌpi nosororin.

⁶ Napoaponahuëꞌ, Nasaro caniorinsoꞌ natantaponahuëꞌ, catoꞌ tahuëri inaquë chachin iꞌhuataantarin.

⁷ Ina quëran caꞌtanoꞌsanënpitacoi itaponcoi: —Huëcoꞌ iyaroꞌsaꞌ Cotia parti paantaꞌahuaꞌ, itërincoi.

⁸ —Iꞌhuamiáchin Maistro, inaquë yaꞌhuëpisopita tëpainënquënso marëꞌ naꞌpiquë yatëꞌyarapirinënquënhuëꞌ, ¿inatohua chachin yapaantaran ti? itërai.

⁹ Napotohuatoira, Quisoso itaponcoi: —Shonca catoꞌ ora quëran iꞌhuarin. Tahuëri iratohuatëra, co iꞌparëhuëꞌ. Noya quënantatëꞌ, noya paꞌnëꞌ.

¹⁰ Tashiso nipirinhuëꞌ iratohuatëra, iꞌparëꞌ. Capa aꞌpininsoꞌ niꞌton, iꞌparëꞌ, itërincoi.

¹¹ Ina quëran itaantarincoi: —Iya Nasaro huëꞌërin. Nipirinhuëꞌ, paato ochinanconapo, itërincoi.

¹² —Huëꞌërin niꞌquëhuarëꞌ Sinioro, noyatapon, itërai.

¹³ Topinan huëꞌërin, topiraihuëꞌ. Nani chimininsoꞌ nitotaton, naporin.

¹⁴ Napoaton noꞌtëquën shaꞌhuitërincoi: —Nasaro nani chiminin.

¹⁵ Iꞌhuara aquëtëran co paatorahuëꞌ, co anoyatërahuëꞌ. Canpita naꞌcon naꞌcon natëamacoso marëꞌ isëquë ninarahuë. Inasoꞌ noya tënahuë. Iporaso nipirinhuëꞌ, huëcoꞌ inatohuaꞌ paꞌahuaꞌ, itërincoi.

¹⁶ —Huëcoꞌ iyaroꞌsaꞌ paꞌahuaꞌ canpoantaꞌ inarëꞌquënpoaꞌ chiminacaso marëꞌ, itërincoi Tomasë, catopiaꞌhua nininsoꞌ.

Quisosori ananpitaantacasoꞌ yonquirinsoꞌ

¹⁷ Napotohuachincoira, Pitaniaquë paꞌnai. Inaquë canconpiraihuëꞌ, nani Nasaro chiminin quënanconai. Nani catapini tahuëri naꞌpi naninquë yaꞌhuërin.

¹⁸ Pitaniasoꞌ Quirosarin yaꞌcariya yaꞌhuërin. Cara quiromitro pochin aquërin.

¹⁹ Naꞌa cotioroꞌsaꞌ nani huëꞌpi Marta, Maria, inapita achinicancanaponaꞌ. Yoꞌinaꞌ chimininso marëꞌ nontapi ama aquëtëꞌ sëtacaiso marëhuëꞌ.

²⁰ “Quisoso nani huëꞌsarin,” topachinara, Marta paꞌnin nacapiapon. Mariaso nipirinhuëꞌ pëinënquë yaꞌhuarin.

²¹ Quisoso nacapirahuaton, Martari itapon: —Iꞌhua Sinioro isëquë yaꞌhuëran naporini, co yoꞌyohuë chimiintonhuëꞌ.

²² Chiminpirinhuëꞌ, natëranquën Sinioro. Maꞌsona Yosë nipatan, acotarinquën, tënahuë, itërin.

²³ —Yoꞌyoparin nanpiantararin, itërin Quisosori.

²⁴ —Nanpiantacaso tahuëri nanihuachin, nanpiantararin, nitotërahuë, tënin Marta.

²⁵ —Cari ananpitaantarahuë. Casáchin nanpicasoꞌ quëtërahuë. Insopitasona natëhuachinaco, chiminaponaraihuëꞌ, nanpiantarapi.

²⁶ Natërinacosopita chiminpachinaꞌ, co parisitomiatapihuëꞌ. Co onporontaꞌ taꞌhuantapihuëꞌ. Noꞌtëquën nontaranquën. ¿Natëranco ti? itërin Quisosori.

²⁷ —Natëranquën mini Sinioro. Tëhuënchachin quëmasoꞌ Cristo. Yosë huiꞌninquën. Isoroꞌpaquë aꞌpaimarinquënsoꞌ, itërin.

Quisoso naꞌnërinsoꞌ

²⁸ Ina tosahuaton, Marta paꞌnin cain shaꞌhuitapon. Canconahuaton, sacaro quëran shaꞌhuitërin. —Nani Maistro huëꞌnin. Yanontërinquën, itërin.

²⁹ Ina natanahuaton, Maria aꞌnaroáchin huanirahuaton, nontapon paꞌnin.

³⁰ Quisososoꞌ co ninanoquë canshatërarinhuëꞌ. Martari nacapirinquë quëparitërin.

³¹ Maria manorahuachina, cotioroꞌsaꞌ huëꞌpisopitari niꞌsapi. “Naꞌpi naninquë naꞌnëapon paꞌsamara,” taꞌtonaꞌ imapi.

³² Mariasoꞌ Quisosoquë canconahuaton, nantën pirayan isonconin. —Iꞌhua Sinioro isëquë yaꞌhuëran naporini, yoꞌyohuë co chimiintonhuëꞌ, itërin.

³³ Ina tosahuaton, naꞌnërárin. Cotioroꞌsantaꞌ naꞌnërápi. Ina niꞌsahuaton, Quisoso chiníquën sëtaton, co napion cancantërin.

³⁴ —¿Insëquëtaꞌ poꞌmopi? itërin. —Huëquëꞌ Sinioro niꞌquiquëꞌ, itopi.

³⁵ Quisosontaꞌ naꞌnërin.

³⁶ Ina niꞌsahuatonaꞌ, cotioroꞌsaꞌ nitaponaꞌ: —Niꞌcoꞌ. Naꞌnërin antaꞌ. Paꞌpi nosororin inarintaꞌ, itopi.

³⁷ —Somaraya aꞌnaroáchin anoyarayatërin niꞌquëhuarëꞌ, ¿ina nohuanton Nasaronta co chimiintonhuëꞌ nimara ti? topi aꞌnaquën.

Nasaro ananpitaantarinsoꞌ

³⁸ Quisoso sëtaton, naꞌpi naninquë Nasaro poꞌmopiquë paꞌnin. Pancaraꞌpiquë nani paꞌcopitopi.

³⁹ —Naꞌpi chiꞌhuincacoꞌ, itërin Quisosori. —Coꞌ, Sinioro. Nani anarotarin. Nani catapini tahuëritërin, itërin oshini, Marta itopisoꞌ.

⁴⁰ —Ama imoya ina pochin yonquiquësohuëꞌ. Yosë yaꞌipiya nanitaparin. Natëhuatanco, Yosë nóya nininsoꞌ niꞌsaran, itërin.

⁴¹ Ina quëran naꞌpi chiꞌhuincatopi. Quisoso inápaquë nëꞌpëtahuaton, Yosë nontërin: —Nani Tata nontëranquën catahuancoso marëꞌ. Natanatonco, catahuaranco mini. Ina marëꞌ “Yosparinquën,” itëranquën.

⁴² Nani tahuëri natanatonco, catahuaranco noya nicaꞌhuaso marëꞌ. Quëma chachin isoroꞌpaquë aꞌpaimaranco. Casoꞌ nitotopirahuëꞌ, isopitasoꞌ co nitotopihuëꞌ. Inapita natëinacoso marëꞌ aꞌninquëchin nontaranquën, tënin.

⁴³ Ina tosahuaton, chimipi chiníquën itapon: —¡Iya Nasaro, pipirahuaton huëquëꞌ! itërin.

⁴⁴ Napotohuachina, chimipi nanpiantarahuaton, pipirin. Paꞌon, imirin, inapita nëꞌmëtërinquë yaꞌipi soꞌpinpinan pipirin. Yaꞌpiriontaꞌ panioquë tonporayatopinan. Cotioroꞌsaꞌ inachintopisoꞌ niꞌton, ina pochin poꞌmopi. —Iꞌquiritocoꞌ paꞌin, itërin Quisosori. Napotohuachina, iꞌquiritopi.

Quisoso macacaiso marëꞌ chinotopisoꞌ

⁴⁵ Cotioroꞌsaꞌ huëꞌpisopitantaꞌ niꞌpi. Ananpitaantarinsoꞌ niꞌsahuatonaꞌ, naꞌa natëpi. “Tëhuënchachin Yosëri catahuarin niꞌton, naporin,” topi.

⁴⁶ Aꞌnaquënso nipirinhuëꞌ paatonaꞌ, parisioroꞌsaꞌ shaꞌhuitonpi.

⁴⁷ Ina natanahuatonaꞌ, parisioroꞌsaꞌ, corto huaꞌanoꞌsaꞌ, inapita napopianáchin yonquiatonaꞌ, yaꞌipi cotio huaꞌanoꞌsaꞌ ayontonpi ninontacaiso marëꞌ. —¿Maꞌtaꞌ onpotahuaꞌ? Ina quëmapi naꞌa piyapiꞌsaꞌ aꞌnaroáchin anoyatarin. Iporantaꞌ aꞌna piyapi chiminpirinhuëꞌ, ananpitaantarin. “Yosëri chachin catahuarin,” topi.

⁴⁸ Tananpitohuatëhuaꞌ, yaꞌipi piyapiꞌsari natërapi. Napohuachinaꞌ, Noma copirno noꞌhuitaton, sontaroꞌsaꞌ aꞌpaiarin. Huëꞌpachinaꞌ, Yosë chinotërëhuaso pëiꞌ ohuatahuatonaꞌ, yaꞌipi cotioroꞌsanpoaꞌ ataꞌhuantarinënpoaꞌ nimara, nitopi.

⁴⁹ Ina quëran aꞌna corto huaꞌan Caihuasë itopisoari nontërin. Naporo piꞌiquë inasoꞌ, chini chiníquën nanantërin. Inaso huanirahuaton, tapon: —Canpitasoꞌ co mantaꞌ nitotëramahuëꞌ.

⁵⁰ Chiminacasoꞌ yaꞌhuërin, tënahuë. Ama yaꞌipinpoaꞌ chiminacaso marëhuëꞌ ina chimiꞌin. Ina noya noya canpoa marëꞌ, itërin.

⁵¹ Napoaponahuëꞌ, co inaora yonquinën quëran naporinhuëꞌ. Corto huaꞌan niꞌton, Yosë nohuanton, ninorin. Tëhuënchachin Quisoso cotioroꞌsa marëꞌ chiminarin.

⁵² Nipirinhuëꞌ, co cotioroꞌsa marëáchin chiminarinhuëꞌ. Yaꞌipi piyapiꞌsaꞌ yaꞌhuërënamën chiminarin. Natëhuachinaꞌ, Yosëri huiꞌninpita pochin niꞌsarin. Aꞌnaquën aquë yaꞌhuëpirinahuëꞌ, imapachinaꞌ, aꞌna huëntoíchin pochin nisapi.

⁵³ Naporo tahuëri quëran huarëꞌ cotio huaꞌanoꞌsaꞌ yonquipi Quisoso tëpacaiso marëꞌ.

⁵⁴ Napoaton Quisoso co huachi nohuantërinhuëꞌ aꞌninquëchin cotio ninanoroꞌsaquë paacasoꞌ. Inotëro parti pirayan paaton, Iprainquë yacapatarin. Inaquë caꞌtanoꞌsanënpitacointaꞌ yacapatonai.

⁵⁵ Pascoa tahuëri naniriahuachina, naꞌa piyapiꞌsaꞌ Quirosarinquë paꞌpi. Coꞌhuara Pascoa naniyátërasohuëꞌ, Yosë chinotopiso pëiquë paꞌpi. “Moisësë camaitërinsoꞌ nipatëhuaꞌ, Yosë noya niꞌsarinpoaꞌ,” taꞌtonaꞌ, paꞌpi.

⁵⁶ Inatohuaꞌ paꞌsahuatonaꞌ, Quisoso yonisápi. Chinotopiso pëiquë yaꞌconahuatonaꞌ, ninontápi. —Pascoa naꞌhuëcaso marëꞌ ¿Quisoso huëcapon to? topi aꞌnaquën.

⁵⁷ Corto huaꞌanoꞌsaꞌ, parisioroꞌsaꞌ, inapitasoꞌ nani piyapiꞌsaꞌ shaꞌhuitopi: “Quisoso quënanpatamaꞌ, shaꞌhuitocoi maii,” itopi. Tashinan pëiquë poꞌmocaiso marëꞌ napotopi.