Josué 6 - Chayahuita (Shahui)

Quirico ninano ahuëcaiso marëꞌ Siniorori anitotërinsoꞌ

¹ Quiricoroꞌsasoꞌ, ninano yaꞌcoanaroꞌsa noyá oncotopi. Ama israiroꞌsari yaꞌcontatona ahuëcaiso marëhuëꞌ napopi. Napoaton co insonta pipirinhuëꞌ, co insonta yaꞌconinhuëꞌ.

² Napoaponahuëꞌ, Siniorori Cosoi itapon: “Quirico ninano ataꞌhuantacaso marëꞌ carinquën catahuaranquën. Copirnonënaꞌ, sontaronënpita, inapita minsëaramaꞌ.

³ Quëmasoꞌ sontaronënpitarëꞌquën chachin ninano tahuitëquëꞌ. Nani tahuëri aꞌnaroraꞌ tahuitocoꞌ. Inapochináchin saota tahuëri naniin.

⁴ Iso pochin paꞌsaramaꞌ: Canchisë corto huaꞌanoꞌsa quëchinamën paꞌsapi. Carniro pomon sëꞌquërahuatona paꞌsapi. Ina piquëran canpitarëꞌco anoyatërëhuaso caposonën quëparapi. Corto huaꞌanoꞌsari pitënpi quëran quëparapi. Ina piquëran Israiro sontaroꞌsanta paꞌsapi. Canchisë tahuëri nanihuachinasoꞌ, canchisëro tahuitaramaꞌ. Corto huaꞌanoꞌsa papona pochin carniro pomon pihuisoi tahuitaramaꞌ.

⁵ Canchisëroꞌ tahuitëramaso nanisëma chachin, pomonoꞌsa nisha pihuirapi huachi. Naporo canpitasoꞌ, chiníquën ‘yai,’ tocoꞌ. Naporo chachin ninano pairanën nohuatapon. Nohuatohuachina, notëtërama quëran chachin ninano yaꞌcontatoma ahuëcoꞌ,” itërin.

⁶ Napotohuachina Cosoisoꞌ corto huaꞌanoꞌsa përarin. Huëꞌpachinara itapon: “Canchisë yaꞌpima carniro pomon sëꞌquëramaquëran quëchitocoꞌ. Ina piquëran aꞌnapitanquëmantaꞌ, Siniororëꞌquënpoa anoyatërëhuaso caposonën quëpacoꞌ,” itërin.

⁷ Israiro sontaroꞌsanta Cosoiri itapon: “Paatoma ninano tahuitocoꞌ. Ahuëtai marëꞌ noyá niacoatona quëchitopisopitaꞌton, quëchichinaꞌ. Ina piquëran carniro pomon quëpapisopita paꞌinaꞌ. Ina piquëran Sinioro caposonën quëpapisopitanta imachinaꞌ,” itërin.

^8-9 Israiroꞌsasoꞌ, Cosoi camaitërinso chachin yaꞌipiya quëran nisapi. Ahuëtai marëꞌ noyá niacoatona quëchitopisopitaꞌton, quëchitaponaꞌ. Ina piquëran carniro pomon quëpapisopita pomontërëꞌnachin paponaꞌ. Sinioro caposonën quëpapisopitantaꞌ, imataponaꞌ. Piquëran huarëꞌ aꞌnapita Israiro sontaroꞌsanta paponaꞌ.

¹⁰ Coꞌhuara Israiro sontaroꞌsa ninano tahuichátërasoihuëꞌ, Cosoiri nani camairin: “Taꞌtatoma canpitaso pacoꞌ. Cariima camaiaꞌhuanquëma huarëꞌ chiníquën ‘¡yai!’ taramaꞌ,” itërin.

Quirico ninano ataꞌhuantopisoꞌ

¹¹ Cosoi camaitohuachina, Corto huaꞌanoꞌsaso Sinioro caposonën pitënpi quëran, aꞌnaroraꞌ ninano tahuitopi. Nani tahuitahuatonaꞌ, naquëranchin yaꞌhuëapiquë paantapi. Tashi nipachina huëꞌëcaiso marëꞌ inaquë paantapi.

¹² Tahuëririnquë tashíramiachin Cosoisoꞌ capayataantarin. Yaꞌipi israiroꞌsanta capayatopi. Corto huaꞌanoꞌsantaꞌ, Sinioro caposonën maantarahuatona pitëantapi.

¹³ Ahuëtai marëꞌ noyá niacoatona quëchitopisopita, quëchitopi. Ina piquëran carniro pomon quëpapisopita pomontërëꞌnachin paꞌantapi. Ina piquëran Sinioro caposonën quëpapisopitanta paꞌsapi. Piquëran huarëꞌ aꞌnapita Israiro sontaroꞌsanta paꞌsapi.

¹⁴ Naporonta aꞌnaroraꞌ ninano tahuitaantapi. Inarë nani catoro tahuitapi. Nani tahuitahuatonaꞌ, naquëranchin yaꞌhuëapiquë paantapi. Saota tahuëri inaposápi.

¹⁵ Canchisë tahuëri nanihuachina, tashiyachin huënsëintapi. Nani tahuëri napopiso chachin naquëranchin ninano tahuitaantapi. Ina tahuëriso napoaponahuëꞌ, canchisëroꞌ tahuitopi.

^16-20 Canchisëroꞌ tahuitopiso nanisoi chachin, corto huaꞌanoꞌsa pomontaantapi. Pomontasoiꞌ, Cosoisoꞌ sontaroꞌsa camairin: “Iso ninanoquë yaꞌhuëpisopita, maꞌshanënapitarë chachin ataꞌhuantomiatamaso yaꞌhuërin. Pëiroꞌsanta ohuatamaso yaꞌhuërin. Sinioro ina pochin camaitërin niꞌton, inapotamaso yaꞌhuërin. Monshihuantë sanapi Nacapa itopisosoꞌ, nosorocoꞌ. Ina nisahuaton pëinënquë yaꞌhuëapisopitantaꞌ, nosorocoꞌ. Inari nëhuëtonaꞌpiroꞌsa aꞌparahuëso poꞌorin niꞌton, nosorocoꞌ. Niꞌcona ina ninanoquë maꞌsha yaꞌhuërinsoꞌ, canpitaora marëꞌ matamaꞌ. Nani inaso Sinioro camairinquëmaꞌ, ataꞌhuantamasoꞌ. Co ina natëtomarahuëꞌ mapatamasoꞌ, yaꞌipinpoa ama huachi noya yaꞌhuëcaso marëhuëꞌ shaꞌhuitatonpoa anaꞌintarinpoaꞌ. Oro, prata, inapitaso nipirinhuëꞌ, macatëhua Sinioro marëꞌ paꞌton nipisopita tapapiquë, acoarihuaꞌ. Shaꞌpi huaꞌna, huaꞌnamia inaquëranpita maꞌsha nipisonta macatëhuaꞌ, inapotarihuaꞌ,” tënin. Camaitërinso toquitohuachina corto huaꞌanoꞌsasoꞌ, pihuimiatopi huachi. Naporoꞌ Cosoisoꞌ: “Yai toco huachi,” tënin. Ina natanatonaꞌ, Israiro sontaroꞌsasoꞌ chiníquën: “¡Yaiii!” topi. Napohuachinara, ninano pairanën inápa nipirinhuëꞌ nohuatërin. Naporoꞌ israiroꞌsasoꞌ, notëtopi quëran chachin ninano yaꞌcontatona ahuëpi.

²¹ Sahuëni quëran ahuërahuatona quëmapiꞌsaꞌ, sanapiꞌsaꞌ, huiꞌnapiꞌsaꞌ, mashoyaroꞌsaꞌ, inapita tëpapi. Tororoꞌsaꞌ, ohuicaroꞌsaꞌ, moraroꞌsaꞌ, inapitanta tëpapi. Yaꞌipi ataꞌhuantopi. Nacapa, quëmopinënpita, inapitaíchin chaꞌëpi.

²² Cato nëhuëtonaꞌpiroꞌsa iꞌhua aꞌparinsopita, Cosoiri itantapon: “Monshihuantë sanapi pëinënquë paꞌsahuatomaꞌ, ocoicontacoꞌ. Yaꞌipi quëmopinënpitarë chachin ocoicoꞌ. Yoscoarëꞌ taꞌtoma shaꞌhuitëramaso chachin nitoncoꞌ,” itërin.

²³ Napotohuachina, inapitaso paꞌsahuatona ocoiconpi. Paꞌpin, aꞌshin, yoꞌinpita, cainpita, inapitanta ocoiconpi. Aꞌnapita áquë quëmopinënpitanta ocoiconpi. Yaꞌipi inapita ocoirahuatonaꞌ, yaꞌhuëapi aquëcha acoonpi. Ama maꞌsha onpotacaiso marëhuëꞌ inaquë acopi.

²⁴ Ina quëran israiroꞌsasoꞌ, ninanoquë oro, prata, inapita mapi. Shaꞌpi huaꞌna, huaꞌnamia, inapita quëran maꞌsha nipisopitanta mapi. Inapita macatona Sinioro marëꞌ paꞌton nipisopita tapapiquë acopi. Nani inapita mapachinara, ninanoquë pëiroꞌsa yaꞌhuërinso yaꞌipi ahuiquitopi.

²⁵ Nacapa, quëmopinënpita, inapitaso nipirinhuëꞌ, co Cosoiri atëpatërinhuëꞌ. Quirico ninano nëhuëcaiso marëꞌ aꞌparinsopita catahuarinso marëꞌ co atëpatërinhuëꞌ. Naporo quëran huarëꞌ Nacapa quëran pipipisopitasoꞌ, israiroꞌsa yacapapi huachi.

²⁶ Ina quëran Cosoisoꞌ, iso pochin shaꞌhuirin: “Inso tëranta Quirico ninano anoyataantahuachin, Siniorori chachin ama huachi noya yaꞌhuëcaso marëhuëꞌ shaꞌhuitaton anaꞌinchin. Simintonën acoasoꞌ, huiꞌnin paninatërinsoꞌ chimiin. Ninano pairapipisoꞌ yaꞌcoanaroꞌsanta acoasoꞌ, huiꞌnin huinsho nininsoꞌ yaꞌhuërëꞌ chimiantaꞌin. Yoscoarëꞌ inapoarin,” tënin.

²⁷ Shaꞌhuitërinso chachin Siniorori Cosoi catahuarin. Napoaton yaꞌipi ina parti yaꞌhuëpisopita, Cosoi chiníquën nanantërinsoꞌ natantopi.