Juan 10 - Chayahuita (Shahui)

Ohuicaroꞌsa pochin nininsoꞌ

¹ Ina quëran Quisosori aꞌchintaantarin. —Ohuicaroꞌsa naporin quëran aꞌchinchinquëmaꞌ natancoꞌ. Ohuicaroꞌsaꞌ aꞌpaicaiso marëꞌ pairapipi. Aꞌnaíchin yaꞌcoana yaꞌhuërin. Aꞌnaquën huëcaton, co yaꞌcoana quëran yaꞌconinhuëꞌ. Nanpërahuaton, yaꞌconin. Inasoꞌ co huaꞌanënhuëꞌ. Ihuatëꞌ, matararo, inapita ina pochin yaꞌconpi ohuica ihuatacaiso marëꞌ.

² Huaꞌanënso nipirinhuëꞌ yaꞌcoana quëran yaꞌconahuaton, ohuicanënpita aꞌpairin.

³ Ina huëꞌpachina, yaꞌcoana aꞌpainaꞌpiri nohuitaton, iꞌsoatërin. Ohuicanënpitarintaꞌ natanahuatonaꞌ, nohuianantopi. Aꞌnaya aꞌnaya nininën përapachina, co tëꞌhuatatonahuëꞌ, aꞌnaroáchin huëꞌpi. Huëꞌpachinara, quëparin panpatëroꞌ capacaiso marëꞌ.

⁴ Ohuicanënpita quëpahuachina, quëchitërarin. Noninsoꞌ nohuianantatonaꞌ, imapi huachi.

⁵ Nisha piyapiri yaquëpahuachina, co yaimapihuëꞌ. Co noninsoꞌ nohuianantatonahuëꞌ, taꞌananpipi, itërin Quisosori.

⁶ Iso pënënto nanan shaꞌhuitopirinhuëꞌ, co nitotopihuëꞌ. —¿Maꞌtaꞌ tapon naporin? itopi.

Quisososoꞌ ohuica huaꞌanën pochin ninin

⁷ Napoaton itaantarin: —Tëhuënchachin casoꞌ yaꞌcoana pochin ninahuë. Ohuica pairapipiquë yayaꞌconpatëra, yaꞌcoana quëran yaꞌconëꞌ.

⁸ Coꞌhuara huëꞌshatërasocohuëꞌ, naꞌa piyapiꞌsaꞌ aꞌchinpirinahuëꞌ, inapitasoꞌ ihuatëroꞌsa pochin nipi. Anishacancantacaiso marëꞌ aꞌchinpi. Imarinacosopitaso nipirinhuëꞌ, co inapita natëpihuëꞌ.

⁹ Casáchin yaꞌcoana pochin ninahuë. Ca quëran yaꞌconpatamaꞌ, chaꞌësaramaꞌ. Ohuicaroꞌsaꞌ pipirahuatonaꞌ, noya coshatopi. Ina quëran yaꞌcoantapi. Inapochachin imarinacosopita noya paꞌsapi.

¹⁰ Ihuatëroꞌsaꞌ co noyahuëꞌ yonquipi. Ihuatacaisoꞌ, tëpatacaisoꞌ, ataꞌhuantacaiso inapita nicacaisoráchin yonquipi. Caso nipirinhuëꞌ oꞌmarahuë imarinacosopita Yosë nohuitacaiso marëꞌ. Noya noya nanpicaiso marëꞌ oꞌmarahuë.

¹¹ Casoꞌ ohuica huaꞌanën pochin ninahuë. Imarinacosopita noya aꞌpairahuë. Huaꞌanën noya nipachina, ohuicanënpita aꞌpaiton, co chiminacasoꞌ tëꞌhuatërinhuëꞌ. Inapochachin cantaꞌ imarinacosopita marëꞌ chiminarahuë.

¹² Inpriatoso nipirinhuëꞌ, paꞌpiniꞌ huëꞌpachina, ohuicaroꞌsaꞌ taꞌananpirin. Paꞌpiniri aꞌnaraꞌ macasoꞌ, yaꞌipi ohuicaroꞌsaꞌ yanquëëpi. Inpriatosoꞌ co huaꞌanënhuëꞌ niꞌton, co ohuicaroꞌsaꞌ paꞌpoyatërinhuëꞌ.

¹³ Canacaso marëáchin sacatërin niꞌton, co inapita yonquiatonhuëꞌ, taꞌananpirin.

¹⁴ Caso nipirinhuëꞌ noya huaꞌanën pochin ninahuë. Imarinacosopita nohuitërahuë. Cantaꞌ nohuitërinaco.

¹⁵ Tatahuërëꞌco ninohuitëraiso pochin nohuitërahuë. Nosoroato, inapita marëꞌ chiminarahuë.

¹⁶ Aꞌnapita piyapiꞌsantaꞌ oshaquëran imasarinaco. Nisha piyapiroꞌsaꞌ niponaraihuëꞌ, yaimarinaco. Inapitantaꞌ nohuantërahuë imainacoso marëꞌ. Aꞌchintacasoꞌ yaꞌhuërin. Nanamëhuë natanpachinaꞌ, natëarinaco. Yaꞌipi imarinacosopita aꞌna huëntoínchin nisapi. Carisachin huaꞌanëntarahuë.

¹⁷ Imarinacosopita yonquiato, casoꞌ chiminarahuë noya noya nanpiantaꞌhuaso marëꞌ. Napoaton Tatahuë nosororinco.

¹⁸ Caora nohuanto, imarinacosopita marëꞌ chiminarahuë. Co nohuantërahuëꞌ naporini, co tëpainacosoꞌ nanichitonahuëꞌ. Tatahuë shaꞌhuitërinco niꞌton, chiminaꞌhuasoꞌ nohuantërahuë. Ina nohuanton, nanpiantararahuë huachi, itërin.

¹⁹ Ina natanahuatonaꞌ, cotioroꞌsaꞌ nisha nisha yonquipi.

²⁰ —Sopairi nani yaꞌcoancantërin niꞌton, huaꞌyantërin. ¿Maꞌmarëta natanamaꞌ? topi aꞌnaquën.

²¹ Aꞌnaquëniso nipirinhuëꞌ noya natanpi. —Co sopairi yaꞌcoancantërinhuëꞌ. Noya aꞌchintërinpoaꞌ. Huaꞌyantonaꞌpisoꞌ co ina pochin noninhuëꞌ. ¿Sopaintaꞌ taꞌmaꞌ somaraya anoyarayatacasoꞌ nanichitonhuëꞌ ti? topi.

Cotioroꞌsaꞌ co Quisoso nohuantopisohuëꞌ

²² Ina quëran aꞌna cotio niyontonpiso tahuëri naniantarin. Naporoꞌ Yosë chinotopisoꞌ pëiꞌ iráca anoyataantapisoꞌ yonquiatonaꞌ, “Yosparinquën Sinioro,” itopi. Ina marëꞌ naꞌa piyapiꞌsaꞌ Quirosarinquë paꞌsapi. Quisosontaꞌ Yosë chinotopisoꞌ pëiquë paꞌnin. Oꞌnapi tahuëri niꞌton,

²³ ishpanamën pochin nininquë paꞌsarin, inaso “ishpana, Saromon ishpananën,” itopi nohuitatonaꞌ.

²⁴ Naꞌa cotioroꞌsaꞌ canquirahuatonaꞌ, Quisoso ahuancanapipi. —Naꞌaroꞌ natanpirainquënhuëꞌ, ¿onporo huarëtaꞌ shaꞌhuitaponcoi? Quëmasoꞌ Cristonquën nipatan, noꞌtëquën shaꞌhuitocoi nitochii, itopi.

²⁵ —Nani shaꞌhuitopiranquëmahuëꞌ, co yanatëramacohuëꞌ. “Tata Yosë chachin catahuarinco,” taꞌto, sacaiꞌ nininsoꞌ ninahuë canpita nohuitamacoso marëꞌ.

²⁶ Nipirinhuëꞌ, canpitasoꞌ co ohuicanëhuë pochin ninamahuëꞌ niꞌton, co natëramacohuëꞌ.

²⁷ Casoꞌ ohuica pëꞌtahuanaꞌpi pochin ninahuë. Imarinacosopita ohuicanëhuëpita pochin niꞌnahuë. Nohuitërahuë. Noya nataninaco. Nontohuatëra, natëtonaco, imarinaco.

²⁸ Ca nohuanto, nanpimiatapi. Co parisitopiquë paꞌsapihuëꞌ. Noya aꞌpaiarahuë. Co insontaꞌ osërëtarinacohuëꞌ.

²⁹ Tata Yosë nohuanton, imarinaco. Inasoꞌ chini chiníquën nanantërin. Co insontaꞌ nanitërinhuëꞌ Yosë quëran osërëcaisoꞌ.

³⁰ Caso Tatahuëroꞌco napopináchin cancantërahuë, itërin Quisosori.

³¹ Ina natanahuatonaꞌ, naquëranchin naꞌpiroꞌsaꞌ maantapi. Tëpacaiso marëꞌ maantapirinahuëꞌ,

³² Quisosori itaantarin: —Tata Yosë shaꞌhuitërinco niꞌton, naꞌa piyapiꞌsaꞌ anoyatërahuë: ¿Insota anoyatërahuëso marëꞌ naꞌpiquë yatëparamaco? itërin.

³³ —Co ina marëꞌ naꞌpiquë yatëparainquënhuëꞌ. Yosë pinoranso marëꞌ napotarainquën. Quëmasoꞌ piyapinquën niponahuëꞌ, “Casoꞌ Yosëco,” toconan. Ina pochin nonan niꞌton, Yosë yayaꞌhuërëtëran, itopi.

³⁴ Napotohuachinara, itantarin: —Yosë pënëntërinsoꞌ quiricaquë nani ninshitopi: “Canpitasoꞌ aꞌnaya aꞌnayanquëmaꞌ Yosë pochin ninamaꞌ,” tëninsoꞌ nontëramaꞌ.

³⁵ Yosëri chachin huaꞌanoꞌsaꞌ acorinsoꞌ yonquiaton, napotërin. Yaꞌipi Yosë quiricanënsoꞌ noꞌtëquën. Co piꞌpisha tërantaꞌ nonpininhuëꞌ.

³⁶ Tata Yosë chachin acorinco nanamën aꞌchinaꞌhuaso marëꞌ. Ina marëꞌ isoroꞌpaquë aꞌpaimarinco. “Casoꞌ Yosë huiꞌninco,” topatëra, ¿onpoatontaꞌ ina marëꞌ pinoramaco? tënahuë.

³⁷ Co tatahuë pochin nipatohuëꞌ, ama natëcosohuëꞌ

³⁸ Co yanatëpiramacohuëꞌ, nani maꞌsha Yosë pochin ninahuë niꞌton, natëco. Ina quëran nitotarama Tata Yosë pochachin ninahuësoꞌ. Tata Yosëntaꞌ ca pochachin ninin, itërin.

³⁹ Ina natanahuatonaꞌ, naquëranchin tashinan pëiquë poꞌmocaiso marëꞌ yamaantapirinahuëꞌ, chaꞌërin.

⁴⁰ Ina quëran Cortaniiꞌ aquëtëran paantarin. Iꞌhua Coansha piyapiꞌsaꞌ aporintërinquë yaꞌhuërarin.

⁴¹ Naꞌa piyapiꞌsaꞌ ina nicaponaꞌ paꞌpi. Ina niꞌsahuatonaꞌ, ninontopi. —Coanshasoꞌ co piyapiꞌsaꞌ aꞌnaroáchin anoyatopirinhuëꞌ, noꞌtëquën shaꞌhuitërinpoaꞌ. “Quisososoꞌ Yosëri aꞌpaimarinsoꞌ,” itohuachinpoara, noꞌtëquën nonin, nitopi.

⁴² Naꞌa piyapiꞌsaꞌ inaquë paatonaꞌ, Quisoso natërapi.